November

Ala dang taboto sude situasi ni si Jona, olo do ra gabe didok rohatta molo si Jona on halak na so setia jala dang boi diandalhon. Diparettahon Jahowa do ibana lao tu Ninive pasahatton barita panguhuman. Alai dang olo ibana, gabe ‘maporus do ibana sian Jahowa’. Lao do ibana markapal tu luat na asing. (Jona 1:1-3) Alai, dilehon Jahowa do muse kesempatan tu ibana. (Jona 3:1, 2) Sian tangiang ni si Jona, boi ma taboto halak na songon dia do ibana sasittongna. (Jona 2:1, 2, 9) Sada contoh tangiangna tikki di butuha ni dekke ibana. Taboto ma adong do parangena na denggan. Serep do rohana, diargai ibana do Jahowa, jala unduk do ibana tu Jahowa. I do alana, dang holan hasalaanna na diida Jahowa. Dialusi Jahowa do tangiang ni si Jona jala dipakke do muse ibana gabe panurirang. Jadi massai rikkot do di ganup sintua asa jolo ‘mambege parsoalanna’, baru pe mangalehon poda. w20.04 15 ¶4-6

Porsea do akka sisean di abad na parjolo tu ajaran i. Jala diasahon nasida do tondi parbadia asa diurupi nasida mangattusi Hata ni Debata. Nasida sandiri do na mangalului hatorangan lao mambuktihon na tutu do ajaran i sian Bibel. (Ul. 17:11, 12; Heb. 5:14) Jadi, haporseaon ni nasida tu Jahowa dang holan alani pakkilalaanna sambing, jala dang holan ala las ni rohana marsaor dohot akka dongan sahaporseaon. Alai gabe togu do haporseaon ni nasida alani ‘parbinotoan na bagas taringot tu Debata’. (Kol. 1:9, 10) Dang boi muba hasittongan na sian Bibel. (Ps. 119:160) Dang muba i tikki adong dongan sahaporseaotta na mangulahon dosa. Jala dang muba i tikki adong masa sitaonon di ngolutta. Jadi, ikkon takkas do taboto akka ajaran na adong di Bibel, jala ikkon pos do rohatta na tutu do i hasittongan. Molo pos do rohatta tu ajaran na adong di Bibel, boi ma hita toktong marsihohot tu Jahowa tikki masa sitaonon. w20.07 9 ¶6-7

Didok Jesus, molo taurupi akka anggina na miniahan, sasittongna na mangurupi ibana do hita disi. (Mat. 25:34-40) Sada cara lao mangurupi na miniahan, i ma marsitutu di ulaon marbarita dohot mambahen sisean, songon na dipaboa Jesus tu akka na mangihutton ibana. (Mat. 28:19, 20) Ala na diurupi akka ‘biru-biru na asing’ do umbahen gabe boi akka anggi ni Kristus on mangulahon ulaon marbarita di liat portibi on sahat tu saonari. (Joh. 10:16) Molo biru-biru na asing do hamu, marsitutu ma hamu dohot tu ulaon marbarita. Alana on patuduhon, na holong do rohamu tu na miniahan dohot tu Jesus. Boi do hita muse gabe ale-ale ni Jahowa dohot Jesus molo tapakke hepengta lao mangurupi ulaon Harajaon. (Luk. 16:9) Misalna, boi do hita mangalehon sumbangan tu akka ulaon di liat portibi on. Songon tu ulaon mangalehon bantuan tu akka dongan na hona bencana. Boi do muse hita mangalehon sumbangan tu huriatta jala mangurupi akka dongan na porlu diurupi.—Poda 19:17. w20.04 24 ¶12-13

Tutu ma digohi surirang i. Dipatudu raja utara i do, dang parduli ibana tu “debata ni angka ompuna”. Marsakkap do Uni Soviet lao mangaripasson akka agama. Marsitutu do ibana asa unang be marhuaso organisasi ni agama di luat i. Alani i mulai sian taon 1918, dibahen pamaretta Uni Soviet ma asa akka sikkola mangajarhon dang adong Debata. Songon dia do raja utara i pasangappon “debata ni [akka benteng] di huta”? Dipakke Uni Soviet ma godang hepeng lao mambahen lam gogo muse pasukan militerna. Jala dibahen do marribu sinjata nuklir asa lam balga huasona. Ala godang do sinjata ni raja utara dohot raja selatan on, boi do nasida mambunu marmiliar halak di portibi on! Hea do raja utara on kerja sama dohot raja selatan. Rap do nasida mambahen “ulaon na dihagigihon Debata na mambahen hancur”, i ma Perserikatan Bangsa-Bangsa manang PBB.—Dan. 11:31. w20.05 6-7 ¶16-17

