Aid olduğun təbliğ xidməti qrupundan necə faydalana bilərsən?
1. Yığıncağın kitaböyrənmə görüşündən əldə etdiyimiz hansı faydaları indi təbliğ xidməti qrupundan əldə edə bilərik?
1 Yığıncağın kitaböyrənmə görüşü üçün darıxırsan? Bu qruplar balaca olduğundan adam özünü rahat hiss edirdi. Bunun sayəsində ruhani cəhətdən inkişaf etməyimizə kömək edən dostluq münasibətləri qurmaq daha asan idi (Sül. məs. 18:24). Kitaböyrənmə nəzarətçisinin qrupun hər bir üzvü ilə yaxından tanış olmaq və onları ruhlandırmaq imkanı vardı (Sül. məs. 27:23; 1 Pet. 5:2, 3). İndi isə bu faydaları təbliğ xidməti qrupundan əldə etmək mümkündür.
2. Təbliğ xidməti qrupumuzun üzvləri ilə ruhani cəhətdən inkişaf etdirən dostluq münasibəti qurmaq üçün təşəbbüsü üzərimizə necə götürə bilərik?
2 Təşəbbüs göstər. Adətən, təbliğ xidməti qrupunda iştirak edənlərin sayı kitaböyrənmə üzvlərinin sayı ilə eyni olur. Xidmətdə başqaları ilə «çiyin-çiyinə» əməkdaşlıq etməklə sıx dostluq münasibətləri qura bilərik (Filip. 1:27). Qrupunuzun üzvlərindən neçəsi ilə əməkdaşlıq etmisən? Əməkdaşlıq etmək üçün əhatəni genişləndirə bilərsənmi? (2 Kor. 6:13). Bundan əlavə, vaxtaşırı qrupumuzun üzvlərindən kimlərisə ailəvi ibadət axşamına və ya nahara dəvət edə bilərik. Bəzi yığıncaqlarda təbliğ xidməti qrupları dəvət olunmuş natiqi növbə ilə qonaq dəvət edirlər. Hətta dəvət olunmuş natiq yeməyə qalmasa da, həmin həftə növbəsi olan qrup üzvləri süfrə arxasına toplaşır və bir-birini ruhlandırırlar.
3. Ağsaqqalların təbliğ xidməti qrupunun üzvlərinə maraq göstərməsi üçün hansı imkanları var?
3 İndi həftədə iki dəfə yığılsaq da, bu o demək deyil ki, ağsaqqallar təbliğçilərə az maraq göstərirlər. Qrup nəzarətçisi öz qrupunun üzvləri ilə yaxından maraqlanmalı və xidmətdə püxtələşmələrinə kömək etməlidir. Əgər qrup nəzarətçin hələ də səninlə əməkdaşlıq etməyibsə, niyə də yaxınlaşıb onunla xidmətə yazılmayasan? Bundan əlavə xidmət nəzarətçisi hər ayın bir həftə sonu müxtəlif qruplarla əməkdaşlıq etməlidir. Cəmi bir neçə təbliğ xidməti qrupu olan kiçik yığıncaqlarda o, hər qrupa ildə iki dəfə baş çəkir. Vaxtını elə planlaşdırırsanmı ki, o, sizin qrupa baş çəkəndə onunla əməkdaşlıq edəsən?
4. a) Təbliğ xidməti üçün görüşlər necə təşkil olunur? b) Təbliğ xidməti görüşü keçirilsin deyə nə üçün evimizi təklif etməliyik?
4 Adətən, hər qrupun həftə sonu təbliğ xidməti üçün ayrı-ayrı yığışması yaxşıdır. Hər təbliğ qrupunun ayrı-ayrı yerlərdə yığışması və görüşün vaxtının dəyişməməsi təbliğçilərin görüşə və sahəyə getmələrini asanlaşdırır. Təbliğçilər qısa vaxt ərzində bölüşüb sahəyə gedə bilirlər. Bu həmçinin qrup nəzarətçisinin qrup üzvlərinin qayğısına qalmasını asanlaşdırır. Lakin şərait ucbatından iki və daha çox qrupun birgə yığılması yolveriləndir. Əgər yığıncağın hamısı ayın ilk şənbə günü və ya «Gözətçi qülləsi» müzakirəsindən sonra xidmətə getmək üçün bir yerə toplaşırsa, yaxşı olardı ki, hər qrup ayrı əyləşsin və qrupun nəzarətçisi təbliğ görüşünün yekun duasından öncə bir neçə dəqiqə ərzində qrup üzvlərini bölüşdürsün.
5. Hal-hazırda yığıncağın kitaböyrənmə görüşü keçirilməsə də, nəyə əmin ola bilərik?
5 Yığıncağın kitaböyrənmə görüşü indi keçirilməsə də, Yehova iradəsinə uyğun ehtiyac duyduğumuz hər şeylə bizi təmin etməyə davam edir (İbr. 13:20, 21). Yehova qeydimizə qaldığı üçün heç nəyə ehtiyac duymuruq (Məz. 23:1). Təbliğ xidməti görüşü sayəsində çoxlu xeyir-dualar əldə edirik. Əgər təşəbbüsü öz üzərimizə götürüb səxavətlə əksək, bol biçəcəyik (2 Kor. 9:6).
[6–cı səhifədəki çərçivə]
Evini təklif edə bilərsənmi?
Bir yerə yığışmağa mənzil çatışmadığından bir çox qruplar təbliğ üçün görüşləri həftə sonu keçirirlər. Yığıncaq görüşlərinin bir hissəsi olan təbliğ xidməti görüşünün sənin evində keçirilməsi böyük üstünlükdür. Bu görüşün keçirilməsi üçün sən öz evini təklif edə bilərsənmi? Evindəki şəraitin bir o qədər də yaxşı olmadığını düşünərək təklifi rədd etməyə çalışma. Ağsaqqallar sizin evin yerləşdiyi ərazini və digər amilləri kitaböyrənmə keçirilən zaman nəzərə aldıqları kimi, indi də nəzərə alacaqlar. Əgər sən öz evini təklif etmək istəyirsənsə, dərhal qrup rəhbərinə de.