Februari

Songon na disurat ni si Jakobus, ”Ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang.” (Jak. 1:4) Songon dia do ulaon na denggan dihorhon habengeton? Tingki marsitaonon hita, jotjot ingkon tapatuduhon hasabaron, holong dohot pangargaion. Alani i, molo marhabengeton do hita mangadopi sitaonon, boi do on gabe tingki di hita laho patuduhon angka parange na denggan i. Ala habengeton boi mambahen hita lam denggan, unang ma tatadingkon patik ni Jahowa holan asa malua sian pangunjunan. Umpamana, nang pe marungkil hita mangalo pingkiran na rorang, unang olo hita talu! Tapangido ma pangurupion sian Jahowa mambolongkon pingkiran sisongon i. Adong do keluargamu na so marlomo ni roha tu haporseaonmu? Unang talu hamu alani i! Pillit ma tongtong manomba Jahowa. Ingot ma, asa dihalomohon Debata, ingkon marhabengeton do hita.​—Rom 5:3-5; Jak. 1:12. w16.04 2:15, 16

Dos do sude jolma di adopan ni Jahowa. Nang pe godang ragam ni suku ditompa Jahowa, alai boi do hita marlas ni roha rap marsaor dohot nasida. Ndang lomo roha ni Jahowa patutoru manang patimbohon suku manang hasomalanta. (Rom 10:12) Unang ma tadok dumenggan do bangso manang negaranta sian na asing. Alai, molo songon i do pangkilalaanta, on mambahen hita maol netral. Hea do masa na songon on di abad na parjolo. Ndang denggan dibahen halak Kristen na marhata Heber maradophon angka halak Kristen na mabalu na marhata Junani. (Ul. 6:1) Sian dia do boi taboto hita mangkaringkothon hasangapon? Molo adong donganta sian luat na asing mangalehon pandapot laho mangurupi hita, pintor juaonta do jala tadok di rohanta, ’Dumenggan do na taulahon di ingananta saleleng on’? Molo songon i do, taingot ma poda na didok di ayat sadari on. w16.04 4:12, 13

Jesus mamaritahon ”barita na uli taringot Harajaon” jala i do na ingkon dibaritahon siihuthon ibana. Punguan na dia do na mamaritahon barita na uli taringot Harajaon? (Mat. 28:19) Holan Sitindangi Ni Jahowa do na mangulahon i! Parrohahon ma na didok ni sahalak imam Katolik taringot Sitindangi Ni Jahowa. Disungkun ibana do Sitindangi Ni Jahowa di sude negara na hea diingani ibana taringot aha na dibaritahon nasida. Imam i mandok, ”Oto hian do nasida, alusna holan sada, ’Barita na uli taringot Harajaon.’” Aha na didok ni imam i, patuduhon molo hita ndang na oto, alai sasintongna on patuduhon hita halak Kristen na marsada ni roha. (1 Kor. 1:10) Tarida do muse barita on sian majalah Joujou Paboahon Barita Harajaon ni Jahowa. Majalah on, adong di 254 bahasa jala ganup bulan dicetak godangna hirahira 59 juta. On ma majalah na gumodang disarhon di liat portibi on! w16.05 2:6

Olo do ra lomo rohamu gabe perintis. Ra, nunga dibahen hamu hamubaon di ngolumuna asa boi pangkeonmu godang tingki laho marbarita. Alai, olo do ra ganggu rohamuna molo hurang parhepengon na mambahen moru las ni rohamuna. Ndang adong dipaboa di Bibel ingkon merintis do hita laho manomba Jahowa. Nang pe hita penyiar, tongtong do hita boi manomba Jahowa. Alai Jesus paboahon, pasupasuon ni Jahowa do halak na mangalehon godang tingkina humongkop Harajaon. (Luk. 18:29, 30) Dipaboa di Bibel, las do roha ni Jahowa molo marsitutu hita manomba Ibana, jala lomo rohaNa hita marlas ni roha. (Ps. 119:108) Molo tatangiangkon jala tarimangi sudena on, boi ma hita manontuhon na laho sipillitonta jala mangkirim tu pasupasu ni Jahowa. w16.05 3:13

