«Müqəddəs Kitab öyrədir» kitabını öyrənməyə hazır olmayanlara kömək

1. Hər kəslə «Müqəddəs Kitab öyrədir» kitabı ilə öyrənmə başlamaq münasibdirmi? İzah edin.

¹ Yehovanın xidmətçisi olmaq üçün insan Müqəddəs Kitab təlimlərini öyrənməlidir. Ancaq elə insanlar var ki, onlar xristian dininə mənsub deyillər və Müqəddəs Kitabı Allahın Kəlamı hesab etmirlər. Bəziləri isə ümumiyyətlə Allaha inanmır və Müqəddəs Kitaba hörmət etmir. İlk dəfədən «Müqəddəs Kitab öyrədir» kitabını öyrənməyə hazır olmayan insanlara kömək etmək üçün hansı vəsaitlərdən istifadə etmək olar? Aşağıdakı təkliflər təxminən 20 ölkədən olan təbliğçilərin fikirlərinə əsaslanır.

2. Kimsə Allaha inanmadığını deyəndə nəyi müəyyənləşdirməliyik və nə üçün?

² Allaha inanmayanlar. Kimsə Allaha inanmadığını deyəndə yaxşı olar ki, bunun səbəbini müəyyənləşdirək. Bəlkə, həmin adam təkamülə inanır? Bəlkə, o, dünyadakı ədalətsizliyə və ya dindəki ikiüzlülüyə görə Allaha olan imanını itirib? Ola bilsin, o, Allaha ibadətin qadağan olunduğu bir ölkədəndir. Yaxud da, ola bilsin, o, Allahın varlığını qəti inkar etməsə də, heç vaxt Allaha inanmayıb. Bir çox təbliğçilər: «Siz həmişə belə düşünmüsünüz?» — deyə soruşmaqla bu kimi insanların öz mövqelərini izah etmələrinə şərait yaradırlar. Hər bir halda insana qulaq as və sözünü kəsmə. İnsanın Allaha nə üçün inanmadığını başa düşəndən sonra ona nə cavab verəcəyimizi və hansı ədəbiyyatı təklif edəcəyimizi biləcəyik (Sül. məs. 18:13).

3. İnsana və etiqadına hörmət etdiyimizi necə göstərə bilərik?

³ Elə cavab ver ki, insanda onun fikirlərini tənqid atəşinə tutduğun fikri yaranmasın. Növbəti təklif Birləşmiş Ştatlardandır: «İnsanın istədiyi şeyə inanmaq hüququna hörmətlə yanaşmaq olduqca vacibdir. Mübahisəni qazanmağa çalışmaq əvəzinə, insanı düşündürən və özünün bir qənaətə gəlməsinə kömək edən sual vermək yaxşı olar». Bir səyyar nəzarətçisi həmişə ev sahibinin fikrini dinləyəndən sonra bu cür sualla müraciət edir: «Siz həmişə düşünmüsünüz ki, bu belədir?»

4. Buddistlərə necə kömək edə bilərik?

⁴ Bir çox buddistlər üçün Allah anlayışı yaddır. Britaniyada bəzi təbliğçilər belə insanlara «Əbədi sülh və xoşbəxtliyi necə tapmaq olar?» broşürası (rus.) vasitəsilə şahidlik edirlər. Ön sözü müzakirə etdikdən sonra onlar «Haqq-Taala Allah və Yaradan mövcuddurmu?» bölməsini, ondan sonra isə «Bütün bəşəriyyət üçün faydalı rəhbərlik» bölməsini araşdırırlar. Ehtimal ki, bundan sonra isə onlar «Müqəddəs Kitab öyrədir» kitabını təqdim edir və ev sahibinə belə deyirlər: «Hətta Allaha inanmasanız da, Müqəddəs Kitabı araşdırmaq sizin üçün faydalı olar, çünki orada çoxlu praktiki məsləhətlər var»a. Birləşmiş Ştatlarda çinlilərə təbliğ edən bir pioner qardaş demişdi: «Ərazimizdəki insanların əksəriyyəti oxumağı sevirlər. Buna görə də biz təkrar gələndə onların verdiyimiz ədəbiyyatı oxuyub qurtardıqlarını görürük. Ancaq onlar Müqəddəs Kitab öyrənməsinin nə demək olduğunu başa düşməyə bilərlər. Buna görə də mən ilk başçəkmə zamanı “İlahi müjdə” broşürasını təqdim edirəm. Çünki bu broşüra elə tərtib olunub ki, insanı müzakirəyə cəlb edir». Birləşmiş Ştatlarda çindilli rayonda xidmət edən rayon nəzarətçisi məlumat verir ki, ilk başçəkmədən «Müqəddəs Kitab öyrədir» kitabı ilə söhbətə başlamaq mümkündür. Amma öyrənməni Allah haqqında müzakirə olunan 1-ci fəsildən yox, Müqəddəs Kitab haqda məlumat olan 2-ci fəsildən başlamaq daha yaxşı olardı.