Ise do na boi dohot mangalului akka dongan na so aktif? Sude hita, tarmasuk ma i akka sintua, perintis, penyiar, dohot keluarga ni dongan na so aktif i. Paboa ma tu nasida molo lomo do rohana dikunjungi, asa dilehon nomor teleponna tu akka sintua di huria. Didok sahalak sintua na margoar si Thomas, “Parjolo sahali, husukkun ma akka dongan na mamboto didia saonari jabu ni akka dongan na so aktif. Manang, husukkun ma nasida, diingot nasida dope akka ise na so ro be marpungu. Dung i, tikki ro au manjuppangi akka dongan na so aktif i, husukkun do taringot ianakkon dohot keluarga ni nasida. Olo do ra, najolo nungnga dohot marpungu ianakkon ni nasida, manang nungnga sanga gabe penyiar. Nasida pe boi do diurupi asa mulak tu Jahowa.” w20.06 24 ¶1; 25 ¶6-7

Sian sude toppaan na adong di tano on, holan jolma do na boi marsiajar sian pengalamanna. Alani i, gabe boi ma hita paubahon cara marpikkirta dohot parniulaotta. (1 Kor. 6:9-11; Kol. 3:9, 10) Jala, boi do talatik panggora ni rohatta asa taboto dia do na sala jala dia do na sittong. (Heb. 5:14) Boi do hita marsiajar patuduhon holong, haburjuon, dohot asi ni roha. Jala boi do hita maniru hatigoran ni Jahowa. Ala boi do hita mangingot, songon dia do caratta patuduhon pangargaion tu silehon-lehon on? Taingot ma sude na hea diulahon Jahowa lao mangurupi jala patoguhon hita. Molo taulahon i, gabe pos ma rohatta sai diurupi Jahowa do hita. (Ps. 77:12; 78:4, 7) Asing ni i, taingot ma akka na denggan na hea dibahen halak tu hita. Akka peneliti mandok, ussonang do roha ni akka halak na jotjot mangargai akka na dibahen halak na asing. w20.05 23-24 ¶12-13

Bayakkon ma aha na dihilala si Musa tikki masuk ibana tu sada gua di dolok batu jala mangida hamuliaon ni Jahowa. Bukku Pemahaman Alkitab mandok “on do ra pengalaman paling luar biasa na hea dihilala jolma.” Dibege si Musa ma soara ni suru-suruan na mandok, “Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna. Na pahothon denggan basana i pola marriburibu sundut jala marpamuati rohana mida hajahaton, pangalaosion dohot dosa.” (2 Mus. 33:17-23; 34:5-7) Tottu, diingot si Musa do pengalamanna i tikki dijou ibana goar ni Jahowa songon ayat sadari on. Tikki tarimangi taringot goar ni Jahowa, ikkon tarimangi do Debata na songon dia do Jahowa i. Molo taulahon i, gabe lam taronjar rohatta lao pasangappon Ibana.—Ps. 77:11-15. w20.06 8-9 ¶3-4

Jesus mandok pittor boi do ditanda halak akka siseanna ala masihaholongan nasida. (Joh. 13:34, 35) Alai dang boi togu haporseaotta molo holan alani holong na dipatudu akka donganta. Boasa? Alana nasida pe boi do mangulahon dosa, termasuk ma i akka sintua dohot perintis. Manang olo do ra adong dongan na mambahen haccit rohamuna. Manang adong do muse na ujungna gabe murtad. Molo i do na masa, gabe tartuktuk do hamu, jala dang olo be hamu manomba Jahowa? Pikkirhon ma, molo porsea hamu tu Debata holan alani parange ni halak, dang alani parale-aleonmuna tu Debata, dang boi togu haporseaonmuna i. Memang, molo tahaholongi Jahowa dohot akka donganta, boi do gabe lam togu haporseaotta. Alai dang cukkup holan i. Ikkon takkas do taparsiajari Bibel, taattusi aha na taparsiajari i, jala tabahen ma riset asa lam pos rohatta tu hasittongan taringot Jahowa. Ikkon hita sandiri do na mambuktihon memang tutu do Bibel i marisi hasittongan taringot Jahowa.—Rom 12:2. w20.07 8 ¶2-3

