Maret

Disuru hahana ma si Jepta laho sian huta ni nasida, asa unang dohot gabe sipanean di arta ni natuatuana. (Pangh. 11:1-3) Tingki mangido pangurupion sintua ni bangso i tu si Jepta, diurupi ibana do nasida. (Pangh. 11:4-11) Aha do na mangonjar roha ni si Jepta mangulahon i? Ala rumingkot do di si Jepta pabadiahon goar ni Jahowa, dipillit ibana do marsihohot tu Jahowa. Parniulaon ni si Jepta on, parohon pasupasu do tu ibana dohot tu bangso Israel. (Heb. 11:32, 33) Aha do na boi taparsiajari sian si Jepta? Aha do na taulahon molo adong dongan sahaporseaonta mambahen hansit manang metmet rohanta? Unang ma taloas hansit ni roha mambahen hita ndang manomba Jahowa. Tongtong ma ro tu parpunguan jala marsaor dohot dongan di huria. Tatiru ma si Jepta jala taoloi Jahowa. On boi mangurupi hita tingki adong situasi na borat di ngolunta, jala boi hita gabe sitiruon na denggan di dongan na asing.​—Rom 12:20, 21; Kol. 3:13. w16.04 1:7, 9, 10

Ingkon marhabengeton do hita sahat ro di ujungna, ndang holan di tingkinta saonari. Pingkirhon ma kapal na naeng lonong. Asa boi mangolu sude halak na di kapal i, ingkon marlange do sahat tu darat. Alai, gabe lonong do halak na so marlange ala loja. Songon i ma sasahalak na so sahat ro di ujungna, ndang mandapot haluaon. Molo naeng mangolu hita di tano na imbaru, ingkon tongtong do hita marhabengeton. Tatiru ma apostel Paulus na mandok, ”Ndang marnaloja hami.” (2 Kor. 4:16) Songon si Paulus, ingkon pos do rohanta tu Jahowa, urupanNa hita sahat ro di ujungna. Si Paulus manurat, ”Alai andul do hamonanganta di saluhutna i, hinorhon ni na mangkaholongi hita. Ai gomos do ditiop rohangku: Ndang tarbahen sirang hita sian holong ni roha ni Debata, na di bagasan Kristus Jesus Tuhanta i: Manang bahenon ni hamatean manang hangoluan, nang bahenon ni angka surusuruan nang angka harajaon, nang na masa nuaeng, nang na masa sogot, nang angka hagogoon pe, manang bahenon ni na di ginjang nang na di toru, ro di nasa na tinompa pe.”​—Rom 8:37-39. w16.04 2:17, 18

Tapangido ma pangurupion dohot bisuk sian Jahowa laho mamboto situasi na mambahen hita maol netral, jala asa taboto mamillit mangulahon na sintong tingki masa situasi sisongon i. Olo do ra hita diuhum manang dipenjarahon ala mangoloi Jahowa. Alani i, martangiang ma hita mangido habaranion asa barani paboahon boasa hita netral. Pos ma rohanta, urupan ni Jahowa hita asa marhabengeton manang sabar. (Ul. 4:27-31) Dilehon Jahowa do Bibel laho patoguhon hita. Tajaha jala tarimangi ma ayat ni Bibel na mangurupi hita tongtong netral. Taingot ma angka ayat i asa tongtong hita togu, tarlumobi tingki ndang boi hita manjaha Bibel. Bibel pe boi do patoguhon pangkirimonta tu janji ni Debata. Pangkirimon on mangurupi hita manaon hasusaan alani haporseaon. (Rom 8:25) Rimangi ma ayat na manggombarhon na masa di tano na imbaru, jala tapingkirhon ma dohot hita disi. w16.04 4:14, 15