Ringkot di sude halak Kristen manjaha hatorangan di publikasi na diparade tu angka na poso. Godang parsoalan na diulas di buku i mangkorhon tu sude halak Kristen. Umpamana, ingkon tajaga do haporseaon, taorom muruk, unang tarelaela jala tapadao hiburan dohot parsaoran na roa. Alani i, nang pe buku on diparade tu angka na poso, alai hatoranganna marojahan sian Bibel jala marlaba do tu sude halak Kristen. Buku na diparade tu angka na poso, boi mangurupi nasida patoguhon paralealeonna tu Jahowa. Alai, boi do tong angka naung magodang mandapot laba sian i.​—Pjm. 12:13. w16.05 5:15, 16

”Jahowa Debatanta i, Jahowa Sasadasa do.” Hata on patoguhon roha, jala mangurupi halak Israel asa marhabengeton manaon hasusaan tingki bongot tu tano Kanaan. Hata on pe, patoguhon rohanta mangadopi hasusaan bolon jala gabe parsidohot tu Paradeiso. Tongtong ma panombaonta talehon tu Jahowa. Ingkon tahaholongi jala tasomba Ibana sian nasa roha, pingkiran dohot gogonta. Ingkon marsitutu do hita manjaga hadameon dohot hasadaon tu angka donganta. Molo tongtong taulahon songon on, papunguon ni Jesus ma hita tu punguan ni birubiru, jala idaonta ma hata ni Jesus digohi na mandok, ”Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on!”​—Mat. 25:34. w16.06 3:2, 20

Ginjang ni roha mambahen hita pasintongkon dirinta. Tingki masa sisongon i, gabe songon tano liat na maol ditopa ma hita. Hea do hansit rohamu dibahen donganta? Muruk do hamu tingki ndang mandapot hak na sumurung be hamu di huria? Gabe ginjang do rohamuna, manang rumingkot do di hamu mardame dohot dongan jala marsihohot tu Jahowa? (Ps. 119:165; Kol. 3:13) Tingki sasahalak mangulahon dosa jala sai ditabunihon dosana, boi do i mambahen ibana maol manjalo poda sian Debata. On mambahen ibana mura mangulahon dosa. Sahalak donganta baoa mandok, tingki diulahon na sala ndang pintor mangkuling panggora ni rohana. (Pjm. 8:11) Donganta baoa na asing na jotjot manonton pornografi mandok, ”Gabe jotjot do ahu marungutungut tu angka sintua.” Ala nunga somal ibana manonton pornografi, sega ma paralealeonna tu Jahowa. Tingki adong mamboto hasomalanna on, diurupi sintua ma ibana. Tutu do hita sude mardosa. Alai, molo jotjot hita marungutungut tu halak na mamodai hita jala tongtong mangulahon dosa, boi do on mambahen jogal rohanta. w16.06 2:5, 6

Diboto Jesus do na holsoan angka siseanna taringot sipanganon, siinumon, dohot pangkean. Diurupi Jesus do nasida mangantusi boasa ndang porlu holsoan taringot na dihaporluhon. Diboto Jesus, molo paholsohu nasida taringot na dihaporluhon, gabe lupa ma nasida na rumingkot di ngoluna. Diparrohahon Jesus do angka siseanna. Tingki marjamita di dolok, opat hali ma Jesus paingothon nasida. (Mat. 6:27, 28, 31, 34) Diboto Jesus do na dihaporluhon jolma. Diboto ibana do lam susa ngolu ni angka siseanna ”di angka tingki parpudi” on. (2 Tim. 3:1) Sasintongna, godang do halak na maol mangalului karejo jala lam arga angka situhoron. Di inganan na asing, godang jolma na pogos jala ndang adong sipanganonna. Alai diboto Jesus, rumingkot do ”hosa sian sipanganon” jala rumingkot do ”daging sian parabiton”. w16.07 1:8, 9

