Mei

Godang do nuaeng on halak na laho sian huta ni nasida, jala mangungsi tu luar negeri. Tapangkulingi ma nasida mamangke bahasa ni nasida. Parsiajari ma piga-piga hata asa boi hita mangkatai tu nasida. Dung i, patudu ma video dohot sijahaonta di bahasa ni nasida, na adong di jw.org. Dilehon Jahowa do sude na tahaporluhon asa lam denggan marbarita. Umpamana, di Parpunguan Hangoluan dohot Pangkobasion, diurupi do hita asa barani manjumpangi muse jala mangurupi nasida marsiajar Bibel. Boi ma diajari hamu angka gellengmuna asa markomentar mamangke hata ni nasida sandiri. Piga-piga halak gabe taronjar do rohana marsiajar Bibel ala mambege angka dakdanak boi paboahon haporseaonna sandiri.​—1 Kor. 14:25. w18.06 22-23 ¶7-9

Taingot ma, ndang tatanda dope Debata najolo. (Eps. 2:12) Alai alani holongNa, ditogu Jahowa do hita asa jonok tu Ibana. (Hos. 11:4; Joh. 6:44) Jala dijangkon Jesus do hita. Diurupi ibana do hita asa boi gabe keluarga ni Debata. Nang pe nunga mardosa hita, alai dijangkon Jahowa dohot Jesus do hita. Jadi ingkon tajangkon ma muse sude halak! Nunga lam jonok be ajal ni portibi on. Lam tarbagi do halak, lam godang na paimbar-imbarhon jala mangkasogohon na asing. (Gal. 5:19-21; 2 Tim. 3:13) Alani i, hita angka naposo ni Jahowa, porlu do talului “habisuhon na sian ginjang i”. Boi do i mangurupi hita asa unang mardingkan jala tongtong mardame. (Jak. 3:17, 18) Las do rohanta mardongan dohot angka halak sian negara na asing. Taparsiajari do hasomalan ni nasida, jala adong do na marsiajar bahasa ni nasida. Molo taulahon on, gabe tadapot ma dame “doshon batang aek” dohot hatigoran “doshon galumbang ni laut”.​—Jes. 48:17, 18. w18.06 14 ¶18-19

Ingkon marsipatu do tentara Rom laho marporang. Sipatuna i dibahen sian bahan kulit sampe tolu lampis. Jadi, jago do sipatuna i jala tabo pangkeon. Alani i, gabe ndang mura nasida tarsulandit. Dos songon sipatu i, na ingkon dipangke laho marporang, hita pe ingkon tongtong do “mangkaringgashon barita na uli, pardamean i”. (Jes. 52:7; Rom 10:15) Alai, ingkon barani do hita marbarita. Si Bo, na marumur 20 taon mandok, “Mabiar do ahu marbarita tu dongan singkolangku. Maila do ahu. Alai molo hupingkiri, ndang huboto boasa songon i ahu. Saonari las do rohangku ala boi marbarita tu angka donganku.” Godang angka na poso saonari mandok, ummura do nasida marbarita molo nunga diparade hian angka na porlu. w18.05 23 ¶9-11

Didok Jesus tu angka apostelna, “Dame do hutinggalhon di hamu.” (Joh. 14:27) Songon dia dame sian Jesus i mangurupi hita marbarita? Molo tongtong hita marbarita, taboto na las do roha ni Jahowa dohot Jesus tu hita. Alani i, gabe dame ma pangkilalaanta. (Ps. 149:4; Rom 5:3, 4; Kol. 3:15) Dung didok Jesus na lomo do rohana asa marlas ni roha nasida, dipatorang ibana do boasa porlu nasida patuduhon holong na so mangkaringkothon diri. (Joh. 15:11-13) Didok ibana, “Ale-ale do hamu hudok.” Sada silehonlehon na arga do i! Alai songon dia angka apostelna i boi tongtong gabe ale-alena? Didok Jesus, “Laho hamu marparbue.” (Joh. 15:14-16) Lapatanna, tongtong ma marbarita. Dua taon andorang so dipaboa Jesus i, hea do didok ibana tu nasida, “Alai borhat ma hamu mamaritahon hata on: Nunga songgop harajaon banua ginjang i!” (Mat. 10:7) I do alana di borngin andorang so mate Jesus, dipaingot ibana do angka siseanna asa tongtong lao marbarita.​—Mat. 24:13; Mrk. 3:14. w18.05 13 ¶15-16

