Desember

Sipata olo do ra adong informasi na disurat di Bibel na maol dapot rohatta. Manang alus ni Jahowa tu tangiangta dang songon na taharappon. On ma na mambahen moru pos ni rohatta. Molo tapasombu torus songon i boi ma gabe gale haporseaotta. (Jak. 1:7, 8) Bahaya do on, boi do gabe dang tapaima-ima be akka janji ni Debata di ari na naeng ro. Didok si Paulus songon jangkar ni kapal do akka janji ni Debata di ngolutta. (Heb. 6:19) Boi do jangkar mambahen kapal hot di ingananna. Dang maup diboan aek jala dang sappe manabrak batu karang. Alai asa marguna jangkar ni kapal i, dang boi putus i sian rattena. Molo tasikon ratte i gabe mura ma i putus sian jangkarna. Songon i ma tong, molo moru pos ni rohatta gabe gale ma haporseaotta jala mago ma harapanta. Halak sisongon i pasti dang marlas ni roha. w21.02 30 ¶14-15

Tikki ditadikkon si Abraham kota Ur, hira-hira nungnga marumur 70 taon lobi ibana. (1 Mus. 11:31–12:4) Adong ma hira-hira saratus taon ibana tading di kemah, jala marpinda-pinda do ibana tu akka luat di Kanaan. Mate ma si Abraham tikki marumur 175 taon. (1 Mus. 25:7) Alai dang diida ibana kota, manang Harajaon ni Debata i dipajongjong. Nang pe songon i, didok do di Bibel, “mate saur matua” do si Abraham. (1 Mus. 25:8, Bibel siganup ari) Nang pe godang hasusaan na diadopi si Abraham, alai toktong do togu haporseaonna jala sabar do ibana paimahon Jahowa. Boasa boi songon i? Alana saleleng ngolu ni si Abraham, jagaon ni Jahowa do ibana. Jala dibahen Jahowa do ibana gabe ale-alena. (1 Mus. 15:1; Jes. 41:8; Jak. 2:22) Songon si Abraham, tarpaima do hita tu kota na marfondasi na togu. Memang, dang tapaima be andigan kota i dipajongjong. Alana, nungnga dipajongjong Harajaon ni Debata di taon 1914, jala nungnga mamaretta be i di surgo. (Pgk. 12:7-10) Alai, tarpaima do hita andigan Harajaon i mamaretta di tano on. w20.08 4-5 ¶11-12

Asa boi denggan tatangihon halak na asing, porlu do serep rohatta jala sabar. Memang dang mura i, alai adong tolu laba na boi tadapot. Na parjolo, gabe dang sala be penilaianta tu sasahalak. Na paduahon, gabe taboto ma boha pakkilalaan ni sasahalak, jala boasa songon i pangalahona. Gabe ummura ma hita patuduhon asi ni roha tu ibana. Na patoluhon, gabe boi ma taurupi halak asa lam mangattusi dirina sandiri. Sipata, ikkon jolo dipaboa sasahalak do aha na di bagasan rohana, baru pe diboto ibana boha pakkilalaanna. Adong do akka dongan na maol paboahon pakkilalaanna. Ra, ala nungnga songon i nasida sian na gelleng, manang nungnga songon i parangena. Sipata porlu do talehon tikki tu nasida asa boi paboahon na di rohana. Asa boi nasida marcarita tu hita, porlu do hita sabar songon Jahowa. Jala molo nungnga pos roha ni nasida lao marcarita tu hita, manat ma tatangihon nasida. w20.04 15-16 ¶6-7

Biasana dekke marpungu di inganan na aekna cocok tu dekke i, jala godang siallangonna disi. Porlu do tong diboto sijala dekke andigan tikki na pas manakkup dekke. Parrohahon ma na didok sahalak donganta di Kepulauan Pasifik taringot andigan tikki na pas lao manakkup dekke. Tikki naeng manjala dekke ibana dohot sahalak misionaris, didok misionaris i ma, “Jam sia pagi ma hita sogot pajuppang ate.” Alai dialusi donganta i ma, “Dang songon i brur, ikkon taboto do andigan tikki na pas lao manjala dekke. Dang tikki na pas di hita.” Akka sijala jolma di abad na parjolo, lao do tu inganan ni godang halak. Jala diboto nasida do andigan tikki na pas lao manjuppangi akka jolma disi. Uppamana marbarita do nasida di bagas joro, di akka sinagoga, sian jabu tu jabu, dohot di pasar. (Ul. 5:42; 17:17; 18:4) Hita pe ikkon taboto do hasomalan ni akka halak na tinggal di luatta. Ikkon tasesuaihon do didia jala andigan tikki na pas lao manjuppangi nasida.—1 Kor. 9:19-23. w20.09 4 ¶8-9