Ala jotjot hita mangulahon na sala, ndang patut hita mandapot asi ni roha ni Debata. Raja Salomo mandok, ”Ndang adong nanggo sahalak di tano on, na sai tongtong tigor jala na so hea sala.” (Pjm. 7:20, Bibel siganup ari) Apostel Paulus mandok, ”Tung saluhut do nasida mardosa jala ndang dapot pujion ni Debata nasida” jala ”upa tinuhor ni dosa do hamatean.” (Rom 3:23; 6:23a) Ala Jahowa mangkaholongi jolma, dilehon ma ”Anakna na sasada i” mate humongkop hita. On ma asi ni roha ni Debata na umbalga. (Joh. 3:16) Si Paulus mandok, ”[Jesus] martumpalhon hasangapon dohot hamuliaon, ala nunga ditaonhon hamatean i, asa sian asi ni roha ni Debata Ibana mangahap hamatean i humongkop saluhut.” (Heb. 2:9) Tangkas ma, ”basabasa ni Debata do hangoluan salelenglelengna marhitehite Kristus Jesus Tuhanta i”.​—Rom 6:23b. w16.07 3:3, 4

Godang do halak na mardongan saripe. Alai, songon dia do mula ni parsaripeon jala aha do na tinujuna? Molo taboto alusna, tadapot ma pangantusion dohot pasupasu. Ditompa Jahowa ma si Adam, dung i disuru ma ibana mambahen goar ni binatang. Diida si Adam ma sude binatang i adong donganna, alai ”anggo di si Adam ndang adong jumpang pangurupi bahen donganna”. Dibahen Debata ma si Adam tarpodom, dibuat ma sada rusukna jala dibahen gabe borua. Dilehon Jahowa ma borua i tu si Adam gabe tungganeboruna. (1 Mus. 2:20-24) Boi ma tadok, parsaripeon i silehonlehon sian Jahowa. Diulahi Jesus do muse na nidok ni Jahowa di porlak Eden, ”Dibahen i tadingkonon ni baoa do amana dohot inana, laho patophon dirina tu dongan saripena, gabe sada daging do nasida na dua.” (Mat. 19:4, 5) Ala sian rusuk ni si Adam borua i, ingkon ingoton ni na mardongan saripe do naung gabe sada nasida. Ndang dihalomohon Jahowa halak naung mardongan saripe marsirang manang marhasohotan tu lobi sian sada halak. w16.08 1:1, 2

Ndang holan di jolo ni natorop Jesus marbarita. Alai, jotjot do ibana marbarita tu sasahalak, jala lambok do ibana tingki pasahathon barita i. Umpamana, martungkar pingkiran do ibana dohot borua na mambuat aek sian sumur di jonok ni huta Sikar. (Joh. 4:5-30) Martungkar pingkiran do Jesus dohot si Mateus Lepi, pemungut pajak, jala ditogihon do ibana asa gabe siseanna. Ditangihon ibana do Jesus jala ditamue do Jesus dohot na asing. Disi, mangkatai ma Jesus dohot torop halak. (Mat. 9:9; Luk. 5:27-39) Lambok do Jesus tingki mangkatai tu si Natanael, nang pe leas roha ni si Natanael mangida halak sian Nasaret. Ala lambok Jesus, muba ma roha ni si Natanael mangida Jesus na sian Nasaret. Lomo ma roha ni si Natanael diajari Jesus. (Joh. 1:46-51) Sian on taboto, molo lambok hita mangkatai, lomo ma roha ni halak manangihon hita. Tingki talatik na asing mangulahon on, lam lomo ma roha ni nasida marbarita na uli. w16.08 4:7-9

Ala ndang boi pasaehon parsoalan, adong do pigapiga halak na mamillit gabe marsirang manang padaodao. Godang do halak gabe padaodao ala godang parsoalan di keluargana. Tingki didok Jesus songon dia Hata ni Debata taringot parsaripeon, na ingkon tadingkonon ni baoa do amana dohot inana, asa rap dohot dongan saripena, didok Jesus do muse, ”Naung pinadomu ni Debata, ndang jadi sirangon ni jolma.” (Mat. 19:3-6; 1 Mus. 2:24). Lapatanna, ndang dihalomohon Jahowa parsirangan. Alani i, tungganedoli dohot tungganeboru naung pinadomu ni Debata, ingkon rap saleleng nasida mangolu. (1 Kor. 7:39) Taingot ma, martanggung jawab do hita tu Jahowa taringot parniulaonta. On mangurupi hita asa hatop pasaehon parsoalan. w16.08 2:10, 11