Angka naposo tongtong ma pasonangkon Jahowa jala manontuhon tujuan na denggan. Alai, godang do angka na poso na holan mamingkirhon songon dia asa marsonang-sonang. Ra, dijujui do hamu asa mangihuthon nasida. Jadi, porlu do dipaboa hamu tu nasida taringot aha cita-citamuna, jala unang ma halupahon i. Jadi, molo adong na mamaksa hamu asa mangihuthon nasida, aha ma na boi ulahononmuna? Pasiding ma angka situasi na boi mambahen hamu gabe tarelaela. (Poda 22:3) Pingkirhon ma pangkorhonna molo diulahon hamu na sala. Jala rade ma manjalo sipaingot. Tangihon ma poda ni natua-tuamuna dohot angka dongan na gabe sitiruon di huria. (1 Ptr. 5:5, 6) Molo hamu, rade do manjangkon sipasingot? w18.04 31 ¶14-16

Di bagasan suratna, didok Jesus do mauliate tu angka dongan na adong di piga-piga huria di Asia Kecil. Umpamana, di hata pamungka ni suratna tu huria na di Tiatira didok ibana do, “Huboto do angka na niulam, holong ni roham, haporseaonmu, na niulam tu Debata, dohot hasabaronmu. Huboto do gumodang na niulam saonari sian na parjolo i.” (Pgk. 2:19) Ndang holan angka naung diulahon nasida na dipujihon Jesus, alai dipuji do muse angka parange ni nasida na denggan. Nang pe porlu dope dipaingot Jesus piga-piga halak na di Tiatira, alai di hata pamungka dohot di hata panutup ni suratna tongtong do dipatogu nasida. (Pgk. 2:27, 28) Sasintongna ndang porlu Jesus mandok mauliate tu sude naung taulahon. Alana ibana do na manguluhon sude huria. Alai nang pe songon i, tongtong do didok ibana mauliate. Sitiruon na denggan do ibana di angka sintua! w19.02 16 ¶10

Di abad na parjolo dipangke Jahowa do punguan na mangaradoti laho mangurupi sude halak Kristen. Tarmasuk ma angka sintua na di huria. Disuru ma si Petrus dohot si Johannes manangiangkon halak Kristen na baru asa diurupi tondi parbadia. (Ul. 8:5, 14-17) Gabe dipatogu do si Pilippus dohot halak Kristen na baru alani pangurupion sian punguan na mangaradoti. Saonari, dipatogu Punguan na Mangaradoti Organisasi do angka na karejo di Betel, perintis istimewa, dohot hita sude. Songon halak Kristen di abad na parjolo, las do rohanta molo dipatogu. Jala di taon 2015, diparade nasida do buku Kembalilah kepada Yehuwa, laho patoguhon angka halak na manadingkon Jahowa. w18.04 19-20 ¶18-20

Dipingkir piga-piga halak, dumenggan do molo ndang pola adong aturan. Tabayangkon ma molo so adong aturan di portibi on. The World Book Encyclopedia mandok, ingkon dipingkirhon pamarenta do songon dia asa bebas rayatna, alai ingkon dibahen do aturan asa unang gabe lomolomo ni rayatna. Tutu, ndang mura nasida mambahen aturan. I do alana gabe godang ma dibahen aturan, jala porlu do pengacara dohot hakim laho patorangkon aturan i. Jadi, asa boi hita bebas hombar tu na dihalomohon ni Debata, adong do na ingkon taulahon. Na parjolo, tajangkon ma hasintongan na diajarhon Jesus. Na paduahon, ingkon gabe sisean ni Jesus do hita. Molo taulahon i, boi ma tadapot i. Alai, bebas sian aha do? Jesus mandok, “Hatoban ni dosa do ganup na mangula dosa. Molo dipalua Anak i hamu, na malua situtu ma hamu.”​—Joh. 8:34, 36. w18.04 6-7 ¶13-14

