Maret

Molo tajaha buku 1 Musa bindu 1 dohot 2, taboto ma, bebas do si Adam dohot si Hawa di mulana. Ndang adong halak na hea mangkilala songon na dihilala nasida. Adong do sude na dihaporluhon. Ndang porlu nasida holsoan tu manang aha pe. Jala ndang adong sahit dohot hamatean. (1 Mus. 1:27-29; 2:8, 9, 15) Taingot ma, holan Jahowa do na so porlu batasan laho mangulahon sangkapNa. Ala Ibana do na manompa saluhutna. (1 Tim. 1:17; Pgk. 4:11) Alai, imbar do molo angka na tinompaNa. Adong do aturan na dibahen tu saluhut tompaanNa na di surgo nang di tano on. Lomo do rohaNa asa taantusi, holan Ibana do na boi manontuhon aturan na tigor jala masuk angkal. Jadi sian mulana, dibahen Jahowa do aturan tu angka tinompaNa. w18.04 4 ¶4, 6

Taboto do ala na diurupi Jahowa do umbahen na boi hita martahan. (2 Kor. 4:7, 8.) Alani i, sabar ma tingki mangajari nasida. Ingot ma, ra ndang hea dope diboto nasida hasintongan na sian Bibel naung tangkas taboto. Jala godang do halak na porsea situtu tu agamana. Ra dihilala nasida, agamana i do na mambahen nasida jonok tu keluarga, budaya, dohot tu angka dongan ni nasida. Andorang so tajujui halak maninggalhon haporseaon na “leleng”, ingkon jolo taurupi do nasida mangkaholongi hasintongan na “baru” dope diboto nasida. Dung i, baru ma boi ditinggalhon nasida haporseaon ni nasida naung leleng i. Porlu do tingki laho mangurupi nasida asa mambahen hamubaon.​—Rom 12:2. w19.03 23-24 ¶10, 12-13

Holong dohot asi ni roha na dipatudu Jahowa, paingothon hita asa patoguhon donganta na asing. (Joh. 5:20) Tontu, las do rohanta molo adong dongan na patuduhon holong manang mamuji na taulahon. Dos songon i ma, ingkon tahaholongi jala tapatogu do angka dongan di huria dohot keluarganta. Molo tapuji nasida, gabe lam togu ma haporseaon ni nasida tu Jahowa jala marsihohot tu Ibana. Tarlumobi angka natua-tua, ingkon dipatogu nasida do ianakhonna. Tingki dipuji natua-tua ianakhonna jala dipatudu asi ni roha, on boi mangurupi nasida asa lam togu. Hata “halomoan ni rohangku do ho” patuduhon, na pos do roha ni Jahowa, na tongtong Jesus mangulahon sangkap ni Bapakna. Suang songon i ma, hita pe ingkon pos do rohanta na laho digohi Jesus do sude janji ni Jahowa. (2 Kor. 1:20) Molo tarimangi angka contoh na dibahen Jesus, on mangonjar rohanta asa marsiajar sian ibana jala maniru ibana.​—1 Ptr. 2:21. w19.03 8 ¶3; 9 ¶5-6

Tingki tadapot hadiah na mansai arga, tontu gabe taargai do halak na mangalehon i. Alai, bangso Israel ndang mangargai haluaon na dilehon Jahowa tu nasida. Piga-piga bulan dung ruar sian Misir, sai ditaringoti nasida do sipanganon na adong di Misir. Marungut-ungut do nasida taringot manna i ma sipanganon naung diparade Jahowa. Umlomo do roha ni nasida asa mulak muse tu Misir! Rumingkotan do di nasida dengke, ansimun, jelok, angka sayur, angka baoang sian haluaon dohot panombaon tu Jahowa. Alani i, gabe muruk situtu ma Jahowa tu nasida. (4 Mus. 11:5, 6, 10; 14:3, 4) Aha ma parsiajaranna tu hita? Dijujui si Paulus do sude halak Kristen asa mangargai haluaon na dilehon Jahowa marhite AnakNa, Jesus Kristus.​—2 Kor. 6:1. w18.04 10-11 ¶6-7

