Agustus

Di parpunguan, dipaingot do hita tu angka aha naung dibahen Jahowa dohot Jesus tu hita. Tontu mandok mauliate do hita alani tobusan i, alani i tatiru ma Jesus. (2 Kor. 5:14, 15) Asing ni i, gabe taronjar do rohanta mamuji Jahowa na mangalehon tobusan i. Sada cara laho mamuji Jahowa, i ma marhite mangalehon komentar di parpunguan. Laho patuduhon holongta tu Jahowa dohot Jesus, ingkon olo do hita berkorban. Songon dia pe situasi na taadopi, ingkon tabahen do pengorbanan asa boi ro marpungu. Ra, godang do huria na mambahen jam parpunguan dung mulak halak karejo. Hape, ra nunga loja hita. Jala adong dope muse parpunguan di ujung ni minggu. Hape, halak na asing istirahat do di tingki i. Tontu diparrohahon Jahowa do pengorbanan na tabahen i. Na holong do rohanta tu Jahowa, molo olo hita mambahen pengorbanan.​—Mrk. 12:41-44. w19.01 29 ¶12-13

Hea do Jesus mangadopi hasusaan songon na diadopi halak na asing. Umpamana, magodang di keluarga na pogos do ibana. Gabe tukang hau do ibana rap dohot bapakna si Josep. (Mat. 13:55; Mrk. 6:3) Ra si Josep mate, andorang so dimulai Jesus dope ulaonna marbarita. Tontu dihilala Jesus do songon dia lungunna tingki mate halak na tahaholongi. Jala boi do dihilala ibana songon dia molo adong keluargana na so sisomba Jahowa. (Joh. 7:5) Angka hasusaan na diadopi Jesus i, mangurupi ibana lam mangantusi hasusaan dohot pangkilalaan na diadopi godang halak. Dipatudu Jesus do muse roha sapangkilalaan tingki mambahen mukjizat. Diulahon Jesus pe i, ndang laho patuduhon na boi ibana mambahen mukjizat. Alai, ala asi do rohana tu halak na susa. (Mat. 20:29-34; Mrk. 1:40-42) Asi do roha ni Jesus tu angka halak umbahen diurupi ibana nasida.​—Mrk. 7:32-35; Luk. 7:12-15. w19.03 16 ¶10-11

Bayangkon songon dia arsak ni roha ni Jesus di borngin andorang so mate ibana. Marsoal do angka siseanna taringot “ise na umsangap” sian nasida. Nang pe burju Jesus, alai tegas do ibana. Jala dipatorang ibana do tu nasida parange aha na ingkon dipatudu. Nang pe songon i, dipuji ibana do angka siseanna i ala tongtong setia tu ibana. (Luk. 22:24-28; Joh. 13:1-5, 12-15) Molo ndang setia hian Jesus sahat tu na mate, tontu ndang adong halak na boi mandapot hangoluan salelengna. (Rom 5:18, 19) Jala goar ni Jahowa pe gabe ndang dipasangap. (Job 2:4) Tiru ma Jesus, nang pe marsak tongtong ma hamu lambok. Taingot ma, hita pe olo do mambahen na sala. (Poda 12:18; Jak. 3:2, 5) Jala sai taingot ma angka na denggan sian donganta.​—Eps. 4:29. w19.02 11-12 ¶16-17

Patik ni si Musa mangurupi sasahalak tingki ditudu mangulahon na jahat. Marhak do ibana mamboto ise na manudu ibana. (5 Mus. 19:16-19; 25:1) Andorang so ditudu sasahalak mangulahon na jahat, ingkon adong do pinomat dua saksi na mangalehon hatorangan taringot i. (5 Mus. 17:6; 19:15) Alai songon dia molo adong sasahalak na mangulahon na jahat alai holan sada do saksina? Unang ma dirimpu rohana ndang laho diuhum ibana. Alana diida Jahowa do sude na diulahon ibana. Tigor do sude na diulahon Jahowa. Alani i, sitiruon na denggan do Ibana di hita. Dipasu-pasu Ibana do angka halak na tongtong setia mangulahon lomo ni rohana. Alai uhumonna do halak na so mandalanhon tanggung jawabna. (2 Sam. 22:21-23; Hes. 9:9, 10) Ra adong do halak na mangulahon na jahat alai ndang diuhum. Alai pos ma rohanta adong do tingkina uhumon ni Jahowa nasida. (Poda 28:13) Jala molo ndang olo nasida muba, botoon ni nasida ma na “marjea do halak na madabu tu panguhuman ni Debata na mangolu i”.​—Heb. 10:30, 31. w19.02 23-24 ¶20-21

