April

Pingkiran ni ise do na tatiru? Pingkiran ni Jahowa do manang pingkiran ni angka halak di portibi on? Sude halak Kristen, ingkon marsitutu do mangulahon lomo ni roha ni Debata. Marsitutu do hamu maniru pingkiran ni Jahowa? Sasintongna, ndang mura maniru pingkiran ni Jahowa. Alana, umgodang do halak di humaliangta na so maniru pingkiran ni Jahowa. (Eps. 2:2) Jala halak di portibi on pe holan mangkaringkothon dirina sandiri. Alani i, molo ndang manat hita boi do gabe taihuthon pingkiran ni nasida. Molo tapaloas pingkiran ni angka halak di portibi on manegai pingkiranta, boi do hita gabe mamingkirhon dirinta sandiri. Ujungna, ndang taantusi be dia na denggan dohot na so denggan. (Mrk. 7:21, 22) Ringkot do taparsiajari “pingkiran ni Debata” ndang “pingkiran ni jolma”. w18.11 21 ¶1; 22 ¶3-4

Ndang lomo roha ni Jesus dipasangap angka pamimpin agama manang parpolitik. Alai hea do tolu hali Jahowa mangkatai sian surgo laho patuduhon holongNa tu Jesus. Tontu, on patoguhon roha ni Jesus! Umpamana, dung tardidi Jesus di Sunge Jordan, didok Jahowa ma songon na didok di ayat sadari on. Asing ni Jesus, ra holan si Johannes Pandidi do na mambege hata i. Dung i hira-hira sataon andorang so mate Jesus, tolu apostelna mambege soara ni Jahowa na mandok taringot Jesus, “On do Anakku, haholonganki, halomoan ni rohangku do ibana. Tangihon ma ibana.” (Mat. 17:5) Dung i muse, piga-piga ari andorang so mate Jesus, mangkatai ma Jahowa sian surgo tu ibana. (Joh. 12:28) Diboto Jesus do na laho jouon ni halak do ibana sahalak pangarehe, jala parmatena pe ndang denggan. Alai, tongtong do ditangiangkon ibana asa saut lomo ni roha ni Debata. (Mat. 26:39, 42) “Sabar do ibana manaon na hansit di hau partinaonan i, jala ndang maila.” Alana, rumingkot do di ibana hasangapon sian Amana, ndang sian portibi on.​—Heb. 12:2. w18.07 7-8 ¶15-16

Dung dibahen Jesus Borngin Parningotan na parjolo sahali, dipatudu ibana do habaranion. Sian dia taboto? Dioloi ibana do parenta ni Amana, nang pe ingkon mate ibana ala ditudu gabe parjahat na mangaleai Debata. (Mat. 26:65, 66) Laho pasangaphon jala pabadiahon goar ni Jahowa, tongtong do ibana setia. Gabe sada dalan do on tu angka halak na olo marhamubaon, asa mandapot hangoluan na salelengna. Jala di tingki i dipatogu Jesus do roha ni angka siseanna asa barani nasida laho mangadopi hasusaan di ari na naeng ro. Ndang sai dipingkiri Jesus hasusaan na diadopi ibana. Diparrohahon ibana do aha na dihaporluhon angka siseanna. On patuduhon na barani do Jesus. Dung laho si Judas, dibahen Jesus ma acara na sederhana. Acara on paingothon angka na miniahan na laho mandapot laba nasida sian mudar ni Jesus jala na dohot tu perjanjian na imbaru na dibahen Jesus.​—1 Kor. 10:16, 17. w19.01 22 ¶7-8

Dialusi Jahowa ma Jesus sian surgo, “Nunga hupasangap i, jala pasangaponku do i muse.” Ala naeng tongtong setia tu Jahowa, gabe susa ma dihilala Jesus. Diboto Jesus do na laho disiksa ibana jala lea parmatena. (Mat. 26:38) Alai na rumingkot di Jesus, i ma pabadiahon goar ni Jahowa. Marsak do Jesus molo parmatena i mambahen lea goar ni Jahowa, alana ditudu do ibana mangaleai Debata. Tontu, hata ni Jahowa i mambahen togu roha ni Jesus. Songon Jesus, hita pe olo do mabiar molo dileai goar ni Jahowa. Dibahen do na so tigor tu hita, manang adong mandok na so tutu taringot hita. Ra gabe marsak do hita, ala on boi mambahen marlea goar ni Jahowa dohot organisasina. Alai, hata ni Jahowa i, boi paposhon rohanta. Alana, sai dipasangap Jahowa do goarna.​—Ps. 94:22, 23; Jes. 65:17. w19.03 11-12 ¶14-16