Godang do pengalaman na patuduhon, diurupi akka suru-suruan do hita lao mangalului akka dongan na so aktif. (Pgk. 14:6) Contohna, i ma pengalaman ni si Silvio sian Ekuador. Martangiang do ibana asa dikirim Jahowa sasahalak lao mangurupi ibana mulak tu Jahowa. Tikki martangiang dope ibana, ro do dua sintua tu jabuna. Las hian do rohatta ala boi mangurupi akka dongan na so aktif mulak tu Jahowa. Si Salvador, sahalak perintis na marsitutu mangurupi akka dongan na so aktif mandok, “Molo huingot muse akka donganta naung mulak tu Jahowa, las hian do rohakku. Olo do sappe tangis au. Sada hasangapon do di au ala boi rap saulaon dohot Jahowa lao mangurupi biru-biruna kaluar sian portibi ni Sibolis jala mulak muse tu Ibana.” Molo dang dohot be hamu marbarita jala ro tu parpunguan, pos ma rohamuna toktong do dihaholongi Jahowa hamu. Dipaima Jahowa do hamu mulak tu Ibana. w20.06 29 ¶16-18

Di Bibel, godang do akka sitiruon na dibahen Jahowa lao mangajari hita. (Jes. 30:21) Boi do muse tadapot parsiajaran sian akka halak na so boi patuduhon akka parange na denggan. (Ps. 37:37; 1 Kor. 10:11) Parrohahon ma aha na masa tu Raja Saul. Mulana, serep do rohana. Tikki poso dope ibana, diboto ibana do aha na so boi ulahononna. Jala, dang pittor olo ibana mandapot godang tanggung jawab. (1 Sam. 9:21; 10:20-22) Alai dung gabe raja, gabe ginjang ma rohana. i. Di sada tikki, dang sabar si Saul paimahon panurirang Samuel. Dipelehon ibana do pelean, hape dang marhak ibana mangulahon i. Ujungna, dang dijalo Jahowa be ibana gabe raja, ala dang lomo be roha ni Jahowa tu ibana. (1 Sam. 13:8-14) Tadapot do parsiajaran na rikkot sian on. Unang ma taulahon na so hakta. w20.08 10 ¶10-11

Marhite Jesus, dilehon Jahowa do ‘silehon-lehon’ tu organisasina. (Eps. 4:8) ‘Silehon-lehon’ na dimaksud disi i ma, anggota ni Punguan na Mangaradoti Organisasi, akka donganta na mangurupi Punguan na Mangaradoti Organisasi, Panitia Cabang, pengawas wilayah, instruktur sikkola, sintua di huria, dohot hamba pelayanan. Sude do akka donganta on dilantik marhite tondi parbadia lao mangurus biru-biru na mararga di Jahowa, jala patoguhon roha ni nasida. (1 Ptr. 5:2, 3) Akka donganta na dilantik marhite tondi parbadia i marsitutu do lao mangulahon godang tanggung jawab di huria. Sada bagian ni pamatangta, songon tangan manang pat, boi do marguna tu sude bagian ni pamatangta na asing. Dos songon i ma akka donganta na manguluhon di huria. Mararga do nasida tu sude anggota ni huria. Dang olo nasida pasangappon dirina sandiri. Alai patoguhon jala paposson roha ni akka dongan do na uppetting di nasida. (1 Tes. 2:6-8) Mandok mauliate do hita tu Jahowa ala dilehon Ibana tu hita akka dongan na so makkarikkotton dirina sandiri! w20.08 21 ¶5-6

Sada alasan boasa hita ikkon semangat marbarita, ala godang halak na ‘disusai jala dang disarihon’ lomo rohana mamboto hasittongan taringot Harajaon ni Debata. (Mat. 9:36) Lomo do roha ni Jahowa asa saluhut jolma mandapot parbinotoan na bagas taringot tu hasittongan, jala asa boi nasida malua. (1 Tim. 2:4) Ala taboto ulaon marbarita na uli boi paluahon ngolu ni halak, gabe taronjar ma rohatta lao mangulahon on. Taurupi do nasida asa boi malua. (Rom 10:13-15; 1 Tim. 4:16) Adong do alat na tapakke tikki marbarita. Jala ikkon taboto do cara mamakke i. Takkas do dipaboa Jesus tu akka siseanna songon dia carana marbarita na uli. Dipaboa ibana do aha na diboan, tu dia lao marbarita, jala aha na porlu sidohonon ni nasida. (Mat. 10:5-7; Luk. 10:1-11) Saonari diparade organisasi ni Jahowa do Angka Alat Lao Mangajari na mangurupi hita asa lam denggan marbarita. Diajari do hita carana mamakke akka alat on. Pelatihan on mangurupi hita asa lam malo marbarita dohot mangajari.—2 Tim. 2:15. w20.09 4 ¶6-7, 10