Si Musa, i ma sahalak baoa na tongtong mangasahon Jahowa. Didok di Bibel, “Tongtong do ibana togu, ai songon na diida ibana do Debata na so boi idaon i.” (Heb. 11:24-27) Hira-hira dua bulan dung kaluar halak Israel sian Misir, adong ma parsoalan andorang so sahat nasida tu Dolok Sinai. Marungut-ungut ma bangso i ala so adong aek. Gabe muruk ma si Musa ala marungut-ungut nasida tu ibana. Didok di Bibel, “Mangangguhi ma si Musa tu Jahowa, ninna ma: Aha ma bahenonku tu bangso on? Otik nari dangguronnasida ma ahu dohot batu.” (2 Mus. 17:4) Disuru Jahowa ma si Musa mamungkul batu di Horeb mamangke tungkotna. Didok muse, “Dibahen si Musa ma songon i di adopan ni angka sintua ni Israel.” Dung i, kaluar ma aek sian batu i jala boi ma nasida minum.​—2 Mus. 17:5, 6. w18.07 10 ¶4-5

Dipatudu Jahowa do holongna marhite angka dongan di huria laho patoguhon hita. Molo tahaholongi donganta, on patuduhon na holong do hita tu Jahowa. Tapapos ma roha ni angka donganta, molo nasida dihaholongi jala mansai arga di Jahowa. (1 Joh. 4:19-21) Didok si Paulus, “Masiurupan ma hamu jala patogu ma na asing, songon naung diulahon hamu saleleng on.” (1 Tes. 5:11) Jadi ndang holan angka sintua na boi mangulahon on. Hita pe boi do maniru Jahowa dohot Jesus laho mangapuli angka donganta. (Rom 15:1, 2) Adong do donganta na gabe stres alani gok ni sitaononna. Porlu do ra nasida laho tu dokter. (Luk. 5:31) Diboto angka sintua dohot dongan na di huria do, mansai ringkot di nasida mangapuli angka dongan nang pe nasida ndang songon dokter na boi mangubati na marsahit. Jala sude do angka dongan di huria boi mangapuli na asing. I do alana didok Bibel, “Apuli hamu ma na marsak, urupi hamu ma angka na gale, jala sabar ma hamu tu sude halak.”​—1 Tes. 5:14. w18.09 11 ¶10-11

Holan marhite manjaha Bibel huhut mangarimangi, boi ma lam tatanda Jahowa. Jala lam pos ma rohanta tu Ibana. Alana dipaboa do di Bibel songon dia Jahowa mangurupi naposona najolo. Alani i, boi ma pos rohanta sai linggoman ni Jahowa do hita. Bayangkon ma tudosan na dipangke si Jesaya laho manggombarhon songon dia Jahowa mangalinggomi hita. Didok si Jesaya, “Dipapungu do angka birubiruNa jala diboan do nasida di bagasan abinganNa.” (Jes. 40:11, Bibel siganup ari) Dipatudos do Jahowa songon sahalak parmahan, hita dipatudos songon biru-biruna. Molo dung tahilala songon dia tangan ni Jahowa mangalinggomi hita, gabe ndang mabiar be hita. Asa unang holsoan hamu tingki mangadopi hasusaan, rimangi ma hata na patoguhon di ayat na diulas sadari on. On mangurupi hamu asa tongtong togu tingki mangadopi hasusaan na laho masa. w19.01 7 ¶17-18