Ingkon sai jaga do hita. Boasa? Alana, olo do ro musu tingki gale hita manang sian na so panagaman ni rohanta. Molo tongtong taalo hajahaton, boi do hita monang! Alai, molo ndang jaga hita jala ndang mangalo, talu ma hita dibahen Sibolis, portibi on, dohot hagaleonta. Alani i, tongtong ma marhiras ni roha jala unang ma galegale tanganmuna! (1 Ptr. 5:9) Asa boi monang, ingkon taingot do boasa hita marjuang. Ingkon marjuang do hita asa dihalomohon Debata jala mandapot pasupasu. Heber 11:6 mandok, ”Ai halak na mandapothon Debata, ingkon dihaporseai: Adong Debata; laos Ibana do silehon upa tu angka na manjalahi Ibana.” Manjalahi Jahowa, lapatanna ingkon marsitutu do hita asa dihalomohon Ibana.​—Ul. 15:17. w16.09 2:4,5

Di Bibel, adong do tudutudu na mangurupi hita asa marbisuk mamillit na denggan. Aha na tapangke patuduhon ise hita. Ra, asing do gaya dohot pangkean na tapangke sian halak na asing. Alai, pangkeanta ingkon tongtong rapi, ias, jala tama diida angka halak. Ndang mura mangalului pangkean na tama idaon. Godang do toko holan manggadis pangkean na godang dipangke halak saonari. Alani i, porlu do tingki jala ingkon marsitutu do mangalului rok, baju, kemeja, jas, dohot celana panjang na so paketathu. Las do roha ni angka donganta mamparrohahon hita tongtong marpangkean na denggan jala tama idaon. Mansai las do rohanta ala nunga mamangke pangkean na parohon sangap tu Debata. w16.09 3:15, 16

Somalna, mura do dakdanak mangingot. Molo dibahen hamu tudosan, na mangurupi ianakhonmuna do hamu asa marpingkir. On mangurupi nasida mamingkirhon, mangantusi, jala mangingot na niajarhonmuna. Gabe las ma rohanasida marsiajar. Pangke ma tudosan mangajari ianakhonmuna asa diboto sintong do isi ni Bibel. Umpamana, jahahon ma ayat sadari on. Unang ma holan paboahon molo hatorangan di ayat i sian Jahowa. Urupi ma ibana marpingkir. Dok ma, di tingki ni si Job ndang adong na porsea molo tano on digantungkon di na soada. Diboto nasida, ingkon adong do ojahan ni benda songon bola manang batu. Di tingki i, ndang adong dope bukti na patuduhon tano on digantungkon di na soada, ala ndang adong dope teleskop manang pesawat luar angkasa. Parsiajaranna, nang pe Bibel i nunga leleng disurat, alai sintong do isina ala sian Jahowa.​—Neh. 9:6. w16.09 5:9, 12

Molo marhaporseaon tu Jahowa dohot Jesus, ndang sae holan mamboto aha na diulahon nasida tu hita saonari dohot di ari na naeng ro. Alai, ingkon hombar do parngoluonta tu na diajarhon nasida. Marhiras ni roha ma hita mangurupi na asing asa mananda nasida. Asa boi mangolu salelengna di tano na imbaru, ingkon tajaga do asa tongtong togu haporseaonta. Haporseaon i dos songon suansuanan. Asa denggan tubu, ingkon jotjot do tasiram. Molo ndang tasiram, boi do gabe malos jala mate. Suang songon i ma, ingkon taparrohahon do haporseaonta asa tongtong denggan jala lam togu.​—Tit. 2:2; 2 Tes. 1:3; Luk. 22:32; Heb. 3:12. w16.10 4:4, 5