Tontu, las do rohanta molo rap dohot angka dongan na mamparrohahon jala manarihon hita. Alana, marsitutu do nasida patuduhon roha sapangkilalaan. Jala rade do nasida mangurupi hita nang pe ndang tapangido dope. Tontu, mandok mauliate do hita tu angka dongan na patuduhon roha “sapangkilalaan” tu hita. Sude hita halak Kristen, lomo do rohanta patuduhon roha sapangkilalaan. Alai taboto, ndang mura mangulahon i. Boasa? Alana hita ndang sempurna. (Rom 3:23) On mambahen hita holan mamingkirhon diri sandiri. Olo do ala nunga somal hita ndang patuduhon roha sapangkilalaan di keluarganta. Manang ala hea dibahen halak na so denggan tu hita na mambahen hita maol patuduhon roha sapangkilalaan. Asing ni i, olo do ala songon i angka dongan di humaliangta. Di ari parpudi on, godang do angka halak ndang mamingkirhon pangkilalaan ni na asing. Gariada, “mangkaholongi dirina sandiri” do nasida. (2 Tim. 3:1, 2) Alani i, molo tatiru Jahowa dohot Jesus, lam mura ma hita patuduhon roha sapangkilalaan. w19.03 14 ¶1-3

Di Patik na Pasampuluhon didok do unang haliangi ampuna ni halak, manang mangkalomohon ampuna ni na asing. (5 Mus. 5:18; Rom 7:7) Diboto Jahowa do, molo pingkiran dohot pangkilalaan na sala boi mambahen sasahalak gabe mangulahon na jahat. I do alana dilehon Jahowa patik on, asa mangajari naposona manjaga roha ni nasida, i ma pingkiran dohot pangkilalaan ni nasida. Umpamana songon Raja Daud. Sasintongna, halak na burju do ibana. Alai sada tingki, lomo rohana tu istri ni halak. Ala sai dipingkiri i, gabe mangulahon dosa ma ibana. (Jak. 1:14, 15) Ujungna mangalangkup ma si Daud, dioto-otoi ibana ma suami ni borua i dungkon i dibunu. (2 Sam. 11:2-4; 12:7-11) Ndang songon jolma, boi do diida Jahowa na di bagas rohanta. (1 Sam. 16:7) Ndang adong na buni sian Ibana. Nang pe songon i, angka na denggan do na diida Ibana sian hita. Alani i, lomo do rohana asa taboto songon dia dirinta jala ingkon taorom ma dirinta asa unang mangulahon na sala.​—2 Kron. 16:9; Mat. 5:27-30. w19.02 21 ¶9; 22 ¶11

Didok Bibel, si Musa ma halak na ‘lumambok sian saluhut jolma na di atas tano on’. (4 Mus. 12:3) Maksudna, na parbiar do si Musa? Manang na so barani do ibana mambahen keputusan dohot mangadopi halak? Ndang songon i. Alai molo pandapot ni godang halak, songon i do halak na lambok. Sasintongna halak na togu, tegas, jala halak na barani do si Musa. Ala sai diurupi Jahowa, barani do ibana manjumpangi si Firaun, mamimpin hira-hira tolu juta halak mangalewati padang pasir, jala mangurupi halak Israel manaluhon musu. Ndang sarupa hasusaan na taadopi songon na diadopi si Musa. Ganup ari, ingkon taadopi do angka halak manang situasi na boi mambahen hita maol patuduhon lambok ni roha. Marjanji do Jahowa “sai na teanon ni angka parlambohi do sogot tano i”. (Ps. 37:11) Alani i, gabe taronjar do rohanta patuduhon lambok ni roha. Molo songon i, nunga gabe halak na lambok roha hamu? Didok na asing do hamu halak na lambok roha? w19.02 8 ¶1-2

Dilehon Jahowa do panggora ni roha tu jolma. Si Adam dohot si Hawa pe adong do panggora ni rohana. Sian dia taboto? Dung mangulahon dosa, pintor martabuni do nasida. On patuduhon na ganggu do panggora ni roha ni nasida ala mangulahon dosa. Panggora ni roha, i ma pangkilalaan sian roha na paingothon hita jala manogu-nogu hita di parngoluan. Molo ndang tarlatik panggora ni roha ni sasahalak, dos do ibana songon kapal naung sega kompasna. Boi do gabe lilu kapal i ala diombus alogo. Alai molo denggan do kompasna, boi ma kapten kapal i mangatur asa unang lilu. Suang songon i ma, molo tarlatik do panggora ni rohanta, boi do i denggan manogu-nogu hita di parngoluan. Kompas, i ma sada alat na mamangke jarum magnet laho patuduhon arah na tatuju. Molo denggan kompasna i, ndang gabe lilu be halak na mamangke i. Molo ndang denggan talatik panggora ni rohanta, olo do gabe taulahon na sala. (1 Tim. 4:1, 2) Ra, olo do gabe tadok, “na jat denggan do i”. w18.06 15-16 ¶1-3

