Ehtiyat təbliğçinin yaraşığıdır
1. Nəyə görə təbliğ xidmətində ehtiyatlı olmaq vacibdir?
1 «Pozğun və əxlaqsız nəslin içində» təbliğ edən Allahın xidmətçiləri, sanki, «canavarlar arasına quzu kimi» göndəriliblər (Mat. 10:16; Filip. 2:15). Dünyanı bürüyən iğtişaşların, kütləvi hücumların və insan oğurluğu kimi amansız cinayətlərin artması barədə ardı-arası kəsilməyən məlumatlar pis insanların «daha da pis işlər» gördüklərinə dəlalət edir (2 Tim. 3:13). Hansı Müqəddəs Kitab prinsipləri xidmətdə «ehtiyatlı» olmağa bizə kömək edə bilər? (Mat. 10:16).
2. Hansı vəziyyətlərdə təbliğ etdiyimiz ərazini tərk edib xidmətimizi başqa yerdə davam etdirmək məsləhətdir?
2 Uzaqgörən olun. Süleymanın məsəlləri 22:3 ayəsində vurğulanır ki, təhlükədən qaçmaq müdrik hərəkətdir. Ehtiyatı əldən verməyin! Təhlükəsizliyin hökm sürdüyü ərazidə vəziyyət gözlənilmədən dəyişə bilər. Ola bilsin, siz də küçələrdə polislərin fəaliyyətinin artmasının və ya insanların kütləvi şəkildə toplaşmasının şahidisiniz. Bəzən hansısa ev sahibi yaxşı niyyətdən irəli gələrək təhlükə barədə bizi xəbərdar edir. Belə hallarda maraq xatirinə həmin ərazidə qalmaq əvəzinə, oranı dərhal tərk edib xidmətimizi başqa yerdə davam etdirmək uzaqgörənlik əlaməti olardı (Sül. məs. 17:14; Yəh. 8:59; 1 Salon. 4:11).
3. Vaiz 4:9 ayəsindəki prinsip xidmətimizlə necə bağlıdır?
3 Əməkdaşlıq edin. Vaiz 4:9 ayəsində deyilir: «İki adam bir adamdan yaxşıdır». Ola bilsin, siz tək xidmət etməyi adət etmisiniz və indiyədək başınıza bir iş gəlməyib. Bəs indi də belə etmək təhlükəsizdirmi? Bəzi yerlərdə təhlükəsizdir. Lakin digər yerlərdə bacının və ya gənc təbliğçinin sahəni təkbaşına işləməsi (xüsusilə də günbatandan sonra) təhlükəlidir. Təcrübə göstərir ki, yanımızda diqqətli əməkdaşın olmasının yerini heç nə verə bilməz (Vaiz 4:10, 12). Əgər qrup şəklində təbliğ edirsinizsə, sizinlə birgə xidmət edən təbliğçilərin də təhlükəsizliyini düşünün. Sahəni tərk edəndə çalışın, həmişə onlara bu barədə xəbər verəsiniz.
4. Bütün yığıncağın təhlükəsizliyini təmin etmək üçün nə etmək olar?
4 Rifahınızı düşünən ağsaqqalların yerli ərazinin tələbatına uyğun göstərişlər vermək məsuliyyəti var (İbr. 13:17). Əmin ola bilərik ki, əgər biz bir məsihçi kimi təvazökarlıq təzahür etdirir və onlarla tam əməkdaşlıq ediriksə, Yehova xeyir-duasını bizdən əskik etməyəcək (Mik. 6:8; 1 Kor. 10:12). Gəlin təyin olunmuş ərazimizdə səmərəli şahidlik vermək işinə öz töhfəmizi verərək ehtiyat tədbirlərini heç vaxt yadımızdan çıxartmayaq!