Qoy Allahın iradəsi yerinə yetsin
1. 2012-ci xidmət ilində keçiriləcək xüsusi birgünlük konqresin mövzusu nə olacaq və onu nəzərdən keçirməyimiz nəyə görə münasibdir?
1 Biz Yehovanın iradəsilə yaranmışıq (Vəhy 4:11). Allahın iradəsini öyrənmədən və onu yerinə yetirmədən yaradılmağımızda nəzərdə tutulan məqsədə çatmaq qeyri-mümkündür. Bu, göründüyü kimi, bir o qədər də asan deyil, çünki biz bədənimizin və zehnimizin arzuları və «millətlərin istəyini» yerinə yetirmək meyili ilə daxilimizdə mübarizə aparmalı oluruq (Efes. 2:3; 1 Pet. 4:3; 2 Pet. 2:10). Allahın köməyi olmasa, bizi hətta İblisin istəklərini yerinə yetirmək üçün diri-diri onun toruna düşmək təhlükəsi gözləyir (2 Tim. 2:26). 2012-ci xidmət ilində keçiriləcək xüsusi birgünlük konqresin mövzusu nümunəvi duadakı üçüncü əsas xahişə — «Qoy Sənin iradən... yerinə yetsin» xahişinə uyğun davranmağa kömək edəcək (Mat. 6:9, 10).
2. Konqresin proqramında hansı suallara cavab tapacağıq?
2 Növbəti suallara cavab tapacağıq. Proqrama qulaq asdıqca növbəti sualların cavabına diqqət yetir: Allahın Kəlamına qulaq asmaqdan savayı daha nəyi etməyimiz vacibdir? Allahın bizimlə bağlı olan iradəsinin nədən ibarət olduğunu necə başa düşə bilərik? Nəyə görə biz hər cür insana kömək əli uzatmağa hazır olmalıyıq? Həyatdan necə sevinc və məmnunluq duymaq olar? Gənclər Yehovaya nəyi sübut etməlidirlər? Allahın iradəsini yerinə yetirmək hansı xeyir-duaları gətirir?
3. Xüsusi birgünlük konqresin proqramından tam şəkildə necə faydalana bilərik?
3 Konqresin proqramında mütləq iştirak et və diqqətlə qulaq as. Bet-Elin nümayəndəsi və ya səyyar nəzarətçi konqresdə dəvət olunmuş natiq qismində iştirak edəcək. Proqramdan əvvəl və sonra onunla və həyat yoldaşı ilə ünsiyyət etməyə vaxt ayır. Evə qayıdanda unutqan dinləyici olma, ailənlə birlikdə proqramı nəzərdən keçir və tam şəkildə Allahın iradəsinə uyğun necə davranacağınızı müzakirə edin (Yaq. 1:25).
4. Allahın iradəsini həyatımızda birinci yerə qoymaq nəyə görə vacibdir?
4 Öz istəklərinin ardınca gedən və Yehovanın iradəsinə tabe olmaqdan boyun qaçıranlar tezliklə məhv olacaqlar (1 Yəh. 2:17). Allahın iradəsini həyatımızda birinci yerə qoya bilməyimiz üçün bu məlumatı vaxtında hazırladığına görə Yehova çox minnətdarıq!