Bayakkon ma, pasti las hian do roha ni si Johannes tikki dibege ibana toktong do setia akka halak na diurupi ibana mananda hasittongan. Godang do hasusaan ni nasida, jala marsitutu do si Johannes patoguhon haporseaon ni nasida. Nungnga songon anakna sandiri be nasida. Suang songon i ma, las hian do rohatta tikki ianakkotta dohot akka halak na taurupi mananda hasittongan mangalehon diri tu Jahowa jala toktong setia. (3 Joh. 3) Di taon 98 M, marhite tondi parbadia diurupi Jahowa do si Johannes mambahen tolu surat. Sian tolu surat i, dijujui ibana do halak Kristen asa toktong porsea tu Jesus jala toktong mangihutton hasittongan. Tikki i marsak do rohana ala adong akka halak na murtad na mangajarhon na so sittong tu huria. (1 Joh. 2:18, 19, 26) Didok akka guru palsu i ditanda nasida do Debata, alai dang dioloi nasida paretta ni Jahowa. w20.07 20 ¶1-3

Ala porsea hita tu barita na uli na tapasahat, lomo ma rohatta paboahon i tu godang halak sian nasa tolapta. Pos do rohatta tu janji na disurat di Bibel. (Ps. 119:42; Jes. 40:8) Taida do surirang na disurat di Bibel masa di tikkitta saonari. Taida do muse boi muba parngoluan ni sasahalak ala mangulahon prinsip ni Bibel. Sian akka bukti on, lam pos ma rohatta porlu do sude halak mambege barita Harajaon i. Porsea do hita muse tu Jahowa na mangalehon barita na uli, dohot tu Jesus na dilantik Jahowa gabe Raja di Harajaonna. Dang soal songon dia situasi na taadopi, sai dilinggomi Jahowa do hita, jala dilehon Ibana do gogo tu hita. (Ps. 46:1-3) Asing ni i, pos do rohatta Jesus do na manguluhon ulaon on sian surgo. Jala dipakke ibana do huaso dohot gogo na dilehon Jahowa tu ibana. (Mat. 28:18-20) Haporseaotta na togu paposson rohatta pasu-pasuon ni Jahowa do ulaonta marbarita. Nang pe sipata di na so panagamanta do dipasu-pasu Jahowa i. w20.09 12 ¶15-17

Tikki mangadopi situasi na maol, porlu do adong na mangurupi jala mambela akka donganta borua. (Jes. 1:17) Misalna, porlu do ra taurupi donganta borua na mabalu manang naung marsirang mangurus akka ulaon na biasana diulahon suamina. Porlu do ra tadongani sahalak donganta borua na matua tikki makkatai tu dokter. Porlu do ra tabela akka donganta borua molo adong na mangkritik nasida. Misalna, adong na mangkritik donganta borua perintis na mangurupi ulaon teokratis, ala dang jotjot ibana marbarita. Tatiru ma aha na diulahon Jesus. Dibela Jesus do akka borua na setia molo adong na mangkritik nasida. Misalna, dibela Jesus do si Maria tikki dikritik si Marta. (Luk. 10:38-42) Jala tikki dikritik halak si Maria ala mangusehon miak na massai arga tu ulu ni Jesus, pittor dibela Jesus do ibana. (Mrk. 14:3-9) Diattusi Jesus do boasa diulahon si Maria i. Gariada, disurirangkon Jesus do “manang didia pe barita na uli dibaritahon di liat portibi on”, botoon ni akka halak do haburjuon na binahen ni si Maria. w20.09 24 ¶15-16