Lomo do rohanta sude asa dihaholongi jala dibahen na tigor. Alai, molo jotjot dibahen na so denggan tu hita, olo do ra gabe tahilala ndang mararga dirinta jala gabe mandele. Diboto Jahowa do na lomo rohanta dihaholongi jala dibahen na tigor tu hita. (Ps. 33:5) Taboto, ndang lomo roha ni Jahowa molo adong na mambahen na so tigor tu hita, alana holong do rohana tu hita. Boi do i taboto sian Patik na dilehon Jahowa tu bangso Israel marhite si Musa. Songon na taparsiajari di Patik ni si Musa, taboto ma songon dia holong ni roha ni Jahowa tu hita. (Rom 13:8-10) Patik ni si Musa dibahen marhite holong. Alana, holong do na mangonjar roha ni Jahowa mambahen Patik i. (1 Joh. 4:8) Jala ojahan ni sude Patik i, i ma holong tu Debata dohot holong tu jolma. (3 Mus. 19:18; 5 Mus. 6:5; Mat. 22:36-40) Sian 600 Patik na dibahen i, boi ma taparsiajari taringot holong ni Jahowa. w19.02 20-21 ¶1-4

Manat do si Job maradophon borua. (Job 31:1) Ndang olo ibana menggoda borua na so dongan saripena. Saonari, godang do ela-ela na manjujui hita mangulahon seks na so patut. Tatiru do si Job ndang menggoda na so dongan saripenta? Tapasiding do video dohot gambar na porno? (Mat. 5:28) Molo marsitutu hita mangorom dirinta, gabe boi ma hita tongtong setia. Diboto si Job do, molo gabe arta na rumingkot di ngoluna, boi do gabe mangulahon dosa na balga ibana jala diuhum. Alani i, tongtong do si Job unduk tu Jahowa asa unang arta na rumingkot di ngoluna. (Job 31:24, 25, 28) Saonari, godang halak holan mangalului arta. Alai, songon na taparsiajari di Bibel, molo ndang hepeng dohot arta na gabe rumingkot di ngolunta, boi ma hita tongtong setia.​—Poda 30:8, 9; Mat. 6:19, 20. w19.02 6 ¶13-14

Mansai holong do roha ni Jahowa tu hita. Jala holan Jesus do na boi pas maniru holong ni Jahowa. (1 Joh. 4:8-10) I do alana rade Jesus mangalehon ngoluna tu hita. Ndang soal hita halak na dimiahi manang ‘biru-biru na asing’, marhite tobusan tahilala do holong ni Jahowa dohot Jesus. (Joh. 10:16; 1 Joh. 2:2) Sian angka lambang na dipangke di Borngin Parningotan, patuduhon holong dohot asi ni roha ni Jesus tu siseanna. Boasa songon i? Ndang diparentahon Jesus asa dibahen acara na balga tu Borngin Parningotan i. Alani i, nang pe di penjara angka sisean na miniahan, tongtong do boi diulahon nasida acara on ganup taon, nang pe di situasi na maol. (Pgk. 2:10) On patuduhon holong ni roha ni Jesus do tu nasida. Sian najolo sahat tu saonari, marsitutu do halak Kristen na sintong laho mangulahon acara Borngin Parningotan. w19.01 24 ¶13-15

Molo diihuthon hamu pangajarion ni Jesus, gabe bebas ma hamu sian agama palsu, cerita na so tutu jala ndang dioto-otoi portibi on be hamu. (Joh. 8:31) Jala di ari na naeng ro, lehonon ni Jahowa do muse tu hita “hasangapon na mansai balga songon na dilehon tu angka anak ni Debata”. (Rom 8:21) Tontu mandok mauliate do hita tu Jahowa ala tadapot hasintongan. Alai ndang sae holan ‘mamboto hasintongan’ i, ingkon ulahononmuna do i di ngolumuna! Nang pe godang angka na denggan na didapot halak saonari on, alai parsatongkinan do i. Alana ndang taboto aha na laho masa haduan. (Jak. 4:13, 14) Alani i, bahen ma Jahowa gabe “parjambaran” di hamu, i ma marhite pajonokkon diri tu Ibana jala argai ma angka na denggan na dilehon Ibana. (Ps. 103:5) Ndang dipaksa Jahowa angka halak laho manomba Ibana. (Ps. 16:5) Nasida sandiri do na ingkon mamillit. Alai molo tongtong dioloi hamu Debata, dapotmuna ma “hangoluan na saleleng ni lelengna”. (1 Tim. 6:19) Pos ma rohamuna lehonon ni Jahowa do las ni roha na salelengna!​—Ps. 16:11. w18.12 26 ¶19, 21

