Müqəddəs Kitabı öyrənmək istəyənləri tapmağın beş üsulu
1. Əgər yaşadığımız ərazidə Müqəddəs Kitabı öyrənmək istəyən insanları tapmaq çətindirsə, nə etməliyik və nəyə görə?
1 Sənin üçün Müqəddəs Kitabı öyrənmək istəyən insanları tapmaq çətindirmi? Bunun üçün əlindən gələni et. Yehova Onun iradəsini yerinə yetirməkdən yorulmayan insanları xeyir-dualandırır (Qalat. 6:9). Aşağıda bu sahədə bizə kömək edəcək beş məsləhət müzakirə olunur.
2. İnsanlara Müqəddəs Kitabı öyrənməyi necə təklif edə bilərik?
2 Birbaşa təklif. Çoxları bilir ki, biz «Gözətçi qülləsi» və «Oyanın!» jurnallarını təklif edirik. Amma, ola bilsin, onlar Müqəddəs Kitabı öyrənməyi təklif etdiyimizdən bixəbərdirlər. Buna görə də evdən-evə təbliğ edərkən niyə də birbaşa öyrənmə təklif etməyəsən? Həmçinin təkrar baş çəkdiyin insanlardan Müqəddəs Kitabı öyrənmək istəyib-istəmədiklərini soruşa bilərsən. Əgər razılaşmasalar, onda onlara ədəbiyyat gətirməyə və maraqlarını artırmağa davam edə bilərsən. Bir qardaş illər ərzində bir ər-arvada baş çəkir və onlara jurnal gətirirdi. Jurnalların son nəşrlərini verib getmək istəyəndə birdən ağlına gəlir ki, Müqəddəs Kitabı öyrənmək istəyib-istəmədiklərini soruşsun. Razılaşdıqlarını eşidəndə çox təəccüblənir. İndi onlar Allahın həsr olunmuş xidmətçiləridir.
3. Yığıncaq görüşlərinə gələnlərlə kiminsə Müqəddəs Kitabı öyrəndiyini nəyə görə yəqin etməməliyik?
3 Yığıncağa gələnlər. Heç vaxt yəqin etməli deyilik ki, yığıncağa gələn maraqlananların hamısı ilə Müqəddəs Kitabı öyrənən var. Bir qardaş deyir: «Müqəddəs Kitabı öyrətdiyim insanların əksəriyyəti ilə, demək olar ki, yığıncaqda tanış olmuşam». Bir bacı yığıncaqda utancaq bir qadına yaxınlaşmaq qərarına gəlir; onun yığıncaqda iki vəftiz olunmuş qızı var idi. Sən demə, həmin qadın yığıncaqlara haradasa 15 ildir gəlirmiş. Özü də zala həmişə görüş başlayandan sonra gəlir, qurtarandan sonra isə dərhal gedirmiş. Nəticədə, o, Müqəddəs Kitabı öyrənməyə razılaşdı və həqiqəti qəbul etdi. Onunla öyrənməyə başlayan bacı yazır: «Çox təəssüf edirəm ki, öyrənmək istəyib-istəmədiyini ondan 15 ildən sonra soruşmuşam!»
4. Başqalarının köməyi ilə Müqəddəs Kitabı öyrənmək istəyən insanları necə tapa bilərik?
4 Həmimanlıların köməyi. Bir bacı çalışırdı ki, digər təbliğçilərlə onların öyrətdikləri insanların yanına getsin. Sonda öyrədən bacı və ya qardaşın icazəsi ilə həmin adamdan Müqəddəs Kitabı öyrənmək istəyən tanışı olub-olmadığını soruşur. Bundan əlavə, təkrar baş çəkdiyin adama Müqəddəs Kitabı öyrənmək üçün vəsaiti təklif edərək soruşa bilərsən: «Bu nəşri əldə etmək istəyən kimisə tanıyırsınız?» Bəzən şərait elə gətirir ki, təbliğçilər və pionerlər sahədə qarşılaşdıqları adamla Müqəddəs Kitabı öyrənmək imkanları olmur. Buna görə də başqalarına deyə bilərsən ki, lazım gəlsə Müqəddəs Kitabı hər hansı bir insanla öyrənmək imkanın var.
5. Nəyə görə yığıncağımızın üzvlərinin həqiqətdə olmayan həyat yoldaşlarına Müqəddəs Kitabı öyrənməyi təklif edə bilərik?
5 İmanda olmayan həyat yoldaşları. Yığıncağınızda həyat yoldaşı imanda olmayan bacı-qardaşlar varmı? Bəziləri həqiqətdə olan həyat yoldaşları ilə Müqəddəs Kitab barədə danışmaq istəməsələr də, ancaq kənar adamlardan kimsə onlara öyrənmə təklif edəndə razılaşa bilərlər. Ancaq Müqəddəs Kitabı öyrənməyi təklif etməmişdən qabaq, onların imanda olan həyat yoldaşları ilə məsləhətləşmək yaxşı olardı.
6. Müqəddəs Kitabı öyrənmək istəyən insanları tapmaq üçün dua nə dərəcədə vacibdir?
6 Dua. Bu məsələdə duanın gücünü inkar etmək olmaz (Yaq. 5:16). Yehova iradəsinə uyğun olan dualarımıza cavab verəcəyini vəd edir (1 Yəh. 5:14). Gərgin iş qrafiki olan bir qardaş Müqəddəs Kitabla maraqlanan insan tapmaq barədə güclü dua edirdi. Onun həyat yoldaşı narahat idi ki, görəsən, əri öyrənənin — xüsusilə də əgər onun çoxlu problemləri olarsa — qayğısına necə qalacaq. O, ərinin maraqlanan adam tapması barədə dua edəndə bu narahatçılığını da Yehovaya bildirdi. İki həftədən sonra bu ər-arvad öz dualarına cavab aldı: onların yığıncaqlarından olan pioner bir bacı Müqəddəs Kitabı araşdırmaq istəyən bir nəfər tapıb ona verdi. Qardaşın həyat yoldaşı yazır: «Müəyyən çətinliklərə görə kiməsə Müqəddəs Kitabı öyrədə bilməyəcəyini düşünənlərə deyirəm ki, dualarında konkret olsunlar və bu barədə dua etməyə davam etsinlər. Biz mənim təsəvvür etdiyimdən də böyük sevinc əldə etmişik». Mətanətli olsanız, siz də Müqəddəs Kitabı öyrənmək istəyən insanları tapacaq və həyata aparan yolda çoxlu sevinc dadacaqsınız (Mat. 7:13, 14).