Ndang dibaritahon angka pandita Harajaon ni Debata. Didok nasida, Harajaon ni Debata i adong di bagasan roha. (Luk. 17:21) Ndang diajarhon nasida Harajaon ni Debata i sada pamarentaon na diparenta ni sada Raja, i ma Jesus. Holan di tingki ari Natal manang tingki ari Paska do jotjot ditaringoti nasida Jesus. Ndang dipatorang nasida, holan Harajaon ni Debata na boi paluahon jolma sian hasusaan jala na pasohothon hajahaton. (Pgk. 19:11-21) Ndang diantusi angka pemimpin ni gareja aha na diulahon Jesus dung gabe Raja di Harajaon ni Debata. Ala ndang diantusi nasida barita na dipasahat ni Jesus, ujungna ndang diantusi nasida boasa ingkon dibaritahon i. Ndang hepeng na niluluan ni sisean ni Jesus tingki marbarita. Alani i, ulaon marbarita na uli ndang dalan laho mangalului hepeng. (2 Kor. 2:17) Ndang digaji sisean ni Jesus tingki marbarita.​—Ul. 20:33-35. w16.05 2:7, 8

Adong sada tudosan,umpamana, lomo rohanta mangida model ni sada pangkean, alai molo tapangke pangkean i, boi mambahen gale haporseaon ni dongan di huria. Ndang ditontuhon di Bibel model ni pangkean na laho sipangkeonta. Alani i, songon dia do hita mamboto pingkiran ni Jahowa taringot on? Bibel paboahon tu hita, ”Angka parompuan pe, songon i do: Pantun marabit, marpangkean hahormaton dohot toruk ni roha; unang ma marhitehite obuk na mardandan dohot sanggul mas dohot mutiha manang abit na arga. Alai naeng ma songon na tama di parompuan, angka na marhatopothon hadaulaton.” (1 Tim. 2:9, 10) Sipaingot on, marlangku do tu sude Sitindangi Ni Jahowa. Molo taihuthon do poda on, ingkon tapingkirhon do pangkilalaan ni dongan taringot pangkeanta. Ala tahaholongi do dongan na asing, ndang olo hita mambahen gale haporseaon ni nasida.​—1 Kor. 10:23; Plp. 3:17. w16.05 3:14

Ala mangalo si Adam tu Jahowa, ndang didok be ibana anak ni Debata. Alai, godang do pinompar ni si Adam na mangoloi Jahowa. (Heb. 12:1) Pangoloion ni nasida tu Debata patuduhon Jahowa do na dipillit nasida gabe Ama manang Sipanopa, ndang Sibolis. (Joh. 8:44) Songon halak Israel na didok di ayat sadari on, serep do roha ni sude na manomba Jahowa saonari jala marsitutu mangoloi Ibana. Hasangapon do di nasida mandok Jahowa Ama ni nasida, jala las rohanasida mangoloi Jahowa Sitopanasida. Olo do hita songon tano liat na mura ditopa gabe gunsi na arga? Boi do taida angka donganta na marsitutu asa mura ditopa Jahowa? w16.06 1:2, 3

Ala lam jonok hita tu tano na imbaru, lam jotjot ma haporseaonta diunjuni. Tapatogu ma haporseaonta. Songon dia carana? Tarimangi ma hata ni Jesus di Mateus 6:33. Tasungkun ma dirinta, ’Di parngoluonku, pos do rohangku tu poda ni Jesus? Ala mangalului hepeng, olo do ahu ndang marbarita na uli manang ndang ro marpungu? Songon dia do bahenonku molo habis tingki dohot gogongku di parkarejoan? Loasonku do portibi on manopa jala mangambati ahu manomba Jahowa?’ Molo ndang taihuthon poda ni Bibel taringot halak na dipabali sian huria, parsaoran na roa manang hiburan, on boi mambahen gabe jogal rohanta. Aha do na ingkon taulahon molo masa on tu hita? Ringkot tapatogu haporseaonta! Jujur ma hita tu dirinta, jala tapangke ma Bibel mamodai hita. w16.06 2:8, 9