Sangap do parsaripeon di Jahowa dohot di Jesus. Alani i, sude halak Kristen ingkon maniru nasida. Ala sude hita ndang sempurna, adong do na so mangargai parsaripeonna. (Rom 7:18-23) I do alana halak Kristen di abad na parjolo pe, hea do mangadopi hasusaan di parsaripeon ni nasida. Didok si Paulus di suratna, “Ndang boi tunggane boru manadingkon tunggane dolina.” Alai, adong do na gabe maninggalhon dongan saripena. (1 Kor. 7:10) Ndang tangkas dipaboa si Paulus aha alasan na mambahen na mardongan saripe gabe padao-dao. Songon naung taparsiajari, molo adong sahalak suami mangulahon seks na so patut, boi do istrina mangido sirang dung i marhasohotan muse. Alai didok si Paulus, molo padao-dao sahalak istri dohot suamina ingkon “tongtong ma ibana ndang marhasohotan. Molo so i, mulak ma ibana muse tu tunggane dolina”. Alana di adopan ni Debata, tongtong dope nasida mardongan saripe. Jadi na didok si Paulus dison, nang pe adong parsoalan na borat di parsaripeon ni nasida, alai molo ndang alani na mangulahon seks na so patut, ingkon tongtong do nasida rap. Alai molo adong parsoalan ni nasida, boi do dipangido asa diurupi sintua. w18.12 13 ¶14-15

Lomo do roha ni Debata asa marale-ale hita tu Ibana jala mambahen na dumenggan di ulaon marbarita. (Mat. 28:19, 20; Jak. 4:8) Alai sipata, adong do piga-piga halak na mambahen metmet rohanta. Umpamana, ditawarhon bosmuna hamu lembur asa lam godang gajimuna, hape gabe ndang adong be tingkimuna marbarita dohot marpungu. Manang, molo singkola dope hamu, ditawarhon gurumuna asa pinda tu singkola na umjago alai gabe dao ma hamu sian natua-tuamuna. Andorang so dibahen hamu keputusan, martangiang do hamu? Dilului hamu do hatorangan sian publikasinta manang manungkun tu dongan na asing? Denggan do molo diparsiajari hamu hian sian saonari, songon dia Jahowa mangida situasi i. Molo tung pe masa situasi na ummaol sian i, gabe mura ma hamu mangadopi i ala ditiru hamu pingkiran ni Jahowa. Nunga tangkas be diboto hamu na laho ulahononmuna. Alana nunga dibahen hamu keputusan na dumenggan asa tongtong manomba Jahowa. w18.11 31-32 ¶18

Tingki poso dope, nunga gabe raja si Salomo. Sada tingki, disungkun Jahowa ma si Salomo marhite nipi. Didok, “Aha dipangido roham leanonku di ho?” Didok si Salomo ma, “Mansai poso dope ahu, na so umboto mangarajai. . . . Ala ni i, lehon ma di ahu habisuhon laho mangarajai bangsoM.” (1 Raj. 3:5-10, Bibel siganup ari) Ala “habisuhon” do na dipangido ibana, on patuduhon na serep do rohana. (2 Sam. 12:24) Las do roha ni Jahowa tu alus ni si Salomo i. Alani i, dilehon ma tu ibana “habisuhon dohot pangantusion”. (1 Raj. 3:12, Bibel siganup ari) Ala marsihohot si Salomo, godang ma dapotna pasu-pasu. Jala las do rohana tingki disuru Debata ibana laho pajongjongkon bagas joro “di Goar ni Jahowa, Debata ni Israel”. (1 Raj. 8:20) Ala bisuk na dilehon Debata, gabe godang do halak na mananda ibana. Sude hata na didok ibana ro sian Debata. Jala disurat do i di tolu buku na adong di Bibel. Sada sian buku i, i ma buku Poda. w19.01 14 ¶1-2

Piga-piga halak, ndang lomo rohana diatur halak na asing. Didok nasida, “Lomongku do di ahu.” Ala didok roha ni nasida, ingkon nasida sandiri do na mamillit dia lomo ni rohana. Ndang lomo rohana di atur halak na asing jala ndang olo ibana dipaksa asa sarupa songon nasida. Nang pe tatiru pingkiran ni Jahowa, boi do bebas hita mamillit. Didok di 2 Korint 3:17, “Didia adong tondi parbadia ni Jahowa, disi do adong haluaon.” Dilehon Jahowa do tu hita kebebasan laho mamillit aha pe na dihalomohon rohanta. Sasintongna, songon i do hita ditompa. Alai nang pe songon i, adong do aturan dilehon Jahowa. (1 Ptr. 2:16) Jadi tingki mambahen keputusan, lomo do roha ni Jahowa asa tapangke prinsip ni Bibel. w18.11 22 ¶5-6