Dirimpu siseanna laho patureon ni Jesus muse harajaon ni Israel. Hape didok Jesus, naeng disiksa nama ibana jala mate. Songgot ma roha ni angka siseanna i mambege hata ni Jesus. Didok si Petrus ma, “Asi ma roham tu dirim Tuan. Ndang na laho masa i tu ho.” Didok Jesus ma tu ibana, “Laho ma ho tu pudingku Bolis! Batu partuktuhan do ho di ahu, ai ndang pingkiran ni Debata dipingkirhon ho, pingkiran ni jolma do.” (Mat. 16:21-23; Ul. 1:6) Sian pangkataion ni nasida, tangkas do dipaboa Jesus mansai imbar do pingkiran ni Jahowa sian angka halak na di portibi on. (1 Joh. 5:19) Dijujui si Petrus do asa dipingkirhon Jesus dirina sandiri, dos songon angka halak di portibi on. Alai diboto Jesus do na ingkon rade ibana laho manaon hasusaan jala mate songon na dipangido Jahowa. Sian alus ni Jesus, tangkas ma tarida molo ibana maniru pingkiran ni Jahowa, ndang pingkiran ni portibi on. w18.11 21-22 ¶1-2

Tingki ro marjuta halak tu Borngin Parningotan ni Tuan, aha do na diida Jahowa? Diida Jahowa do sude na ro i ganup marsada-sada jala diboto do ise na ro ganup taon. Ra, adong do sian nasida na tongtong ro nang pe dianiaya. Na asing, nang pe ndang jotjot ro marpungu, alai ro do tu Borngin Parningotan. Alana ringkot do on didok roha ni nasida. Jala diida Jahowa do halak na parjolo sahali dope ro tu acara i. Ra, na lomo do roha ni nasida naeng mamboto songon dia acara i dibahen. Tontu, las do roha ni Jahowa mangida godang halak ro tu acara i. (Luk. 22:19) Ndang godang ni halak na ro na rumingkot di Jahowa. Alai na rumingkot di Ibana, i ma aha na mangonjar roha ni nasida ro tu acara i. Lomo do rohanta mangihuthon tudu-tudu na dilehon Jahowa marhite organisasina.​—Jes. 30:20; Joh. 6:45. w19.01 26 ¶1-3

Dibahen Jesus do contoh na dumenggan taringot mambahen pengorbanan. Asing ni rade mangalehon ngoluna, dipingkirhon Jesus do muse angka na ringkot di siseanna. Umpamana, nang pe nunga loja, dilehon ibana do tingkina laho patoguhon jala mangajari angka siseanna. (Luk. 22:39-46) Sai dipingkirhon ibana do aha na boi dilehon tu halak na asing. (Mat. 20:28) Nunga gabe sada keluarga hita sude. Tontu las do rohanta manggokkon godang halak asa rap dohot hita, tarlumobi ma angka “dongan sahaporseaon” naung leleng ndang marpungu dohot marbarita. (Gal. 6:10) Na holong do rohanta tu nasida molo tatogihon asa ro muse marpungu, tarlumobi tu Borngin Parningotan. Dos songon Jahowa dohot Jesus, tontu las do rohanta molo mulak muse nasida tu Jahowa, i ma Ama jala Parmahan na parholong.​—Mat. 18:14. w19.01 29 ¶12, 14; 30 ¶15