Tingki ditaban si Daniel dohot angka donganna tu Babel, dipaksa halak Babel do nasida mangihuthon hasomalan dohot agama na disi. Aha do na diulahon halak Babel? Diajari nasida do ”hata ni halak Kasdim” tu si Daniel dohot angka donganna jala dilehon do tu nasida goar ni halak Babel. (Dan. 1:3-7) Goar na dilehon tu si Daniel, i ma si Beltsasar, dewa ni halak Babel na umgogo. Lomo roha ni Raja Nebukadnesar asa porsea si Daniel, umgogo do debata ni halak Babel sian Jahowa. (Dan. 4:5) Di Babel, dilehon do sipanganon ni raja na tabo tu si Daniel. Alai, ibana ”nunga marsangkap hian di bagasan rohana” asa unang mangalo patik ni Debata. (Dan. 1:8) Ala tongtong diparsiajari ibana buku na badia, na marbahasa Heber, tongtong ma togu paralealeonna tu Jahowa nang pe di inganan na asing. (Dan. 9:2) Sasintongna, hirahira 70 taon dung di Babel ibana, diboto halak do goarna di bahasa Heber, i ma si Daniel.​—Dan. 5:13. w16.10 2:7, 8

Mulai sian taon 1919, nunga dipillit Jesus ”naposo haposan jala na marroha” mangurupi naposo ni Debata mangantusi Bibel jala mangihuthon i. (Mat. 24:45-47) Molo taihuthon poda sian Bibel, hita manjaga huria tongtong badia, dame, jala marsada. Sungkun ma dirimuna, ’Marsihohot do ahu tu Jesus jala huihuthon do tudutudu sian naposo haposan?’ Ala marsiajar Bibel, gabe taboto ma naposo ni Jahowa di surgo pe denggan do diatur. Umpamana, diida si Hesekiel do Jahowa hundul di huretaNa na boi hatop marlojong tudia pe dihalomohon rohaNa. (Hes. 1:4-28) Satongkin nai, salpuhonon ni Kristus dohot surusuruanna ma hajahaton. Ndang adong be na mangaleai manang mangalo Jahowa laho mamarenta tano on! w16.11 3:9, 10

Songon halak Kristen najolo, hita marpungu saonari asa diajari jala dipatogu. (1 Kor. 14:31) Angka halak naung leleng manomba Jahowa pe porlu do dipatogu. Taingot ma si Josua. Tingki laho bongot halak Israel tu Tano Kanaan, dipillit Jahowa do si Josua manguluhon nasida. Nang pe si Josua nunga leleng manomba Jahowa, disuru Jahowa do si Musa patoguhon si Josua. Jahowa mandok, ”Dung i dokkon ma si Josua, asa pir tondina i jala marsihohot, ai taripar do anggo ibana manguluhon bangso on, jala ibana marbagihon tano naung niidam bahen partalian nasida.” (5 Mus. 3:27, 28) Porlu do si Josua dipatogu. Alana, godang do parporangan na laho diadopi bangso Israel jala hea do talu nasida. (Jos. 7:1-9) Hita pe boi do patoguhon angka sintua dohot pengawas wilayah, na marsitutu manjaga naposo ni Debata.​—1 Tes. 5:12, 13. w16.11 1:12, 13

Diboto Parsiajar Bibel, ndang sae holan paboahon tu keluarga, tu dongan, dohot tu anggota ni gareja taringot na so olo be nasida dohot tu agama na so sintong. Lomo roha ni nasida asa diboto sude halak, Babel na Balga, i ma agama na so sintong! Alani i, bulan Desember 1917 sahat tu mula ni taon 1918, Parsiajar Bibel mangalehon 10.000.000 risalah na marisi artikel na marjudul ”Halelengse ni Babel”. Risalah i patuduhon hasintongan taringot angka gareja na mandok dirina Kristen. Tontu taboto do gabe muruk angka pemimpin ni gareja! Alai, marhiras ni roha do Parsiajar Bibel. Marsitutu do nasida marbarita jala unduk ”di Debata asa di jolma”. (Ul. 5:29) Aha do na boi taboto sian on? Taboto ma, saleleng Porang Dunia I, angka halak Kristen na marsihohot ndang ditaban; alai, dipalua do nasida sian agama na so sintong jala mangurupi na asing mangulahon na sarupa. w16.11 5:2, 4