Adong do cita-cita na dibahen hamu? Ra, marcita-cita do hamu laho manjaha Bibel ganup ari, asa lam denggan komentarmuna di parpunguan, manang asa lam godang mamboto ayat ni Bibel na laho dipangke hamu tingki marbarita. Songon dia do pangkilalaanmuna molo lam denggan hamu mangulahon i manang gabe dipuji halak? Tontu, las do rohamuna. Alana, nunga ditiru hamu Jesus mangulahon lomo ni roha ni Jahowa. (Poda 27:11) Molo marsitutu hamu manomba Jahowa, boi ma las rohamuna jala adong ma tujuan ni ngolumuna. Didok si Paulus, “Ingkon togu ma hamu, jala ndang muba-uba. Sai marsitutu ma hamu mangulahon godang ulaon ni Tuhan i. Ai diboto hamu do, ndang marisuang halojaonmuna marhobas di Tuhan i.” (1 Kor. 15:58) Godang halak na marcita-cita mangalului hepeng manang asa terkenal, alai ndang boi i mambahen nasida marlas ni roha. Nang pe mamora nasida, alai jotjot do dihilala nasida hira na so marlapatan ngoluna.​—Luk. 9:25. w18.12 18-19 ¶12-13

Taingot ma hata ni si Daud na mandok “teanon ni angka partigor i do sogot tano i”. (2 Ptr. 3:13) Na didok si Daud dison, sada tingki sude halak na di tano on unduk tu hata ni Debata. Surirang di Jesaya 65:22 mandok, “Ai songon ariari ni hau, songon i do ariari ni bangsongku.” On paboahon, molo angka naposo ni Jahowa laho mangolu salelengna di tano na imbaru. Didok di Pangungkapon 21:1-4, pasu-pasuon ni Debata ma sude jolma. Sada sian pasu-pasuna i, i ma “ndang adong be hamatean”. Ndang saut dope sude tano on gabe Paradeiso dibahen si Adam dohot si Hawa. Alai marjanji do Debata laho bahenonna do muse tano on gabe Paradeiso. Jala pasu-pasuonna do muse sude halak na tading disi. Songon na didok si Daud, mangolu salelengna ma disi angka halak partigor dohot na lambok roha. (Ps. 37:11) Marhite surirang ni si Jesaya, diurupi do hita asa paimahon na ro nama tingkina laho tading hita di Paradeiso jala marlas ni roha. (Jes. 11:6-9; 35:5-10; 65:21-23) Andigan do masa i? Tingki dipasaut Jesus janjina tu parjahat na di lambungna i. (Luk. 23:43) Pos ma rohanta, boi do hita tading di Paradeiso i. w18.12 8 ¶22-23

Ndang boi pintor tapasiding sude pingkiran ni angka halak na di portibi on. (1 Kor. 5:9, 10) Alana tingki marbarita hita, olo do tabege pandapot manang haporseaon na sala sian angka halak. Nang pe ndang boi pintor tapasiding sude pingkiran na sala i, unang ma tapamasuk tu rohanta jala unang sai tapingkiri i. Unang ma satolop hita dohot nasida. Songon Jesus, pintor tapasiding ma pingkiran ni Sibolis. Molo tapasiding angka pingkiran na so denggan sian angka halak di portibi on, na manjaga pingkiranta do hita disi. Didok Bibel, molo marale-ale hita tu halak na so manomba Jahowa, boi do gabe tatiru pingkiran ni nasida. Alani i, ingkon manat ma hita mamillit ise na gabe donganta. (Poda 13:20; 1 Kor. 15:12, 32, 33) Jala, tapasiding ma angka hiburan na paboahon taringot evolusi, kekerasan dohot angka ulaon na rorang. Molo taulahon i, on patuduhon na so olo do hita pamasukkon angka ‘na maralo tu parbinotoan taringot Debata’ tu pingkiranta.​—2 Kor. 10:5. w18.11 25 ¶16-17

Aha do na boi mangurupi hita asa tongtong mangihuthon hasintongan? Sada cara, i ma mangajarhon hasintongan tu na asing. Songon sahalak tentara na gomos maniop podangna, hita pe ingkon gomos do tatiop Hata ni Debata. Alana Bibel i, dipatudos do songon podang. (Eps. 6:17) Sude hita boi do gabe guru “na denggan mangajarhon jala patorangkon hasintongan i”. (2 Tim. 2:15) Molo tapangke Bibel laho mangajari halak, gabe lam taantusi jala lam tahaholongi ma hasintongan i. Jala lam marsitutu ma hita mangihuthon hasintongan i. Silehon-lehon ni Jahowa do hasintongan i. Alana, on boi mambahen hita gabe marale-ale tu Jahowa. Jala i ma na rumingkot di ngolunta. Nunga godang na diajarhon Jahowa tu hita. Alai ndang sadia dope i! Marjanji do Jahowa laho mangajari hita salelengna. Songon mutiara na arga do hasintongan i di hita. Alani i, “tuhor ma hasintongan jala unang gadis.”​—Poda 23:23. w18.11 9 ¶2; 13-14 ¶15-17