5. Səbir göstərmək nə üçün vacibdir?

⁵ İnsanın Allaha imanının yaranması üçün vaxt lazımdır, buna görə də səbir etmək vacibdir. İlk söhbətlərimiz insanı Yaradanın varlığına inandırmaya bilər. Lakin, ola bilsin, vaxt keçdikcə o, bunun mümkün olduğu qənaətinə gələcək. Yaxud, kiminsə nə üçün belə qənaətə gəldiyini başa düşdüyünü deyəcək.

6. Nə üçün bəzilərinin Müqəddəs Kitaba marağı olmaya bilər?

⁶ Müqəddəs Kitaba marağı olmayanlar və ya etibar etməyənlər. Çox vaxt Allahın varlığını qəbul edən insan Müqəddəs Kitabın Allahın Kəlamı olduğuna inanmadığı üçün oradakı təlimlərlə maraqlanmır. Ola bilsin, o, qeyri-xristian ölkəsində yaşayır və elə fikirləşir ki, Müqəddəs Kitab xristianlar üçündür. Yaxud ola bilsin, o, adı xristian ölkəsi olan, lakin sivil bir ölkədə yaşayır və Müqəddəs Kitabın onun üçün praktiki olmadığını düşünür. Biz belə insana Müqəddəs Kitaba marağını inkişaf etdirməyə və nəticədə «Müqəddəs Kitab öyrədir» kitabı vasitəsilə öyrənməyə razılaşmasına necə kömək edə bilərik?

7. İnsanda Müqəddəs Kitaba marağı necə oyatmaq olar?

⁷ Yunanıstandakı filial yazır: «Müqəddəs Kitaba marağı olmayanlara kömək etməyin ən yaxşı üsulu Müqəddəs Kitabı açıb orada nədən bəhs edildiyini göstərməkdir. Əksər təbliğçilər fikir vermişlər ki, Müqəddəs Kitabdan oxunan ayə insanın ürəyinə istənilən sözdən daha güclü təsir edir (İbr. 4:12). Müqəddəs Kitabda Allahın adını görmək bir çoxlarında onu araşdırmaq istəyi yaradır». Hindistandakı filial yazır: «Həyat və ölüm haqqında həqiqət, həmçinin Müqəddəs Kitabın irqi ayrı-seçkiliyin olmayacağı bir dünya haqda vədi bir çox hinduistə güclü təsir edir». Yerli ərazidə aktual olan problemlərdən söz açmaq çox vaxt təbliğçilərə imkan verir ki, Allahın Padşahlığının bu vəziyyəti necə düzəldəcəyinə dair Müqəddəs Kitabda deyilənləri göstərsinlər.

8. Xristian dinləri ucbatından Müqəddəs Kitab haqda mənfi fikirdə olanlara nə deyə bilərik?

⁸ Əgər kimsə Xristian dinləri ucbatından Müqəddəs Kitaba mənfi yanaşırsa, ona Xristian dünyasının Müqəddəs Kitab və onun təlimləri haqda səhv şeylər öyrətdiyini başa salmaq olar. Hindistandakı filial yazır: «Hərdən insanlara kilsələrin Müqəddəs Kitaba bağlı qalmadığını görmələrinə kömək etməli oluruq». Onlar məlumat verirlər ki, hinduistlərə daha çox «Həyatın mənası nədədir? Onu necə tapmaq olar?» broşürasının 4-cü fəslindəki məlumat təsir edir. Orada kilsələrin Allahın Kəlamını necə təhrif etməyə və məhv etməyə çalışdıqlarını izah edilir. Braziliyadan olan bir pioner insanlara belə sual verir: «Nə üçün Müqəddəs Kitabda nədən bəhs edildiyi haqda daha çox öyrənməyəsiniz? Əksər insanlar bunu heç bir dinin təsiri altında olmadan, qərəzsiz şəkildə edirlər. Öyrəndikləriniz sizin üçün olduqca maraqlı olacaq».