Sada cara asa lam solhot tu Jesus i ma unduk ma tu pengaturan na adong di huria Kristen. Gabe lam solhot ma hita tu Jesus molo olo hita unduk tu akka na manguluhon hita. (Eps. 4: 16) Misalna, marsitutu do hita asa denggan mamakke sude Bale Harajaonta. Alani i, adong do piga-piga huria na gabe dipasada. Alani pengaturan on, gabe boi ma organisasi menghemat hepeng sumbangan. Alai, porlu do tong penyesuaian di akka parbarita alani pengaturan i. Adong do donganta naung martaon-taon di sada huria jala nungnga solhot tu akka dongan disi. Alai saonari, dipangido ma nasida asa pinda tu huria na asing. Tottu massai las do roha ni Jesus molo olo nasida unduk tu pengaturan i! w20.04 24 ¶14

Bersaing do raja utara dohot raja selatan asa gabe pamarettaon na unjago. Misalna, parrohahon ma aha na masa dung sae Porang Dunia II. Rusia dohot sekutuna ma na mangarajai godang luat di Eropa. Alani i, gabe marsitutu ma raja selatan asa kerjasama dohot akka negara na asing lao mambahen sada pasukan militer na digoari NATO. Dipakke nasida do godang hepeng asa mambahen pasukan militerna gabe lam jago. Diurupi raja utara do akka musu ni raja selatan tikki marporang. Piga-piga taon na parpudi on, gabe lam godang pengaruh ni Rusia dohot sekutuna tu portibi on. Dipakke nasida do program komputer asa mambahen raja selatan on gabe susa parhepengonna jala sega pamarettaonna. Jala songon naung disurirangkon si Daniel, toktong do raja utara on menyerang akka naposo ni Debata.—Dan. 11:41. w20.05 13 ¶5-6

“Tung tarhalupahon inaina ma posoposona?” I ma na hea disukkun Jahowa di jaman ni panurirang Jesaya. Didok Debata do muse tu akka naposona, “Tung sura pe tarhalupahon nasida, ianggo ahu laos so halupahononku do ho.” (Jes. 49:15) Di ayat on, dibandingkon Ibana do dirina tu sahalak ina. Dibandingkon Ibana do holongna tu akka naposona songon holong ni sahalak ina tu poso-posona. Sahalak donganta borua na margoar si Jasmin mandok, “Holong hian do roha ni sahalak ina tu poso-posona. Jala dang marnasuda holongna i.” Tottu setuju do godang ina tu hata na didok si Jasmin on. Diboto Jahowa do molo adong naposona na so olo be marbarita jala ro tu parpunguan. Godang do akka donganta na so aktif ujungna gabe mulak muse tu huria. Las do rohatta manjakkon nasida. Lomo do roha ni Jahowa asa mulak muse nasida, jala hita pe songon i do.—1 Ptr. 2:25. w20.06 18 ¶1-3

Dang sude arta boi taida. Gariada arta na ummarga sian sude dang boi diida matatta. Tikki pasahatton Jamita di Dolok, didok Jesus dao do ummarga arta na di banua ginjang sian arta na di portibi on. Dung i didok ibana muse, “Ai didia artam, disi do roham.” (Mat. 6:19-21) Molo adong sada arta na mararga situtu di hita, tottu marsitutu do hita lao mandapotton i. Jadi tapapungu ma arta na di banua ginjang. Carana, tabahen ma goar na denggan di adopan ni Jahowa. Songon na didok Jesus, arta sisongon i dang boi sega manang ditakko halak. Dijujui si Paulus do hita asa mamparrohahon “angka na so tarida”. (2 Kor. 4:17, 18) Akka arta na so boi taida on, tarmasuk ma pasu-pasu na lao tadapot di tano na imbaru. Taargai do silehon-lehon i? w20.05 26 ¶1-2