Andorang so ro Aek na Sumar, dipaingot si Noak do tu angka halak na laho masa panguhuman i. Alana didok Jesus do, “Tagan so ro aek na sumar i, marmangani nasida jala minumminum, mangoli dohot pabolihonsa, paima dapot ari habobongot ni si Noak tu bagasan parau i. Laos so mamoto nasida, paima ro aek na sumar i mangaupi nasida saluhutna. Suman tusi do sogot haroro ni Anak ni jolma i!” (Mat. 24:38, 39) Nang pe godang halak na so manangihon si Noak, tongtong do dipaboa ibana barita na sian Jahowa i. Hita marbarita taringot Harajaon ni Debata tu godang halak saonari, asa nasida marsiajar taringot sangkap ni Debata di ari na naeng ro. Songon Jahowa, lomo do rohanta asa godang halak manjangkon barita i jala boi tongtong “mangolu”. (Hes. 18:23) Tingki marbarita hita sian jabu tu jabu manang di inganan na godang halak, hita nunga pasingothon nasida taringot Harajaon ni Debata na naeng ro jala mangaripashon portibi na jahat on.​—Hes. 3:18, 19; Dan. 2:44; Pgk. 14:6, 7. w18.05 11-12 ¶8-9

Molo diorai pamarenta ulaonta jala gabe dipenjarahon hamu, aha do laho bahenonmuna? Songon dia do molo adong na manungkuni hamu taringot angka donganta? Dipaboa hamu do sude hatorangan na diboto hamu? Ingot ma, tingki Jesus disungkuni gubernur ni halak Rom. Ndang adong manang aha didok Jesus! Ala diihuthon Jesus do poda ni Bibel na mandok, “adong do tingki hohom, adong do tingki mangkatai”. (Pjm. 3:1, 7, Bibel siganup ari; Mat. 27:11-14) Jadi tingki songon i situasinta, ingkon marbisuk ma hita. Jala unang ma pola tapaboa hatorangan taringot donganta na boi manusai nasida. (Poda 10:19; 11:12) Molo diboto hamu adong dongan manang keluargamuna mangulahon dosa na balga, aha do na ingkon ulahononmuna? “Hatahon ma hasintongan”. Paboa ma i tu angka sintua jala paboa ma sude hatorangan na diboto hamu. Ingkon diboto angka sintua do hatorangan na sasintongna, asa diboto nasida songon dia cara na dumenggan laho mangurupi donganta i marale-ale muse tu Jahowa.​—Jak. 5:14, 15. w18.10 7-8 ¶17-18

Songon dia carana mangkaholongi na asing? Sada cara, i ma rade ma manangihon. (Jak. 1:19) Na holong do rohanta molo rade hita manangihon donganta. Denggan ma sungkun nasida asa diboto hamu songon dia pangkilalaanna. Molo sapangkilalaan do hamu dohot nasida, tarida do i sian bohinta jala diboto nasida do i. Tingki dipaboa nasida na di bagas rohana, sabar ma hamu manangihon sampe sae nasida mangkatai. Jadi, molo rade hamu manangihon, gabe diantusi hamu ma nasida. Jala, gabe pos ma roha ni nasida na tutu do hamu laho mangurupi. Molo marsitutu do hamu marasi ni roha tu angka dongan, gabe boi ma hamu patoguhon nasida. w18.09 11 ¶10; 12 ¶13

Porlu do tingki di sasahalak laho manangihon barita na uli, manjaha Bibel dohot angka publikasi, marsiajar Bibel dohot Sitindangi, persiapan laho tu parpunguan dohot marpungu. Alani i, ingkon gumodang ma tapangke tingkinta laho mangulahon i sude, sian tu ulaon na asing. (Eps. 5:15, 16, surat na di toru.) Sadia leleng do hita laho mamparsiajari ajaran dasar ni Bibel? Ndang sai sarupa pangantusion ni piga-piga halak. Jadi, ingkon torus do hita mamparsiajari taringot bisuk ni Jahowa, pingkiranna dohot angka naung diulahonna. (Rom 11:33) Di Watch Tower edisi na parjolo sahali, dipatudos do hasintongan i songon “bunga na buni”. Didok disi, “Molo nunga tadapot sada bunga, i ma hasintongan, unang ma didok rohanta nunga sae holan i. Ingkon talului do muse godang hasintongan na asing.” Nang pe mangolu salelengna hita, sai adong do na boi taparsiajari taringot Jahowa. Alani i, ringkot do tapangke tingkinta asa ringgas marsiajar. w18.11 5 ¶7