Diattusi sahalak parmahan na burju do, sipata boi do mago biru-biruna. Taparrohahon ma songon dia Debata mangapuli piga-piga naposona na hea mandao sian Ibana. Hea do panurirang Jona lari tikki dilehon tugas sian Jahowa. Alai dang na gabe ditadikkon Jahowa ibana. Diurupi Jahowa do ibana jala dilehon do gogo. (Jona 2:7; 3:1, 2) Dung i, dipakke Jahowa do hau labu lao mangajari si Jona asa mangattusi na mararga do ganup jolma di Debata. (Jona 4:10, 11) Aha do parsiajaranna? Unang ma pittor menyerah akka sintua tikki mangurupi akka penyiar na so aktif. Molo mulak ibana tu Jahowa, ikkon dipatudu nasida do holong tu ibana. w20.06 20-21 ¶10-12

Dung tarbagi pamarettaon ni Uni Soviet taon 1991, dihilala akka naposo ni Debata ma saotik pangurupion, i ma tikki nungnga bebas nasida. Hasilna, gabe ummura ma nasida marbarita, jala adong marratus ribu Sitindangi na tamba di akka negara na hea margabung tu Uni Soviet najolo. Adong tolu na diulahon sada pamarettaon na patuduhon molo pamarettaon i nungnga gabe raja utara manang raja selatan: (1) pamarettaon i mambahen keputusan na mambahen susa naposo ni Debata, (2) sian pambahenan ni nasida i tarida do na marmusu nasida tu Jahowa dohot tu akka naposona, jala (3) bersaing do nasida. Rusia dohot sekutuna do na gabe raja utara di tikkitta saonari. Dibahen nasida do susa akka naposo ni Debata, diorai nasida do ulaon marbarita, jala dianiaya do marratus ribu akka donganta na tading disi. Sian ulaon ni nasida i, tarida ma na sogo rohana tu Jahowa dohot tu naposona. Jala bersaing do ibana dohot raja selatan, i ma Inggris-Amerika. w20.05 12-13 ¶3-4

Asa boi taurupi halak gabe sisean, ikkon malo ma hita mangajari. Adong marjuta parsiajaran Bibel na diuluhon di liat portibi on. Alai songon naung taulas di artikel sebelumna, lomo do rohatta asa parsiajar Bibel i boi tardidi. Ala lomo rohatta patorakkon hasittongan sian Bibel, olo do gabe terpancing hita patorakkon sude na taboto. Dang soal tikki manguluhon Joujou Paboahon, Parsiajaran Bibel di Huria, manang tikki manguluhon parsiajaran Bibel tu sasahalak, unang ma pagodangku patorakkon. Ikkon boi do sahalak guru mangorom dirina, ala ikkon denggan do ibana mamakke Bibel tikki patorakkon. Unang ma pittor dipatorang ibana sude na diboto ibana taringot ayat dohot topik na dibahas. (Joh. 16:12) Bandingkon ma aha na diattusi hamu tikki baru tardidi dohot saonari. Tikki baru tardidi hamu, holan ajaran dasar ni Bibel do ra na diattusi hamu. (Heb. 6:1) Porlu do sappe martaon-taon asa songon saonari godang ni pangattusionmuna. Jadi unang ma dibahen hamu parsiajar Bibelmuna ikkon mamboto sude di bagasan sadari. w20.10 14-15 ¶2-4

Dipillit Jahowa do natua-tua na denggan tu Jesus. (Mat. 1:18-23; Luk. 1:26-38) Sian tangiang ni si Maria na disurat di Bibel, tarida do balga ni holongna tu Jahowa dohot tu Hatana. (Luk. 1:46-55) Jala sian cara ni si Josep mangulahon paretta ni Debata, tarida do na dihaholongi ibana Jahowa. (Mat. 1:24) Dang halak na mamora dipillit Jahowa gabe natua-tua ni Jesus. Sian pelean na dilehon si Josep dohot si Maria dung tubu Jesus, tarida ma na pogos do nasida. (Luk. 2:24) Jala adong lobi sian pitu ianakkonna. Jadi pasti sederhana do ngolu ni nasida. (Mat. 13:55, 56) Memang di piga-piga situasi, dilinggomi Jahowa do Jesus. Alai diloas Ibana do Jesus mangadopi tantangan. (Mat. 2:13-15) Misalna, pasti lungun do roha ni Jesus ala adong keluargana na so porsea molo ibana Messias. (Mrk. 3:21; Joh. 7:5) Lungun do muse roha ni Jesus ala tibu do mate si Josep. w20.10 26-27 ¶4-6

