Yellun Din Kirɔ

Yehofa kun deri tɔn kɔ̃sobu bu Alusanna sanku. Win bɔrɔba tɔnawa ba ko n wãa ye sɔɔ. Mba ya koo tɔn kɔ̃sobu deema? À n kĩ a n wisibu yɛ̃, a Nɔwɛn faagi gea mɛɛrio. Saa Nɔwɛn wãarun waatin di sere gisɔ, n kua wɔ̃ɔ nɔrɔbu dabinu. U raa sãawa tɔn geo wi u ra raa baadomma kookari ko u ka Yehofan gɔ̃ru kĩru ko. Adama tɔn be ba tie temɔ gãa kɔ̃sia ba ra ko. Yen sɔ̃na Yehofa u raa Nɔwɛ sɔ̃ɔwa ma U koo guru bɔkɔ bɔkɔ nɛɛsia U ka tɔn kɔ̃sobu be kpeesia. U Nɔwɛ yiire u kpakororu bani kpa wi ka win dusibu bu ku ka gbi sanam mɛ Nim yibu bakaru koo tunuma.—Torubu 6:9-18.

Nɔwɛ ka win dusiba kpakororu bana. Nɔwɛ u tɔmbu kirɔ kua ma Nim yibu bakaru ta wee, adama ba ǹ nùn swaa daki. Ba ra ben gãa kɔ̃si mɔ ba n sosimɔwa. Sanam mɛ ba kpakororu bana ba kpa, Nɔwɛ u yɛɛ duusia kpakororu sɔɔ, ma wi ka win dusibu ben tii ba maa dua ye sɔɔ. Yen biru Yehofa u guru woo bɔkɔ soka. Gura ya nawa sɔ̃ɔ sɔɔ 40 ka wɔ̃kuru 40. Nim mu tem gira kpuro yibia.—Torubu 7: 7-12.

Tɔn kɔ̃sobu ba ben wãaru bia, adama Nɔwɛ ka win dusibu ba faaba wa. Yehofa u be kpara ka alafia Nim yibu bakarun saa sɔɔ sere ba tura tem dɛɛram sɔɔ ka kɔ̃sa sari. (Torubu 7:22, 23) Bibeli ya nɛɛ ma saa ya kpam tunuma ye sɔɔ Yehofa u koo tɔn be ba yina bu gea ko kam koosia. Tɔn geobu ba ǹ kam mɔ. Ba koo n wãawa Alusanna sɔɔ temɔ sere ka baadommaɔ.—2 Piɛɛ 2:5, 6, 9.

Gisɔn tɔ̃ru tɔn dabina gãa kɔ̃si mɔ̀. Handunia ya wahala yiba. Yehofa u ra n win Seeda diobu gɔramɔ bu ka tɔmbu kirɔ ko, adama tɔn ben dabina ba ǹ kĩ bu Yehofan gere swaa daki. Ba ǹ kĩ bu ben daa kɔsi. Ba ǹ kĩ bu mwa ye Gusunɔ gerumɔ gea ka kɔ̃sa sɔɔ. Mba ya koo tɔn be deema? Ba koo sɔ̃ɔ teeru kɔsi ro? Ben dabinu kun kɔsimɔ pai. Saa ya wee ye sɔɔ tɔn kɔ̃sobu ba koo kam ko kpa ba n kùn maa wãa pai.—Womu 92:8.

Ba ǹ tem kpeesiamɔ; ba koo mu gɔsia alusannawa. Be ba Gusunɔn bɔrɔba gɔsiamɔ ba ko n wãa sere ka baadommaɔ Alusanna sɔɔ temɔ.—Womu 37:29.