Akka na diajarhon si Musa i patoguhon roha ni bangso Israel songon ombun na mambahen tubu suan-suanan. Songon dia asa songon i caratta mangajari? Tikki marbarita hita sian jabu tu jabu manang tikki kesaksian di tempat umum, tapakke do Bibel lao patandahon goar ni Debata, i ma Jahowa. Boi do talehon tu nasida akka sijahaon, tapatudu video, dohot akka bahan na asing na adong di situs webta. Di parkarejoan, di sikkola, manang tikki mardalani, tapakke do kesempatan lao paboahon taringot Jahowa dohot parangena. Tikki tapaboa aha na lao bahenon ni Jahowa tu jolma dohot tu tano on, ra on dope diboto nasida holong situtu do Jahowa tu nasida. Molo tapaboa tu akka halak hasittongan taringot Debata, gabe tapabadia do goarna. Jala taurupi do nasida asa unang be porsea tu akka gabus taringot Debata. Sude na taajarhon sian Bibel i boi do patoguhon nasida.—Jes. 65:13, 14. w20.06 10 ¶8-9

Asa boi taurupi akka dongan na lomo rohana mulak tu Jahowa, marsiajar ma hita sian tudosan ni Jesus taringot anak na mago. (Luk. 15:17-24) Anak na mago i manolsoli keputusanna jala mulak muse tu jabu. Dipapos do rohana holong situtu do bapakna i tu ibana. Alai sai manolsoli do anakna i, didok ibana dang tama be ibana gabe anak. Diattusi bapakna do pakkilalaanna i. Dipatudu bapakna ma, toktong do ibana gabe anakna. Dang na dibahen ibana gabe parkarejo. Dibahen bapakna do pesta, jala dilehon ma tu ibana pakkean na bagak. Gabe pos ma rohana, na dijakkon bapakna i do muse ibana. Songon i do Jahowa. Holong do rohana tu akka dongan na so aktif, jala lomo rohana asa mulak muse nasida. Tatiru ma Jahowa, tapatudu ma hasabaron, roha sapakkilalaan, dohot holong. w20.06 25 ¶8-9

Didok Jesus adong do piga-piga halak na manjalo hasittongan “di bagasan las ni roha”, alai ujungna gabe gale do haporseaonna tikki adong sitaonon. (Mat. 13:3-6, 20, 21) Dang diattusi nasida ra molo halak na mangihutton Jesus ikkon mangadopi sitaonon dohot hasusaan. (Mat. 16:24) Manang dirippu nasida dang adong be sitaonon molo nungnga gabe halak Kristen, ala sai dipasiding Debata do sude sitaonon ni nasida. Alai saleleng di portibi on dope hita, sai adong do sitaonon. Boi do margatti-gatti sitaonon di parngoluotta, jala boi do i mambahen gabe dang marlas ni roha be hita. (Ps. 6:6; Pjm. 9:11) Godang do akka donganta na patuduhon pos do rohana tu hasittongan. Sian dia boi taboto? Dang gabe gale nasida tikki adong dongan sahaporseaon na mambahen haccit roha ni nasida manang mangulahon dosa. (Ps. 119:165) Tikki masa pe sitaonon, lam togu do haporseaonna, dang na gabe gale. (Jak. 1:2-4) Ikkon songon i do tabahen haporseaotta. w20.07 8 ¶1; 9 ¶4-5

Sebelum manjaha Bibel, martangiang ma hita tu Jahowa asa diurupi mangida parsiajaranna tu hita. (Plp. 4:6, 7) Tikki tajaha pengalaman ni naposo ni Debata na disurat di Bibel, tabayakkon ma aha na masa tu ibana, tabayakkon ma hita di situasina. Tabayakkon ma muse songon dia situasi di sakalilingna jala songon dia perasaanna. Na mangihut, mangarimangi. Mangarimangi lapatanna, bagas mamikkiri na tajaha jala mamikkiri songon dia mangulahon informasi i. Molo tabahen songon i, gabe lam takkas ma taattusi na tajaha i. Manjaha Bibel alai dang mangarimangi, sarupa ma i songon na papunguhon bumbu ni masakan alai dang dicampur. Tottu dang mardai masakan i. Alai molo dung dicampur sude bumbuna i, gabe tabo ma masakan i. Songon i ma mangarimangi mangurupi hita bagas mangattusi situasina. w21.03 15 ¶3-5