Godang do pingkiran ni halak di portibi on na sala na so pola tangkas tarida. Alani i ingkon tapasiding do i. Umpamana, adong do barita na mandok angka na denggan sian politik. Asing ni i, adong do muse barita taringot sasahalak naung marhasil jala diangkui angka halak di portibi on. Piga-piga film dohot buku mandok “ahu do na rumingkot” manang “keluargangku do na rumingkot”. Alani i, gabe godang do halak mangihuthon pandapot sisongon i. Alai maralo do i tu Bibel. Dipaboa do di Bibel, molo umholong rohanta tu Jahowa, gabe marlas ni roha do hita dohot keluarganta. (Mat. 22:36-39) Ndang sude hiburan sala. Alai andorang so taihuthon i, ingkon tasungkun do rohanta. ‘Boi do huboto na dia hiburan na sala? Hujaga do diringku dohot ianakhonku sian angka sitontonon dohot sijahaon na sala? Huurupi do ianakhonku asa unang tarihut-ihut tu pingkiran na sala marhite na diida dohot na dibege nasida?’ w18.11 25-26 ¶18-19

Na patuduhon na didongani Jahowa hita, i ma marhite mangkaholongi jala manarihon hita. Taboto ma muse balga ni holong ni Jahowa tu hita tingki didok Ibana, “Mansai arga do hamu di Ahu jala ala Huhaholongi hamu gabe Hulehon hasangapon di hamu.” (Jes. 43:4, Bibel siganup ari) Ndang adong na boi mangambati Jahowa patuduhon holongna tu naposona jala setia do Ibana tu hita. (Jes. 54:10) Tingki mangadopi sitaonon, ndang didok Jahowa pintor pasidingonna i sian hita. Alai, ndang dipaloas Ibana sitaononta na songon “batangaek” manang sunge na boi mambahen hita gabe maup. Manang hasusaan na songon “api” na boi mambahen marsak na ujungna mambahen hita ndang manomba Jahowa. Marjanji do Jahowa sai dongananna jala urupanna do hita asa boi ‘mamolus’ angka sitaonon. Songon dia carana? Diurupi do hita asa tongtong setia jala unang mabiar nang pe ingkon mate. (Jes. 41:13; 43:2) Molo pos rohanta tu janji ni Jahowa na mandok, “Ahu do donganmu,” gabe barani ma hita jala tongtong togu tingki mangadopi sitaonon. w19.01 3 ¶4-6

Molo poso dope hamu, ra dijujui angka guru, penasehat dohot halak na asing do hamu asa kuliah manang asa mandapot karejo na godang gajina. Alai imbar do poda ni Jahowa sian poda ni angka halak. Molo Jahowa, lomo rohana asa ringgas hamu marsiajar di singkola asa boi hamu annon manarihon dirimuna sandiri. Diboto Jahowa do, molo keputusan na dibahen hamu saonari mangkorhon do i tu masa depanmuna. (Kol. 3:23) Diparade Jahowa do tudu-tudu na boi mangurupi hamu mambahen keputusan na mambahen las rohana di ari parpudi on. (Mat. 24:14) Diboto Jahowa do aha na laho masa di ari na naeng ro jala andigan ajal ni portibi on. (Jes. 46:10; Mat. 24:3, 36) Hamu pe, tangkas do ditanda Jahowa. Diboto Ibana do aha na boi mambahen hamu marlas ni roha dohot na mambahen hamu ndang marlas ni roha. Godang do poda ni jolma songon na denggan begeon, alai molo ndang sian Bibel i, ndang adong labana. w18.12 15-16 ¶1-2