Dung marsiajar Bibel, taboto ma manomba Jahowa do na rumingkot di ngolunta sian mangalului arta. Las do rohanta mandapot hasintongan i, nang pe ingkon berkorban. Alai lam leleng, olo do gabe mangiburu hita mangida halak ala godang hepengna, boi manuhor barang na baru jala marsonang-sonang. Molo songon i do na masa, boi do gabe arta muse na sai tapingkirhon jala ndang marlas ni roha be hita manomba Jahowa. Rimangi ma taringot si Demas, umlomo do rohana tu arta na ‘di portibi on’. Gabe ditadingkon ibana ma si Paulus dohot tugas na dilehon tu ibana. Ndang diharingkothon be manomba Debata jala ndang olo be ibana berkorban. Parsiajaranna, molo ndang manat hita, boi do gabe sai taingot-ingot muse angka naung tatinggalhon hian. Jala gabe ndang tahaholongi be hasintongan i. w18.11 12 ¶9

Mansai jahat do gabus ni Sibolis i. Alana, diboto ibana do molo porsea si Hawa jala diallang parbue ni hau i, gabe mate do nasida. Jala, tutu do songon i na masa. Ala ndang unduk be si Adam dohot si Hawa tu parenta ni Jahowa, gabe mate do nasida. (1 Mus. 3:6; 5:5) Alani dosa ni si Adam, ‘sahat ma hamatean i tu saluhut jolma’. Jala saonari, “nunga marhuaso hamatean i . . . , gariada marhuaso do hamatean i tu halak na so mangulahon dosa songon na niulahon ni si Adam.” (Rom 5:12, 14) On ma na mambahen hita ndang sempurna jala ndang mangolu salelengna songon na dihalomohon Debata. Gariada, holan “pitupulu taon” do jolma mangolu, ‘jala molo gogo do ualupulu taon’. Jala gok do “hangaluton dohot halojaon” di ngolunta. (Ps. 90:10) Ala gabus ni Sibolis do on masa! Didok Jesus taringot Sibolis, “Ndang hot ibana di hasintongan, ai ndang adong hasintongan di bagasan rohana.” (Joh. 8:44) Jala ndang na laho muba Sibolis. Tong do ibana margabus sahat tu saonari “mangaliluhon saluhut portibi on”. (Pgk. 12:9) Alai, ndang olo hita dililuhon Sibolis. w18.10 3-4 ¶1-4

Hita pe boi do marlas ni roha molo tabahen marragam cara asa mardame dohot na asing. Alana didok si Jakobus, “Parbue ni angka ulaon na denggan disuan di bagasan dame tu angka halak sibahen dame.” (Jak. 3:18) Jadi, molo adong parsoalanmuna dohot sasahalak di huria manang di keluargamuna, pangido ma pangurupion ni Jahowa asa boi hamu gabe sibahen dame. Dung i, lehononna ma tondi parbadia na mangurupi hamu mangulahon angka parange na denggan. On boi mambahen hamu marlas ni roha. Didok Jesus ringkot do tabahen marragam cara laho mardame. Didok ibana, “Molo diboan ho silehon-lehonmu tu langgatan, jala disi gabe diingot ho adong donganmu na marsogo ni roha tu ho, tadingkon ma silehon-lehonmi di jolo ni langgatan i. Laho ma ho mardame dohot donganmi. Dung pe i, asa ro ho muse pasahathon silehon-lehonmi.”​—Mat. 5:23, 24. w18.09 19 ¶17

Di borngin andorang so mate Jesus, adong 30 hali dipatorang Jesus taringot holong tu siseanna. Jala didok ibana tu siseanna ingkon “masihaholongan ma hamu”. (Joh. 15:12, 17) Alani i, ditanda do nasida sisean ni Jesus na sasintongna ala mansai balga do holong na dipatudu nasida. (Joh. 13:35) Holong na didok ni Jesus dison ndang holan taringot pangkilalaan sambing. Alai parange na mansai denggan do on, jala tarida do i sian parniulaon na so mangkaringkothon diri. Alani i ma didok Jesus, “Ndang adong holong na umbalga sian holong ni halak na olo mangalehon ngoluna humongkop angka donganna. Donganku do hamu molo diulahon hamu angka parentangku.” (Joh. 15:13, 14) Ditanda halak do Sitindang Ni Jahowa halak na burju, parholong jala marsada. (1 Joh. 3:10, 11) Jadi ndang soal bangsona, sukuna, bahasana, luatna, manang hasomalanna, marsihaholongan do naposo ni Jahowa di liat portibi on. w18.09 8-9 ¶1-2