Di liat portibi on, adong organisasi na mangurupi halak mangkaholongi jala manomba Jahowa, i ma Sitindangi Ni Jahowa. Nang pe adong hagaleon dohot hahurangan ni nasida, alai ditogutogu Jahowa do nasida marhite tondi parbadia. Taida ma songon dia Jahowa mamasumasu nasida. Otik dope halak na manomba Jahowa di taon 1914. Alai, dipasupasu Jahowa do ulaon parbaritaon. Alani i, nunga marjuta halak marsiajar Bibel jala gabe SitindangiNa. Nunga dipaboa Jahowa hian taringot on. Songon na didok di ayat sadari on, tangkas taida surirang on digohi. Naposo ni Jahowa nunga songon bangso na bolon. Godang do negara di liat portibi on na godang ni pendudukna umotik sian godang ni Sitindangi Ni Jahowa. w16.06 4:1, 2

Pos do roha ni Jesus, molo disarihon Jahowa angka pidong, jolma pe sarihononNa do. (1 Ptr. 5:6, 7) Songon pidong, ingkon karejo do hita asa adong sipanganon dohot hepeng. Unang ma gabe malas hita. Pasupasuon ni Jahowa do ulaonta. Tingki ndang adong hepengta manuhor sipanganon, diparade Jahowa do na tahaporluhon. Umpamana, olo do ra angka donganta mangalehon na porlu di hita. Diparade Jahowa do inganan ni angka pidong. Ditompa Jahowa do nasida boi mambahen asarna, jala diparade do na porlu tu nasida laho mambahen i. Diurupi Jahowa do hita asa boi paradehon ingananta. (Bandingkon tu Luk. 12:6, 7, Bibel siganup ari) Tingki didok songon na di ayat sadari on, ra na diingot Jesus, mate pe ibana ndang na humongkop pidong manang binatang. Alai, Jesus mate humongkop jolma asa mangolu salelengna.​—Mat. 20:28. w16.07 1:11-13

Boasa hita mardosa jala mate? Bibel mandok, ”Hamatean manggomgomi, binahen ni na sada ala ni pangalaosionna i.” Ala pinompar ni si Adam do hita, mardosa jala mate ma hita. (Rom 5:12, 14, 17) Alai, boi do hita mamillit asa unang dirajai dosa. Songon dia carana? Molo tahaporseai pelean tobusan ni Jesus, tadapot ma laba sian asi ni roha ni Jahowa. (Rom 5:20, 21) Nang pe mardosa hita, unang ma olo hita dirajai dosa. Tingki sala hita, tapangido ma asa disesa Jahowa dosanta. Songon dia do asa tadapot laba sian asi ni roha ni Debata? Si Paulus mandok, ”Nunga tarida asi ni roha ni Debata . . . diajari do hita, asa tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on.”​—Tit. 2:11, 12. w16.07 3:5, 6

Ala mangalo si Adam dohot si Hawa, sursar ma parsaripeonna. Sibolis, ”ulok na robi”, margabus tu si Hawa asa dipangan parbue ni hau ”parbinotoan ni na denggan dohot na roa”. Didok Sibolis, molo dipangan ibana parbue ni hau i, botoonna ma na denggan dohot na roa. Pintor dipangan si Hawa ma parbue ni hau i, ndang jolo disungkun si Adam. On patuduhon, ndang dipasangap ibana tungganedolina. Tingki dijalo jala dipangan si Adam parbue ni hau i, on patuduhon na dialo ibana do Debata. (Pgk. 12:9; 1 Mus. 2:9, 16, 17; 3:1-6) Tingki disungkun Jahowa boasa dipangan nasida parbue ni hau i, disalahon si Adam do tungganeboruna. Songon i nang si Hawa, disalahon do ulok i. (1 Mus. 3:12, 13) Ndang martanggung jawab nasida di pangalaosionna, ujungna diuhum ma nasida. Sipaingot na denggan do on di hita! Asa martua parsaripeon, ingkon taoloi do Jahowa jala martanggung jawab di parniulaonta. w16.08 1:1, 4, 5

