Juni

Tontu, gabe dipatogu do angka apostel alani janji ni Jesus on! Ndang diboto angka apostel na laho mate nama Jesus. Alai mate pe Jesus, ndang lapatanna gabe so adong na mangurupi nasida. Rade do Jahowa mangalusi tangiang ni nasida jala mangurupi nasida marbarita. Jala tutu do i. Dung mate Jesus, dipangido angka apostel do habaranion sian Jahowa, jala dialusi Jahowa do tangiang ni nasida i. (Ul. 4:29, 31) Songon i ma hita saonari. Molo tongtong hita marbarita, tongtong ma hita gabe ale-ale ni Jesus. Jala pos do rohanta, sai rade do Jahowa mangalusi tangiangta jala diurupi do hita tingki tahilala hira na maol marbarita. (Plp. 4:13) Mansai las do rohanta ala rade do Jahowa mangalusi tangiangta, jala boi hita gabe ale-ale ni Jesus. Sude silehonlehon na sian Jahowa on mangurupi hita asa tongtong marparbue.​—Jak. 1:17. w18.05 14 ¶17-18

Ra, sungkunsungkun do roha ni halak Kristen di abad na parjolo, boasa dijujui si Paulus asa lam ringgas nasida masipatoguan. Alai dung piga-piga taon, gabe diantusi nasida ma, nunga jonok panguhuman sian Jahowa tu Jerusalem. Ingkon ditadingkon nasida do kota i, songon naung hea didok Jesus. (Luk. 21:20-22; Ul. 2:19, 20) Panguhuman i masa di taon 70 M, i ma tingki halak Rom manaluhon Jerusalem. Suang songon i ma situasinta saonari. Nunga jonok be ‘ari ni Jahowa na bolon jala na songkal sahali’. (Joel 2:11) Disurat panurirang Sepania do muse taringot tingkinta saonari, “Jonok na ma ari ni Jahowa na bolon i; jonok na ma i, jala silu situtu do i ro.” (Sep. 1:14) Alani i, ingkon “masiantoan ma hita, masipajujuan tu haholongon dohot tu angka ulaon na denggan!” (Heb. 10:24) Ingkon lam ringgas ma tasarihon angka donganta, asa boi hita masipatoguan. w18.04 21 ¶1-2

Tontu, gabe dipatogu do roha ni si Josua ala mambege hata on andorang so masuk tu Tano na Dijanjihon! Dipatogu Jahowa do punguan ni angka naposoNa. Umpamana, tingki halak Jahudi ditaban di Babel, dipaboa Jahowa do sada surirang na patoguhon roha ni nasida. Didok, “Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho, huhut maniopi ho marhitehite siamun ni hatigoranku.” (Jes. 41:10) Asing ni i, dipatogu Jahowa do angka halak Kristen di abad na parjolo, songon i nang hita saonari. (2 Kor. 1:3, 4) Dipatogu Jahowa do muse AnakNa. Dung tardidi Jesus, dibege ibana ma soara sian surgo na mandok, “On do Anakku, Haholongan i; halomoan ni rohangku do Ibana!” (Mat. 3:17) Tontu, on mambahen togu roha ni Jesus laho mangulahon ulaonna tingki di tano on! w18.04 16 ¶3-5

Dirimpu godangan halak do ndang bebas si Adam dohot si Hawa mamillit na dihalomohon rohana. Alai taingot ma, bebas ndang sarupa lapatanna tu manontuhon dia na denggan dohot na so denggan. Lomo ni nasida do unduk manang ndang. Alai, marhite “hau parbinotoan ni na denggan dohot na roa”, taboto ma holan Jahowa do na boi manontuhon dia na denggan dohot na so denggan. (1 Mus. 2:9) Alani i do umbahen dilehon parenta tu si Adam dohot si Hawa, asa dapot nasida las ni roha molo unduk. Alai, ndang unduk si Adam dohot si Hawa. Aha do hasilna, gabe bebas do? Ndang. Gabe ndang bebas be nasida jala ndang marlas ni roha. w18.04 5-6 ¶9-12