Dipangido Jahowa do asa tasarihon keluarganta. Ra, ingkon karejo do hamu laho paradehon na dihaporluhon keluargamuna. Manang adong do angka ina na ingkon di jabu laho manjaga ianakhonna. Manang hita ingkon mangurus natua-tuanta ala ndang boi be nasida mangurus dirina sandiri. Jadi ingkon diulahon do on. Ra, ala adong tanggung jawab keluarga ndang boi godang na diulahon hamu tu Jahowa songon na dipangido rohamuna. Alai, unang ma metmet rohamuna! Jadi las do roha ni Jahowa molo taparade angka na porlu di keluarganta. (1 Kor. 10:31) Molo ndang adong tanggung jawab keluarga na so boi ditinggalhon hamu, boi do hamu mangurupi angka donganta na matua, na marsahit, manang na mangkaporluhon pangurupion? Manang boi do hamu mangurupi angka dongan na mangurus keluargana? Parrohahon jala urupi ma angka dongan na mangkaporluhon pangurupion di huriamuna. Molo taulahon songon i, gabe dongan saulaon Jahowa do hamu laho mangalusi tangiang nasida.​—1 Kor. 10:24. w18.08 22-23 ¶3, 5

Rimangi ma pengalaman ni si Josep. Sian sude anak ni si Jakkob, si Josep ma anak haholonganna. On mambahen angka abangna gabe mangiburu tu ibana. Jadi tingki marumur 17 taon si Josep, digadis do ibana jala gabe hatoban. (1 Mus. 37:2-4, 23-28) Saleleng 13 taon ma si Josep susa di Mesir. Gabe hatoban jala dipenjarahon do ibana disi. Jala gabe dao do ibana sian bapakna. Sasintongna, situasi i boi do mambahen jut roha ni si Josep jala mandele. Alai, ndang songon i na masa. Jadi aha do na mangurupi ibana? Saleleng di penjara si Josep tongtong do sai dipingkiri aha naung dijalo ibana sian Jahowa. (1 Mus. 39:21; Ps. 105:17-19) Ra, sai diingot ibana do nipina na paboahon sada surirang. Jala i mambahen pos rohana tu Jahowa. (1 Mus. 37:5-11) Tontu jotjot do si Josep martangiang tu Jahowa laho paboahon na di rohana. (Ps. 145:18) Jala dialusi Jahowa do tangiang ni si Josep i. Dipapos Jahowa do rohana, sai dongananna do ibana manang aha pe na masa. w18.10 23 ¶3-4

Olo do muba caranta mangida sasahalak alani hamoraonna. Songon dia do hamoraon ni sasahalak boi mambahen hita gabe paimbar-imbarhon? Ditogu-togu tondi parbadia do si Salomo laho paboahon hahurangan ni jolma songon na didok di ayat na diulas sadari on. Aha do parsiajaranna tu hita? Molo ndang manat hita, holan tu angka donganta na mamora ma hita marsaor. Jala ndang olo be hita marsaor dohot na pogos. Jadi aha ma na boi masa molo olo hita paimbar-imbarhon alani hamoraon? Molo taulahon i boi do gabe ndang marsada be angka dongan di huria. On ma na masa di piga-piga huria di abad na parjolo. Jala dipasingot si Jakobus do nasida alani i. (Jak. 2:1-4) Unang ma tapaloas masa i di hurianta. Jala unang tapaimbar-imbar halak alani hamoraon. w18.08 11-12 ¶8-10

Molo burju hita tu angka dongan di huria, on patuduhon na taargai do parale-aleonta tu Jahowa. Alana nasida pe dipillit Jahowa do. Molo taingot i, gabe tahaholongi jala burju ma hita tu nasida. (1 Tes. 5:15) Mansai ringkot do on. Alana didok Jesus do tu angka siseanna, “Molo masihaholongan hamu, botoon ni sude jolma ma na siseanku hamu.” (Joh. 13:35) Didok si Maleaki, ‘ditatap jala ditangihon’ Jahowa do songon dia angka naposoNa maradophon angka donganna. (Mal. 3:16) Jadi “ditanda Jahowa” do angka naposoNa. (2 Tim. 2:19) Sai diparrohahon Jahowa do manang aha na taulahon dohot tahatahon. (Heb. 4:13) Alani i, molo ndang burju hita tu angka dongan, diboto Jahowa do i. Alai, diparrohahon Jahowa do muse molo rade hita manjalo angka dongan, burju, jala sai rade manalpuhon hasalaan.​—Heb. 13:16. w18.07 25-26 ¶15, 17