Boasa adong na mangadopi parsoalan na borat, jala naeng padaodao? Alana, adong do halak na gabe mandele ala parsaripeonna ndang songon na hinirim ni rohana. Asing ni i, marasingasing do hasomalan ni sasahalak dohot cara ni nasida dipagodanggodang. Sipata, maol do mangadopi keluarga ni simatua, jala ndang sai sapandapot taringot parhepengon manang pagodanggodang ianakhon. Alai, las do rohanta mangida godang halak Kristen boi pasaehon parsoalan di parsaripeon ala mangihuthon poda ni Debata. Tingki adong parsoalan, ingkon dipangido do pangurupion sian angka sintua. Nunga godang pengalaman ni angka sintua jala boi mangurupi na marsaripe mangulahon Hata ni Debata. Molo dipangido tondi parbadia, diurupi ma nasida mangulahon prinsip ni Bibel, jala patuduhon parange na denggan.​—Gal. 5:22, 23. w16.08 2:11-13

Godang do ulaon ni Jesus. Alai molo adong halak na olo manangihon ibana, lomo do rohana mangajari nasida. Umpamana, sada tingki, torop halak marpungu di topi ni tao laho manangihon Jesus. Hundul ma Jesus dohot si Petrus di parau, jala sian i ma ibana mangajari natorop i. Dung i, diajari ibana ma muse si Petrus. Dibahen Jesus do tanda halongangan, gabe boi ma si Petrus mandapot godang dengke. Didok ibana ma tu si Petrus songon na di ayat sadari on. Dung i, ”ditarik nasida angka paraunasida i tu duru, ditadingkon nasida ma saluhutna” jala diihuthon ma Jesus. (Luk. 5:1-11) Lomo do roha ni si Nikodemus marsiajar tu Jesus. Alai, ala anggota sintua ni malim ibana, mabiar do ibana molo diida halak ibana mangkatai tu Jesus. Alani i, tingki borngin ma ibana manjumpangi Jesus. Nang pe songon i, ndang dipalao Jesus ibana. Dipaboa Jesus do hasintongan tu ibana. (Joh. 3:1, 2) Lomo do roha ni Jesus mangajarhon hasintongan jala patoguhon haporseaon ni halak. Songon i ma nang hita, rade ma hita manjumpangi halak di tingki na pas di nasida, jala mangurupi nasida marsiajar Bibel. w16.08 4:10, 11

Taboto, badia do Jahowa jala patikNa mambahen lam denggan ngolunta. Asa boi hita marserep ni roha, ingkon taulahon do patikNa. Serep ni roha mangurupi hita patuduhon pangargaion tu pangkilalaan dohot pandapot ni halak na asing. Pangkeanta ingkon tangkas patuduhon molo hita Sitindangi Ni Jahowa. Mansai denggan do patik ni Jahowa jala las rohanta mangihuthon i. Dipuji do angka donganta sahaporseaon alani pangkean dohot parniulaon ni nasida. On mambahen halak na serep marroha manjalo barita na uli, jala parohon sangap dohot las ni roha tu Jahowa. Tingki mamillit pangkean, ingkon tongtong do hita pasangaphon Debata Jahowa na ”marpangkean hasangapon dohot hamuliaon”. w16.09 3:18-20

Dipatudu si Jakkob do molo ibana marsitutu laho mandapot pasupasu! (1 Mus. 32:24-26) Dipasupasu Jahowa ma si Jakkob ala marsitutu ibana jala digoari ma ibana Israel, na lapatanna ”Halak na Marsihohot tu Debata”. Dijalo si Jakkob do hadiah na tongtong talului saonari, i ma dihalomohon Jahowa jala dipasupasu. Maimaima do si Rahel, tungganeboru ni si Jakkob, taringot janji ni Jahowa na didok tu tungganedolina. Alai ndang boi si Rahel marianakhon, jala sada hailaan do di tingki i molo sahalak borua ndang boi marianakhon. Songon dia do si Rahel mangadopi na masa on? Ndang gabe marmetmet ni roha ibana. Alai, martangiang do ibana ganup ari tu Jahowa. Ujungna, ditangihon Jahowa do tangiangna, dibahen ma ibana boi marianakhon.​—1 Mus. 30:8, 20-24. w16.09 2:6, 7

