SƆ̃ƆSI 03
Kaa kpĩ a Bibeli naanɛ ko?
Bibeli ya nɔɔ mwɛɛ dabinu mɔ ma ya bwisi kɛ̃ɛ dabinu wɛ̃ɛmɔ. Sɔrɔkudo a sɛnde a tubu sɔ̃ɔsi ni Bibeli ya wɛ̃ɛmɔ, adama a sika sika mɔ̀. Kaa kpĩ a tire tɔkɔ tenin bweserun nɔɔ mwɛɛnu ka bwisi kɛ̃nu naanɛ ko? Sa koo kpĩ su ye Bibeli ya gerumɔ n arufaani di saa tɛ̃n di? Sa koo maa kpĩ su ye ya gerumɔ sia sɔɔ naanɛ ko? Tɔn yako dabina ye naanɛ sãa. A de su wa à n kaa maa kpĩ a ye naanɛ ko.
1. Bibelin gari yi sãawa gem nge sukuna?
‘Gari geeya’ yi wãa Bibeli sɔɔ. (Waasu kowo 12:10) Yèn gari ya kua ya koorawa ka gem, tɔn bèn gari ya maa kua ba wãaru di ka gem. (A Luku 1:3; 3:1, 2 gario) Faagi yɛ̃robu ka kaso kowo dabinu ba wura ma ye Bibeli ya gerua tɔ̃nu ganu, tɔmbu gabu ka ayenu ganu sɔɔ, ya koorawa ka gem.
2. Baa mɛ ba Bibeli yorua ya tɛ mban sɔ̃na sa koo kpĩ su ye naanɛ ko?
Bibeli ya gãa dabinun gari kua ni tɔn dabina kun daa tuba sanam mɛ ba ni yorumɔ. Sà n weenasia sua, ya kason gari kua. Gãa dabi nin gari ya kua kaso kobu sɔɔ tɔn dabina kun ye naanɛ kue ba ye siki saa ye ba ye yorumɔ. Adama, bɛsɛn waatin kaso kowobu ba sɔ̃ɔsi ma ye Bibeli ya raa gerua gema. “Ya ko n sirerewa sere ka baadommaɔ.”—Womusu 111:8.
3. Mban sɔ̃na sa koo kpĩ su ye Bibeli ya gerumɔ sia sɔɔ naanɛ ko?
Bibeli ya sɔmɔbun garia mɔ yi yi “gerua yellun di ye ya koo koora.” (Esai 46:10) Ya gãa dabinu nɔɔsia kpasasa nu sere koora. Ya maa ye ya kooramɔ gisɔn tɔ̃run gari kua kpasasa. Sɔ̃ɔsi teni sɔɔ, sa ko Bibelin sɔmɔbun gari gɛɛn gari ko. Mɛ gãa ni nu ka koora mam mam nge mɛ Bibeli ya gerua ya maamaaki mɔ.
A SƆ̃ƆSI TE DUKIASIO
A wɛ̃ɛrio mɛsum gisɔn kaso kowobun gari, yi mwaanɛ ka ye Bibeli ya gerua, kpa a maa sɔmɔbun gari maamaakigii gɛɛn fiiko wɛ̃ɛri.
4. Ye kaso kowo ba wa ya mwaanɛ ka ye Bibeli ya gerumɔ
Yellu, tɔn dabina raa tamaa tem mu sɔ̃wa gãanun wɔllɔ. A FIDEO mɛɛrio.
A daakari koowo ye ba yorua Yoobun tireru sɔɔ yen wɔ̃ɔ 3500 ka sɔndiru wee. A Yoobu 26:7 gario, yen biru i wesianɔ gari yini sɔɔ:
Ba nɛɛ tem bwɛ̃ɛ “kam dirun sɔɔ”, mban sɔ̃na gari yi yi maamaaki mɔ?
Wɔ̃ɔ 1800 ba sɔɔra ba den tuba mɛ nim sanum mu sãa wɔllu ka tem baa sɔɔ. Adama a mɛɛrio ye Bibeli ya raa gerua yen wɔ̃ɔ nɔrɔm nɔrɔm dabinu wee. A Yoobu 36:27, 28 gario, yen biru i wesianɔ gari yini sɔɔ:
Mban sɔ̃na mɛ ba ka nim sanum mɛ tubusia tokereke ya maamaaki mɔ?
