«Müqəddəs Kitab öyrədir» kitabından istifadə edərkən Böyük Müəllimi təqlid et
1. İsa necə öyrədirdi?
1 Böyük Müəllim İsa Məsih fikrini həmişə sadə və aydın şəkildə izah edirdi. Dinləyiciləri düşünməyə təşviq etmək üçün çox vaxt onların fikrini soruşurdu (Mat. 17:24-27). İsa insanların diqqətini birbaşa Allahın Kəlamına yönəldirdi (Mat. 26:31; Mark 7:6). O, şagirdlərinə mənimsəyə biləcəklərindən artıq mə’lumat vermirdi (Yəh. 16:12). İsa, həmçinin şagirdlərin tə’limləri başa düşüb-düşmədikləri, onlara inanıb-inanmadıqları ilə maraqlanırdı (Mat. 13:51). «Müqəddəs Kitab öyrədir» kitabı bizə İsa kimi öyrətməyə kömək edir.
2. Giriş suallardan necə istifadə edə bilərik?
2 Giriş suallar. Yeni fəslə başlamazdan əvvəl, yaxşı olardı ki, fəslin adının altındakı giriş suallara diqqət yetirəsən. Öyrənən adamda iştaha oyatmaq üçün bu sualları ritorik şəkildə səsləndir. Yaxud da ondan bu suallara qısa cavab verməsini xahiş et. Onun şərhlərini uzun-uzadı müzakirə etməyə və ya dediyi hər bir səhv fikri düzəltməyə ehtiyac yoxdur. Fikirlərinə görə minnətdarlığını bildir və fəslin müzakirəsinə başla. Giriş suallara verdiyi cavablardan sən artıq biləcəksən ki, fəslin hansı hissələrinin üstündə xüsusilə dayanmaq lazımdır.
3. Öyrənməni necə sadə keçirə bilərik?
3 Ayələr. Öyrənmə zamanı əsas diqqəti Müqəddəs Kitab ayələrinə yönəltmək lazımdır (İbr. 4:12). Bununla belə, hər ayəni açıb oxumağa ehtiyac yoxdur. Diqqəti imanımızın nəyə əsaslandığını göstərən ayələrə yönəlt. İkinci dərəcəli mə’lumat daşıyan ayələri oxumamaq da olar. «Müqəddəs Kitab öyrədir» nəşrində həqiqət sadə yolla izah edilir. Çalış öyrənməni sadə keçir. Əsas məqamlara diqqət yetir və fikirləri çox da xırdalama. Zərurət yoxdursa, əlavə mənbələrdən mə’lumat gətirmə.
4. Öyrənmə zamanı «Əlavələr»dəki mə’lumatı nəzərdən keçirib-keçirməyəcəyimizi necə müəyyən edə bilərik?
4 Əlavələr. «Əlavələr» bölməsində fəsilləri tamamlayan 14 mövzu var. Öyrənmə zamanı bu mövzuları müzakirə edib-etməmək öz ixtiyarına buraxılır. Əgər öyrənən adam fəsildəki mə’lumatı başa düşüb və ona inanırsa, onda təşviq et ki, əlavə mə’lumatı özü oxusun. Məsələn, əgər öyrənən, İsanın Məsih olduğuna onsuz da inanırsa, onunla «İsa Məsih haqqında həqiqət» adlanan 4-cü fəsli öyrənərkən «Əlavələr»dəki «İsa və’d edilmiş Məsihdir» mövzusunu nəzərdən keçirməyə ehtiyac yoxdur. Digər hallarda isə, öyrənmə zamanı əlavə mə’lumatı və ya onun bir hissəsini araşdırmaq faydalı ola bilər.
5. «Əlavələr»dəki mə’lumatı necə müzakirə etmək olar?
5 Əgər əlavə mə’lumatı nəzərdən keçirməyi qərarlaşdırmısansa, əvvəlcədən suallar hazırla və fəsilləri müzakirə etdiyin kimi, əlavə mə’lumatı da abzas-abzas araşdır. Amma bə’zi hallarda, «Əlavələr»dəki mə’lumatı nəzərdən keçirmək üçün öyrənmə zamanı bir neçə dəqiqə ayırmaq kifayətdir. Bununla sən, öyrənənin şəxsən oxuduğu əlavə materialı başa düşüb-düşmədiyini görəcəksən.
6. Təkrar üçün çərçivədən necə istifadə etmək olar?
6 Təkrar üçün çərçivə. Hər fəslin sonunda verilmiş çərçivədəki bəndlər çox vaxt giriş sualların cavablarına müvafiq gəlir. Fəslin əsas fikirlərini təkrarlamaq üçün çərçivədən istifadə edə bilərsən. Bə’zi təbliğçilər hər bəndi oxuyub müvafiq ayələri açmağın faydalı olduğunu görüblər. Sonra öyrənəndən xahiş edirlər ki, ayənin, əsas fikri necə açıqladığını qısaca söyləsin. Bu, öyrənənin fəslin əsas fikirlərini və onların Müqəddəs Kitaba əsaslandığını anlayıb-anlamadığını, həmçinin öyrəndikləri ilə razı olub-olmadığını görməyə kömək edir. Bunun sayəsində, o həmçinin Müqəddəs Kitabın köməyi ilə həqiqəti başqalarına izah etməyi də öyrənir.
7. Şagird hazırlamaq tapşırığını yerinə yetirmək üçün «Müqəddəs Kitab öyrədir» nəşrindən necə istifadə edə bilərik?
7 İnsanları öyrətmək və şagird hazırlamaq tapşırığını yerinə yetirməyin ən əlverişli üsulu, İsanın həqiqəti öyrətmək metodlarından istifadə etməkdir (Mat. 28:19, 20). «Müqəddəs Kitab öyrədir» nəşri bu işdə bizə kömək olacaq. Həqiqəti insanlara sadə, aydın və maraqlı yolla çatdırmaq üçün bu kitabdan istifadə et.