Gariada didok do laho “teanon ni angka parlambohi do sogot tano i, jala hahilashononna hinadeak ni hadameon”. Didok si Daud muse, “Teanon ni angka partigor i do sogot tano i, jala tongtong do nasida maringanan disi.” (Ps. 37:11, 29; 2 Sam. 23:2) Songon dia do janji on marlaba tu angka halak na mangoloi Debata? Diboto nasida do, molo haduan holan halak partigor do na laho tading di tano on. Jala bahenon ni Debata ma tano on gabe paradeiso songon porlak Eden. Godang do halak Israel na mangangku manomba Jahowa, alai lam leleng ndang dioloi nasida be Jahowa. Alani i, gabe dipaloas Jahowa ma halak Babel manaluhon nasida. Jala diboan ma nasida gabe hatoban ni halak Babel. (2 Kron. 36:15-21; Jer. 4:22-27) Alai marhite panurirangna, dipaboa Debata na laho mulak do muse halak Israel sian Babel dungkon 70 taon. Saut do masa surirang i. Alai, adong do laba ni i tu hita saonari na laho saut paradeiso i di tano on. w18.12 4-5 ¶9-10

Maralo do poda sian portibi on tu poda ni Bibel. Jadi, dumenggan do poda ni halak di portibi on sian poda ni Bibel? Didok Jesus, “Tarida do bisuk sian parniulaonna.” (Mat. 11:19) Nang pe nunga lam jago teknologi, alai ndang boi i pasaehon hasusaanta, songon porang, paimbar-imbarhon suku, dohot hajahaton. Adong muse na mandok, ndang sala mangulahon seks na so patut. Hape boi do i gabe mambahen sursar keluarga, mambahen sahit, dohot hasusaan na asing. Molo songon i, marlaba do poda ni Jahowa? Halak Kristen na mangihuthon poda ni Jahowa, boi mangkilala keluargana lam martua, lam sehat, jala boi marale-ale dohot sude dongan sahaporseaon di liat portibi on. (Jes. 2:4; Ul. 10:34, 35; 1 Kor. 6:9-11) On patuduhon, dao do dumenggan pingkiran ni Jahowa sian pingkiran ni jolma. w18.11 23 ¶8-10

Nang pe tongtong tabahen na denggan tu keluarga, alai ingkon manat do hita asa unang sampe mangalanggar prinsip ni Bibel laho pasonangkon nasida. Ingkon angka sisomba Jahowa do na gabe ale-alenta. Asa tongtong taihuthon hasintongan, ingkon denggan ma parniulaonta di adopan ni Jahowa. (Jes. 35:8; 1 Ptr. 1:14-16) Dung marsiajar Bibel, rade do hita paubahon pangalahonta hombar tu hata ni Debata. Adong do sian hita na ingkon godang mambahen hamubaon. Alani i, ingkon manat do hita asa unang mulak muse songon pangalahonta najolo i. Aha do na boi mangurupi hita asa unang songon i? Rimangi ma na dibahen Jahowa tu hita asa tongtong ias di adopanna. Dilehon Ibana do anakna, i ma Jesus Kristus na gabe tobusan. (1 Ptr. 1:18, 19) Alani i, ingkon tongtong ma taingot tobusan i. w18.11 12 ¶10-11

Didok angka dongan na dohot tu dinas sepenuh waktu, molo tongtong ringgas di ulaon marbarita boi do i mangurupi nasida tongtong marlas ni roha. Contoh sian nasida patuduhon, manang aha pe na masa molo tongtong taulahon na denggan jala pos rohanta tu Jahowa gabe boi ma tahilala hadameon ni roha dohot pingkiran. Jala gabe taboto do, molo taihuthon situasi na muba di ngolunta, gabe lam togu do parale-aleonta tu Jahowa. Di tingkinta saonari, boi do tompu muba ngolunta. Ra, tadapot do tugas na asing di ulaon ni Jahowa. Manang marsahit hita, manang ingkon mangurus keluarga. Alai aha pe na masa di ngolunta, pos ma rohanta tu Jahowa. Disarihon Jahowa do hita jala laho urupanna do hita di tingkina. (Heb. 4:16; 1 Ptr. 5:6, 7) Alai saonari aha pe na masa, taulahon ma na dumenggan. Martangiang ma tu Jahowa, jala tongtong ma marhaposan tu Ibana. Molo taulahon i tongtong do tahilala hadameon pingkiran sian Jahowa. w18.10 26 ¶17; 26-27 ¶19, 22

