“Rəbbi sevin, ey sizlər, bütün sadiqləri”
Biz aprelin 4-də İsanın ölümünün Xatirə Gecəsini qeyd edəcəyik
1 Sovet hakimiyyəti dövründə Ukraynada Dövlət Təhlükəsizlik Komitəsinin əməkdaşları Şahidləri daima güdürdülər, xüsusilə də Xatirə Gecəsinin keçirildiyi ərəfədə. Onlar bunu, görüşün harada keçiriləcəyini öyrənmək məqsədi ilə edirdilər. Hakimiyyət nümayəndələri bayramın təxminən nə vaxt olacağını həmişə bilirdilər, buna görə də bu tədbiri keçirmək üçün münasib yer tapmaq olduqca çətin idi. Bəs qardaşlar buna necə nail olurdular? Bir dəfə bir bacımızın evinin zirzəmisini su basdı. Hakimiyyət nümayəndələri gözləmirdilər ki, su dizə çıxan bir yerdə adamlar toplaşa bilər! Qardaşlar suyun üzərində taxta səki düzəltdilər və tavan alçaq olduğundan əyilərək oturmalı oldular. Buna baxmayaraq, Xatirə Gecəsini şən keçirməkdə onlara heç kim mane olmadı.
2 Ukraynadakı qardaşlarımızın İsanın öz ölüm gününün qeyd edilməsinə dair verdiyi göstərişə cəsarətlə riayət etmələri, onların Allaha olan məhəbbətlərinə gözəl sübutdur (Luka 22:19; 1 Yəh. 5:3). Əgər biz də hər hansı çətinliklə qarşılaşırıqsa, gəlin bu cür nümunələrdən ruh yüksəkliyi əldə edək və aprelin 4-də Rəbbin Xatirə Gecəsinə gəlməyə qəti qərarlı olaq. Bu cür davranaraq biz, “Rəbbi sevin, ey sizlər, bütün mö’minləri [“sadiqləri”, YD]” deyə oxuyan məzmurçunun sözlərinə şərik olduğumuzu göstərəcəyik (Məz. 31:23).
3 Allaha olan məhəbbətlərinin inkişaf etməsində başqalarına kömək et. Allaha olan məhəbbət, həmçinin bizi təşviq edir ki, başqalarını bu bayrama də’vət edək. “Bizim Padşahlıq Xidmətimiz”in fevral sayının əlavə vərəqəsindəki məqalə bizim hər birimizi təşviq edirdi ki, Xatirə Gecəsinə də’vət etmək istədiyimiz adamların siyahısını tutaq. Tutduğun siyahıdakı adamların hər birini də’vət etmək üçün sə’y göstərmisənmi? Bu hadisənin əhəmiyyətli olduğunu izah etmək üçün vaxt ayır. Xatirə Gecəsinin keçiriləcəyi günü və vaxtı xatırlat. Əgər münasibdirsə, onlara birlikdə getməyi təklif et. Bu, onları gəlməyə təşviq edə bilər.
4 Mərasim zamanı də’vətimizi qəbul edib gələnləri ürəkdən salamlamaq üçün xüsusi sə’y göstər. Sən bu insanların Yehovaya olan məhəbbətlərinin inkişaf etməsində necə kömək edə bilərsən? Onların suallarına cavab verməyə hazır ol. Əgər şərait imkan verirsə, onlara Müqəddəs Kitab öyrənməsi təklif et. Hər həftə keçirilən yığıncaq görüşlərinə də’vət et. Ağsaqqallar Xatirə Gecəsinə gələn qeyri-fəal təbliğçilərə xüsusi diqqət yetirəcəklər. Ağsaqqallar onlarla görüş tə’yin edə bilər və teokratik fəaliyyətlərini bərpa etməyə təşviq edə bilərlər. Bu zaman onlar Xatirə Gecəsində söylənilən mə’ruzədə səslənən fikirlərdən istifadə edə bilərlər (Rom. 5:6-8).
5 Yehovaya olan məhəbbətimizi gücləndiririk. Fidiyə ən’amı üzərində düşünmək Yehovaya və Onun Oğluna olan məhəbbətimizi gücləndirə bilər (2 Kor. 5:14, 15). Uzun müddət Xatirə Gecəsinə gələn bir bacımız demişdir: “Biz Xatirə Gecəsini səbirsizliklə gözləyirik. Bu mərasim bizim üçün hər il daha da əziz olur. 20 il bundan əvvəl atamın dəfni zamanı durub, fidiyə üçün dərin minnətdarlıq hissi duyduğumu xatırlayıram. O vaxta kimi fidiyə mənim üçün sadəcə olaraq nəzəriyyə idi. Müqəddəs Yazılardakı fidiyəyə aid ayələrin hamısını bilir və onları çox asanlıqla izah edə bilirdim. Lakin yalnız ölümün nə qədər dəhşətli olduğunu duyduqdan sonra, bu qədər qiymətli olan fidiyə vasitəsilə nail olunacaq şeylərə görə qəlbim minnətdarlıq hissilə doldu” (Yəh. 5:28, 29).
6 Xatirə Gecəsi yaxınlaşdıqca ürəyini bu mərasimə hazırlamaq üçün vaxt ayır (2 Tarix. 19:3). “Müqəddəs Yazıları gündəlik araşdırmaq” broşürasında və 2004-cü ilin təqvimində gətirilən Xatirə Gecəsindən qabaq Müqəddəs Kitabın oxunulması proqramı əsasında oxuduqlarının üzərində düşün. Bə’ziləri ailəvi öyrənmə zamanı “Ən böyük insan” kitabının 112-116-cı fəsillərini oxumağı xoşlayırlar. Digərləri isə sadiq və ağıllı qulun vasitəsilə təqdim olunan vəsaitlərdən istifadə edərək, əlavə axtarışlar aparırlar (Mat. 24:45-47). Məsihin fidiyə qurbanlığı üçün bizim hər birimiz duada ürəkdən təşəkkür edə bilərik (Məz. 50:14, 23). Gəlin, Xatirə Gecəsi dövründə Yehovanın bizə qarşı olan məhəbbəti üzərində dərindən düşünək və bizim də Ona olan məhəbbətimizi təzahür etdirmək üçün imkanlar axtaraq! (Mark 12:30; 1 Yəh. 4:10).