Tikki susa hamu, hea do hamu makkilala holan sahalakmuna do jala dang adong na mangurupi? Godang do na makkilala songon i, termasuk ma naposo ni Debata na setia. (1 Raj. 19:14) Molo songon i do na dihilala hamu, ingot ma janji ni Jahowa, “Ndang tadingkononku ho jala ndang pasombuonku ho.” Gabe pos ma rohatta mandok, “Jahowa do pangurupi di ahu, ndang mabiar ahu.” (Heb. 13:5, 6) Dibahen Apostel Paulus do surat on tu akka halak Kristen di Judea taon 61 M. Sarupa do pakkilalaan ni si Paulus dohot sahalak panurat Psalmen na disurat di Psalmen 118:5-7. Jotjot do dihilala si Paulus na diurupi Jahowa ibana. Misalna dua taon andorang so dibahen si Paulus surat tu halak Heber, selamat do ibana di pardalanan nang pe masa badai di laut. (Ul. 27:4, 15, 20) Saleleng di pardalanan i dohot martaon-taon andorang so i, diurupi Jahowa do si Paulus marhite marragam cara. w20.11 12 ¶1-2

Boasa dang marbisuk hita molo sai tadok undenggan do ngolutta najolo? Alana olo do sai holan akka na denggan na taingot. Parrohahon ma aha na masa tu bangso Israel. Dung kaluar nasida sian Mesir, pittor lupa do nasida tu akka hasusaanna di Mesir. Alai na sai diingot nasida holan akka sipanganon na tabo na adong disi. Didok nasida, “Tikki di Mesir lomonta do mangallang dengke, so pola situhoron. Songon i muse molo taingot angka ansimun, semangka, bawang pre, bawang mera, bawang puti.” (4 Mus. 11:5, Bibel siganup ari) Alai toho do memang dang pola situhoron akka sipanganon i? Daong. Gariada, massai porsuk do dihilala nasida ala ikkon karejo gabe hatoban di Mesir. (2 Mus. 1:13, 14; 3:6-9) Pittor lupa do nasida tu hasusaan tikki di Mesir, jala lomo do roha ni nasida asa songon najolo i muse ngoluna. Sai dipikkiri ma akka na denggan di ngolu ni nasida najolo. Jala gabe dang fokus be tu akka na denggan na dibahen Jahowa tu nasida di Mesir. Dang lomo be roha ni Jahowa tu nasida.—4 Mus. 11:10. w20.11 25 ¶5-6

Marsak do ra hita molo sai tapikkiri ngolutta na “gok hasusaan” jala na parsatokkinan on. (Job 14:1, Bibel siganup ari) Godang do akka naposo ni Debata na disurat di Bibel makkilala sisongon i. Jala adong do sian nasida na sappe mangido mate. (1 Raj. 19:2-4; Job 3:1-3, 11; 7:15, 16) Alai sai diurupi Jahowa do nasida jala dipatogu. Disurat do pengalaman ni nasida i asa boi mangajari hita jala mangapuli rohatta. (Rom 15:4) Marsiajar ma hita sian si Josep anak ni si Jakkob, toppu do muba parngoluon ni si Josep. Anak hasian ni bapakna hian do ibana alai gabe hatoban ma ibana di Mesir, di jabu ni halak na so manomba Jahowa. (1 Mus. 37:21-28; 1 Mus. 39:1) Ditudu do ibana naeng memerkosa istri ni si Potipar. Pittor dipenjarahon si Potipar ma ibana jala diratte. Dang jolo dipastihon si Potipar tutu do manang na dang tuduhan i. (1 Mus. 39:14-20; Ps. 105:17, 18) Pasti metmet do roha ni si Josep di tikki i. w20.12 16-17 ¶1-4

Na urrikkot asa tatangiakkon i ma pabadiahon goar ni Debata. Alai aha do lapatan ni hata ni Jesus on? Hata pabadiahon lapatanna mambahen badia manang ias. Adong do piga-piga halak na sukkun-sukkun rohana, ‘Nungnga badia be goar ni Jahowa i, jadi boasa pola ikkon dipabadia muse?’ Asa tadapot alusna, ikkon taboto do sadia rikkot goar i. Goar dang holan sada hata na boi disurat manang didokkon. Bibel mandok, “Argaan do [goar] na denggan sian hamoraon godang.” (Poda 22:1; Pjm. 7:1, Bibel siganup ari) Boasa goar i massai rikkot? Alana molo tabege sada goar, pasti gabe tapikkirhon do taringot halak nappuna goar i. Jadi na urrikkot dang songon dia goar i disuratton manang didokkon, alai aha do na dipikkirhon halak molo manjaha manang mambege goar i. Godang do halak na mangaleai goar ni Jahowa. Dipaboa nasida do gabus taringot Jahowa asa halak na asing gabe marpikkir na so denggan taringot Ibana. w20.06 3 ¶5-7