Lomo do rohanta tongtong marsihohot jala marpihak tu Jahowa. Denggan do i di hita. Alana, holan Jahowa do Debata pargogo na so hatudosan, na umbisuk, jala parholong! (Ps. 96:4-6) Alai, adong do naposo ni Jahowa na gabe ndang marpihak be tu Ibana. Taingot ma si Kain. Manomba Jahowa do ibana, alai ndang dijalo Jahowa peleanna. Boasa songon i? Alana, diboto Jahowa do adong sangkap na roa di roha ni si Kain. (1 Joh. 3:12) I do umbahen dipasingot Jahowa ibana, “Molo diula ho na denggan, minar ma bohim; alai ala diula ho na jahat, mangonggop ma dosa i di pintu ni roham. Naeng rajaanna ma ho, alai taluhon ma i.” (1 Mus. 4:6, 7, Bibel siganup ari) Jadi tangkas do dipaboa Jahowa, molo marhamubaon si Kain jala marpihak tu Ibana, sai dongananNa do si Kain. Alai ndang ditangihon si Kain sipasingot i. w18.07 15-16 ¶1, 3-4

Parohon pujian tu Jahowa do molo marbarita hita jala mangurupi halak marsiajar Bibel. (Mat. 28:19, 20) Asing ni marbarita na uli, ingkon denggan do pangalahonta asa parohon pujian tu Jahowa. Godang do halak na mamparrohahon hita tingki marbarita. Molo burju hita jala olo manise nasida, boi do gabe denggan pandapot ni nasida taringot hita dohot taringot Debata na tasomba. Didok Jesus do tu angka siseanna, “Tingki masuk hamu tu sada jabu, pangkulingi ma parjabu i.” (Mat. 10:12) Di inganan ni Jesus marbarita, somal do parjabu manogihon halak tu jabuna, nang pe ndang marsitandaan dope. Alai saonari on di godang inganan, ndang somal songon i. Molo adong halak na so tinanda ro tu jabu, olo do mabiar parjabu i. Alai molo burju hita tu nasida, boi do gabe pos roha ni parjabu i. Tingki marbarita hita di inganan na ribur mamangke rak beroda, gabe las do roha ni halak molo burju hita tu nasida. w18.06 22 ¶4-5

Najolo, holan tu halak Jahudi do si Petrus marbarita. Alai dipaboa Debata ma molo halak Kristen ndang boi mardingkan, jadi marbarita do si Petrus tu si Kornelius, sahalak tentara Rom. (Ul 10:28, 35) Dung i, olo do si Petrus rap mangan dohot angka dongan na so halak Jahudi. Alai dung piga-piga taon tingki di Antiokia, ndang olo be ibana rap mangan dohot nasida. (Gal. 2:11-14) Dipasingot si Paulus ma si Petrus, jala olo do si Petrus manjalo sipasingot i. Boi ma taida i sian surat ni si Petrus tu angka dongan na halak Jahudi dohot na so halak Jahudi di Asia. Di suratna i, didok ibana mansai ringkot do mangkaholongi sude angka donganta. (1 Ptr. 1:1; 2:17) Sian sitiruon na dibahen Jesus, diparsiajari angka apostel ma cara mangkaholongi “sude jolma”. (Joh. 12:32; 1 Tim. 4:10) Boi do nasida muba nang pe godang tingki na dihaporluhon. Didok, “Marsihaholongan do nasida sude.” Jala na asing mandok, “Sai masiurupan do nasida, nang pe ingkon mate.” Ala rade do angka halak Kristen ‘marpangalaho na imbaru’, gabe ditiru nasida ma Debata na so mardingkan tu sude halak.​—Kol. 3:10, 11. w18.06 12-13 ¶15-16