Ingkon diantusi suami do na umgale istrina. (1 Ptr. 3:7) Tingki ndang sarupa pandapot suami dohot istri, suami na parholong ndang mandok ummalo ibana sian istrina. (1 Mus. 2:18) Diantusi ibana do pangkilalaan jala sai dihaholongi do istrina. Suami na mangkaholongi istrina, ndang main mata manang tubu holong di rohana tu borua na asing. (Job 31:1) Ndang olo ibana manggoda borua na asing, di media sosial manang internet jala nang pe ndang rap dohot istrina. Jala ndang diida ibana angka situs na so denggan. Setia do ibana ala dihaholongi istrina. Jala ala dihaholongi ibana Jahowa dihasogohon ibana do na so denggan.​—Ps. 19:15; 97:10. w18.09 28 ¶3-4

Ala mangolu hita di “ari parpudi”, ndang denggan pangalaho ni angka halak saonari. Holan ‘mangkaholongi dirina sandiri do jolma, holongan di hepeng, marhata manggang, patimbohon diri’, jala “ndang diboto mangorom diri”. (2 Tim. 3:1-3) Alani i, gabe maol ma hita mangulahon parenta ni Debata. Alana, molo naeng mangulahon na didok Bibel, ingkon marserep ni roha do hita. Alai, ra olo do gabe didok rohanta denggan do ngolu ni nasida jala marlas ni roha do, hape ndang denggan pangalahona. (Ps. 37:1; 73:3) Ra, gabe sungkun-sungkun ma rohanta, ‘Tutu do adong labana molo olo ahu mangurupi na asing? Jala molo marserep ni roha ahu, tong do diargai halak?’ Molo tarihut-ihut hita songon angka halak na mangkaringkothon diri, boi do gabe sega parale-aleonta tu angka donganta. Jala boi do gabe maol ditanda angka halak molo hita Sitindangi. Alai molo tatiru angka naposo ni Jahowa na marserep ni roha, dapotta ma pasu-pasu. w18.09 3 ¶1

Holan sahalak ni Jahowa hinan do tingki so adong dope angka tompaan. Jadi, ala burjuna ditompa Ibana ma angka na denggan di banua ginjang dohot na di tano on. “Debata na marlas ni roha” do Jahowa, lomo do rohana mangalehon angka na denggan. (1 Tim. 1:11; Jak. 1:17) Ala lomo rohana asa marlas ni roha hita, dijujui do hita asa burju mangalehon. (Rom 1:20) Ditompa Debata do jolma suman tu Ibana. (1 Mus. 1:27) Lapatanna, dibahen Jahowa do jolma asa boi marparange songon Ibana. Alani i, tatiru ma Ibana asa marlas ni roha jala dapot pasu-pasu. Marsitutu ma hita gabe halak na burju mangalehon jala manarihon na asing. (Plp. 2:3, 4; Jak. 1:5) Boasa ingkon taulahon i? Ala songon i do hita ditompa Jahowa. Nang pe hita ndang sempurna, alai boi do hita burju songon Jahowa.​—Eps. 5:1. w18.08 15 ¶1-2; 16 ¶4

Dipatudu sisean ni Jesus do na ditangihon nasida soarana jala mangulahon angka parentana. Ndang olo nasida “paholsohu tu parngoluon”. (Luk. 21:34) Alai, diharingkothon nasida do parenta ni Jesus di ngolu ni nasida, nang pe ingkon mangadopi na susa. Alai tongtong do nasida marsihohot tu Jahowa. Cara na asing na patuduhon na tatangihon do Jesus, i ma marhite unduk tu na manguluhon hita. (Heb. 13:7, 17) Piga-piga taon on, godang do dibahen organisasi tudu-tudu na baru. Umpamana, mamangke alat dohot cara na baru laho marbarita, acara na baru di parpunguan parsitongaan ni minggu, pajongjongkon, padengganhon, dohot manjaga Bale Harajaonta. Tontu taargai jala taulahon do tudu-tudu on! Pos ma rohanta pasu-pasuon ni Jahowa do hita molo marsitutu mangihuthon tudu-tudu na dilehon organisasi. w19.03 10-11 ¶11-12

