Mba n sɔm kowo dɛrobun sɔmburu?

Kirisigibun suunu sɔɔ, Bibeli ya tɔn wuunu yirun gari kua be ba ra yigbɛru nɔɔri, bera guro gurobu ka sɔm kowo dɛrobu. (Filipi 1:1) Yigbɛnu dabinu sɔɔ, sa ko kpĩ su guro gurobu ǹ kun mɛ sɔm kowo dɛrobu ben yiru, ita, ǹ kun mɛ ya n kere mɛ wa. Sɔmbu terà sɔm kowo dɛrobu ba mɔ̀ bɛsɛn arufaanin sɔ̃?

Ba ra guro gurobun wuuru nɔma kɛ̃ yigbɛru sɔɔ. Sɔm kowo dɛro ba sãawa be ba kookari mɔ̀ ben bɔrɔnu ka Gusunɔn swaa sɔɔ, ba naanɛ mɔ ma ba ra ben sɔmburu ko ka laakari; ben gaba sãa aluwaasiba, gaba maa bukure. Ba ra n ye ya sãa sɔma girin nɔni do, nge sɔm yãa nin bukata sa ra n mɔ ka ye n weenɛ bu sɔmɛ kpuro, yigbɛrun wuswaa daabun sɔ̃. Ben sɔma ya ra guro gurobu somi ba n ka nɔni doke ye ya girim bo sɔɔ, sɔ̃ɔsiru ka yigbɛrun kparabu.

Ba ra yigbɛru somi. Sɔm kowo dɛro ben gaba ra tɔmbu dam koosie bà n mɛnnɔsu na. Gaba ra sɔm yãa ni sa ka womu mɔ̀ ka ni sa ka gari mɔ̀n nɔni do, gaba ra maa tirenu bɔnu ko, gabu maa ni, dooru sɔɔwa ba wãa ma gaba tem bɔnun kaatiba nɛni, ye ya ra sun somi waasu sɔɔ. Ba ra maa yigbɛru dere Bandu yeru ta n ka dɛɛre. Guro guroba koo kpĩ bu be kana bu tɔkɔbu gabu nɔma kɛ̃. Sɔmbu te sɔm kowo dɛro ba gesi mɔ̀ kpuro, ta tura su ka be bɛɛrɛ wɛ̃.—1 Timɔte 3:13.

Ba ra swaa ye n weenɛ Kirisigii u swĩi sɔ̃ɔsi. Ba ra sɔm kowo dɛrobu gɔsiwa yèn sɔ̃ ba sɔ̃ɔsi ben wãaru sɔɔ ma ba Kirisigiin daa mɔ. Bà n mɛnnɔn bɔnu gaa mɔ̀, ba ra bɛsɛn naanɛ dokebu dam kɛ̃. Bà n gbia waasu kobun sɔmburu sɔɔ, ba ra bɛsɛn hania dam sosi. Yen sɔ̃ ba ra tii wɛ̃ bu ka ben berusebu somi, ba ra de nuku dobu ka nɔɔsina ya n wãa. (Efesu 4:16) Bà n kookari mɔ̀ mɛ, ba koo ra maa kpĩ bu gɔsia guro gurobu.

• Tɔn beràn bwesera sɔm kowo dɛrobu?

• Swaa yerà sɔɔwa sɔm kowo dɛro ba ra yigbɛru dere tu ka wuswaa da?