Somalna baju partahanan ni tentara Rom dibahen sian bosibosi na manutupi sude andorana. Ingkon sai dipareso ibana do asa bosibosi i tongtong gomos. Alana, baju partahanan on boi mangalinggomi jantung dohot na asing asa unang hona podang manang panah. Songon baju partahanan i, songon i ma uhum ni Jahowa boi mangalinggomi ‘rohanta’. (Poda 4:23) Ndang olo sahalak tentara manukar bosibosi ni bajuna i tu bosibosi na so denggan. Suang songon i ma, ndang olo hita manukar uhum ni Jahowa tu pamingkirionta sandiri. Ndang boi holan hita sandiri na manjaga rohanta. (Poda 3:5, 6) I do alana, ringkot do molo sai tapareso ‘bosibosi’ na tadapot sian Jahowa, asa tongtong i manjaga rohanta. Jala molo lam holong rohanta tu hasintongan, gabe lam mura ma tapangke “baju partahanan, i ma mangihuthon uhum ni Jahowa.​—Ps. 111:7, 8; 1 Joh. 5:3. w18.05 22-23 ¶3-4, 6-7

Sasintongna ndang ala na so adong aek umbahen marungut-ungut halak Israel, alai disalahon nasida do si Musa ala diboan nasida tu padang pasir (4 Mus. 20:1-5, 9-11) Alani i, muruk hian ma si Musa jala gabe mago ma lambok ni rohana. Sasintongna, holan mangkatai do ibana disuru Jahowa tu batu i. Hape gabe muruk do si Musa tu bangso i huhut didok ibana, boi do bahenonna tanda halongangan. Dipungkul si Musa ma batu i sampe dua hali, dung i kaluar ma godang aek. Alani muruk ni rohana dohot ginjang ni rohana, gabe dibahen ibana ma hasalaan na balga. (Ps. 106:32, 33) Ala ndang marlambok ni roha be si Musa, gabe ndang dipaloas be ibana dohot tu Tano na Dijanjihon (4 Mus. 20:12) Sian on, tadapot ma parsiajaran na ringkot. Na parjolo, ingkon tongtong do hita marlambok ni roha. Molo ndang tapatudu be lambok ni roha, boi do gabe ginjang rohanta jala gabe tadok hata na oto. Na paduahon, nang pe marsak hita jala mangadopi hasusaan, ingkon tongtong ma marlambok ni roha. w19.02 12-13 ¶19-21

Gabe borat do tahilala tingki marbarita? Ndang. Dung dipaboa Jesus tudosan taringot hau anggur, didok ibana molo marbarita hita, gabe boi do dapotta las ni roha sian ibana. (Joh. 15:11) Songon dia carana? Taingot ma molo di tudosan i, dipatudos do Jesus songon hau anggur, jala siseanna ma angka rantingna. (Joh. 15:5) Angka ranting boi mandapot aek dohot sipanganonna, holan molo ranting i ndang maponggol sian hauna. Suang songon i ma, boi do tongtong hita marlas ni roha molo tongtong taihuthon Jesus, i ma laho mangulahon sangkap ni Debata. (Joh. 4:34; 17:13; 1 Ptr. 2:21) Si Hanne naung merintis saleleng 40 taon mandok, “Ala sai las do rohangku tingki dung sae marbarita, gabe taronjar do rohangku asa tongtong merintis.” Las ni roha i boi mambahen hita tongtong ringgas marbarita, nang pe godang na so olo manangihon.​—Mat. 5:10-12. w18.05 9 ¶2; 13 ¶14

Si Paulus pe gabe sada sitiruon na denggan do taringot patoguhon angka dongan. Ditogutogu tondi parbadia do ibana asa marbarita tu halak Junani, Rom, dohot angka halak na manomba gana-ganaan. (Gal. 2:7-9) Lao do si Paulus tu luat na saonari digoari Turki, jala lao do muse ibana tu Junani dohot tu Italia. Marbarita do ibana tu na so halak Jahudi, jala dipungka ibana ma huria Kristen disi. Ndang mura parngoluan ni halak Kristen di tingki i. Alana sai dialo godang halak do nasida. Jadi, porlu do nasida dipatogu. (1 Tes. 2:14) Di taon 50 M, ditongoshon si Paulus do surat na patoguhon roha ni angka dongan di huria Tessalonik. Didok ibana, “Na mandok mauliate do hami tongtong tu Debata siala hamu saluhutna; ai hutaringoti hami do hamu di tangiangnami. Ai ndang mansadi hami marningot ulaonmuna na sian haporseaon dohot halojaonmuna.” (1 Tes. 1:2, 3) Jala dipangido ibana do asa masipatoguan nasida jala disurat ma, “Sai masipaingotan ma hamu jala masipauliulian, songon naung binahenmuna.”​—1 Tes. 5:11. w18.04 19-20 ¶16-17