Unang ma porsea tu cerita na hurang buktina! Taparsiajari ma pengalaman ni halak Israel na tading di sabola barat ni Sunge Jordan. On masa di ngolu ni si Josua. (Jos. 22:9-34) Dibege nasida ma barita molo halak Israel sabola timur pajongjongkon langgatan na balga Tutu do nian barita i, alai ndang diboto halak i dope sude hatoranganna. Gabe dirimpu halak Israel na di sabola barat ma naung mangalo halak Israel na di sabola timur tu Jahowa. (Jos. 22:9-12) Alai andorang so i, disuru nasida ma piga-piga baoa mangalului hatorangan na sintong. Tutu do pandapot ni nasida i? Sasintongna, ndang na langgatan tu debata na so sintong na dibahen halak Israel na di sabola timur i. Alai langgatan tu Jahowa do. Jadi ala sabar do halak Israel na di sabola barat mangalului hatorangan na sintong, ndang jadi be nasida marporang. Jala marlas ni roha ma halak i. w18.08 6 ¶9-10

Songon na didok si Paulus, nang pe sasahalak nunga manomba Jahowa, boi do gabe diulahon ibana na sala. Ra dirimpu ibana, marpihak dope Jahowa tu ibana. Jadi nang pe lomo roha ni sasahalak marale-ale jala marsihohot tu Jahowa, ndang boi dope tadok Jahowa marpihak tu ibana. (1 Kor. 10:1-5) Ala leleng do si Musa mulak sian Dolok Sinai, gabe marsak do halak Israel. Suang songon i ma hita. Ala songon na leleng do ro ajal ni portibi on, olo do gabe marsak hita. Gabe tarimpu ma leleng nai dope i masa, manang ndang saut be i. Jadi, holan mangulahon lomo ni rohanta ma hita, ndang taulahon be lomo ni roha ni Debata. Molo ndang manat hita, boi do gabe dao hita sian Jahowa. Jala gabe mangulahon dosa ma hita. w18.07 19-20 ¶17-18

Ditanda Jahowa do ise dirinta. Alai songon dia do carana asa boi marale-ale tu Ibana? Ingkon tahaholongi jala talehon ma dirinta tu Ibana. (1 Kor. 8:3) Ingkon tajaga do parale-aleonta tu Debata. Songon halak Kristen na parjolo di Galatia, hita pe unang ma “mangihuthon angka na so marguna”, songon hasangapon ni portibi on. (Gal. 4:9) Halak Kristen di Galatia nunga marale-ale tu Debata. Alai si Paulus mandok, piga-piga halak Kristen disi ‘mulak muse’ mangihuthon angka na so marguna i. Gabe hira-hira didok si Paulus ma tu nasida, ‘Boasa olo hamu mulak muse diparhatoban angka na so marguna i?’ w18.07 4 ¶5-6

Unang ma jolo tataon hasusaan alani hasalaanta, baru pe taantusi dia na denggan dohot na roa. Alai boi do hita marsiajar sian pengalaman ni angka halak di tingki najolo. Jadi sian Debata do sude tudutudu na denggan! Umpamana, rimangi ma si Daud na gabe susa ala mangulahon dosa dohot si Bat-seba. (2 Sam. 12:7-14) Molo tajaha ayat on, boi ma tasungkun di rohanta, ‘Sasintongna, ingkon songon dia hian do si Daud mangadopi situasi on? Aha ma na huulahon molo mangadopi situasi na sarupa? Gabe huulahon do na rorang songon si Daud? Manang si Josep do hutiru?’ (1 Mus. 39:11-15) Molo tapingkiri do akibatna ala mangulahon dosa, gabe lam ‘tahagigihon ma na jat i’.​—Amos 5:15. w18.06 16-17 ¶5, 7