Molo torus hita marsak mamikkiri masalahta, gabe dang boi be hita fokus mangulahon na asing. Misalna, olo do ra mabiar hita dang cukkup hepengta manuhor sipanganon. Manang mabiar hita molo sappe marsahit na parah dang boi be karejo. Jala mabiar do ra hita dang boi setia molo digoda. Satokkin nai pakkeon ni Sibolis nama akka bangso lao menyerang hita naposo ni Debata. Mabiar do ra hita molo sappe dang setia tikki masa i. Jadi sukkun-sukkun ma rohatta, ‘Sala do au molo songon i pikkiranku?’ Hea do didok Jesus tu akka siseanna, “Unang be holsoan hamu.” (Mat. 6:25) Alai maksud ni Jesus dison dang na gabe so boi hita holsoan. Najolo adong do akka naposo ni Debata na holsoan. Alai toktong do dihaholongi Jahowa nasida. (1 Raj. 19:4) Sasittongna hata ni Jesus on patoguhon hita do, asa unang sappe tapasombu holso ni rohatta i mambahen hita marpikkir dang penting be hubungatta tu Jahowa. w21.01 3 ¶4-5

Cara ni suami mandalatton wewenangna i, ikkon partanggung jawabhononna do i tu Jahowa dohot tu Jesus. (1 Ptr. 3:7) Ala untimbo do huaso ni Jahowa sian saluhutna, marhak do Ibana mambahen aturan na ikkon unduk sude keluargana na di surgo dohot na di tano on tu Ibana. (Jes. 33:22) Jesus pe marhak do mambahen peraturan ala ibana do ulu ni huria. (Gal. 6:2; Kol. 1:18-20) Marhak do kepala keluarga mambahen keputusan tu keluargana. Alai ikkon ditiru ibana do Jahowa dohot Jesus. (Rom 7:2; Eps. 6:4) Terbatas do wewenang ni kepala keluarga i. Misalna tikki mambahen keputusan ibana ikkon sesuai do i tu prinsip ni Bibel. (Poda 3:5, 6) Jala dang boi ibana mambahen aturan tu na so anggota keluargana. Asing ni i, molo dung dewasa gellengna jala dang sajabu be nasida, dang marhak be sahalak kepala keluarga mambahen keputusan di gellengna i. (Rom 14:4) Alai ikkon torus do diargai gellengna i natua-tuana.—Mat. 19:5. w21.02 2-3 ¶3-5

Sahalak kepala keluarga na parholong, diparade do na dihaporluhon ni keluargana. Alai na uppetting, ikkon urupanna do keluargana asa toktong jonok tu Jahowa. (Mat. 5:3) Tikki na targattung Jesus di hau partinaonan, nang pe nungnga haccitan, alai disangahon ibana do mangido tu si Johannes asa diurus si Maria. (Joh. 19:26, 27) Godang do tanggung jawab ni sahalak kepala keluarga. Ikkon ringgas do ibana karejo, ai parohon sangap do i tu goar ni Jahowa. (Eps. 6:5, 6; Tit. 2:9, 10) Jala olo do ra adong tanggung jawabna di huria. Misalna penggembalaan dohot mamimpin ulaon marbarita. Asing ni i, adong do tanggung jawabna di jabu, ikkon urupanna do istrina dohot gellengna marsiajar Bibel. Molo torus diupayahon kepala keluarga asa rade kebutuhan ni keluargana, pasti mandok mauliate do nasida tu ibana.—Eps. 5:28, 29; 6:4. w21.01 12-13 ¶15, 17