Rap dohot 11 siseanna na setia do parjolo sahali dibahen Jesus acara on. Sederhana do dibahen acara i. Dibuat ibana ma roti dohot anggur na lobi sian acara Paska na baru sae dope diulahon nasida. Didok Jesus ma tu angka siseanna i, molo roti na so marragi dohot anggur i, manggombarhon daging dohot mudarna na sempurna. On patuduhon na laho dilehon ibana do dirina gabe tobusan laho humongkop nasida. Ndang songgot be ra roha ni nasida ala sederhana dibahen Jesus acara na ringkot i. Boasa? Piga-piga bulan andorang so Borngin Parningotan i, ro do Jesus tu jabu ni ale-alena si Lasarus, si Marta, dohot si Maria. Jala mangajari ma ibana disi. Alai molo si Marta, sibuk do paradehon sipanganon. Gabe ndang ditangihon ibana be Jesus. Alani i, dipaingot Jesus ma ibana asa unang suda tingkina holan laho paradehon sipanganon, alana ndang i na rumingkot. (Luk. 10:40-42) Diulahon Jesus do na didok na i, piga-piga jom andorang so mate ibana. Dipastihon ibana do na sederhana acara i dibahen. w19.01 20-21 ¶3-4

Dungkon dipahehe Jesus, dilehon Jahowa do tu ibana “inganan na tumimbo” di surgo. Dibahen Jahowa do ibana boi tongtong mangolu, jala ndang adong dope na hea mandapot pasu-pasu sisongon i! (Plp. 2:9; 1 Tim. 6:16) Tontu, pasu-pasu na mansai arga do on di Jesus ala marsihohot ibana! Aha do na boi mangurupi hita asa tongtong mangkaringkothon hasangapon sian Jahowa? Tongtong ma taingot, sai dipasu-pasu Jahowa do angka naposoNa na marsihohot, jala dilehon do i marhite cara na so panagaman. Rimangi ma pasu-pasu na laho lehonon ni Jahowa tu hita di ari na naeng ro! Alai saonari, tongtong ma hita marsihohot nang pe godang sitaononta. Jala ingot ma, na laho salpu sitaonon i sude dohot hasangapon na di portibi on. (1 Joh. 2:17) Ndang dihalupahon Jahowa na tabahen dohot holong naung tapatudu, ala tigor do Ibana. (Heb. 6:10) Jala, pasu-pasuonNa ma hita, ra marhite na so hea tapingkirhon hian! w18.07 8 ¶17-18

Di tingki borngin na parpudi dohot angka siseanna, ditaringoti Jesus do asa boi nasida marsada. Tingki martangiang pe Jesus dohot nasida, ditangiangkon ibana do i asa boi nasida marsada, songon ibana marsada dohot Amana. (Joh. 17:20, 21) Molo marsada nasida, on patuduhon na tutu do Jahowa na manuru Jesus asa ro tu tano on. Gabe boi ma ditanda halak nasida sisean ni Jesus alani holong ni nasida. Jala holong i do na mambahen nasida marsada. (Joh. 13:34, 35) Di borngin i, jotjot do dihatai Jesus asa marsada nasida. Alana diparrohahon ibana, ndang boi dope nasida marsada. Umpamana, marsoal do muse nasida taringot “ise na umsangap”. (Luk. 22:24-27; Mrk. 9:33, 34) Asing ni i, hea do si Jakobus dohot si Johannes mangido asa dilehon tu nasida inganan na umsangap di lambung ni Jesus molo dung di surgo.​—Mrk. 10:35-40. w18.06 9 ¶1-2

Lomo roha ni Jahowa angka na mardongan saripe asa tongtong marsihaholongan saleleng ngolu ni nasida. (Mat. 19:3-6) Na so mangkaholongi dongan saripena do molo mangalangkup sasahalak. I do alana di patik na papituhon sian Sampulu Patik i, didok do asa unang mangalangkup. (5 Mus. 5:17b) Molo mangalangkup sasahalak boi ma tadok, jahat do ibana tu dongan saripena. Jala nunga ‘mardosa maradophon Debata’ ibana. (1 Mus. 39:7-9) Boi do hansit roha ni dongan saripe na so marsala i saleleng martaon-taon. Asing ni i, disarihon Jahowa do angka ianakhon. Alana, tanggung jawab ni natua-tua ndang holan manarihon na dihaporluhon ianakhonna, alai ingkon diurupi do ianakhonna asa marale-ale tu Debata. Alani i, diparentahon Jahowa do natua-tua asa mangajari ianakhonna mangargai Patik i jala mangkaholongi Jahowa. (5 Mus. 6:6-9; 7:13) Alana silehon-lehon sian Jahowa do angka ianakhon jala ingkon diargai angka natua-tua do i.​—Ps. 127:3. w19.02 21 ¶5, 7