Lam godang diida halak hajahaton, lam tubu ma di roha ni nasida asa dohot tu politik. Di tingki ni Jesus, molo adong halak na manggarar pajak, didok do ibana nunga mamillit pamarentaon ni Rom. Umpamana pajak arta, pajak tano, dohot jabu. Asing ni i, korupsi do angka sijalo pajak di tingki i, gabe lam susa ma situasina. Sipata, dilehon nasida do hepeng tu pamarenta asa boi nasida mandapot jabatan. Dung i korupsi ma nasida sagodang-godangna. Si Sakeus, sahalak kepala ni pajak di Jeriko gabe mamora ala timbo do dibahen ibana pajak tu angka halak. (Luk. 19:2, 8) Dipangke angka alo ni Jesus do parsoalan taringot pajak on laho mambahen ibana gabe marpihak tu partai politik. Disungkun nasida do tu ibana taringot manggarar pajak. Tingki i, ingkon digarar halak Jahudi do pajak na argana sadinar. (Mat. 22:16-18) Ndang lomo roha ni halak Jahudi manggarar pajak i, alana hira na gabe hatoban ni halak Rom do nasida. w18.06 6 ¶8-10

Sai roa do hasil na didapot angka na mangihuthon Sibolis. Jadi sasintongna, ndang adong labana. (Job 21:7-17; Gal. 6:8) Boasa porlu taboto Sibolis do na mangarajai portibi on? Asa taboto ingkon songon dia do hita maradophon pamarentaon ni jolma. Jala, boi do i gabe mangonjar rohanta laho marbarita. Taboto, dipangido Jahowa do hita asa unduk tu pamarenta. (1 Ptr. 2:17) Alai taingot ma, hita unduk tu nasida saleleng uhumna i ndang maralo tu uhum ni Debata. (Rom 13:1-4) Jala, hita pe ingkon netral, manang ndang mangkalomohon partai politik dohot angka pamimpin. (Joh. 17:15, 16; 18:36) Taboto do molo Sibolis naeng paroaroahon Debata, jala mambahen halak asa ndang mamboto goar ni Jahowa. Alani i, porlu do taajarhon hasintongan taringot Debata tu angka halak. Las do rohanta ala hita ditanda Sitindangi Ni Jahowa. Holong tu Jahowa do na ummarga sian holong tu hepeng manang na asing.​—Jes. 43:10; 1 Tim. 6:6-10. w18.05 17 ¶8-9

Molo adong masala di parsaripeon, boi do nasida pintor padao-dao tingki adong masala? Ndang dipaboa di Bibel aha na mambahen na mardongan saripe boi padao-dao. Didok si Paulus, “Molo ndang halak na porsea tunggane doli ni sahalak donganta borua, jala olo do tunggane dolina i rap tading dohot ibana, unang ma ditadingkon ibana tunggane dolina i.” (1 Kor. 7:12, 13) Marlangku dope ayat on sahat tu saonari. Alai, adong do piga-piga donganta ndang olo be rap tading dohot suamina na so sisomba Jahowa. Ra, ala olo suamina i mamungkuli, na boi mambahen tarancam ngoluna. Jala ndang dibalanjoi keluargana, manang diorai laho manomba Jahowa. Nang pe didok suamina i asa tongtong nasida rap tading, alai boi do dipillit istrina i ndang rap tading dohot suamina molo masa situasi sisongon i. Alai adong do donganta na olo tongtong rap dohot suamina, nang pe songon i situasina. Jala marsitutu do nasida laho padengganhon parsaripeonna. w18.12 13-14 ¶14, 16-17

Di tudosan ni Jesus taringot sahalak panabur na dipaboa di Lukas 8:5-8, 11-15, dipatorang ibana do molo boni i manggombarhon “hata ni Debata”, manang barita taringot Harajaon ni Debata. Tano manggombarhon roha ni sasahalak. Molo boni i madabu tu tano na denggan, boi ma tubu jala marparbue “saratus lompit”. Songon hau eme na dipaboa nangkin, boni na baru do parbuena, ndang hau eme na baru. Hita pe, ndang na ingkon marhasil mambahen sasahalak gabe sisean, alai hita ingkon marparbuehon boni na baru. Songon dia carana? Tapaboa ma barita Harajaon i tu na asing. Dos do i songon na manaburhon boni naung marparbue di rohanta. (Luk. 6:45; 8:1) Jadi, molo tongtong hita mamaritahon Harajaon ni Debata, tutu do hita “marparbue di bagasan habengeton”. w18.05 5,6 ¶10-11