Ndang holan asi roha ni Jahowa tingki mangida naposona susa. Alai adong do na diulahon Ibana laho mangurupi nasida. Umpamana, tingki ditawan halak Israel di Mesir, diboto Jahowa do arsak ni roha ni nasida. Didok Jahowa ma tu si Musa, “Nunga tangkas huida pardangolan ni bangsongku . . . , jala nunga hutangihon angguhangguknasida . . . ai nunga huboto parniahapannasida i. Ala ni umbahen tuat Ahu paluahon nasida sian tangan ni halak Misir.” (2 Mus. 3:7, 8) Ala marasi ni roha Jahowa tu naposona, dipalua ma nasida sian Mesir. Dung i muse, susa do halak Israel dibahen angka musu tingki di Tano na Dijanjihon. Songon dia do pangkilalaan ni Jahowa? “Asi ma roha ni Jahowa tu nasida ala ni orongorongnasida binahen ni hinahansit dohot sitaononnasida”. Ala marasi ni roha, taronjar ma roha ni Jahowa laho paluahon nasida. Disuru Jahowa do angka hakim paluahon halak Israel sian angka musu.​—Pangh. 2:16, 18, Bibel siganup ari. w19.03 15 ¶4-5

Dua parenta na parjolo sian Sampulu Patik i, i ma holan Jahowa do na ingkon disomba jala unang manomba patung. (2 Mus. 20:3-6) Sasintongna Patik i parohon laba do tu halak Israel. Alai molo disomba nasida debata na asing, boi do gabe susa ngolu ni nasida. Molo setia nasida tu Jahowa jala dibahen na denggan tu angka halak, dipasu-pasu Jahowa do nasida (1 Raj. 10:4-9) Tingki adong halak na mangangku manomba Jahowa, hape ndang diulahon patikna jala dibahen susa tu naposona, ndang boi Jahowa na tasalahon. Alana, holong do roha ni Jahowa tu hita. Diboto Ibana do molo adong halak na mambahen na so tigor tu hita. Lungun do rohana, lobi sian lungun ni sahalak ina na mangida molo marsahit poso-posona. Nang pe ndang pintor diurupi Jahowa hita tingki masa sisongon i, alai adong do tingkina haduan uhumonna halak na tongtong mambahen na so tigor tu na asing. w19.02 22 ¶13-15

Di minggu-minggu andorang so Borngin Parningotan, jotjot do diulas di parpunguan taringot sitiruon sian Jesus dohot serep ni rohana. Dipatudu ibana do serep ni rohana i marhite mangalehon ngoluna gabe tobusan tu hita. Gabe taronjar ma rohanta laho maniru serep ni rohana jala mangulahon lomo ni roha ni Jahowa nang pe mangadopi hasusaan. Rimangi ma habaranion na dipatudu Jesus andorang so mate ibana. Diboto ibana do na laho ro musu mangarehei, mamungkul jala mambunu ibana. (Mat. 20:17-19) Alani i, tingki di Getsemane didok ibana do tu angka siseanna, “Hehe ma hamu, laho ma hita. Ida ma! Nunga ro na manjehehon ahu.” (Mat. 26:36, 46) On patuduhon ndang mabiar Jesus mate. Tingki ro sarombongan tentara laho manangkup ibana, barani do Jesus patandahon dirina na ibana do Jesus. Alai didok ma tu angka tentara i asa dipaloas angka siseanna laho. (Joh. 18:3-8) Tutu ma, halak na barani do Jesus! Saonari pe marsitutu do angka na miniahan dohot biru-biru na asing maniru habaranion ni Jesus. w19.01 27-28 ¶7-8