Tongtong do setia si Job huhut mamingkirhon upa na laho dilehon Debata tu ibana. Porsea do si Job, na las do roha ni Debata molo setia ibana. Nang pe mangadopi sitaonon, pos do roha ni si Job na lehonon ni Jahowa upa tu ibana. Jala pos do rohana urupan ni Jahowa do ibana asa tongtong setia. Nang pe jolma na so sempurna si Job, tongtong do ibana setia tu Jahowa. Alani i, dilehon Jahowa do gok pasu-pasu tu ibana. (Job 42:12-17; Jak. 5:11) Jala haduan, lehonon ni Jahowa do muse gok pasu-pasu tu ibana. Ndang hea muba Jahowa. (Mal. 3:6) Molo taingot na arga do di Jahowa molo tongtong hita setia, on boi mangurupi hita tongtong mangingot pangkirimon i di bagas rohanta (1 Tes. 5:8, 9) Sipata, olo do ra dihilala hamu ndang adong donganmuna na setia tu Jahowa. Alai sasintongna, marjuta do halak na setia tu Jahowa di liat portibi on. Songon angka naposo ni Jahowa najolo na tongtong setia nang pe ingkon mate, hamu pe boi do songon i.​—Heb. 11:36-38; 12:1. w19.02 7 ¶15-16

Ala naung jonok Borngin Parningotan, tarimangi ma sungkun-sungkun on, ‘Songon dia do ahu boi maniru Jesus patuduhon holong? Holan diringku do na hupingkiri manang hupingkirhon do angka dongan na asing? Hupaksa do ingkon sempurna na dibahen angka dongan tu ahu, manang boi do huantusi hahurangan ni nasida?’ Tatiru ma Jesus jala tapatudu ma na “sapangkilalaan” do hita dohot angka dongan. Adong do tingkina ndang ulahononta be Borngin Parningotan ari hamamate ni Jesus. Tingki “ro” Jesus di haporsuhon bolon, papunguonna ma angka “na tarpillit” laho tu surgo. Dungkon i ma ndang ulahononta be Borngin Parningotan.(1 Kor. 11:26; Mat. 24:31) Nang pe ndang taulahon be i haduan, pos do rohanta sai ingoton ni naposo ni Jahowa do acara na sederhana i, na manggombarhon serep ni roha, habaranion, dohot holong na dipatudu Jesus. w19.01 25 ¶17-19

Asa mura taantusi songon dia rohanta, tarimangi ma tudosan on. Na parjolo, molo naeng sehat hita, tontu tapillit do sipanganon na sehat jala ingkon jotjot do hita olahraga. Suang songon i ma, asa boi tongtong hita mangoloi Debata ingkon tajaha do Bibel dohot angka publikasinta. Jala ingkon tongtong do tapatudu haporseaonta tu Jahowa. Carana, taulahon ma aha na taparsiajari jala tabaritahon ma aha na tahaporseai. (Rom 10:8-10; Jak. 2:26) Na paduahon, nang pe sian luar songon na sehat hita idaon, hape olo do di bagasan nunga marsahit. Suang songon i ma, didok rohanta nunga togu haporseaonta ala tongtong marbarita dohot marpungu. Alai boi do tubu sangkap na roa di bagasan rohanta. (1 Kor. 10:12; Jak. 1:14, 15) Ingot ma, marsitutu do Sibolis laho manegai pingkiranta. w19.01 15 ¶4-5

Tarimangi ma, ‘Hutiru do asi ni roha ni halak Samaria i?’ (Luk. 10:30-35) ‘Asi do rohangku tu dongan sahuria, i ma na matua, na mabalu, manang dakdanak na so Sitindangi natua-tuana? Rade do ahu mangapuli na marsak laho patoguhon nasida?’ (1 Tes. 5:14; Jak. 1:27) Molo marasi ni roha hita sarupa do i songon mangalehon tu sasahalak. Jesus pe mandok parohon las ni roha do molo adong na talehon tu sasahalak. Jala taboto, las do roha ni Jahowa tingki taulahon i. (Ul. 20:35; Heb. 13:16) Taringot halak na marasi ni roha didok Raja Daud do, “Ramotan jala pangoluon ni Jahowa do ibana, martua do ibana bahenonna di tano on”. (Ps. 41:2, 3) Molo marasi ni roha hita tu na asing, gabe marasi ni roha ma Jahowa tu hita. Jala tahilala ma las ni roha saleleng ni lelengna.​—Jak. 2:13. w18.09 18 ¶11-12