Sian Bibel boi do taparsiajari songon dia Jahowa mangantusi angka naposona. Umpamana, parrohahon ma songon dia si Samuel diurupi Jahowa laho paboahon barita panguhuman tu si Eli, Sintua ni Malim, songon na disurat di 1 Samuel 3:11-18. Didok do di Patik ni Jahowa, ingkon sangap do na poso tu angka na matua. Tarlumobi tu na adong tanggung jawabna. (2 Mus. 22:28; 3 Mus. 19:32) Bayangkon ma, na poso songon si Samuel tingki manogot dope laho mandapothon si Eli, jala ingkon barani paboahon barita panguhuman ni Debata. Didok di Bibel, “Mabiar do anggo si Samuel paboahon pangungkapon i tu si Eli.” Diurupi Debata do si Eli mamboto na Ibana do manjou si Samuel. Jadi, didok si Eli ma tu si Samuel asa unang ditabunihon ibana Hata ni Debata. “Dipaboa si Samuel ma hata i luhut tu ibana.” Jala hombar do hatana i dohot barita naung dipaboa hian tu si Eli. (1 Sam. 2:27-36) Sian carita on, taboto ma marbisuk do Jahowa jala diantusi do hita. w18.09 21 ¶2; 22 ¶4-5

Saonari, ndang holan angka parhuaso na margabus. Di artikel, “Boasa olo Jolma Margabus” na disurat Y. Bhattacharjee mandok, “nunga bangko ni jolma be na margabus i”. Asing ni i, adong do halak na marpingkir ndang na sala molo margabus. Jotjot do jolma margabus laho manjaga diri tarlumobi tingki adong hasalaan na dibahen nasida. Margabus do nasida asa dapotan godang hepeng. Didok do muse di artikel i, adong do piga-piga halak na olo margabus “tu halak na so tinanda, dongan sakarejo, ale-ale ni nasida dohot keluarga ni nasida”. Tingki martangiang si Daud didok ibana do tu Jahowa, “Sintong ni roha di bagasan do tongon lomo ni roham”. (Ps. 51:8) Na didok si Daud dison, na adong di rohanta do na rumingkot. Alani i sude halak Kristen ingkon ‘mandok na sintong tu donganna’.​—Sak. 8:16. w18.10 4 ¶4; 5 ¶9-10; 8 ¶19

Ra lobi sian tolu juta ma halak Israel na kaluar sian Mesir taon 1513 SM. Adong do sian nasida dakdanak, na matua, na cacat manang na marsahit. Alani godang ni nasida, dihaporluhon do Pamimpin na manarihon jala mangantusi nasida. Jahowa ma Pamimpin na songon i. Jala dipillit ma si Musa laho mangulahon i. Gabe ndang mabiar halak Israel nang pe ingkon manadingkon jabu ni nasida. (Ps. 78:52) Songon dia do Jahowa paposhon roha ni naposona asa unang mabiar? Taratur do dibahen Jahowa punguan ni halak Israel i tingki kaluar sian Mesir. (2 Mus. 6:26) Ala taratur do nasida dibahen, gabe boi ma diida nasida songon dia Jahowa manjaga jala mangalinggomi nasida. Dilehon Jahowa ma muse di nasida ‘ombun tingki arian’ jala “sondang ni api” tingki borngin, asa diboto nasida na sai dilinggomi Jahowa do nasida. (Ps. 78:14) Ringkot do dipapos roha ni halak Israel, ala adong dope na laho diadopi nasida. w18.09 24-25 ¶11-12

Di tingki najolo adong do piga-piga naposo ni Debata, na mandok di rohana tumagon ma mate. Songon si Job na marsak alani sitaononna. Didok ibana ma, “Nunga ngolngolan ahu. Loja ahu na mangolu on.” (Job 7:16) Si Jona pe, ala mandele ibana gabe didok ibana ma, “On pe ale Jahowa, ua buat ma tagonan hosangku sian ahu, ai dengganan ahu mate sian na mangolu.” (Jona 4:3) Suang songon i muse si Elia. Tingki marmetmet ni roha ibana, didok ma, “Nunga i sae ale Jahowa, buat na ma tagonan hosangki.” (1 Raj. 19:4) Nang pe songon i pangkilalaan ni naposona, holong do roha ni Jahowa tu na marsihohot. Jala lomo do rohana asa tongtong mangolu nasida. Ndang diuhum Ibana nasida. Gariada, diurupi Jahowa do naposona asa unang mandele jala boi tongtong marsihohot mangulahon lomo ni rohana. w18.09 9 ¶4