Songon sahalak pelukis, asa boi bagak lukisanna dipangke ibana do marragam warna. Suang songon i ma, asa boi gabe halak na lambok ingkon tapatudu do angka parange na denggan. Umpamana, serep ni roha, unduk, burju, jala barani. Holan halak na serep roha do na olo unduk tu parenta ni Debata. Jala diparentahon Debata do hita asa gabe halak na burju. (Gal. 5:22) Alai, on mambahen sogo roha ni Sibolis. Jala godang do halak di portibi on, na so lomo rohana molo serep rohanta jala lambok. (Joh. 15:18, 19) Alani i, ingkon barani do hita mangalo Sibolis. Imbar do halak na ginjang roha tu halak na lambok roha. Molo na ginjang roha, mura do muruk jala ndang mangoloi Jahowa. Songon i ma parange ni Sibolis. Alani i, ndang pola longang rohanta molo sogo roha ni Sibolis tu angka na lambok roha. Alana dipatudu halak na lambok roha do na roa pangalaho ni Sibolis. Aha pe na dibahen Sibolis, ndang boi diambati ibana halak na lambok roha manomba Jahowa! Dipatudu nasida do molo Sibolis i pargabus.​—Job 2:3-5. w19.02 8-9 ¶3-5

Diboto Jahowa mabiar do angka halak na ditaban di Babel. Dipangke Jahowa do halak Madai-Persia laho paluahon nasida sian Babel. (Jes. 41:2-4) Di tingki i, molo diboto halak Babel dohot bangso na asing na laho ro musu mamorangi nasida, masipatoguan do nasida asa tongtong barani. Dibahen nasida do muse angka gana-ganaan. Ala dirimpu nasida, boi do i mangurupi nasida. (Jes. 41:5-7) Alai, dipapos Jahowa do roha ni halak Jahudi di tingki i. Didok Ibana, ‘Anggo ho ale Israel naposongki [unang songon bangso na asing] . . . Unang ganggu rohamu, ai ahu do Debatam.’ (Jes. 41:8-10) Parrohahon ma hata ni Jahowa na mandok, “Ahu do Debatam.” On paposhon roha ni naposona molo Jahowa ndang mangalupahon nasida. Tongtong do Ibana Debata ni nasida jala tongtong do nasida naposona. Didok Ibana do muse, “Ahu do mangompa . . . jala ahu paluahon.” Tontu hata on, patoguhon naposona do tingki i.​—Jes. 46:3, 4. w19.01 4 ¶8

Tolu hali ma Jahowa hea mangkatai sian surgo. Alai di Markus 1:9-11 ma parjolo sahali dipaboa na hea mangkatai Ibana sian surgo. Didok Jahowa, “Ho do Anakku, haholonganki. Halomoan ni rohangku do ho.” Tontu mansai las do roha ni Jesus tingki mambege Amana paboahon holong dohot pos ni rohana tu ibana! Sian hata ni Jahowa i, adong tolu na ringkot taboto taringot Jesus. Na parjolo, Jesus Anak ni Debata. Na paduahon, dihaholongi Jahowa do Jesus. Na patoluhon, halomoan ni Jahowa do Jesus. Tingki didok Jahowa “Ho do Anakku”, on patuduhon na lam solhot do Ibana dohot Jesus. Andorang so tu tano on Jesus, nunga gabe anak ni Debata ibana. Alai dung tardidi, gabe anak ni Debata na dimiahi tondi parbadia ma ibana jala marpangkirimon mangolu di surgo laho gabe Raja dohot Malim. (Luk. 1:31-33; Heb. 1:8, 9; 2:17) Alani i, tingki tardidi Jesus didok Jahowa ma, “Ho do Anakku.”​—Luk. 3:22. w19.03 8 ¶3-4

Najolo, didok Sibolis do tu si Hawa, molo nasida sandiri na mamillit dia na dumenggan di ngoluna, lam marlas ni roha ma nasida. Poda na so denggan do on! (1 Mus. 3:1-6) Didok Sibolis pe songon i, na lomo do rohana asa holan ibana na disomba jala dioloi si Adam, si Hawa dohot angka pinomparna. Hape Jahowa do na mangalehon sude na dihaporluhon nasida. Dibahen do nasida mardongan saripe, tading di inganan na mansai uli jala dibahen do nasida sempurna asa boi mangolu salelengna. Alai, ndang dioloi si Adam dohot si Hawa Debata. Alani i, gabe susa ma ngolu ni nasida jala ndang marale-ale be dohot Debata. Songon bunga naung diputik sian bonana, songon i ma si Adam dohot si Hawa. Lam leleng, lam matua ma nasida jala mate. Pinomparna pe, gabe susa ma jala mate. (Rom 5:12) Saonari pe godang do halak na mangalo tu Debata. Holan lomo ni rohana do na diulahon nasida. (Eps. 2:1-3) Di ayat na diulas sadari on, tangkas do dipatudu aha hasilna. w18.12 16 ¶3-4

