Allahın Padşahlığı nədir?

MÜQƏDDƏS KİTABDA NƏ DEYİLİR?

«Göylərin Allahı heç vaxt dağılmayacaq bir padşahlıq quracaq» (Peyğəmbərlərin kitabı, Dənyal 2:44).

«Ona hakimiyyət, şərəf və padşahlıq verildi... Onun hakimiyyəti sona yetməyəcək əbədi hakimiyyətdir» (Peyğəmbərlərin kitabı, Dənyal 7:14).

BU SİZİN ÜÇÜN NƏ MƏNA KƏSB EDİR?

• Ədalətli hökumət şəxsən sizə fayda gətirə bilər (Peyğəmbərlərin kitabı, Əşiya 48:17, 18).

• Qarşıdan gələn yeni dünyada insanlar tam sağlam və xoşbəxt ömür sürəcəklər (İncil, Vəhy 21:3, 4).

MÜQƏDDƏS KİTABDA DEYİLƏNLƏRƏ İNANMAQ OLARMI?

Bəli, olar, ən azı, iki səbəbə görə:

• İsa peyğəmbər yer üzündə olanda Allahın Padşahlığının nələri həyata keçirəcəyini göstərmişdi. O, öz davamçılarına Allahın Padşahlığının gəlməsi və Allahın iradəsinin yer üzündə yerinə yetməsi barədə dua etməyi öyrədirdi (İncil, Mətta 6:9, 10). İsa peyğəmbər bu duaya Allahın necə cavab verəcəyini nümayiş etdirmişdi.

  İsa peyğəmbər yer üzündə yaşayanda acları doyuzdurur, xəstələrə şəfa verir və ölüləri dirildərək həyata qaytarırdı! (İncil, Mətta 15:29—38; Yəhya 11:38—44). Allahın Padşahlığının Padşahı İsa Məsih Padşahlığın öz təbəələri üçün nələr edəcəyini möhtəşəm şəkildə göstərdi (İncil, Vəhy 11:15).

• Dünyada hökm sürən vəziyyət əmin edir ki, Allahın Padşahlığı tezliklə gələcək. İsa peyğəmbər demişdi ki, Padşahlıq yer üzünə sülh və əmin-amanlıq gətirməzdən öncə dünya müharibələr, zəlzələlər və aclıq ucbatından əziyyət çəkəcək (İncil, Mətta 24:3, 7).

  Bütün bunlar gözümüzün qabağında baş verir. Buna görə də tam əmin ola bilərik ki, Allahın Padşahlığı tezliklə bu problemlərin hamısına son qoyacaq.