Dang sai diingot-ingot Apostel Paulus be akka naung ditinggalhon ibana. Nang pe songon i borat ni situasina, dang hea disolsoli ibana keputusanna i. Jala dang gabe mandele ibana nang pe dipenjarahon. Hea do ibana ditinggalhon akka donganna na di Asia, alai toktong do ibana porsea tu akka dongan na asing. Pos do roha ni si Paulus setia do akka donganna i jala pasu-pasuon ni Jahowa do ibana. Nang pe naeng dihukum mate nama ibana, alai dang holan i na sai dipikkiri. Pasangappon Jahowa do na paling penting di ibana. Jala dipikkiri ibana do cara patoguhon akka dongan na asing. Sai Jahowa do na diandalhon ibana, buktina jotjot do ibana martangiang. Dang sai marsak ibana mamikkiri akka dongan na maninggalhon ibana. Alai pengorbanan ni akka dongan na setia do na diingot ibana. Asing ni i, torus do diparsiajari si Paulus Surat na Badia. (2 Tim. 3:16, 17; 4:13) Pos situtu do rohana dihaholongi Jahowa dohot Jesus do ibana. w21.03 18 ¶17-18

Saleleng abad 2 M, gabe lam otik do halak Kristen, alana lam godang do halak Kristen na so sittong. Diajarhon nasida do akka ajaran na palsu, jala ditabunihon nasida do akka ajaran na sittong na sian Bibel. Mulai sian i sahat tu ujung ni abad 19, dang adong punguan ni naposo ni Debata di tano on. Lam godang do halak Kristen na so sittong, jala gabe maol ma mamboto ise do halak Kristen na sittong. (Mat. 13:36-43) Boasa porlu taboto on? Alana on patuduhon molo surirang taringot raja utara dohot raja selatan na di bukku Daniel pasal 11 i, dang marlakku tu raja manang pamarettaon di abad 2 sahat tu abad 19 M. Alana tikki i dang adong dope naposo ni Debata na mambahen sada punguan. Alai boi ma tadok, mulai ma tarida muse raja utara dohot raja selatan i di ujung ni abad 19. w20.05 3 ¶5

Didok si Joel, adong sada punguan ni sihapor na naeng menyerang luat Israel jala mambahen sega sude suan-suanan. (Joel 1:4) Saleleng martaon-taon, taattusi do molo surirang taringot sihapor on manggombarhon akka naposo ni Jahowa na ringgas marbarita na uli. Ulaon nasida i mambahen sega “luat” i, na manggombarhon akka halak na mangihutton agama palsu. Alai, molo taparrohahon sude bagian ni surirang i, gabe taboto ma porlu do tasesuaihon pangattusionta. Parrohahon ma aha na didok Jahowa taringot sihapor i. Didok ibana, “PalaoonKu ma tentara sihapor na ro sian Utara.” (Joel 2:20, Bibel siganup ari) Molo sihapor i manggombarhon Sitindangi Ni Jahowa na mangoloi paretta ni Jesus lao marbarita na uli jala mambahen sisean, boasa ma gabe dipalao Jahowa nasida? (Hes. 33:7-9; Mat. 28:19, 20) Jadi, dang mungkin naposo ni Jahowa na naeng dipalao Ibana dison. Akka na jahat tu naposona i do. w20.04 3 ¶3-5

Songon dia do molo dang pittor dialusi Jahowa pangidoatta i? Songon na didok si Jakobus, ‘toktong ma i tapangido tu Debata’ alana “burju do Debata mangalehon”. Dang sogo roha ni Jahowa tu hita manang gabe muruk Ibana molo sai torus tapangido bisuk tu Ibana. Jadi asa boi hita martahan tikki masa hasusaan tapangido ma bisuk. (Ps. 25:12, 13) Diida Jahowa do aha na masa tu hita. Boi do dihilala Ibana hasusaatta jala rade do Ibana mangurupi. Pasti las do rohatta mambege i. Alai songon dia do carana Jahowa mangalehon bisuk tu hita? Sian Bibel do boi tadapot bisuk ni Jahowa. (Poda 2:6) Ikkon taparsiajari do Bibel dohot publikasitta asa marbisuk hita. Alai dang sae holan i. Ikkon taulahon do aha na taparsiajari i. Didok si Jakobus do asa unang “holan na manangihon hata i”, alai ikkon diulahon do i. (Jak. 1:22) Molo taulahon i gabe boi ma dame rohatta, lambok, jala marasi ni roha. (Jak. 3:17) On ma na mambahen hita toktong marlas ni roha nang pe gok sitaonon. w21.02 28-29 ¶10-11