Halak na malo do si Paulus. Timbo do singkolana jala diboto ibana do bahasa Heber dohot bahasa Junani. (Ul. 5:34; 21:37, 39; 22:2, 3) Nang pe songon i, ndang diihuthon ibana habisuhon ni portibi on. Alai tingki mambahen keputusan, diihuthon ibana do Hata ni Debata. (Ul. 17:2; 1 Kor. 2:6, 7) Ujungna, gabe marhasil do ibana di ulaon marbarita. Jala pos do rohana sai na dapotna do pangkirimon i. (2 Tim. 4:8) Tangkas ma, pingkiran ni Jahowa do na umbisuk sian pingkiran ni angka halak di portibi on. Marlas ni roha jala marhasil ma hita molo taihuthon uhum ni Debata. Alai, ndang dipaksa Jahowa hita laho maniru pingkiranna. “Naposo haposan” dohot angka sintua pe, ndang olo mangatur pingkiranta. (Mat. 24:45; 2 Kor. 1:24) Alani i, hita sandiri do na ingkon mamillit laho maniru pingkiran ni Jahowa. w18.11 24 ¶12-13

Didok Debata marhite panurirang Jesaya, na laho mulak do muse halak Israel tu huta ni nasida, jala hilalaon ni nasida ma hadameon disi. Ndang mabiar be nasida tu binatang buas dohot tu jolma na jahat. Malua ma nasida sude. (Jes. 11:6-9; 35:5-10; 51:3) Didok si Jesaya, “Gok parbinotoan di Jahowa tano on sogot, songon aek ni laut mangalungkupi tondolanna.” Jadi ndang holan bangso Israel na mangkilala i, alai dohot do sude tano on. Didok si Jesaya, tingki mulak halak Israel sian Babel, ndang adong binatang buas manang halak na jahat na manggugai nasida. Didok ibana muse, marhasil do suan-suanan ni nasida ala gok do aek disi songon na di porlak Eden. (1 Mus. 2:10-14; Jer. 31:12) Holan di tingki ni halak Israel do surirang i masa? Didok do muse di surirang i laho pamalumonna do na mapitung, na lumpu dohot na nengel. Alai ndang masa dope on tingki mulak halak Israel sian Babel. Di ari na naeng ro do didok Debata laho pasautonna surirang on. w18.12 5 ¶11-12

Lomo do rohanta asa tongtong taihuthon hasintongan. Aha do na boi mangurupi hita asa tongtong mangihuthon hasintongan? Tongtong ma taparsiajari Bibel jala tarimangi. Ingkon taratur do i taulahon. Molo tongtong diparsiajari hamu Bibel, lam holong ma rohamuna tu hasintongan jala ndang olo hamu maninggalhon i. Songon na didok di Poda 23:23, Bibel siganup ari, “Tuhor ma hasintongan”, jala tuhor “habisuhon, pangajarion dohot pangantusion”. Lapatanna, ndang sae holan mamboto hasintongan sian Bibel. Alai ingkon taulahon do i. Molo marbisuk hita, gabe taronjar ma rohanta mangulahon naung taboto. Sipata, hasintongan i do na paingothon hita asa mambahen hamubaon. Pintor taulahon ma i. Alana, ummarga do hata ni Debata sian perak.​—Poda 8:10. w18.11 10 ¶3; 13 ¶13-14

Parale-aleonta tu Jahowa do na ummarga di ngolunta. Ndang adong na ummarga sian i. Asing ni i, adong muse na arga di ngolunta, i ma hasintongan na sian Bibel. Alana, holan di Bibel do dipaboa songon dia asa gabe ale-ale ni Jahowa. (Kol. 1:9, 10) Sian Bibel, diajari Jahowa do hita taringot hasintongan. Umpamana, diajari Ibana do hita taringot goarna dohot angka parangena. Dipaboa do na mansai holong rohana tu hita, i do alana dilehon Anakna laho humongkop hita. Diajari do hita taringot Harajaon Messias. Dipaboa do muse aha na ingkon taulahon. Arga do di hita hasintongan on, alana diajari do hita asa solhot tu Jahowa jala mamboto aha do tujuan ni ngolunta. w18.11 3 ¶1-2

