Bizi qarşılıqlı ruhlandırılma gözləyir
1 Yehovanın xalqı gündən-günə imanın sınağı ilə qarşılaşır. İblis, vaxtının az olduğunu bilərək, var gücü ilə Yehovaya olan bağlılığımızı qırmağa çalışır (Vəhy 12:12). Biz “Rəbbdə və Onun üstün qüdrətində” qüvvətlənməliyik ki, “pis gündə müqavimət göstərib” əlimizdən gələn hər şeyi etdikdən sonra yerimizdə dura bilək (Efes. 6:10, 13).
2 Həmimanlılarımızla görüşlər, qüvvə əldə etməyimizə kömək üçün Yehovanın göstərdiyi qayğıdır. Həvari Pavel bu cür görüşləri qiymətləndirirdi. O, məsihçi qardaşlarını quvvətləndirmək üçün onlarla görüşməyi çox arzu edirdi. Pavel “müştərək iman vasitəsilə” ruhlandırılmanın əhəmiyyətini dərk edirdi (Rom. 1:11, 12). Allahın iradəsini yerinə yetirməyimizə kömək etmək üçün, Rəhbərlik şurası qayğıkeşliklə bizim üçün “Padşahlığın çalışqan təbliğçiləri” adlı vilayət konqresi hazırlayıb. Bu konresdə bir-birimizi ruhlandıra bilərik.
3 Faydalanmaq üçün iştirak et. Üç günün hamısında iştirak etməyi qarşına məqsəd qoy. Fayda əldə etmək üçün birinci mahnı səslənməzdən əvvəl gəl və yekun duaya kimi qal (İş. 48:17, 18). Konqresin heç bir gününü buraxmasınlar deyə, bir çoxları iş qrafiklərində dəyişikliklər etmək üçün müdirləri ilə qabaqcadan danışmalıdırlar. İşdən icazə almaq həmişə asan olmur, amma Yehova əmin edir ki, Onun iradəsini yerinə yetirməkdə bizə kömək edəcəkdir (1 Yəh. 5:14, 15). Nəqliyyat və yaşayış yeri ilə məsələni hələ həll etməmişiksə, indi bunu etməyin əsl vaxtıdır: bu işi özbaşına buraxmaq lazım deyil. Əmin ola bilərik ki, konqresin keçəcəyi üç gündə iştirak etmək cəhdimizə Yehova xeyir-dua verəcəkdir (Sül. məs. 10:22).
4 Ruhlandırılacağımızı səbirsizliklə gözləyirik. Yəqin ki, vilayət konqresindən qayıdarkən demisən: bu, həyatımda ən yaxşı konqres oldu! Bu hissləri nə ilə izah etmək olar? Ruhlanmağınla. Qeyri-kamil olan biz insanların hamısının ruhlandırılmağa ehtiyacı var, axı həyat bizi ruhdan sala bilər (İş. 40:30). Bir bacı öz hissləri ilə bölüşür: “Bu dünya məni taqətdən salır. Konqreslər isə, diqqətimi yenidən ruhani şeylərə cəlb etməkdə və ehtiyac duyduğum ruhani qüvvəni əldə etməkdə mənə kömək edir. Elə təəssürat yaranır ki, ruhlandırma, daha çox ehtiyac duyduğum anda köməyimə çatır”. Çox güman ki, sən buna bənzər hisslər yaşamısan.
5 Biz yalnız mə’ruzələrdən və müsahibələrdən deyil, proqramın ruhən zənginləşdirən digər hissələrindən də ruhlanırıq. Bir qardaş danışırdı: “Konqresdə Müqəddəs Kitab prinsiplərinin aydın və praktiki tətbiqini izah etmələri çox xoşuma gəlir. Həmçinin, qədim dövrdəki istər yaxşı, istərsə də pis nümunələrdən fayda əldə etməyin üsulunu göstərən dramalar da çox kömək edir. Yeni nəşrlərin buraxılışını səbirsizliklə gözləyirəm və evə qayıtdıqdan sonra onları oxumaqdan uzun müddət həzz alıram”.
6 Konqreslər, yaşadığımız bu “çətin anlarda” Yehovanın bəxş etdiyi olduqca qiymətli yardımdır (2 Tim. 3:1). Onlar bizə Müqəddəs Kitabın “ayıq olun, imanda sabit durun, mərdanə və möhkəm olun” nəsihətinə diqqət yetirməyə kömək edir (1 Kor. 16:13). Buna görə də gəlin “Padşahlığın çalışqan təbliğçiləri” adlı vilayət konqresimizin bütün hissələrində iştirak edək və qarşılıqlı ruhlandırılmadan həzz alaq!
[3 səhifədəki çərçivə]
Üç günün hamısında iştirak etməyi planlaşdır
■ İşdən icazə al.
■ Konqresin keçiriləcəyi şəhərdə mənzil tap.
■ Konqresə necə gedəcəyini qərarlaşdır.