Yesu ra mɛm nɔɔ baadomma

Ya ra nun sɛ̃siɛ a ka wunɛn mɔwɔbu mɛm nɔɔwa?— Gasɔ ya ra n sɛ̃. A yɛ̃ ma Yesu u raa Yehofa ka maa win mɔwɔbu tem sɔɔ mɛm nɔɔwa?— Win kom mu koo kpĩ mu nun somi a ka wunɛn mɔwɔbu mɛm nɔɔwa baa mɛ ya ra n sɛ̃. A de su gia su sosi ye sɔɔ.

Yesu u sere na temɔ, u raa wãa wɔllɔ ka win Tundo Yehofa. Adama, Yesu u raa maa mɔwɔbu mɔ tem mini. Ben yĩsira Yosɛfu ka Maari. A yɛ̃ amɔsunwa ya koora ba ka kua win mɔwɔbu?—

Yehofa u Yesu sua wɔllun di ma u win wãaru kpɛ̃ Maarin nukurɔ kpa bu Yesu ma u ka wãaru di temɔ. Ya raa sãawa maamaaki! Yesu u kpɛ̃a Maarin nukurɔ nge mɛ bibu kpuro ba ra kpɛ̃ɛ ben mɛron nukurɔ. Suru nɔɔba nnɛn biru, Maari u Yesu mara. Mɛna Maari ka win durɔ Yosɛfu ba kua Yesun mɔwɔbu tem mini.

Sanam mɛ Yesu u wɔ̃ɔ wɔkura yiru mɔ, u gãa ganu kua ni nu sɔ̃ɔsi ma u win Tundo Yehofa kĩ too. Yeni ya koorawa sanam mɛ Yesu ka win yɛnugibu ba da wuu min tonde. Wuu gera Yerusalɛmu, miya ba ra Gɔɔ Sararibun tɔ̃ɔ bakaru di. Ye ba wurɔ ben wuu gia, swaaɔ ba ǹ Yesu wa ben wuuru sɔɔ. A yɛ̃ mi u raa wãa ro?—

Yosɛfu ka Maari ba duka wura Yerusalɛmuɔ ma ba Yesu kasu yam kpuro. Ba wurure too domi ba ǹ wi wa. Adama, sɔ̃ɔ itasewa ba wi wa sãa yerɔ! A yɛ̃ mban sɔ̃na Yesu u raa wãa sãa yerɔ?— Yèn sɔ̃ migun u koo kpĩ u gia win Tundo Yehofa sɔɔ. U Yehofa kĩ too ma u kasu u gia mɛ u ko ka wi wɛ̃re. Baa sanam mɛ Yesu u kpɛ̃a u gɔsia bukuro, u ra Yehofa mɛm nɔɔwɛwa baadomma. Baa mɛ ya sɛ̃, ka mɛ Yesu u mɛm nua. Baa mɛ ya ka nɔni swãaru na, ka mɛ u mɛm nua. Yesu u maa Yosɛfu ka Maari mɛm nɔɔwa ro?— Oo, Bibeli ya gerua ya nɛɛ, mɛna.

Sɔ̃ɔsi terà kaa kpĩ a sua saa Yesun kom di?— N weenɛ a wunɛn mɔwɔbu mɛm nɔɔwa baa ya n sɛ̃. Kaa ye ko ro?—