Angka panipu boi do mangoto-otoi jolma. Alai ingkon taingot do, ndang boi digabusi nasida Jahowa. Didok di Bibel, ‘patar jala bungka do sude di jolo ni’ Debata. (Heb. 4:13) Umpamana, si Ananias dohot si Sapira diotoi-otoi nasida do angka apostel. Manggadis tano ma nasida alai holan deba dilehon hepengna i tu angka apostel. Asa dipuji halak, didok nasida do nunga dilehon sude hepeng i. Diboto Jahowa do nasida margabus jala diuhum ma nasida. (Ul. 5:1-10) Songon dia do pangkilalaan ni Jahowa mangida pargabus? Sude halak na pargabus jala ndang olo muba, laho dibahen tu “laut api”. Lapatanna, laho diripashon songon Sibolis. (Pgk. 20:10; 21:8; Ps. 5:7) Taboto “ndang dos Debata dohot jolma na olo margabus” jala “ndang boi Ibana margabus”. (4 Mus. 23:19, Bibel siganup ari; Heb. 6:18) Jala “dihagigihon Jahowa . . . dila pargapgap”. (Poda 6:16, 17) Molo lomo rohanta palashon roha ni Jahowa, ingkon mangkatahon na sintong ma hita. w18.10 5-6 ¶10-13

Molo dipangido bosmuna sumbangan laho tu ari raya ni nasida, olo do hamu? Andorang so masa dope situasi sisongon i tu hita, rimangi hian ma songon dia cara ni Jahowa mangida situasi i. Tingki masa i tu hita, gabe mura ma hita mangalusi. Molo tarimangi hian songon dia cara ni Jahowa mangida sada situasi, boi ma hita setia nang pe tingki posa sahitta. Tontu ndang olo hita transfusi darah dohot pamasukkon opat komponen darah tu pamatangta. (Ul. 15:28, 29) Alai adong do piga-piga perawatan medis na ingkon taparrohahon taringot mudar. Sude halak Kristen ingkon mambahen keputusan hombar tu prinsip ni Bibel. Tingki marsahit hita manang tingki diopname, ndang pintor boi hita mambahen keputusan na denggan. Alani i, tariset hian ma hatorangan taringot mudar. Jala isi hian ma Surat Kuasa Khusus Perawatan Kesehatan, asa taboto hatorangan na tahaporluhon. Jala paboa ma hatoranganna i tu dokterta. w18.11 28 ¶5; 30-31 ¶15-16

Jahowa i ma parmahan na sai mamparrohahon jala manarihon biru-biruna. Dilinggomi do naposona sian musu. On paposhon jala patoguhon rohanta, ala nunga lam jonok ajal ni portibi on! Saonari, tong do sada punguan hita disarihon Jahowa. Diurupi do hita asa tongtong marale-ale dohot Ibana. Dilinggomi do hita sian musunta. Jala tongtong do urupanna hita tingki ro haporsuhon bolon. (Pgk. 7:9, 10) Jadi nang pe poso dope, matua, marsahit-sahit manang cacat hita, unang ma mabiar tingki masa haporsuhon bolon. Gariada gabe lam barani ma hita! Taingot ma hata ni Jesus na mandok, “Dirgak ma hamu; pasindak hamu ma ulumuna, ai nunga jonok haluaonmuna.” (Luk. 21:28) Jala pos ma rohanta linggoman ni Jahowa do hita, nang pe ro Gog na sian Magog, i ma punguan angka pamarenta ni portibi on. (Hes. 38:2, 14-16) Alana, molo Jahowa ndang muba. Laho patuduon ni Jahowa do na parholong Ibana jala paluaonna do angka naposona.​—Jes. 26:20. w18.09 26 ¶15-16