Sahalak donganta na margoar si Yoshiko, mandapot kabar na so denggan. Didok dokter, holan piga-piga bulan nai nama ibana mangolu. Nang pe songon i, ndang marsak ibana. Sai diingot ibana do ayat favoritna, i ma ayat na diulas sadari on. Didok di ayat i, songon na ditiop Jahowa do tanganna. Alani i, gabe tarapul do rohana jala pos do rohana tu Jahowa. Hita pe, molo mangadopi hasusaan boi do ayat on patoguhon rohanta. Mulana, disuru Jahowa do si Jesaya manurat hata on laho mangapuli halak Jahudi tingki gabe tahanan ni halak Babel. Ndang holan tu halak Jahudi hata on marlaba. Alai marlaba do i sahat tu hita saonari. (Jes. 40:8; Rom 15:4) Alana saonari hita mangolu ‘di tingki hasusaan di ari parpudi’. Jala lam susa do na laho taadopi. Alani i, buku Jesaya on boi do patoguhon rohanta.​—2 Tim. 3:1. w19.01 2 ¶1-2

Molo adong na mamillit gabe padao-dao dohot dongan saripena olo do gabe susa parngoluonna. Alani i, didok si Paulus do asa tongtong rap tading na mardongan saripe. Didok muse, “Molo ndang halak na porsea tunggane doli ni sahalak donganta borua, jala olo do tunggane dolina i rap tading dohot ibana, unang ma ditadingkon ibana tunggane dolina i.” (1 Kor. 7:14) Godang do donganta na mamillit tongtong rap tading dohot dongan saripena na so sisomba Jahowa, nang pe susa dihilala. Alana, molo tongtong martahan ibana, olo da ra gabe sisomba Jahowa dongan saripena i. (1 Kor. 7:16; 1 Ptr. 3:1, 2) Saonari, godang do angka donganta na denggan parsaripeonna. Boi do diida hamu di huriamuna angka suami na setia dohot angka istri na unduk tu suamina. Dipasangap nasida do parsaripeonna.​—Heb. 13:4. w18.12 14 ¶18-19

Eden lapatanna, “Hasonangan”, i ma inganan na mambahen las roha. Tontu inganan na mansai uli do on jala gok sipanganon. Disi, mardame ma jolma dohot binatang. (1 Mus. 1:29-31) Di bahasa Heber na didok “porlak” molo diterjemahon tu bahasa Junani gabe pa·raʹdei·sos na lapatanna, “paradeiso”. Di buku Cyclopaedia by M’Clintock and Strong mandok, molo dibege halak Junani hata pa·raʹdei·sos, na dipingkirhon nasida, i ma porlak na mansai bidang, uli jala ndang adong na mambahen bahaya. Disi godang do angka hau na marparbue dohot sunge na mansai tio. Adong muse biru-biru dohot ursa na maringanan disi. (Bandingkon 1 Mus. 2:15, 16.) Dibahen Jahowa ma si Adam dohot si Hawa tinggal di porlak na uli, i ma Paradeiso. Ala ndang dioloi nasida Jahowa, gabe ndang boi be nasida dohot pinomparna tading disi. (1 Mus. 3:23, 24) Nang pe ndang adong be jolma na tading disi, alai adong dope porlak i sahat tu na ro Aek na Sumar di tingki ni si Noak. w18.12 3-4 ¶3-5

Angka natua-tua, sai diajarhon do na denggan tu ianakhonna. Asa boi denggan ngolu ni nasida, diajari do nasida asa jujur, ringgas jala parduli tu halak na asing. Tontu marlaba do on tu nasida. Molo diulahon nasida poda ni natua-tuana, boi ma nasida mambahen keputusan na denggan jala ndang gabe susa ngoluna. Dipatudos do Jahowa songon natua-tua na burju. Lomo do rohana asa denggan ngolunta. (Jes. 48:18) Diajarhon do tu hita angka prinsip ni Bibel asa denggan pangalahonta tingki maradophon na asing. Dijujui do hita asa maniru pingkiran ni Jahowa jala mangihuthon podana. On ndang mambahen hita susa. Gariada boi do mangurupi hita asa mambahen keputusan na denggan. (Ps. 92:6; Poda 2:1-5; Jes. 55:9) Gabe las ma rohanta tu keputusan na tabahen i. (Ps. 1:2, 3) Jadi godang do labana maniru pingkiran ni Jahowa! w18.11 22-23 ¶7-8