Rade do si Paulus mangulahon na dumenggan laho mangurupi angka donganna. Tarida do i sian pambahenanna. (2 Kor. 12:15) Suang songon i ma, angka sintua pe boi patoguhon jala mangapuli angka dongan. Jala ndang holan hata alai marhite parniulaon. On patuduhon na tutu do nasida manarihon hita. (1 Kor. 14:3) Laho patoguhon angka dongan, dilehon angka sintua do sipasingot. Boi do nasida marsiajar sian Bibel asa denggan mangulahon i. Gabe sitiruon na denggan do Jesus taringot on, i ma tingki ibana mangalehon poda tu angka huria di Asia Kecil dung hehe ibana sian hamatean. Adong do sipasingot na serius tu huria Epesus, Pergamos, dohot Tiatira. Alai andorang so dilehon sipasingot i, dipujihon Jesus do angka na denggan sian nasida. (Pgk. 2:1-5, 12, 13, 18, 19) Ditiru angka sintua do cara ni Jesus tingki mangalehon sipasingot. w18.04 23 ¶8-9

Hamu natua-tua, tontu dijaga hamu do ianakhonmuna asa unang marsahit. Alani i, ingkon ias do dibahen hamu jabumuna jala ingkon dibolongkon hamu do angka na kotor na boi parohon sahit. Suang songon i ma, ingkon dijaga hamu do ianakhonmuna sian sitontonon, game, dohot internet na boi manegai pingkiran ni nasida. Alana, martanggung jawab do natua-tua mangurupi ianakhonna asa marale-ale tu Jahowa. (Poda 1:8) Ingkon dibahen natua-tua do aturan di jabu na hombar tu prinsip ni Bibel. Paboa ma tu nasida aha na boi ditonton dohot na so boi, asa diboto nasida boasa dibahen hamu aturan sisongon i. (Mat. 5:37) Dung magodang, latik ma nasida manontuhon dia na denggan dohot na so denggan hombar tu pingkiran ni Debata. (Heb. 5:14) Ingot ma, jotjot do ianakhonmuna maniru aha na diulahon hamu.​—5 Mus. 6:6, 7; Rom 2:21. w19.01 16 ¶8

Angka na poso, boi do hamu marale-ale dohot angka na matua. Boi do disungkun hamu angka pengalaman ni nasida jala songon dia nasida boi marsihohot tu Jahowa. Sian pengalaman ni nasida, boi do dapotmuna parsiajaran. Boi ma hamu gabe masipatoguan! Jadi manang ise pe hita, na poso dohot na matua, boi do tajangkon angka na baru ro tu Bale Harajaon. Angka na matua pe boi do tongtong parohon pujian tu Jahowa. Umpamana, tingki manguluhon parpunguan laho marbarita lehon ma daerah na boi dikarejohon angka na matua. Dung i, diatur ma asa didongani na poso nasida. Angka donganta na marsahit pe, olo do marmetmet ni roha ala ndang boi be marbarita songon najolo. Alai las do roha ni nasida molo diparrohahon jala diantusi hamu situasi ni nasida. Jadi angka donganta na poso, na matua, dohot naung leleng gabe Sitindangi, boi do gabe tongtong ringgas marbarita alani burju ni rohanta.​—3 Mus. 19:32. w18.06 23-24 ¶10-12

Tongtong ma taingot naung dipalua Jahowa do hita sian dosa dohot hamatean. Alani tobusan, gabe ias ma panggora ni rohanta laho manomba Debata jala marlas ni roha. (Ps. 40:9) Ingkon mandok mauliate do hita tu Jahowa. Alai asing ni i, porlu do hita manat asa unang gabe taulahon na so denggan. Dijujui apostel Petrus do hita asa unang mangulahon na sala, nang pe taboto nunga tadapot haluaon i. Taingot ma aha na masa tu halak Israel tingki di halongonan. Sibolis jotjot mangela-ela hita marhite angka na di portibi on songon pangkean, sipanganon, siinumon, dohot angka hiburan. Dos do ibana songon pambahen iklan na mamangke artis na bagak laho manjujui hita asa manuhor angka barang, hape sasintongna ndang tahaporluhon barang i. Jadi, boi ma tarelaela hita laho mangulahon na sala. w18.04 11 ¶7-8