9. Əgər kimsə ilk dəfədən Müqəddəs Kitab təlimləri ilə maraqlanmırsa, nə üçün təslim olmamalıyıq?

⁹ Yehova insanın ürəyinə baxır (1 Şam. 16:7; Sül. məs. 21:2). O, ürəyində həqiqi ibadətə düzgün münasibəti olanları cəlb edir (Yəh. 6:44). Bu cür insanların əksəriyyətinin nə Allah haqqında, nə də Müqəddəs Kitab haqqında, az da olsa, bilikləri yoxdur. Bizim xidmətimiz onlara «xilas olub həqiqət barəsində dəqiq biliyə [yiyələnmək]» imkanı verir (1 Tim. 2:4). Buna görə də kimsə ilk dəfədən Müqəddəs Kitab təlimləri ilə maraqlanmayanda təslim olma! Onlarda maraq oyatmaq üçün sizin dildə olan vəsaitlərdən istifadə et. Çox ehtimal ki, bundan sonra əsas dərs vəsaitimiz olan «Müqəddəs Kitab əslində nə öyrədir?» kitabını araşdırmağa başlaya bilərsən.

[Haşiyələr]

[4-cü səhifədəki çərçivə]

Ev sahibi Allaha inanmadığını deyəndə aşağıdakı təkliflərdən istifadə etmək olar:

• Səbəbini öyrənmək üçün soruş: «Siz həmişə bu fikirdə olmusunuz?»

• Əgər o, buddistdirsə, «Əbədi sülh və xoşbəxtliyi necə tapmaq olar?» broşürasından (rus.) istifadə et (səhifə 9—12).

• Əgər o, təkamülə inanırsa, aşağıdakı istinadlar sizə kömək edə bilər:

«Oyanın!» jurnalındakı «Təkamül, yoxsa yaradılış möcüzəsi?» rubrikasından olan məqalələr;

«Yaradılış möcüzələri Allahın əzəmətini bəyan edir» videofilmi (rus.);

«Həyatda məmnunluğu necə tapmaq olar? broşürası (fəsil 4, rus.) və «Həyatın əmələ gəlməsi. Beş vacib suala cavab» (rus.);

• Əgər kimsə ədalətsizliyə və əzab-əziyyətlərə görə Allaha imanını itiribsə, aşağıdakı istinadlar sizə kömək edə bilər:

«Qayğıkeş Yaradan mövcuddurmu?» kitabı (fəsil 10, rus.)

«Allah həqiqətən də bizim qeydimizə qalırmı?» (hissə 6) və «Həyatın mənası nədədir?» (bölmə 6) broşüraları;

• Maraqlananda Allahın mövcud ola biləcəyi fikri yaranan kimi «Müqəddəs Kitab öyrədir» kitabına keç. Müzakirəyə 2-ci fəsildən və ya onun üçün münasib olan başqa mövzudan başlamaq yaxşı olar.

[5-ci səhifədəki çərçivə]

Ev sahibi Müqəddəs Kitaba inanmırsa, aşağıdakı təkliflərdən istifadə etmək olar:

• «Həyat necə əmələ gəlib? Təkamül, yoxsa yaradılma yolu ilə?» kitabının 17, 18-ci fəsillərini (rus.) nəzərdən keçir.

• Hinduistlər üçün «Biz nəyə görə Allaha məhəbbətlə və həqiqətə əsasən ibadət etməliyik?» broşürasından (rus.) istifadə et.

• Yəhudilər üçün «Nə vaxtsa müharibəsiz dünya olacaqmı?» broşürasından istifadə et (səhifə 3—11, rus.).