Bibelin naa si a garim kpee su wunɛn naanɛ dam sosi Bibeli sɔɔ?
5. Bibeli ya raa gãa girinu nɔɔsia
A Esai 44:27–45:2 gario, yen biru i wesianɔ gari yini sɔɔ:
Mba ka mba n garia Bibeli ya raa nɔɔsia wɔ̃ɔ 200 bu sere Babiloni kam koosia?
Faagi dio ba gerua ma sunɔ Sirusi Persigii ka win tabu kowobu ba Babilonin wuu maro kam koosia wɔ̃ɔ 539 sɔɔ bu sere Yesu ma. Ba daa te ta bu sikerenɛ gberasia. Ba dua wuu gen kɔnnɔn di, gèn gambo nu dɔma te wukiare, ma ba wuu ge mwa sannɔ sari. Gisɔ yen wɔ̃ɔ 2 500 ka sɔndira mi, min di Babiloni ya sãa bansu. Tɛ̃ a wɛ̃ɛrio ye Bibeli ya raa gerua.
A Esai 13:19, 20 gario, yen biru i wesianɔ gari bikia bini sɔɔ:
Amɔsunwa ye ya koora Babiloniɔ ya ka sɔ̃ɔsi ma sɔmɔbun gari yi, yi yibiara?
Babilonin bansu gisɔn tɔ̃ru Irakin temɔ
6. Bibeli ya raa gãa ni sa waamɔ gisɔn gari kua
Bibeli ya sun sɔ̃ɔmɔ ma sa wãawa gisɔ “sanam dãakim sɔɔ.” (2 Timɔte 3:1) A daakari koowo ye Bibeli ya gerua sanam dãakim mɛni sɔɔ.
A Mateu 24:6, 7 gario, yen biru i wesianɔ gari bikia bini sɔɔ:
Mba ka mba Bibeli ya nɛɛ sa koo wa sanam dãakim mɛni sɔɔ?
A 2 Timɔte 3:1-5 gario, yen biru i wesianɔ gari bikia bini sɔɔ:
Amɔsunwa Bibeli ya nɛɛ tɔn ba ko n sãa sanam dãakim sɔɔ?
Daa be ba sia sɔɔ, ben berà a waamɔ ya kooramɔ?
GABA RA NƐƐ: “Bibeli ya sãawa sukunu ka gari suninun tireru.”
Wunɛn waaru sɔɔ, mba ya nun siremɔ n kere ma sa koo kpĩ su Bibeli naanɛ ko?
MBA A GIA
Yellun gari, kaso kobu ka sɔmɔbun gari ye kpuro ya sɔ̃ɔsimɔ ma sa koo kpĩ su Bibeli naanɛ ko.
Mba kaa wisi
Ye ya wãa Bibeli sɔɔ gema nge sukuna?
Swɛɛ yirà sɔɔra kaso kobu bu mwaanɛ ka ye Bibeli ya gerua?
Wunɛn waaru sɔɔ, Bibeli ya ye ya koo koora sia nɔɔsiamɔ? Mban sɔ̃?
A WƐ̃ƐRIO
Gari yi Bibeli ya gerua kaso kobu sɔɔ ya deedeeru swĩi?
“Ye kaso kowo ba gerua ya mwaanɛ ka ye Bibeli ya gerua?” (Yirikisin kpararu)
Koma nirà sa waamɔ nu kooramɔ “sanam dãakim sɔɔ”?
“Bibelin sɔmɔbun gari 6 ye a waamɔ ya kooramɔ” (La Tour de Garde, 1er mai 2011)
A mɛɛrio mɛsum Bibelin sɔmɔbun gari yi yibiara Gɛrɛkim sinandu sɔɔ.
A mɛɛrio mɛsum Bibelin sɔmɔbun gari yi durɔ goon yam waaru kɔsa Bibeli sɔɔ.
a Sɔmɔbun gari yi sãawa dabaaru ye ya wee Gusunɔn min di ye ya ko koora sia sɔɔ.