Ringkot do muse mangajari ianakhonmuna asa diboto martua do nasida molo mangihuthon poda sian Bibel. (Ps. 1:1-3) Umpamana, suru ma ibana mambayangkon molo ibana tading di sada pulo, jala mamillit angka ise na ditogihon laho rap tading di pulo i. Dung i sungkun ma, ”Angka halak na songon dia do na ditogihon hamu asa boi dame sude?” Jahahon ma Galatia 5:19-23 asa diboto ibana halak na songon dia na boi mangolu di tano na imbaru. Marhite cara on, adong dua parsiajaran na ringkot na diajarhon hamu. Na parjolo, diajari Jahowa do hita asa martua ngolunta saonari jala mardame tu sude halak. Na paduahon, diajari do hita asa boi mangolu di tano na imbaru. (Jes. 54:13; Joh. 17:3) Paboa ma tu ianakhonmuna songon dia poda ni Bibel mangurupi donganta. Umpamana, lului ma kisah hidup di publikasinta, songon artikel ”Bibel Mambahen Denggan Ngolungku” di Joujou Paboahon. w16.09 5:13, 14

Nang pe godang ulaonta, ingkon talehon do tingki laho marsiajar Bibel dohot panombaon na sasaripe. (Eps. 5:15) Alai, ndang boi Bibel i holan tajaha sambing manang holan paradehon alus tu parpunguan. Ingkon taulahon do Hata ni Debata jala tapatogu haporseaonta. Tingki marsiajar, unang ma holan na ringkot di halak na tapingkiri, alai pingkirhon ma na ringkot di hita. (Plp. 1:9, 10) Ra, tingki paradehon na porlu laho marbarita, marpungu, manang marjamita, olo do ra ndang taulahon i di ngolunta. Umpamana, sahalak pangalompa na malo, olo do holan mandai na nilompana andorang so dilehon tu na mangallang. Alai, ndang boi sehat ibana molo holan mandai na nilompana. Asa tongtong sehat, ingkon dilompa ibana do sipanganon di dirina sandiri. Suang songon i ma, molo lomo rohanta patoguhon paralealeon tu Jahowa, ingkon ringgas do hita marsiajar Bibel, ala on do na tahaporluhon. w16.10 2:10, 11

Di Heber 11:1, dipaboa Bibel do lapatan ni haporseaon. (1) Haporseaon, i ma ”pos ni roha . . . di angka sihirimon”. Na didok ”sihirimon”, i ma janji ni Debata taringot ari na naeng ro. Umpamana, porsea do hita na laho pasohotonNa hajahaton jala adong tano na imbaru. (2) Haporseaon, i ma ”pamotoan na tontu” manang bukti ”taringot tu na so niida”. Taboto, adong do Debata Jahowa, Jesus Kristus, surusuruan, dohot Harajaon di banua ginjang, nang pe ndang boi taida. Songon dia do patuduhon na marhaporseaon hita tu janji ni Debata dohot tu na so boi taida? Tapatudu ma i marhite pangkataion dohot parniulaonta. w16.10 4:6