Asa tongtong taihuthon hasintongan, unang ma mabiar hita tu halak na so manomba Jahowa. Dung marsiajar Bibel hita, adong do ra na mangargai haporseaonta. Alai adong do ra keluarganta na gabe marsogo ni roha tu hita. Ujungna gabe ndang solhot be hita dohot nasida. Ra, adong do keluarga, dongan karejo, manang dongan sasingkolanta na manogihon hita asa dohot tu perayaan ni nasida. Aha do na boi mangurupi hita asa unang dohot tu perayaan na so dihalomohon Jahowa? Ingkon taboto do aha na mambahen ndang lomo roha ni Jahowa tu perayaan i. Boi do tariset sian publikasinta songon dia mula ni perayaan i. Dung tarimangi aha na didok Bibel, gabe taboto ma boasa ndang boi hita dohot tu perayaan i. Alani i, pos ma rohanta ala nunga taulahon angka “na hinalomohon ni Tuhan” i. (Eps. 5:10) Molo porsea hita tu Jahowa dohot tu Bibel, ndang mabiar be hita tu jolma.​—Poda 29:25. w18.11 12-13 ¶10, 12

Molo tompu muba situasi di ngolunta, ra olo do hita gabe holsoan. Jala holan angka parsoalan i do na sai tapingkiri. Ra songon i do pangkilalaan ni si Josep. Alai tongtong do ibana mangulahon na dumenggan di situasi sisongon i. Tingki di jabu ni si Potifar, ringgas do ibana karejo. Jala tingki di penjara pe tongtong do ibana ringgas. Manang aha pe na disuru kepala penjara i, diulahon ibana do. (1 Mus. 39:21-22) Songon si Josep, ra olo do ndang boi songon na didok rohanta situasi na taadopi. Alai, molo sabar hita huhut taulahon angka na dumenggan, pasu-pasuon ni Jahowa do hita. (Ps. 37:5) Jadi nang pe hita holsoan jala hira ndang taboto aha na laho taulahon, sai taharingkothon ma ulaonna. Donganan ni Jahowa do hita jala sai adong do dalan haluaon.​—2 Kor. 4:8. w18.10 24 ¶11; 25 ¶13

Molo sahalak na ditanda hamu ndang diingot goarmuna, boha do pangkilalaanmu? Tontu, lungun do rohamuna. Alana lomo do rohanta asa diargai halak. Alai ndang holan i. Lomo do rohanta asa diboto ise hita na sasintongna, dohot angka naung taulahon. (4 Mus. 11:16; Job 31:6) Ala Sibolis do na mangarajai portibi on, dijujui do hita asa dipasangap. Jadi molo ndang manat hita, boi do gabe ginjang rohanta. Gabe ndang tapasangap be Jahowa, jala holan mangkaringkothon diri sandiri ma hita.​—Pgk. 4:11. w18.07 3 ¶1-2

Ndang longang be rohanta molo Sibolis dohot angka suru-suruanna na jahat mangela-ela angka parhuaso asa “jotjot margabus”. (1 Tim. 4:1, 2) Umpamana, margabus do piga-piga halak tingki mambahen iklan taringot bisnis ni nasida. Hape naeng mangoto-otoi halak do nasida asa dapotan hepeng. Jala ra tiga-tiga ni nasida pe boi mambahen sahit. Boasa boi parohon jea molo na so sintong diajarhon pamimpin agama? Alana molo porsea halak tu na diajarhon pamimpin agama, gabe na sala ma na diulahon nasida. Ujungna gabe ndang dapot hangoluan na salelengna nasida. (Hos. 4:9) Diboto Jesus do angka pamimpin agama di tingki i, nunga mangoto-otoi jolma. Tangkas do didok ibana tu nasida, “Marjea ma hamu siboto surat dohot halak Parise, halak na munafik! Ai ditaripari hamu do laut dohot darat laho mambahen sasahalak masuk tu agamamuna. Hape ia dung masuk, gabe tu Gehena [manang hamatean salelengna] do ibana dibahen hamu.” (Mat. 23:15) Didok Jesus angka pamimpin agama i sarupa do songon ama ni nasida i ma Sibolis, na didok “pambunu”.​—Joh. 8:44. w18.10 4 ¶5-6

