Korrupsiya. Nə dərəcədə geniş yayılıb?

«Bizim şirkət yerli dövlət müəssisəsinə xidmətlər göstərir. Çox vaxt bu xidmətlərə görə edilən ödənişləri iki-üç ay gözləməli oluruq. Lakin bu yaxınlarda bir dövlət işçisi mənə zəng edib təklif etdi ki, haqqımızı tez almaq istəyiriksə, ona “hörmət edək”, yəni pulun müəyyən qismini ona verək» (СON)a.

SİZ heç korrupsiyanın qurbanı olmusunuzmu? Sırf yuxarıdakı kimi olmasa da, yəqin, onun təsiri sizdən də yan ötüşməyib.

Beynəlxalq Şəffaflıq Təşkilatının (Transparency International) 2011-ci il Korrupsiya qavrama indeksininb 10 ballıq şkalasına əsasən, 183 ölkə və ərazinin böyük qismi 5-dən aşağı balla qiymətləndirilib. (Burada 10 bal korrupsiyanın olmadığının, 0 bal isə korrupsiyanın yüksək olduğunun göstəricisidir.) Həmin təşkilatın 2009-cu il üçün illik hesabatında korrupsiyanın kökünün dünyanın hər yerinə şaxələndiyi bildirilirdi. Hesabatda qeyd olunur: «Bir fakt danılmazdır ki, korrupsiya təhlükəsindən dünyanın heç bir regionu sığortalanmayıb».

Bəzi hallarda korrupsiya fəlakətlə nəticələnir. Məsələn, «Taym» jurnalında xəbər verilmişdi ki, 2010-cu ildə Haitidə baş verən irimiqyaslı zəlzələdə böyük sayda insan tələfatının olmasında məsuliyyəti qismən də olsa «korrupsiya və laqeydlik» daşıyır. Jurnalda əlavə olunur: «Binaların tikintisi zamanı mühəndislərin göstərişləri cüzi nəzərə alınıb (əgər göstərişlər ümumiyyətlə verilmişdisə) və “dövlət müfəttişlərinə” külli miqdarda rüşvət verilib».

Korrupsiya bəlasından həmişəlik canımızı qurtarmaq mümkündürmü? Bu sualın cavabını bilmək üçün biz korrupsiyanın kökündə duran amilləri araşdırmalıyıq. Bunu növbəti məqalədə müzakirə edəcəyik.

[Haşiyələr]

[3–cü səhifədəki yazı]

«Korrupsiya şəxsi mənfəətə görə səlahiyyətdən sui-istifadədir. Korrupsiya həyatı, dolanışığı və ya xoşbəxtliyi səlahiyyət sahibi olan insanların dürüstlüyündən asılı olan hər bir kəsə zərərvurur» (BEYNƏLXALQ ŞƏFFAFLIQ).