Boi do maju sahalak parsiajar Bibel jala tardidi molo sude dongan di huria mangurupi. Sude do hita boi mangurupi parsiajar Bibel asa bergabung tu huria. Sahalak donganta perintis paboahon, “Adong do pepatah na mandok, porlu do upaya ni sahuta lao pagodang-godangkon sahalak dakdanak. Hurasa songon i do tong tikki mangurupi parsiajar Bibel. Porlu do upaya ni akka dongan di huria mangurupi ibana asa gabe sisomba Jahowa.” Asa lam dewasa sahalak dakdanak, porlu do peran ni natua-tua, keluarga, dohot guruna. Dos songon i ma, sude do hita na di huria boi mangurupi, pasingotton, patoguhon, jala gabe sitiruon na denggan tu parsiajar Bibel asa boi ibana maju jala tardidi. (Poda 15:22) Las do roha ni guru studi molo sude na di huria mangurupi parsiajar Bibelna. Boasa las rohana? Ala sude boi mangurupi parsiajar Bibel i asa maju. w21.03 8 ¶1-3

Ikkon manat do sude halak Kristen, na poso manang na matua, asa unang manomba Jahowa huhut mangulahon dosa. Didok Apostel Johannes dang boi hita mangihutton hasittongan huhut mangulahon na rorang. (1 Joh. 1:6) Asa las roha ni Jahowa tu hita, taingot ma manang aha pe na taulahon diida Jahowa do i sude. Jadi nang pe dang adong halak na mangida aha na taulahon, alai diida Jahowa do i. (Heb. 4:13) Unang ma taihutton pandangan ni halak di portibi on taringot dosa. Akka halak na murtad di jaman ni si Johannes mandok, boi do sasahalak mangulahon dosa jala toktong marale-ale tu Debata. Songon i do tong pandapot ni akka halak di tikkitta saonari. Godang halak mandok porsea do nasida tu Debata, alai dang setuju nasida tu prinsip ni Jahowa taringot dosa, tarlumobi taringot seks. Didok nasida sasittongna dang sala aha na dihagigihon Jahowa i, hita sandiri do na manottuhon aha na lao taulahon. w20.07 22 ¶7-8

Olo do hamu mambela akka donganta borua? Misalna, adong ma sahalak donganta borua na suamina dang Sitindangi. Jotjot do ibana tarlambat ro tu parpunguan jala pittor mulak dukkon sae parpunguan. Jarang do diboan ibana gellengna tu parpunguan. Diparrohahon akka dongan di huria nga sering ibana songon i, jadi dikritik nasida do ibana. Hape sasittongna, nga berupaya donganta borua i. Dang ibana na mangatur ulaonna sandiri, jala dang ibana na mambahen keputusan taringot tu gellengna. Tapuji ma ibana jala tapaboa ma tu akka dongan, nungnga kerja keras donganta i saleleng on. Molo taulahon i, boi do gabe dang dikritik akka dongan be ibana. Diboto akka sintua do, sai diparrohahon Jahowa do songon dia caratta maradoppon nasida. (Jak. 1:27) Songon Jesus, ikkon masuk akkal do akka sintua. Ikkon diattusi nasida do situasina. Unang ma dibahen nasida aturan na kaku. (Mat. 15:22-28) Molo rade akka sintua mangurupi, gabe dihilala akka donganta borua ma na holong do roha ni Jahowa dohot organisasina tu nasida. w20.09 24-25 ¶17-19

Serep do roha ni Panurirang Daniel. Toktong do dipangido ibana tudu-tudu sian Jahowa. Misalna, tikki dipakke Jahowa ibana lao paboahon lapatan ni nipi ni si Nebukadnesar, dang dipasangap si Daniel dirina sandiri. Alai serep do rohana. Dilehon ibana do sude hasangapon i tu Jahowa. (Dan. 2:26-28) Aha do parsiajaranna tu hita? Molo adong akka donganta na lomo rohana manangihon jamitatta, manang molo adong pengalamanta na denggan tikki marbarita, ikkon talehon do sude hasangapon i tu Jahowa. Alana taboto, dang boi taulahon i sude molo so diurupi Jahowa. (Plp. 4:13) Molo taulahon i, na maniru Jesus do hita disi. Marhaposan do Jesus tu Jahowa. (Joh. 5:19, 30) Dang hea olo ibana mambuat huaso ni Amana na di surgo i. Pilippi 2:6 mandok, “Ndang hea tarpingkir ibana laho manggulut asa sarupa tu Debata.” Diboto Jesus do aha na boi dohot na so boi ulahononna. Jala diargai ibana do huaso ni Jahowa. w20.08 11 ¶12-13