Aha do lapatan ni hata ni Jesus on? Ibana laho mandok, “Ai songon i do angka panurirang manaon angka na hansit najolo. Marlas ni roha jala marolop-olop ma hamu, ai balga do upamuna di banua ginjang.” (Mat. 5:12) Jadi, tingki dipungkuli angka Apostel jala diorai marbarita, ‘kaluar ma nasida sian adopan ni Sanhedrin, alai las do roha ni nasida’. Ndang na gabe marlas ni roha nasida ala dipungkuli. Alai, nasida marlas ni roha “ala diboto tama do nasida dileai alani goar” ni Jesus.” (Ul. 5:41) Nang pe mangadopi hasusaan ala mangihuthon Jesus, tongtong do marlas ni roha angka Sitindangi. (Jak. 1:2-4) Songon angka apostel, ndang na gabe marlas ni roha hita ala diorai manomba Jahowa. Alai sai taingot ma, molo tongtong do hita marsihohot tu Jahowa sai urupanna do hita asa boi martahan. Ala tongtong hita marsihohot, las ma roha ni Jahowa tu hita. Jala hita pe gabe marlas ni roha do nang pe disusai halak dohot keluarganta ala manomba Jahowa, manang ala marsahit, jala ala lam matua hita.​—1 Tim. 1:11. w18.09 20 ¶18-20

Ala saonari hita mangolu di “tingki hasusaan”, gabe “gok arsak dohot hasusaan” na taadopi. Alani i, gok ma halak na mandele, ala mansai borat sitaonon ni nasida. (2 Tim. 3:1-5) Ganup taon lobi sian 800.000 halak na bunu diri. Jadi, sada halak ma na mate di ganup 40 detik. Jala, adong do piga-piga donganta na mate maningkot alani borat ni sitaonon ni nasida. Saonari godang do angka donganta na mangadopi sitaonon na borat, jadi ingkon tahaholongi do nasida. Adong do na gabe disusai, direhei manang digosipi di inganan nasida karejo. Manang adong do na palojahu ala jotjot lembur. Adong muse, na gabe stres ala maol hian karejona. Na asing ala mangadopi parsoalan di keluarga. Ra ala adong na marhasohotan tu na so Sitindangi gabe jotjot ma dibahen parsoalan tu nasida. Ala sitaonon sisongon i do na diadopi, gabe suda do gogo ni nasida. Jala gabe didok roha ni nasida ma ndang mararga be dirina. w18.09 9 ¶3, 5

Angka natua-tua boi do rap saulaon dohot Jahowa, marhite mangurupi ianakhonna asa mangalehon godang tingki tu Jahowa. Godang do angka natua-tua naung mangulahon i. Ujungna, ianakhon ni nasida dohot tu dinas sepenuh waktu, nang pe ingkon dao sian keluarga. Adong do na gabe utusan injil manang merintis di inganan na mangkaporluhon parbarita. Manang adong na karejo di Betel. Tontu, ala dao do angka natua-tua sian ianakhonna gabe ndang boi be nasida jotjot pajumpang. Alai, dipatogu nasida do ianakhonna asa tongtong marhobas tu Jahowa manang didia pe nasida. Boasa angka natua-tua olo mangulahon on? Ala las do roha ni angka natua-tua molo diharingkothon ianakhonna marhobas tu Jahowa. Jadi angka natua-tua i marlas ni roha songon si Hanna, na mangalehon anakna si Samuel tu Jahowa. Sada hasangapon do dihilala natua-tua boi rap saulaon dohot Jahowa marhite cara on.​—1 Sam. 1:28. w18.08 22 ¶4