Adong do disurat di Bibel istri na mandapot tanggung jawab sian suamina lao mangatur rumah tanggana, mangatur parhepengon, jala marbisnis. (Poda 31:15, 16, 18) On ma buktina dang hatoban sahalak istri. Marhak do ibana paboahon pandapotna. Jadi ikkon pos do roha ni suami tu istri jala ikkon rade manangihon pandapotna. (Poda 31:11, 26) Molo diargai suami do istrina, pasti ummura do istrina i unduk tu ibana. Nang pe balga huaso ni Jesus, dang merasa direndahkan ibana molo unduk tu Jahowa. (1 Kor. 15:28; Plp. 2:5, 6) Songon Jesus, unang ma nian merasa direndahkan istri molo unduk ibana tu suamina nang pe malo ibana. Molo holong do roha ni istri tu suamina, pasti olo ibana unduk tu suamina. Alai dang holan i, on patuduhon na holong do rohana tu Jahowa jala diargai pengaturanna. Nang pe ikkon unduk tu suami, alai dang olo sahalak istri Kristen mangulahon ulaon na so sesuai tu prinsip ni Bibel. w21.02 11 ¶14-15; 12 ¶19

Godang do naposo ni Jahowa na martahan manaon penganiayaan ala holong roha ni nasida tu Jahowa. Misalna, tikki diparettahon pengadilan tinggi Jahudi akka apostel asa unang marbarita na uli be, dang olo nasida. Ala holong roha ni nasida tu Jahowa, ‘urrikkot do di halak i mangoloi Debata sian jolma’. (Ul. 5:29; 1 Joh. 5:3) Saonari godang do akka donganta na toktong martahan tikki dianiaya pamaretta, ala holong roha ni nasida tu Jahowa. Unang ma menyerah hita tikki dianiaya. Sada hasangapon do manaon na haccit alani goar ni Jesus. (Ul. 5:41; Rom 5:3-5) Massai susa do tahilala molo tantangan i ro sian keluargatta sandiri. Tikki marsiajar Bibel hita, adong do ra keluargatta na mandok nga disesatton be hita jala nga rittik. (Bandingkon tu Markus 3:21.) Adong do bahkan sian hita na sappe dianiaya. Alai dang pola heran hita disi. Jesus mandok, “Sasittongna, musu ni sasahalak i ma donganna sajabu.”—Mat. 10:36. w21.03 21 ¶6-7

Denggan do molo tatangihon aha na dihatai guru studi dohot parsiajar Bibelna. Asa boi talean komentar tambahan na pas, ikkon tapikkirhon do aha sidokkonotta. Unang ma pagodangku hita makkatai, unang ma potong percakapan, jala unang ma tabahen topik na baru. Molo naeng patakkasson topik na dibahas, boi do tabahen komentar tambahan na singkat, tudosan, manang sukkun-sukkun. Molo tahilala nungnga jelas dipatorang guru studina, dang porlu be adong komentar tambahan. Alai tetap do adong na boi taulahon lao mangurupi parsiajar Bibel i asa maju. Tapuji ma ibana jala tapatudu ma na parduli do hita tu ibana. Molo cocok do, tapaboa ma songon dia hita mananda hasittongan, aha tantanganta, jala songon dia Jahowa mangurupi hita. (Ps. 78:4, 7) Olo do ra pengalamanta i cocok tu situasi ni parsiajar Bibel i. Gabe dipatogu ma haporseaonna, gabe semangat ma ibana mambahen kemajuan, jala tardidi. w21.03 10 ¶9-10

Ise do na tama tapuji molo marhasil hita di ulaon marbarita? Dipaboa si Paulus do alusna tikki dibahen ibana surat tu huria na di Korint. Didok, “Ahu do na manuan, si Apollos do na maniram, alai Debata do na patubuhon i. Na rumingkot ndang na manuan manang na maniram, alai Debata na patubuhon i do na rumingkot.” (1 Kor. 3:6, 7) Songon si Paulus, ikkon sai tapasahat do pujian tu Jahowa molo marhasil hita di ulaon marbarita. Songon dia hita patuduhon pangargaionta ala boi gabe “dongan saulaon” ni Jahowa, Jesus, dohot akka suru-suruan? (2 Kor. 6:1) Ikkon taulahon ma sian nasa tolapta lao paboahon barita na uli tu halak na asing. Ala gabe “dongan saulaon ni Debata” do hita, dang holan manuan hita, alai dohot do maniram boni hasittongan. Molo taboto adong halak na berminat, marsitutu ma hita manjuppangi ibana muse asa marsiajar Bibel. Las do rohatta mangida songon dia Jahowa mangurupi parsiajar Bibel i mambahen hamubaon di ngoluna. w20.05 30-31 ¶14, 16-18