Lomo do roha ni naposo ni Debata manamue. Di angka buku Junani, hata “manamue” lapatanna burju manamue halak na so ditanda. (Heb. 13:2) Sian Bibel adong do angka contoh na mangurupi hita asa ringgas manamue. (1 Mus. 18:1-5) Ingkon olo do hita mangurupi na asing, nang pe nasida ndang ‘dongan sahaporseaonta’. (Gal. 6:10) Boi do hita rap saulaon dohot Jahowa tingki paradehon inganan laho manginap tu angka dongan na dohot tu dinas sepenuh waktu. (3 Joh 5, 8) Adong do labana molo taulahon i. Jala hita pe boi “masipatoguan”. (Rom 1:11, 12) Di Bibel, dijujui do angka baoa di huria asa rap saulaon dohot Jahowa marhite gabe parhobas manang sintua. (1 Tim. 3:1, 8, 9; 1 Ptr. 5:2, 3) Alana angka parhobas dohot sintua rade do mangurupi angka dongan di huria. (Ul. 6:1-4) Jala didok angka donganta baoa, las hian do roha ni nasida tingki mangulahon on. w18.08 23 ¶6-7; 24 ¶10

Tingki mangalehon sipasingot, tongtong do si Timoteus burju jala mangargai angka dongan naung matua. Songon dia molo adong sahalak na matua na sengaja mangulahon dosa? Manang manjujui na asing asa mangulahon na so denggan? Ndang gabe dipasombu Jahowa hasalaanna i holan ala nunga matua ibana jala diargai halak. Prinsip na disurat di Jesaya 65:20 mandok, “pardosa sisaratus taon hona bura”. Sarupa do prinsip on songon na di parnidaan ni si Hesekiel. (Hes. 9:5-7) Alai na rumingkot tapasangap ma Jahowa, i ma Debata naung adong sian najolo. (Dan. 7:9, 10, 13, 14) Molo tapasangap do Jahowa, ndang mabiar hita pasingothon donganta nang pe na matua.​—Gal. 6:1. w18.08 13 ¶13-14

Porlu do taboto cara mamastihon hatorangan na tabege asa boi mambahen kesimpulan na denggan. (Poda 3:21-23; 8:4, 5) Alani i, ingkon talului ma angka bukti sian hatorangan na tabege i. Alana, lomo do roha ni Sibolis dohot angka halak di portibi on manggugai pingkiranta. (Eps. 5:6; Kol. 2:8) Saonari, mura do mangalului hatorangan. Umpamana, sian internet, TV, dohot na asing. Ra, godang do e-mail (surat elektronik), SMS, manang cerita na tadapot sian angka dongan. Ala ndang marnasae cerita i, jadi ingkon manat ma hita. Ra ala las ni rohana, olo do dipasahat donganta sada cerita tu hita, hape ndang diboto ibana molo cerita i ndang sintong be. w18.08 3-4 ¶1, 3

Dipillit Jahowa do si Maria asa gabe omak ni Jesus ala serep rohana. Tading di Nasaret do si Maria, sada kota na gelleng jala dao sian Jerusalem dohot bagas joro. (Luk. 1:26-33) Jala boi taboto, sian pangkataionna tu si Elisabet, togu do parale-aleon ni si Maria tu Jahowa. (Luk. 1:46-55) Sai diparrohahon Jahowa do si Maria. Ala marsihohot do ibana tu Jahowa, balga do pasu-pasu na dapotna. Tingki tubu Jesus, ndang dipaboa tu angka pejabat manang angka pamarenta di Jerusalem taringot i. Alai marhite suru-suruan, dipaboa Jahowa do tu angka parmahan na di adaran ni Betlehem barita hatutubu ni Jesus i. (Luk. 2:8-14) Dung i, diida angka parmahan i ma Jesus naung tubu. (Luk. 2:15-17) Ra, songgot do roha ni si Maria dohot si Josep mangida situasi i. w18.07 5-6 ¶11-12