Ndang adong didok Jesus ndang boi nasida masuk tu Harajaon banua ginjang. Didok ibana, “Marlas ni roha ma hamu angka na pogos, ai hamu do nampuna Harajaon ni Debata.” (Luk. 6:20) Alai lapatanna ndang sude halak na pogos, olo manangihon Jesus, jala dapot pasu-pasu na sumurung. Gariada godang do angka na pogos ndang mangihuthon Jesus. Sasintongna, ndang boi tadok sasahalak boi marale-ale tu Jahowa holan alani artana. Angka naposo ni Jahowa adong do na mamora, jala adong do na pogos. Alai, dihaholongi nasida do Jahowa jala diulahon do lomo ni roha ni Jahowa sian nasa roha. Didok do tu angka na mamora, “asa unang mangkirim nasida tu hamoraon na boi mago. Alai mangkirim ma nasida tu Debata”. (1 Tim. 6:17-19) Disurat do di Bibel, sipasingot tu sude naposo ni Jahowa, na mamora nang na pogos asa unang mangkaringkothon hepeng. (1 Tim. 6:9, 10) Molo tatiru do cara ni Jahowa maradophon angka naposona, tontu ndang tapaimbar-imbar nasida nang mamora manang pogos. w18.08 12-13 ¶11-12

Tontu, las do rohanta patuduhon hamauliateon tu Jahowa ala nunga dipillit gabe naposoNa. Jadi, sada haputusan na dumenggan do, molo marjanji hita tu Jahowa. Jadi ingkon tapasiding ma sude na dihasogohon Jahowa. Marsitutu ma hita burju jala mangkaholongi sude donganta, ala nasida pe na dipillit Jahowa do. (Rom 12:10) Disurat do di Bibel janji ni Jahowa. Didok, “ndang tagamon bolongkonon ni Jahowa anggo bangsona”. (Ps. 94:14) Jadi manang aha pe na masa, sai donganan ni Jahowa do hita. Nang pe mate hita, ndang na laho lupahononNa hita. (Rom 8:38, 39) “Alani i, molo mate manang mangolu hita, ampuna ni Jahowa ma hita.” (Rom 14:8) Tarpaima-ima do hita tingki dipahehe Jahowa sude naposoNa na naung mate. (Mat. 22:32) Jala saonari pe, nunga tahilala godang pasu-pasu sian Ibana. Alani i didok do di Bibel, “Martua ma bangso na mardebatahon Jahowa, bangso na pinillitna laho [naposoNa].”​—Ps. 33:12. w18.07 26 ¶18-19

Piga-piga halak marpingkir, ndang urusan ni halak aha na dipillit nasida. Jadi lomo ni nasida do mamillit aha na dihalomohon, saleleng i ndang mambahen ganggu panggora ni roha ni nasida. Ra, diingot nasida do hata ni si Paulus na mandok, “Boasa ingkon ambatan ni panggora ni roha ni halak ahu?” (1 Kor. 10:29, Bibel siganup ari) Nang pe bebas hita mamillit taringot singkola dohot karejonta, taingot ma adong do aturanna jala adong do pangkorhon ni haputusanta i tu ngolunta. I do alana, disurat si Paulus ayat na diulas di sadari on. Jadi, aha na tahalomohon, ndang i na rumingkot. w18.04 12 ¶10

Saonari, adong do ra halak Kristen naung manomba Jahowa alai tong mangulahon na dihasogohon Jahowa. (Jud. 11) Ra, ringgas do ibana marbarita dohot marpungu. Alai tong do dipingkiri ibana taringot seks na so patut, naeng gabe ampunana sude, manang marsogo ni roha tu na asing. (1 Joh. 2:15-17; 3:15) Angka sangkap sisongon i ma na boi mambahen sasahalak mardosa. Ra, ndang adong na mamboto na di roha dohot di pingkiranta. Alai, molo Jahowa, diboto Ibana do i. Jala, diboto do molo ndang marpihak be hita tu Ibana. (Jer. 17:9, 10) Molo taulahon na sala, ndang pintor tadingkonon ni Jahowa hita. Molo mangulahon na sala pe hita, didok Jahowa do, “Mulak ma hamu tu ahu”. Jadi, diboto Jahowa do adong hahuranganta. Alai lomo do rohaNa asa marsihohot hita tu Ibana jala pasidingkon sangkap na roa. (Jes. 55:7) Molo taulahon i, marjanji do Jahowa laho mangurupi hita. Jala dilehon do gogo tu hita asa boi mambolongkon angka sangkap na roa.​—1 Mus. 4:7. w18.07 16 ¶5-6