Mansai las do roha ni halak Israel tingki didok Jahowa hata on. Tontu mansai arga do hita ganup marsada-sada di Jahowa. I do alana didok di Bibel, “Ulubalang silehon tua do ibana. Marlas ni roha situtu ibana mida ho.” (Sep. 3:16, 17) Manang aha pe parsoalan na taadopi, marjanji do Jahowa laho patoguhon jala mangapuli hita. Didok Ibana, “Asa manusu hamu; ingkon abingabingonna hamu jala didengdidengonna hamu diampuanna. Songon baoa, na niapul ni inana, songon i do ahu mangapuli hamu.” (Jes. 66:12, 13) Bayangkon ma sahalak ina na mangabing poso-posona alani holongna. Tontu las do roha ni poso-posona i. Suang songon i ma holong ni Jahowa tu hita. Lomo do rohana asa tarapul jala las rohanta. Jadi, pos ma rohanta mansai arga do hita di Jahowa.​—Jer. 31:3. w18.09 9-10 ¶6-7

Di tingki najolo marragam do cara ni halak Israel laho mangurupi di piga-piga ulaon. (2 Mus. 36:2; Neh. 11:2) Saonari pe, godang do cara na boi dibahen hamu laho mangalehon tingki, arta, dohot keterampilan laho mangurupi angka dongan. Molo taulahon on, las ma rohanta jala dipasu-pasu Jahowa ma hamu. Angka halak na gabe sukarelawan tu ulaon konstruksi jotjot mandapot ale-ale na baru. Songon donganta na margoar si Margie nunga dohot tu ulaon pembangunan Bale Harajaon saleleng 18 taon. Diparrohahon ibana do angka na poso na dohot di ulaon i jala dilatik do nasida. Didok ibana, on ma cara na dumenggan laho masipatoguan dohot angka dongan. (Rom 1:12) Sada tingki, hea ma ibana mangadopi hasusaan. Jala angka donganna na dohot tu ulaon i do na patoguhon ibana. Hea do hamu gabe sukarelawan di ulaon konstruksi? w18.08 24-25 ¶9, 11

Hira-hira marumur 30 taon ma si Timoteus tingki didok si Paulus songon i. Dung i, dilehon ma tu si Timoteus tanggung jawab na ringkot. Jesus pe tingki marumur 33 taon, nunga godang na diulahon ibana. Parsiajaranna tu hita, unang ma leas rohanta tu donganta na poso. Di piga-piga inganan, somal do na poso ndang diargai. Olo do dirimpu angka sintua ndang boi dope sahalak na poso gabe parhobas manang sintua. Hape sasintongna nunga boi na poso i mandapot tanggung jawab. Alana, ndang adong disurat di Bibel sadia umur ni sasahalak asa boi gabe parhobas manang sintua.​—1 Tim. 3:1-10, 12, 13; Tit. 1:5-9. w18.08 13-14 ¶15-16

Asa boi tabahen haputusan, ingkon tadapot do bukti sian hatorangan i. Alani i, ingkon manat ma hita mamillit na laho tajaha. (Plp. 4:8, 9) Unang ma suda tingkinta ala mangida na so tutu di internet manang manjaha e-mail na paboahon gosip. Tarlumobi, unang ma tajaha cerita sian halak na murtad na dibahen di internet. Alana, lomo do roha ni nasida mambahen gale haporseaonta. Jadi, hatorangan na so sintong boi do mambahen hita marjea jala mangaliluhon hita. Di tingki ni si Musa adong 12 mata-mata na lao tu Tano na Dijanjihon. Dung i mulak ma na sampulu mata-mata i, jala paboahon hatorangan na so denggan. (4 Mus. 13:25-33) Ditamba-tambai nasida do hatorangan taringot Tano na Dijanjihon, gabe mabiar ma angka naposo ni Jahowa. (4 Mus. 14:1-4, 6-10) Ndang mangasahon Jahowa be nasida jala pintor porsea ma nasida tu hatorangan na so denggan i. w18.08 4 ¶4-5