• Növbəti Müqəddəs Kitab prinsiplərinin faydasını müzakirə et:

«Oyanın!» jurnalında «Ailələrə kömək» rubrikasındakı məqalələr:

«Müqəddəs Kitab — həyatımızı dəyişən qüvvə» videofilmi (rus.);

«İlahi müjdə» broşürası (fəsil 9 və 11), «Hamı üçün olan kitab» broşürası (səhifə 22—26) və «Həyatda məmnunluğu necə tapmaq olar?» broşürası (bölmə 2, rus.)

Buddistlər üçün «Sülh və xoşbəxtliyə aparan yol» broşürasından istifadə et (səhifə 3—7, rus.).

Müsəlmanlar üçün «Xoşbəxtlik gətirən həqiqi iman» broşürasından istifadə et (bölmə 3).

Əgər siz Müqəddəs Kitaba qərəzli münasibətin olduğu bir ərazidə təbliğ edirsinizsə, yaxşı olar ki, bir neçə dəfə başçəkmə edənə kimi bölüşdüyünüz hikmətli sözlərin mənbəyi haqda söz açmayasınız.

• Müqəddəs Kitab peyğəmbərliklərinin necə yerinə yetdiyini izah etmək üçün aşağıdakı vəsaitlərdən istifadə etmək olar:

«Müqəddəs Kitab — dəqiq tarix və etibarlı peyğəmbərliklər kitabı» videofilmi (rus.);

«Hamı üçün olan kitab» broşürası (səhifə 27—29);

• İnsan müxtəlif mövzulara dair Müqəddəs Kitabın nə öyrətdiyi ilə maraqlanan kimi «Müqəddəs Kitab öyrədir» kitabına keç.

[6-cı səhifədəki çərçivə]

Ev sahibi: «Mən Allaha inanmıram», — deyəndə belə demək olar:

• «İcazə verin, Allaha inanmağımın səbəbini qısaca izah edim». Sonra «Mülahizə» kitabının 357—359-cu səhifələrindəki (rus. [rs-TK s. 446—448]) fikirləri bölüş və ya oxumağı xoşladığın ədəbiyyatdan həmin adam üçün gətir.

• «Bəs əgər Allah mövcud olsaydı, Onun necə olmasını istəyərdiniz?» Çoxları Allahın məhəbbətli, ədalətli və mərhəmətli, insanların hisslərini başa düşən olmasını istəyirlər. Müqəddəs Kitabdan Allahın bu keyfiyyətlərə malik olduğunu göstərə bilərsən («Müqəddəs Kitab öyrədir» kitabının 1-ci fəslinin 6-cı abzasından başlayan məlumatdan da istifadə edə bilərsən)».

Ev sahibi: «Mən Müqəddəs Kitaba inanmıram», — deyəndə belə demək olar:

• «Sizin kimi fikirləşən insanlar çoxdur. Onlardan bəziləri hesab edir ki, Müqəddəs Kitab elmi kitab deyil və ya oradakı normalar praktiki deyil. Bəs siz nə vaxtsa Müqəddəs Kitabı oxumusunuz? [Cavab verməsinə izin ver. Sonra «Hamı üçün olan kitab» broşürasının 3-cü səhifəsindəki ön sözü göstər və broşüranı təklif et.] Dinlər Müqəddəs Kitab təlimlərini təhrif etdikləri üçün bu gün çoxları bu kitaba etibar etmir. Növbəti dəfə gələndə sizinlə 4 və 5-ci səhifələrdəki bir nümunəni müzakirə etmək istəyərdim».

• «Bir çoxları sizinlə eyni fikirdədirlər. İcazə verin, sizə Müqəddəs Kitabla bağlı mənə nəyin təsir etdiyini göstərim. [Müqəddəs Kitabın elmi cəhətdən dəqiq olduğunu göstərən Əyyub 26:7, yaxud Yeşaya 40:22 ayəsini oxu.] Həmçinin Müqəddəs Kitabda ailələrə köməyi dəyən hikmətli məsləhətlər var. İstəyərdim gələn dəfə gələndə sizə buna dair bir nümunə göstərim».

• «Fikrinizi mənimlə bölüşdüyünüz üçün minnətdaram. Sizcə, əgər Allah insanlar üçün kitab yazsaydı, orada nədən söhbət gedərdi?» Sonra həmin adama Müqəddəs Kitabdan onun fikirlərinə uyğun gələn bəzi ayələri göstər.