Molo taulahon on, na maniru Jahowa dohot Jesus do hita. Nang pe ndang boi be hita mangulahon godang ulaon, mararga do ulaonta di nasida. (Luk. 21:1-4; 2 Kor. 8:12) Umpamana, taboto do nunga maol di angka donganta na matua ro tu parpunguan dohot marbarita na uli. Olo do hita patoguhon jala mamuji nasida? Alani i, tongtong ma tapatogu halak na asing. Tingki diida hamu sasahalak mangulahon na denggan, puji ma ibana. Tingki si Paulus dohot si Barnabas di huta Antiokia na di Pisidia, angka sintua ni sinagoga mandok tu nasida, ”Ale angka dongan, molo adong di hamu hata sipaingot tu natorop on, dok hamu ma!” Dipatogu si Paulus do angka na asing di tingki i. (Ul. 13:13-16, 42-44) Molo tapatogu na asing, lomo ma rohanasida patoguhon hita.​—Luk. 6:38. w16.11 1:3, 15, 16

Hak na sumurung do boi dohot di organisasi ni Jahowa, jala mamboto na dihalomohon Ibana! Ala taboto aha na pasonangkon Debata, martanggung jawab do hita unduk tu Ibana jala mangulahon na denggan. Nang pe halak mangulahon na jahat, tatiru ma Jahowa na mandok, ”Sai hagigihon hamu ma na jat!” (Ps. 97:10) Unang tatiru halak na mandok, ”Na jat denggan do i, jala tu na denggan na jat do i.” (Jes. 5:20) Asa las roha ni Jahowa, marsitutu ma hita asa badia. (1 Kor. 6:9-11) Marlaba do sude na dipaboa Jahowa di Bibel. Tahaholongi do Ibana jala marsihohot tu Ibana. Alani i ma olo hita mangihuthon tudutuduNa di jabu, di huria, di parkarejoan, di singkola, manang didia pe hita. w16.11 3:13

Halak na unduk do angka Parsiajar Bibel. Alai tingki taon 1914 sahat 1919, ndang pola tangkas dope diantusi nasida na didok Jahowa taringot unduk tu pamarenta. I do alana, adong do nasida na so netral saleleng parporangan. Umpamana, tingki presiden Amerika Serikat manuru angka halak martangiang asa mardame tanggal 30 Mei 1918, The Watch Tower pe manjujui Parsiajar Bibel asa dohot martangiang. Adong do pigapiga donganta na mangalehon hepeng tu haporluon ni porang i. Adong muse do na gabe tentara jala marporang. Nang pe nasida porlu dipasingot, alai sala do hita molo tadok alani i nasida ditaban tu Babel na Balga. Sasintongna tingki Porang Dunia I, laho kaluar nama nasida sian agama na so sintong.​—Luk. 12:47, 48. w16.11 5:9

Boasa dipasingot si Paulus halak Kristen na miniahan taringot mangolu ”mangihuthon daging”? Boasa sude halak Kristen saonari ingkon dipasingot taringot on? Alana, sude halak Kristen olo gabe mangkaringkothon lomo ni rohana sandiri. Umpamana si Paulus mandok, pigapiga donganta di Rom gabe hatoban ni ”butuhanasida”. Na didok si Paulus, i ma taringot seks, sipanganon, dohot angka hasonangan na asing na diharingkothon nasida. (Rom 16:17, 18; Plp. 3:18, 19; Jud. 4, 8, 12) Sada tingki, adong do sahalak donganta di Korint na mangulahon parmainanon, ”diparjolma nioli ni amana”. (1 Kor. 5:1) Tangkas ma, halak Kristen di tingki i porlu mandapot sipasingot sian si Paulus taringot mangolu ”mangihuthon daging.” (Rom 8:5, 6) Sipasingot on pe marlaba do saonari. w16.12 2:5, 8, 9

Cara na denggan asa unang sai holsoan, i ma mangkatai tu dongan na boi dihaporseai. Dongan saripemu, alealemu, manang angka sintua di huria boi do mangurupi hamu mangadopi situasi di ngolumuna. Didok muse di Bibel, ”Sai na tarselak do angka sangkap molo soada tuptupan, alai molo torop panuturi, sai tulus ma.” (Poda 15:22) Parpunguanta mangurupi hita asa unang sai holsoan. Di parpunguan ganup minggu, rap do hita dohot angka dongan sahaporseaon, na mamparrohahon jala patoguhon hita. (Heb. 10:24, 25) ”Hiras ni roha” na tadapot di parpunguan, patoguhon hita jala mangurupi hita asa unang sai holsoan.​—Rom 1:12. w16.12 3:17, 18