Sasintongna, godang do halak na burju. Ra, adong do na so sisomba Jahowa ndang sai mangulahon na jahat. Ra, adong do halak sisongon i na ditanda hamu. Alai, denggan do molo marsaor hita tu nasida? Pingkirhon ma: Songon dia do parale-aleonta tu Jahowa molo marsaor hita tu nasida? Gabe lam jonok do hita tu Jahowa? Aha do na umringkot di nasida? Aha do na jotjot dihatai nasida? Taringot pangkean do, hepeng, HP, manang hiburan? Jotjot do nasida paroa-roahon halak? Manang olo do nasida margait-gait na rorang? Jesus mandok, “nasa na adong di roha, i do hatahonon ni pamangan”. (Mat. 12:34) Jadi molo taboto gabe suda tingkinta marsaor dohot nasida, jala gabe sega parale-aleonta tu Jahowa, pintor tapaso ma!​—Poda 13:20. w18.07 18 ¶11

Marumur 80 taon ma si Musa tingki disuru Jahowa ibana laho mamimpin bangso Israel asa malua sian parhatobanan di Mesir. (2 Mus. 3:10) Hea do piga-piga hali didok si Musa asa dipillit Jahowa halak na asing laho mangulahon i. Alai sabar do Jahowa maradophon si Musa. Gariada dilehon Jahowa do tu si Musa huaso laho mambahen tanda halongangan. (2 Mus. 4:2-9, 21) Boi hian do pangkeonna huasona laho pabiar-biarhon si Musa asa mangoloi. Alai ndang dibahen songon i, gariada burju jala sabar do Jahowa. Dipapos do roha ni si Musa na serep roha i, jala sai urupanna do ibana. Marhasil do cara i? Marhasil! Gabe pamimpin na jago do si Musa tu naposo ni Debata. Ditiru ibana do cara ni Jahowa i. Lambok jala olo do Ibana mangantusi na asing. Molo adong do tanggung jawabmuna, tiru hamu ma Jahowa. Ingkon lambok, sabar, jala olo mangantusi angka keluargamuna dohot angka dongan di huria. (Kol. 3:19-21; 1 Ptr. 5:1-3) Molo ditiru hamu do Debata Jahowa dohot Jesus Kristus, i ma si Musa na umbalga, gabe olo ma angka dongan paboahon na di rohana tu hamu jala boi ma urupanmuna nasida.​—Mat. 11:28, 29. w18.09 23-24 ¶7-10

Suang songon i ma molo tapatudu haburjuon laho patoguhon angka dongan. Boi do i mambahen hita gabe lam marsada. Jadi, ingkon lam solhot ma hita tu angka dongan di huria. (2 Kor. 6:11-13) Manang didia pe hita, boi do hita parohon pujian tu Jahowa. Molo burju hita tu hombar jabunta, olo do gabe taronjar roha ni nasida laho marsiajar Bibel. Tarimangi ma: ‘Songon dia do pandapot ni hombar jabungku taringot ahu? Sai ias do jabungku? Denggan do ahu tu hombar jabungku? Olo do ahu mangurupi nasida?’ Sungkun ma donganta di huria songon dia nasida patuduhon haburjuon tu keluarga, hombar jabu, dongan sakarejo, manang tu dongan sasingkola.​—Eps. 5:9. w18.06 24-25 ¶13-14

Songon i do na dihilala angka halak na mambunu si Stepanus. (Ul. 6:8, 12; 7:54-60) Sian najolo, godang do pamimpin agama na mangulahon hajahaton jala sampe mambunu. Didok nasida, songon i ma cara pasonangkon Debata. Alai sasintongna, maralo do i tu uhum ni Debata. (2 Mus. 20:13) Ndang denggan panggora ni roha ni nasida! Jadi, songon dia do carana asa boi talatik panggora ni rohanta? Uhum dohot prinsip na sian Bibel “marguna do i mangajari, maminsang, padengganhon pangalaho, manogu-nogu laho mangulahon na sintong”. (2 Tim. 3:16) Alani i, ingkon taparsiajari do Bibel, tarimangi, dung i taulahon ma. On do cara asa lam taantusi na dihalomohon Debata. Jala, boi ma panggora ni rohanta gabe denggan pasingothon hita. w18.06 16 ¶3-4

