Yığıncağın kitaböyrənməsinə nə üçün ehtiyac duyuruq?
1. Yığıncağın kitaböyrənməsi necə yarandı?
1 Müqəddəs Kitabın Tədqiqatçıları (indi Yehovanın Şahidləri), 1895-ci ildə “Şəfəq” adlı Müqəddəs Kitab dərnəyi kimi tanınmağa başladılar. Onlar tədqiqat üçün “Minilliyin şəfəqi” əsərindən istifadə edirdilər. Sonradan bu görüşlər Müqəddəs Kitab öyrənilməsi üzrə Veriya dərnəkləri adlanmağa başladı (Həv. iş. 17:11). Kiçik qruplardan ibarət olan bu görüşlər axşamlar, hamıya əlverişli olan vaxtda kiminsə evində keçirilirdi. Bu qruplar müasir kitaböyrənmə qruplarının başlanğıcı oldu.
2. Kitaböyrənmədə “ümumi iman vasitəsilə” bir-birimizə necə təsəlli verə bilərik?
2 Təsəlli və kömək. Kitaböyrənmələr müəyyən məqsəddən irəli gələrək kiçik qruplarla təşkil edilirdi ki, orada bacı-qardaşların müzakirədə daha çox iştirak etmək imkanları olsun. Bu, “ümumi iman vasitəsilə təsəlli” tapmağımıza kömək edir (Rom. 1:12, İ–93).
3, 4. Yığıncağın kitaböyrənməsi xidmətimizi icra etməkdə bizə necə kömək edir?
3 Kitaböyrənmənin nəzarətçisinin müzakirəni necə keçirdiyini müşahidə etməklə biz “həqiqət sözünü doğruluqla” öyrətməyi öyrənirik (2 Tim. 2:15). Materialın Müqəddəs Kitaba əsaslandığını onun necə qeyd etdiyinə fikir ver. Əgər öyrənilən nəşr yol verirsə, o, müzakirənin sonunda materialı bilavasitə Müqəddəs Kitabın köməkliyi ilə təkrar edə bilər. Onun nümunəsini təqlid edərək, biz məsihçi xidmətimizin keyfiyyətini yaxşılaşdıra bilərik (1 Kor. 11:1).
4 Kitaböyrənmənin nəzarətçisi həftəlik müzakirə keçirməkdən savayı, təbliğ xidmətində də qrupa nümunə verir. O, xidməti nəzarətçi ilə əməkdaşlıq edərək, təbliğçilərin əksəriyyəti üçün əlverişli olan vaxtda təbliğ üçün görüşlər təşkil edir. Kitaböyrənmənin nəzarətçisi qrupda olanların hamısına xoş xəbəri təbliğ etmək və şagirdlər hazırlamaq işində məsihçi vəzifəsini yerinə yetirməyə kömək edir (Mat. 28:19, 20; 1 Kor. 9:16).
5. Kitaböyrənmədə biz şəxsən hansı köməyi ala bilərik?
5 Kitaböyrənmənin nəzarətçisi qrupdakı təbliğçilərin hər birinin ruhani rifahı üçün qayğı göstərir. O, yığıncaq görüşlərində və həmçinin birgə xidmətə gedən zaman onlara qayğı göstərir. Qardaşlara evlərində baş çəkərək, onlarla ruhani ən’amları bölüşməyə çalışır. Biz ruhani köməyə ehtiyac duyduğumuz hər vaxt sərbəst şəkildə kitaböyrənmənin nəzarətçisinə müraciət edə bilərik (İş. 32:1, 2).
6. a) Bə’zi ölkələrdə kiçik qrup şəklində keçirilən görüşlər qardaşlarımızı necə möhkəmləndirirdi? b) Yığıncağın kitaböyrənməsi şəxsən sənə hansı faydanı gətirir?
6 Bir-birimizi möhkəmləndiririk. Allahın xalqının fəaliyyəti qadağan olunan ölkələrdə qardaşlar adətən kiçik qruplarla yığılırlar. Bir qardaş xatırlayır: “Fəaliyyətimiz qadağan olunsa da, imkan düşən kimi, 10-15 nəfərdən ibarət qruplarla həftəlik görüşləri keçirirdik. Müqəddəs Kitabın öyrənilməsi, habelə onlardan sonra keçirdiyimiz ünsiyyət görüşləri bizə ruhani cəhətdən güc verirdi. Bir-birimizlə bizi narahat edən məsələləri bölüşür, bu isə mübarizədə bərabər olduğumuzu dərk etməyə kömək edirdi” (1 Pet. 5:9). Gəlin yığıncağın kitaböyrənməsini tam şəkildə dəstəkləyərək, bir-birimizi möhkəmləndirək! (Efes. 4:16).