Gənclər, hansı ruhani məqsədləriniz var?
1 Yehova xoşbəxtliyə nail olmaq üçün faydalı işin və real məqsədlərin nə qədər vacib olduğunu yaxşı bilir (Yaradılış 1:28; 2:15, 19 ayələrinə bax.) Bu gün Yehova Öz xalqına təbliğ etmək və öyrətmək tapşırığını verib. Bundan əlavə, bizim yekun məqsədimiz — Cənnətdə əbədi həyata nail olmaqdır. Amma gücümüzü və bacarıqlarımızı boş yerə sərf etmək istəmiriksə, inkişafımıza kömək edəcək ruhani məqsədlər qoymalıyıq (1 Kor. 9:26).
2 Gənclər üçün real məqsədlər. Yaxşı olardı ki, gənclər öz bacarıqlarını nəzərə alaraq əlçatan teokratik məqsədlər qoysunlar (1 Tim. 4:15). Bəzi uşaqlar hələ oxumağı öyrənməmişdən əvvəl Müqəddəs Yazılarda olan kitabların adını əzbərdən deməyi öyrənmişlər. Ailəvi ibadət zamanı uşaqlar görüşlərə hazırlaşmağı öyrənirlər, belə ki, onlar yığıncaqda maraqlı cavablar verməyi və Teokratik Xidmət Məktəbinə yazılmağı məqsəd qoya bilərlər. Uşaqlar valideynləri ilə xidmətə gedəndə onlar şahidlik etməyi öyrənirlər və bununla da vəftiz olunmamış təbliğçi olmaq məqsədinə doğru irəliləyirlər. Valideynlər uşaqların diqqətini həsr olunub vəftiz olmaq məqsədinə yönəltməlidirlər.
3 Əgər sən yeniyetməsənsə, qarşına hansı ruhani məqsədlər qoymusan? Həyatda həqiqətən də dəyərli məqsədlər qoymaqla «səni Yaradanı xatırla» (Vaiz 12:1; Məz. 71:17). Nəyə görə tətil olan aylarda köməkçi pioner kimi xidmət etməyəsən? Heç daimi pioner olub tammüddətli xidmət haqda düşünmüsən? Bəs xarici dil öyrənib gələcəkdə sizin ərazinizdə və ya başqa bir yerdə əcnəbidilli qrupda, yaxud yığıncaqda xidmət etmək haqqında necə, düşünmüsən? İndi Bet-Eldə xidmət edən, səyyar nəzarətçisi, yaxud missioner olan bacı-qardaşların əksəriyyəti hələ məktəbdə oxuyarkən qarşılarına tammüddətli xidmət etmək məqsədini qoymuşlar. Nəyə gərə sən də belə etməyəsən?
4 Yeniyetmə olsan da, İsanın nümunəsini izləməyə çalış. O, cəmi on iki yaşı olanda ruhani mövzular haqqında sərbəst danışırdı (Luka 2:42—49, 52). Qarşına şəxsi öyrənmə keçirmək, Müqəddəs Kitabı hər gün oxumaq, yetkin məsihçilərlə yığıncaqda və xidmətdə müntəzəm əməkdaşlıq etmək kimi faydalı məqsədlər qoysan, İsa kimi, başqalarına Padşahlıq haqqında daha məharətlə öyrətməyi bacaracaqsan.