Müqəddəs Kitab öyrənməsi başlamağı qarşına məqsəd qoy
1 «Gözlərinizi qaldırın, biçilmək üçün ağarmış tarlalara baxın» (Yəh. 4:35). İsa Məsihin dediyi bu sözlər Padşahlığın xidmətçilərinin indi qarşılaşdığı vəziyyətə uyğundur.
2 Yehovanın yollarını öyrənmək istəyən səmimi insanlar hələ də tapılır. Bu, hər il vəftiz olunan yeni şagirdlərin sayından görünür. Müqəddəs Kitab öyrənməsi keçirməyi səmimi qəlbdən istəyirsənsə, nə edə bilərsən?
3 Qarşına məqsəd qoy. İlk növbədə, Müqəddəs Kitab öyrənməsinə başlamağı və onu müntəzəm olaraq keçirməyi qarşına məqsəd qoy. Təbliğ xidmətində iştirak edən zaman məqsədini həmişə yadında saxla. Bizə verilən tapşırıq təbliğ etməklə yanaşı, öyrətməyi də özünə daxil edir. Buna görə də, hamımız şagird hazırlamaq işində daha çox iştirak etmək üçün imkanlar axtarmalıyıq (Mat. 24:14; 28:19, 20).
4 Daha nəyi yadda saxlamaq lazımdır? Padşahlığın təbliğçilərinin ürəkdən dua etmələri olduqca vacibdir. Bə’zən xidmətdə rast gəldiyimiz insanlar Allahı tanımaq üçün dualar etmişlər. Belə insanları tapmaqda və onları öyrətməkdə Yehovanın bizdən istifadə etməsi əsl xeyir-duadır! (Haq. 2:7; Həv. iş. 10:1, 2).
5 Bir bacı dua etmişdir ki, Müqəddəs Kitab öyrənməsi olsun. Sonra o, iş yoldaşlarına «Müqəddəs Kitab haqqında daha çox bilmək istəyərdinizmi?» traktatını payladı. Bir qadın traktatı oxuduqdan sonra kuponu doldurarkən bacı ona yaxınlaşıb söhbət açdı və öyrənməyə başlamağa müvəffəq oldu.
6 Müqəddəs Kitab öyrənmələrinə başlamaqda və aparmaqda uğur qazanan digər təbliğçilər məqsədinə çatmağa kömək edə bilərlər. Həqiqətlə maraqlanan bir kimsəni tapmaq üçün Allaha dua et və məqsədinə çatmaqda kömək edən hər şeydən istifadə et. Ola bilsin, sən tezliklə öyrənmə keçirməyin sevincini yaşayacaqsan.