Molo marsahit manang masa hasusaan na so tarpauba, ingkon tapasahat ma holso ni rohanta tu Jahowa, dung i pos ma rohanta parrohahononNa do hita. (1 Ptr. 5:6, 7) Marsitutu ma hita asa mandapot laba sian parpunguan dohot sian na pinarade ni organisasi ni Jahowa. (Heb. 10:24, 25) Songon dia do molo ianakhonta ndang be manomba Jahowa? Ndang dipaksa si Samuel ianakhonna asa tongtong marsihohot tu Debata. (1 Sam. 8:1-3) Dipasahat ibana do parsoalan i tu Jahowa. Jala, tongtong do marsihohot ibana tu Debata jala palashon rohaNa. (Poda 27:11) Saonari, godang do natuatua mangadopi situasi na sarupa. Porsea do nasida, sai rade do Jahowa manjangkon angka halak na marhamubaon. (Luk. 15:20) Alani i, ingkon tongtong do natuatua marsihohot tu Jahowa jala mangkirim sai anggiat sitiruon sian nasida mangonjar roha ni ianakhonna mulak tu Jahowa. w17.01 1:15, 16

Halak na serep marroha patuduhon unduk ni roha. Diboto do adong hahuranganna, jala diangkui do hasalaanna. Ditangihon do pandapot ni halak jala marsiajar sian i. Las do roha ni Jahowa mangida halak na serep marroha. Bibel paboahon, ditanda halak na unduk do ise dirina jala diboto do adong ulaon na so boi ulahononna. On mangurupi ibana mangargai jala burju tu na asing. Sipata di na so pamotoanta, olo do gabe ginjang rohanta. Songon dia on boi masa? Ra, didok rohanta rumingkot do hita sian na asing ala adong hak na sumurung di hita manang ala alealenta mandapot hak na sumurung di huria. (Rom 12:16) Manang, olo do ra holan dirinta na tapingkirhon. (1 Tim. 2:9, 10) Alani i, olo do ra gabe lomolomonta mangatur halak.​—1 Kor. 4:6. w17.01 3:6-8

Saonari, lam maju do ulaon parbaritaon jala dipangke organisasi ni Jahowa do teknologi na baru laho pasahathon barita na uli tu godang halak. Sipata, maol do di angka na umtua marsiajar cara na baru laho mangulahon ulaon on. (Luk. 5:39) Lam suda do gogo ni sasahalak dung lam matua. Alani i, las do roha mangida angka na umtua mangalatik na poso asa mandapot tanggung jawab di organisasi ni Jahowa. (Ps. 71:18) Maol do di angka naung leleng mandapot hak na sumurung mangalehon tanggung jawab tu na poso. On boi mambahen nasida marmetmet ni roha, ala mansai dihaholongi tanggung jawab i. Jala didok rohanasida, molo ndang ditogutogu nasida angka na poso i, ndang boi denggan i diulahon. Manang olo do ra, ndang adong tingki laho mangalatik na asing. Baoa na poso porlu sabar tingki ndang dilehon dope gumodang tanggung jawab. w17.01 5:3, 4

Gabe jolma na tipak ma Jesus, dos songon si Adam andorang so mardosa. (Joh. 1:14) Alai ndang songon si Adam, diihuthon Jesus do aturan na dibahen Jahowa. Nang pe mansai hansit sitaononna, ndang hea ibana mangalo patik ni Debata. Ala dilehon Jesus hangoluanna na tipak, boi ma malua jolma sian dosa dohot hamatean. Tipak do hangoluan ni Jesus songon hangoluan ni si Adam. Alai, marsihohot jala dioloi ibana do Debata. (1 Tim. 2:6) Mate do ibana humongkop hita, jala marhite tobusanna, boi ma sude jolma mangolu salelengna. (Mat. 20:28) Marhite tobusan, diparade Jahowa dalan laho pasauthon sangkapNa.​—2 Kor. 1:19, 20. w17.02 1:15, 16