Molo diharingkothon hamu do laho pasonangkon Jahowa di ngolumuna, tontu marsitutu do hamu laho marbarita. Jadi, mansai ringkot situtu do marbarita na uli di ngolumuna. Marsitutu do hamu asa lam denggan marbarita? Olo do hamu merintis? Songon dia molo ndang pola lomo rohamuna marbarita saleleng on? Jala songon dia carana asa lam denggan hamu paboahon haporseaonmuna tu na asing? Adong dua carana: Parade ma angka na porlu laho marbarita. Jala marsitutu ma paboahon tu halak taringot Jahowa. Hilalaonmuna ma las ni roha molo marbarita. Ra, adong do sungkunsungkun ni dongan singkolamuna, “Tutu do Adong Debata?” Paradehon hian ma alus ni sungkunsungkun i. Ida ma video di jw.org/bbc. Disi dapotmuna ma video na marjudul Na Didok Angka Donganmu—Tutu do Adong Debata. w18.04 29-30 ¶10-11

Nang pe bebas si Adam dohot si Hawa, alai adong do aturan na ingkon diihuthon nasida. Piga-piga aturan i nunga gabe hasomalan ni nasida ganup ari. Umpamana, marhosa, mangan, dohot modom. Gabe ndang bebas do nasida alani i? Tontu daong. Gariada, las do roha ni nasida mangulahon i. (Ps. 104:14, 15; Pjm. 3:12, 13) Dilehon Jahowa do parenta tu si Adam dohot si Hawa asa marpinompari, manggohi tano on, jala manjaga i sude. Gabe so bebas do nasida alani parenta i? Ndang songon i! Gariada, alani parenta i, gabe boi ma nasida mambahen saluhut tano on gabe paradeiso, jala mangolu salelengna dohot angka pinomparna. On do sasintongna sangkap ni Debata. (Ps. 127:3; Jes. 45:18) Jadi molo dioloi si Adam dohot si Hawa hian Jahowa, tontu boi do tongtong denggan rumatangga ni nasida, jala marlas ni roha. w18.04 4-5 ¶4, 7-8

Molo sabar hita tu angka halak tingki marbarita, tontu ndang tapaksa nasida asa pintor mangantusi manang manjalo hasintongan na baru dibege nasida. Umpamana, pingkirhon ma songon dia carana mangurupi sasahalak asa mangantusi taringot paradeiso di tano on. Ra, porsea do nasida molo mate sasahalak, ndang boi be mulak mangolu manang sude halak na burju laho mangolu di surgo. Parrohahon ma pengalaman ni sahalak donganta na mangurupi godang halak asa mangantusi taringot paradeiso. Parjolo, dijaha ibana ma 1 Musa 1:28. Dung i disungkun ma parjabu i, didia jala ngolu na songon dia do na dihalomohon Debata tu jolma. Godang do na mandok, “Di tano on jala marlas ni roha.” Dung i dijahahon donganta i ma muse Jesaya 55:11, jala disungkun ma muse, na muba do sangkap ni Debata? Jotjot do parjabu mandok, ndang. Na parpudi, dijahahon ma Psalmen 37:10, 11 jala disungkun ma, aha do pangkirimonta di ari na naeng ro. Marhite angka ayat on, godang do halak na diurupi ibana asa mamboto sangkap ni Debata, i ma hangoluan saleleng ni lelengna di Paradeiso. w19.03 24 ¶14-15; 25 ¶19

Tangkas ma, lomo roha ni Jahowa asa tatangihon hata ni Anakna jala taulahon. Denggan do diajarhon Jesus tu angka siseanna carana marbarita na uli, jala dipaingot do nasida asa tongtong jaga. (Mat. 24:42; 28:19, 20) Didok Jesus do muse tu nasida asa marsitutu mangulahon i jala unang marnaloja. (Luk. 13:24) Dipaingot Jesus do angka siseanna asa masihaholongan, tongtong marsada, jala mangulahon parentana. (Joh. 15:10, 12, 13) Jala marlaba do sipaingot on tu hita saonari. Didok Jesus, “Manang ise na mangoloi hasintongan i, tangihononna do soarangku.” (Joh. 18:37) Molo ‘tongtong sabar tu na asing, jala rade manalpuhon hasalaan’, on patuduhon na tatangihon do Jesus. (Kol. 3:13; Luk. 17:3, 4) Cara na asing laho manangihon Jesus, i ma molo tongtong ringgas hita marbarita na uli “di tingki susa dohot di tingki sonang”.​—2 Tim. 4:2. w19.03 10 ¶9-10