Peyğəmbərlərdən nümunə götürün — Sefanya
1. Sefanya hansı şəraitdə peyğəmbərlik edirdi və biz ondan hansı nümunəni götürə bilərik?
1 Eramızdan əvvəl yeddinci əsrin ortaları idi. Baala ibadət Yəhudanı bürümüşdü. Təzəcə öldürülmüş zalım padşah Amonun yerinə gənc Yoşiya padşah seçilmişdi (2 Saln. 33:21—34:1). Həmin dövrdə Yehova hökm xəbərini bəyan etməsi üçün Sefanya peyğəmbəri göndərdi. Sefanya Yəhudanın padşah nəslindən olsa da, Yehovanın Yəhuda başçılarına çıxardığı hökm xəbərini yumşaltmadı (Sef. 1:1; 3:1—4). Biz də, Sefanya kimi, cəsarətli olmalı və qohumlarımızın Yehovaya ibadətimizə mane olmasına yol verməməliyik (Mat. 10:34—37). Sefanya hansı xəbəri bəyan edirdi və bunun nəticəsi nə oldu?
2. Yehovanın qəzəb günündən qurtulmaq üçün nə etməliyik?
2 Yehovaya meyil sal. Yalnız Yehova Öz qəzəb günündən insanları hifz edə bilər. Buna görə də Sefanya Yəhuda xalqını, nə qədər ki gec deyil, Yehovaya, salehliyə və itaətkarlığa meyil salmağa təşviq edirdi (Sef. 2:2, 3). Bu, bizim günlərdə də zəruridir. Sefanya kimi, biz də insanları Yehovaya meyil salmağa təşviq edirik. Eyni zamanda, özümüz də «Rəbbin yolundan» heç vaxt dönməmək üçün qətiyyətli olmalıyıq (Sef. 1:6). Biz Yehovaya meyil saldığımızı Onun Kəlamını dərindən araşdırmaqla və bizə yol göstərməsi üçün dua etməklə göstərə bilərik. Salehliyə meyil saldığımızı əxlaqi cəhətdən təmiz həyat sürməklə nümayiş etdirə bilərik. İtaətkarlığa meyil saldığımızı isə həlimlik ruhu yetişdirməklə və Yehovanın təşkilatının rəhbərliyinə dərhal hay verməklə göstərə bilərik.
3. Nə üçün xidmətdə müsbət əhval-ruhiyyəni qorumalıyıq?
3 Ürəkaçan nəticələr. Sefanyanın çatdırdığı hökm xəbərinə az adam hay versə də, bu xəbər hələ uşaqlıqdan Yehovanı axtarmağa başlayan gənc Yoşiyaya daha çox təsir etmişdi. Yoşiya ölkədən bütpərəstliyin kökünü kəsmək üçün cəsarətlə islahatlar aparmışdı (2 Saln. 34:2—5). Bu gün də Padşahlıq toxumundan bəziləri yol kənarına, daşlığa və ya tikanlığa düşsə də, bəziləri münbit torpağa düşərək bol-bol bar verir (Mat. 13:18—23). Əminik ki, Yehova Padşahlıq toxumlarını səpmək işimizi indən belə də xeyir-dualandıracaq (Məz. 126:6).
4. Nə üçün Yehovanı gözləməliyik?
4 Bəzi yəhudilərə elə gəlirdi ki, Yehova heç vaxt hərəkətə keçməyəcək. Amma Yehova qəti olaraq bildirmişdi ki, Onun böyük gününə az qalıb (Sef. 1:12, 14). Və yalnız Ona pənah gətirənlər qurtula bilərdi (Sef. 3:12, 17). Buna görə də gəlin Yehovanı gözlədiyimiz müddətdə Uca Allahımıza çiyin-çiyinə xidmət edək! (Sef. 3:8, 9).