Boasa muruk situtu Jahowa tu si Salomo? Bibel mandok, “Ala marbalik rohana sian Jahowa, . . . naung niida ni rajai pola dua hali. Nunga pola [didokkon] Ibana tu rajai taringot tu hata on, na so tupa ihuthononhon angka debata sileban; alai ndang diradoti ibana tona ni Jahowa.” Ujungna, gabe sogo ma roha ni Jahowa mangida si Salomo jala ndang diurupi Jahowa be ibana. Pamarentaon ni angka pinomparna pe ndang be mamarenta tu saluhut bangso Israel. Jala gok do parsoalan ni nasida saleleng marratus taon. (1 Raj. 11:9-13) Molo mardongan hita tu angka halak na so mangargai uhum ni Debata, boi do i mambahen sega parale-aleonta tu Jahowa. Ra donganta di huria do nasida, alai ndang solhot nasida tu Jahowa. Manang, nasida keluarganta, tetangga, dongan sakarejo, dohot dongan sasingkola na so sisomba Jahowa. Jadi molo suda tingkinta marsaor dohot nasida, boi do i mambahen gabe ndang marale-ale be hita tu Jahowa. w18.07 17-18 ¶9-10

Dipangke Sibolis do film dohot acara di TV laho manegai pingkiranta. Diboto ibana do, pingkiran, pangkilalaan dohot parniulaonta boi dipengaruhi marhite cerita dohot hiburan. Tingki mangajari Jesus, dipangke ibana do cerita asa hona tu roha ni angka halak na niajarhonna i. Umpamana, cerita taringot sahalak Samaria na burju dohot cerita anak na mago. (Mat. 13:34; Luk. 10:29-37; 15:11-32) Jala angka halak na mangihuthon Sibolis pe, boi do mamangke cerita laho manegai pingkiranta. Alai, ndang sude film manang hiburan manegai pingkiranta. Nang pe songon i, ingkon manat do hita mamillit film manang hiburan. Tasungkun ma dirinta, ‘Boi do film manang hiburan on mambahen ahu gabe mangulahon sangkap na roa?’ (Gal. 5:19-21; Eps. 2:1-3) Molo nunga diboto hamu hiburan i boi manegai pingkiranmuna, pintor pasiding ma i. Songon pasidingkon sahit na menular! w19.01 15-16 ¶6-7

Songon tangkuluk na manjaga ulu ni sahalak tentara, “pangkirimon ni roha di haluaon” boi manjaga pingkiranta. (1 Tes. 5:8; Poda 3:21) Aha do na diulahon Sibolis asa ndang tapangke tangkuluk i? Ingot ma na dibahen ibana tu Jesus. Diboto ibana do molo Jesus na laho mamarenta jolma haduan. Alai, ingkon dihilala ibana do jolo hasusaan dohot hamatean. Dungkon i, baru pe ibana gabe Raja. Jadi, ditawarhon Sibolis ma asa tibu ibana mamarenta. Dijanjihon Sibolis do molo olo Jesus manomba ibana, lehononna do pamarentaon ni portibi on tu ibana. (Luk. 4:5-7) Suang songon i ma, diboto Sibolis do na dijanjihon Jahowa tu hita portibi na imbaru. Alai, ingkon tapaima do i nang pe godang parungkilonta. Jadi, ditawarhon Sibolis do hasonangan ni portibi on, asa ndang taharingkothon be Harajaon ni Debata.​—Mat. 6:31-33. w18.05 25 ¶15-17

Lomo do roha ni Jahowa asa marlas ni roha hamu di haposoonmuna. Ihuthon ma tudutudu sian Jahowa tingki mambahen haputusan. I do na boi palashon rohamuna. Jadi, molo saonari diulahon hamu i, hilalaonmuna ma panogunoguon, parlinggoman, dohot pasupasu sian Jahowa tu hamu. Rimangi ma sude sipasingot sian Bibel, jala ulahon ma poda on, “Sai, dipaingot-ingot roham ma Sitompa ho di angka ari haposoonmu.” (Pjm. 12:1) Angka na poso, sipujion do hamu di huria, marsitutu do hamu manomba Jahowa. Ditontuhon hamu do tujuanmuna, i ma mangkaringkothon ulaon marbarita di ngolumuna. Tongtong do diingot hamu tujuanmuna i. Ndang marisuang sude ulaonmuna i. Adong do angka dongan na mangkaholongi jala manarihon hamu. Jadi “tu Jahowa ma giling [manang pasahat] angka pambahenanmu, asa tulus angka sangkap ni roham”. w18.04 31 ¶17; 32 ¶19