Dipangke tentara ni Rom do podang na ganjangna 50 sentimeter. Jala tarlatik do nasida mamangke i, ala ganup ari do dipangke nasida i. Didok si Paulus do molo Hata ni Debata dos songon podang, na dilehon Jahowa tu hita. Alani i, ingkon jotjot do taparsiajari i asa boi tongtong togu haporseaonta, manang asa boi denggan caranta marpingkir. (2 Kor. 10:4, 5; 2 Tim. 2:15) Ndang porlu hita mabiar tu Sibolis dohot angka surusuruanna. Tutu do nasida umgogo sian hita, alai dao umgogo Jahowa sian nasida. Jala ndang laho mangolu salelengna nasida. Laho dihurung do nasida saleleng Saribu Taon di Pamarentaon ni Kristus. Dungkon i, diripashon ma nasida. (Pgk. 20:1-3, 7-10) Taboto do songon dia musunta i, angkalna, dohot sangkapna. Alai marhite pangurupion ni Jahowa, boi do tongtong hita martahan mangalo nasida! w18.05 25 ¶15; 26 ¶19-21

Diboto si Adam do ndang boi ulok mangkatai. Jadi tingki mangkatai sada ulok tu si Hawa, ra nunga diboto si Adam ndang na ulok i na mangkatai, alai surusuruan do. (1 Mus. 3:1-6) Ndang diboto nasida ise do surusuruan i. Alai, gabe i do na diihuthon nasida jala mangalo tu Debata. (1 Tim. 2:14) Tingki i, pintor dipaboa Jahowa ma ise do surusuruan i, jala laho ripashononNa do i. Dipaingot Jahowa do muse molo surusuruan i do na laho manggugai angka naposoNa. (1 Mus. 3:15) Ndang hea dipaboa Jahowa ise do goar ni surusuruan i. Alai, ndang sahat 2.500 taon dung mardosa si Adam dohot si Hawa, dipaboa Jahowa do ise ibana.​—Job 1:6. w18.05 15 ¶1-2

Hea do gabe metmet rohamuna ala ndang olo halak manangihon barita na uli na dipasahat hamu? Molo songon i, dos do pangkilalaanmuna songon si Paulus. Saleleng 30 taon ma ibana marbarita jala mangurupi godang halak asa gabe halak Kristen. (Ul. 14:21; 2 Kor. 3:2, 3) Alai, ndang godang halak Jahudi na boi urupanna gabe halak Kristen. Gariada, godang do nasida na so manjangkon jala adong na mamungkuli ibana. (Ul. 14:19; 17:1, 4, 5, 13) Alani i, songon dia do pangkilalaan ni si Paulus? Didok ibana, “Mansai marsak rohangku jala sai tongtong do hansit rohangku.” (Rom 9:1-3, Bibel siganup ari) Boasa songon i pangkilalaan ni si Paulus? Alana, lomo do rohana marbarita jala dihaholongi ibana do angka halak. Jadi, lungun do rohana ala ndang olo halak Jahudi manjangkon asi ni roha ni Debata. Songon si Paulus, hita pe marbarita na uli ala holong do rohanta tu angka halak.​—Mat. 22:39; 1 Kor. 11:1. w18.05 4 ¶4-5

Sude do hita porlu dipatogu. Tangkas do dipaboa si Paulus molo angka halak na jotjot patoguhon donganna pe porlu do dipatogu. Disurathon ibana do tu angka dongan na di Rom, “Ai masihol do ahu marnida hamu, anggiat tung tarlehon ahu tu hamu deba silehonlehon partondion, patoguhon rohamuna. On do tahe: Naeng dapotan hiras ni roha nang ahu sian hamu hinorhon ni haporseaonta bé.” (Rom 1:11, 12) Jadi, sahalak apostel songon si Paulus pe porlu do dipatogu. (Rom 15:30-32) Saonari on, hita pe boi do patoguhon roha ni angka dongan na mangalehon gumodang tingkina tu Jahowa. Ise do muse na porlu tapatogu? Angka donganta na so marhasohotan, ala mangoloi Jahowa asa marhasohotan holan tu halak Kristen. (1 Kor. 7:39) Angka donganta na susa alani paraloan manang na marsahit pe porlu do tapatogu.​—2 Tes. 1:3-5. w18.04 22 ¶3-5