Һуғыш ҡурҡыныстарына ҡарамаҫтан йән тыныслығы табыу
«Изге Яҙманы өйрәнә башлағанға тиклем, ни өсөн донъяла ҡанһыҙлыҡ һәм ҡайғы-хәсрәттәр шул тиклем күп икәнен бер ҙә аңламай инем. Әммә хәҙер күңелем тыныс, сөнки тиҙҙән бөтә донъяла именлек хөкөм һөрәсәген беләм. Йәһүә Алла быны үҙе эшләйәсәк».
Күптәр Гари менән ризалашыр. Әйҙәгеҙ, уларҙың ҡайһы берҙәренә Изге Яҙманың нисек ярҙам иткәнен ҡарап китәйек.
ИЗГЕ ЯҘМАНАН АЯТ: «Һин игелекле, ғәфү итергә әҙерһең, бөйөк Хаким» (Зәбур 85:5).
УЛ НИСЕК ЯРҘАМ ИТӘ? «Был һүҙҙәр мине Йәһүәнең шәфҡәтле Алла булыуына инандыра. Мин беләм, һуғышта ҡатнашһам да, ул мине кисерергә теләй» (Уилмар, Колумбия).
ИЗГЕ ЯҘМАНАН АЯТ: «Мин яңы күк, яңы ер яратам. Үткән эштәр инде хәтергә алынмаҫ; бүтәнсә башҡа ла инеп сыҡмаҫ» (Ишағыя 65:17).
УЛ НИСЕК ЯРҘАМ ИТӘ? «Һуғышта кисергәндәрем арҡаһында психик һаулығым ҡаҡшаны, мин депрессиянан яфалана башланым. Ләкин был аят мине шуға ышандыра: оҙаҡламай Йәһүә мине бөтә борсоулы уйҙарҙан һәм һаташтырған ҡурҡыныс төштәрҙән азат итер, улар мине бүтән бер ҡасан да интектермәҫ. Был — иҫ киткес бүләк!» (Зафира, АҠШ).
ИЗГЕ ЯҘМАНАН АЯТ: «Уның көндәрендә тәҡүәләр сәскә атһын, ҡасанғаса күктә ай нур сәсә, шуға тиклем илдә именлек, муллыҡ-бәрәкәт булһын!» (Зәбур 71:7).
УЛ НИСЕК ЯРҘАМ ИТӘ? «Был һүҙҙәрҙе мин йыш ҡына иҫемә төшөрәм. Тиҙҙән һуғыштар һәм уларҙың ҡот осҡос эҙемтәләре юҡҡа сығыр. Беҙгә бүтән яҡындарыбыҙҙың ғүмере өсөн ҡайғырырға тура килмәҫ» (Александра, Украина).
ИЗГЕ ЯҘМАНАН АЯТ: «Һинең үлгәндәрең тереләсәк. […] Эй һеҙ, тупраҡ аҫтында ятҡандар, уянығыҙ, ҡыуанышып йырлағыҙ!» (Ишағыя 26:19).
УЛ НИСЕК ЯРҘАМ ИТӘ? «Мин тутси ҡәбиләһенән. Геноцид ваҡытында бөтә ғаиләм тиерлек вафат булды. Әммә Изге Яҙмалағы был өҙөк мине ғәзиз яҡындарымды яңынан күрәсәгемә ышандыра. Уларҙың ҡыуаныслы тауыштарын ишетәсәк көндө мин зарығып көтәм!» (Мари, Руанда).
ИЗГЕ ЯҘМАНАН АЯТ: «Саҡ ҡына көт, яуыз юҡҡа сығыр. […] Ә баҫалҡыларға ер мираҫ ҡалыр, муллыҡ-именлектә хозурланып йәшәр» (Зәбур 36:10, 11).
УЛ НИСЕК ЯРҘАМ ИТӘ? «Һуғыш бөтһә лә, ғәҙелһеҙлек һәм яуыз кешеләр һаман да бар. Әммә был аяттар миңә көс өҫтәй. Йәһүә барыһын да күреп тора һәм мине яҡшы аңлай. Бөтә ғазаптар юҡҡа сығасаҡ һәм бер ҡасан да иҫкә лә төшмәйәсәк, тип вәғәҙә итә ул» (Далер, Тажикстан).
Был журналда килтерелгән һүҙҙәрҙе Йәһүә шаһиттары әйткән. Уларға һәм уларҙың миллионлаған имандаштарына Изге Яҙма йән тыныслығы табырға ярҙам иткән. Улар раса, милли һәм башҡа төрлө күрә алмаусанлыҡты еңергә өйрәнгән (Эфестарға 4:31, 32). Йәһүә шаһиттары сәйәси һорауҙарҙа нейтраль булып ҡала һәм һәр ҡайһы көс ҡулланыуҙан баш тарта (Яхъя 18:36).
Йәһүә шаһиттары — халыҡ-ара ғаилә. Улар һәр ваҡытта ла бер-береһенә терәк булып тора (Яхъя 13:35). Юғарыла иҫкә алынған Александра бына нимә ти: «Илдең сиге аша үтеү менән үк беҙҙе имандаштарыбыҙ ҡаршы алды. Улар беҙҙе үҙенә саҡырҙы һәм яңы урында төпләнергә ярҙам итте».
Беҙ һеҙҙе осрашыуҙарыбыҙға саҡырабыҙ. Унда беҙ инде хәҙер башҡалар менән татыу йәшәргә өйрәнәбеҙ һәм бөтә ер йөҙөндә тыныслыҡ хөкөм һөрәсәк ваҡыт тураһында белем алабыҙ. Һеҙ йәшәгән ерҙә ундай осрашыуҙарҙың ҡайҙа үткәрелгәнен jw.org сайтында табырға була, шулай уҡ унда «Һин мәңге йәшәй алаһың!» тигән брошюраға нигеҙләнгән Изге Яҙманы өйрәнеү курсына заявка ҡалдырып була. Был курс бушлай, уны шәхси инструктор менән үтеп була.