Adong do na marpingkir, hata ni si Paulus on taringot halak na so Kristen dohot halak Kristen. Alai tingki i, si Paulus manurat tu halak Kristen, na didok ”angka na badia”. (Rom 1:7) Alani i, dipaboa si Paulus do, ise halak Kristen na ”mangihuthon daging” dohot na ”mangihuthon Tondi”. Tajaha ma Rom 7:5. Didok si Paulus disi, ”Andorang di bagasan daging i hita, margogo do angka hisap hadosaon i di bagasan angka ruasta dihorhon patik i.” Si Paulus patorangkon, halak na ”mangihuthon daging”, i ma halak na mangihuthon hagiot ni daging laho mangulahon dosa, mangulahon sude na dihalomohon rohana. w16.12 2:5, 7

Sipata, adong do na holsoan alani hasalaan di tingki naung salpu. Sada tingki, holsoan do Raja Daud alani hasalaanna. Ibana mandok, ”Holsoan ahu ala ni dosangku.” (Ps. 38:4, 5, 9, 19) Tingki i, marbisuk do si Daud maradophon situasina i. Pos do rohana tu asi ni roha ni Jahowa jala disalpuhon do hasalaanna. (Ps. 32:2, 3, 5) Ra, olo do holsoan hita taringot ari na naeng ro. Umpamana, tingki disurat si Daud Psalmen 55, mabiar do ibana dibunu. (Ps. 55:3-6) Alai, ndang dipaloas ibana i pagalehon pos ni rohana tu Jahowa. Dipangido do pangurupion ni Jahowa laho mangadopi sitaonon. Alai, diboto ibana ringkot do mangulahon ulaon na hombar tu pangidoanna i. (2 Sam. 15:30-34) Adong parsiajaran na denggan sian si Daud. Unang ma sai holsoan hita, alai taulahon ma manang aha pe laho mangadopi sitaonon, jala pos ma rohanta sai diparrohahon Jahowa do hita. w16.12 3:14, 15

Dijalo si Daud do sipasingot ni Jahowa marhite si Natan. Martangiang do si Daud tu Jahowa, jala diangkui do dosana. On patuduhon lomo rohana mardame tu Jahowa. (Ps. 51:3-19) Ndang olo si Daud gabe gale, alai marsiajar do ibana sian hasalaanna. Ndang olo be ibana mangulahon dosa sisongon i. Marsihohot do ibana sahat tu na mate, jala diingot Jahowa do ibana. (Heb. 11:32-34) Aha na boi taparsiajari sian si Daud? Molo taulahon dosa na balga, ingkon marhamubaon do hita, taangkui ma, jala mangido hasesaan ni dosa. (1 Joh. 1:9) Mangkatai ma tu sintua, ala boi do nasida mangurupi hita padengganhon paralealeonta tu Jahowa. (Jak. 5:14-16) Molo tajalo pangurupion ni Jahowa, on patuduhon pos rohanta na laho sesaonNa do dosanta. Marsiajar ma sian hasalaanta jala marlas ni roha manomba Jahowa.​—Heb. 12:12, 13. w17.01 1:13, 14

Aha do lapatan ni ginjang ni roha? Lapatanna, mangulahon ulaon na so ulaonta. Ra, taulahon i ala ndang sabar hita manang ginjang rohanta. Ala mardosa, olo do hita marginjang ni roha. Taingot ma Raja Saul, molo gabe hasomalan on di hita, ndang lomo roha ni Jahowa. Psalmen 119:21, Bibel siganup ari mandok, ”Dimuruhi [Jahowa] do angka siginjang roha.” Boasa songon i? Na parjolo, molo ginjang rohanta, on patuduhon na so unduk hita tu Jahowa, Silehon Uhum tu hita. Na paduahon, molo taulahon ulaon na so ulaonta, boi do on gabe parsalisian tu na asing. (Poda 13:10) Na patoluhon, maila do hita molo diboto halak na ginjang rohanta. (Luk. 14:8, 9) Tangkas ma, nunga taboto boasa lomo roha ni Jahowa asa unduk rohanta. w17.01 3:4, 5