Pingkirhon ma molo hita adong di terowongan na golap. Tontu las do rohanta tingki taida na tiur. Songon on ma na boi masa di parngoluonta. Olo do hita marsitaonon jala olo do hita gabe mandele alani sitaonon. Songon i ma na hea dihilala Jesus. Tingki ibana diuhum jala dilinsingi, hansit do dihilala. On ma sitaonon na umborat di parngoluonna. (Heb. 12:3) Aha do na mangurupi ibana marhabengeton? Bibel mandok, ditujuhon do pamerengna tu las ni roha na diparade tu ibana na ”hundul di siamun ni habangsa ni Debata”! Pasupasu alani habengeton na laho sijaloonna, i do na sai diingot Jesus. Pabadiahon goar ni Debata dohot harajaonNa do na rumingkot di ibana. Diboto Jesus, holan satongkin do pangunjunan i, alai pasupasu ni Debata boi do hilalaonna salelengna. Saonari, boi do hita mandele jala marsitaonon alani pangunjunan. Alai, taingot ma holan parsatongkinan do i. w16.04 2:10

Saonari, ndang mangkuling be panggora ni roha ni godang halak tingki mangulahon dosa. Alani i, didok nasida ma ndang ringkot tobusan i. Pigapiga halak diajari taringot aha do dosa i, aha do pangkorhonna jala aha do ulahononta asa boi malua sian dosa dohot hamatean. Dung diantusi nasida i, mandok mauliate do nasida ala dilehon Jahowa AnakNa humongkop hita. Dilehon Jahowa AnakNa i, alani balga ni holongNa do tu hita. (1 Joh. 4:9, 10) Pelean tobusan ni Kristus, i ma holong dohot asi ni roha na umbalga na dipatudu Jahowa tu hita. Las do rohanta tingki taparsiajari na salpuhonon ni Debata do dosanta. Ias ma panggora ni rohanta molo tapatudu haporseaon tu tobusan ni Jesus! (Heb. 9:14) Barita na uli do on tu sude halak! w16.07 4:6, 7

Jahowa paposhon rohanta, molo porsea hita tu tobusan, gabe ”tarsesa” ma dosanta. Boi do sesaonNa sude dosanta. (Ul. 3:19-21) Marhite tobusan, dipillit Jahowa ma pigapiga halak gabe anakNa di surgo. Didok ma nasida na miniahan. (Rom 8:15-17) Ditogihon do muse angka birubiru na asing asa gabe keluargaNa di tano on. Alai dung tipak nasida, adong dope ujian na parpudi. Molo marsihohot tu Jahowa, nasida pe boi do gabe anakNa. (Rom 8:20, 21; Pgk. 20:7-9) Dihaholongi Jahowa do sude ianakhonNa. Marhite tobusan, tadapot ma pasupasu salelengna. Nunga dilehon Jahowa silehonlehon on tu hita, jala ndang adong na boi mambuat i. w17.02 2:15, 16

Diboto Jahowa do hahuranganmuna jala diboto Ibana do na olo dope diulahon hamu na sala. Alai nang pe songon i, tongtong do lomo rohaNa hamu gabe alealeNa. Mansai dihaholongi Jahowa do hita jala dilehon Ibana do silehonlehon na arga. Disuru Ibana do anakNa tu tano on bahen tobusan di hita. (Joh. 3:16) Tingki taulahon na sala, boi do tapangido tu Jahowa asa disalpuhon hasalaanta. Alani tobusan, pos do rohanta molo Ibana boi manesa dosanta jala hita boi tongtong gabe alealeNa, nang pe mardosa dope hita.​—1 Tim. 1:15. w16.05 4:6, 7