Ndang boi be denggan ditiru si Adam sude pangalaho ni Jahowa. Ndang holan si Adam be na so marpangkirimon, dohot do pinomparna. Alani dosana, sude angka pinomparna pe gabe mardosa jala mate. (Rom 5:12) Dipamago si Adam do pangkirimon laho mangolu salelengna. Ala ndang tipak si Adam dohot si Hawa, pinomparna pe gabe ndang tipak. Dung diotootoi Sibolis asa mangalo si Adam dohot si Hawa tu Debata, marsitutu ma ibana muse mangotootoi sude jolma asa mangulahon na sarupa. (Joh. 8:44) Tongtong do dihaholongi Jahowa sude jolma. Nang pe mangalo si Adam dohot si Hawa tu Ibana, lomo do rohaNa maraleale tu jolma. Ndang lomo rohaNa mate jolma. (2 Ptr. 3:9) Alani i, dibahen Debata ma dalan asa boi muse jolma maraleale tu Ibana.​—Joh. 3:16. w17.02 1:12-14

Lam unduk do hita molo angka na denggan na taida sian halak na asing, songon na binahen ni Jahowa. Asa unang mangkaringkothon diri manang mangatur na asing, tumagon ma tapangido poda sian nasida jala las ma rohanta manjangkon poda ni nasida. Las do rohanta tingki dongan sahaporseaonta mandapot hak na sumurung. Mandok mauliate do hita tu Jahowa ala dijangkon do hita laho manomba Ibana. (1 Ptr. 5:9) Molo taihuthon pamingkirion ni Jahowa, boi ma hita mamillit sipilliton na palashon rohaNa. Huhut marsiajar, martangiang, jala mangulahon na taparsiajari, on mambahen lam denggan panggora ni rohanta. (1 Tim. 1:5) Marsiajar ma mangkaringkothon halak na asing. Molo taulahon on, marjanji do Jahowa mangalatik hita asa lam unduk.​—1 Ptr. 5:10. w17.01 4:17, 18

Tama do dongan sahaporseaonta tapasangap. Tarlumobi angka baoa na manguluhon hita, songon sintua, pengawas wilayah, Panitia Cabang, dohot Punguan na Mangaradoti Organisasi. Diparrohahon do na porlu di naposo ni Debata, jala hombar tu Bibel, didok do nasida ”silehonlehon tu angka jolma”. (Eps. 4:8) Alani i, ingkon tapasangap do nasida, ndang soal sian dia harorona, aha singkolana, aha jabatanna manang sadia godang artana. Dilehon halak Kristen di abad na parjolo do sitiruon. Dipasangap do angka baoa na manguluhon nasida, jala hita pe songon i ma. Unang ma tabahen nasida gabe songon surusuruan manang gabe halak na umjago. Alai, tapasangap jala taargai ma nasida alani hiras ni roha ni nasida jala serep marroha.​—2 Kor. 1:24; Pgk. 19:10. w17.03 1:13

Aha do imbar ni Jesus tu si Herodes Agripa I raja ni Juda? Mansai imbar do ibana sian Jesus. Tingki di sada ulaon na sumurung, dipangke si Herodes ma pangkean hasangapon na mansai arga. Tingki diida halak ibana, didok nasida ma, ”Soara ni Debata do i, ndada soara ni jolma!” Lomo hian roha ni si Herodes dipuji. ”Pintor dipastap surusuruan ni Debata ma ibana, ala so dilehon hasangapon tu Debata; jadi dipangan gulok ma ibana, laos mate.” (Ul. 12:21-23) Tangkas ma, ndang si Herodes na dipillit Jahowa gabe pamimpin. Alai dipatudu Jesus do dirina na dipillit Debata, jala tongtong pasangaphon Jahowa, Pamimpin Natumimbul. Lomo roha ni Jahowa asa unang holan satongkin Jesus gabe Pamimpin. Dung dipahehe, didok Jesus tu siseanna, ”Nunga sahat tu Ahu nasa huaso na di banua ginjang dohot na di tano on.” Didok muse, ”Ai ida ma, sai na dongananku do hamu ganup ari, rasirasa ro ajal ni hasiangan on!”​—Mat. 28:18-20. w17.02 3:20, 21