Adong do muse akka donganta na mangadopi tantangan na ro sian dirina sandiri, jala dang boi diida manang diattusi halak na asing. Molo adong sahitta jala tahilala dang adong na boi mangattusi pakkilalaatta, ra boi do hita dipatogu marhite pengalaman ni si Mepiboset. (2 Sam. 4:4) Cacat do ibana jala hea do dang denggan pambahenan ni Raja Daud tu ibana. Hape dang alani salana sandiri umbahen na masa i. Diargai ibana do akka na denggan na boi dapotna. Las do rohana ala hea do burju Raja Daud tu ibana. (2 Sam. 9:6-10) Tikki dang denggan pe pambahenan ni Raja Daud, boi do diattusi ibana aha do na masa sasittongna. Dang gabe jut rohana tu si Daud, jala dang disalahon ibana Jahowa. Urrikkot do di ibana marsitutu lao mangurupi Raja na dipillit Jahowa i. (2 Sam. 16:1-4; 19:24-30) Jadi, dibahen Jahowa do asa disurat pengalaman ni si Mepiboset on di Bibel, asa marsiajar hita sian ibana.—Rom 15:4. w20.04 26 ¶3; 30 ¶18-19

Adong do ra piga-piga akka donganta di huria na gabe missionaris, perintis istimewa manang perintis biasa. Nasida mangalehon gumodang tikki dohot gogo ni nasida lao marbarita jala mambahen sisean. Nang pe biasana dang sadia arta ni nasida, alai dilehon Jahowa do tu nasida godang pasu-pasu. (Mrk. 10:29, 30) Holong do rohatta tu akka donganta on, jala taargai do nasida ala gabe bagian sian huria! Holan akka donganta na dohot tu dinas sepenuh waktu do na mararga di huria? Daong. Sude do parbarita mararga di Jahowa dohot di huria. (Rom 10:15; 1 Kor. 3:6-8) Alana tugas na paling penting na ikkon diulahon huria, i ma mambahen sude halak gabe sisean ni Kristus. (Mat. 28:19, 20; 1 Tim. 2:4) Sude akka parbarita, na tardidi manang na so tardidi dope, berupaya do mambahen ulaon on gabe na uppetting di ngolu ni nasida.—Mat. 24:14. w20.08 21 ¶7-8

Songon ayat sadari on, tikki susa hita, diurupi Jesus do hita. Boasa hata ni Jesus on patoguhon rohatta? Alana sipata maol do situasi na taadopi. Uppamana tikki mate halak na tahaholongi, olo dope sai lungun rohatta dang holan piga-piga ari alai sappe martaon-taon. Na asing mangadopi situasi na maol ala nungnga lam matua. Na asing muse mandele ala depresi. Nang pe songon i boi do hita martahan ala taboto sai didongani Jesus do hita mangadopi situasi manang aha pe. (Mat. 11:28-30) Didok do di Bibel na lao urupan ni Jahowa do hita marhite suru-suruanna. (Heb. 1:7, 14) Uppamana, diurupi suru-suruan do hita paboahon “barita na uli taringot tu Harajaon” tu “saluhut bangso, marga dohot bahasa”.—Mat. 24:13, 14; Pgk. 14:6. w20.11 13-14 ¶6-7

Porlu do diboto parsiajar Bibelta, sude na diparsiajarina i sian Hata ni Debata. (1 Tes. 2:13) Jadi jujui ma parsiajar Bibelmuna asa paboahon aha naung diparsiajari ibana. Unang holan hamu na patorakkon ayat ni Bibel tu parsiajar Bibelmuna, alai pangido ma asa dicoba nasida patorakkon ayat i tu hamu. Urupi ma ibana mamboto aha do pengaruh ni ayat i tu ibana. Bahen ma sukkun-sukkun asa boi taboto songon dia pakkilalaanna tikki manjaha ayat i. (Luk. 10:25-28) Uppamana sukkun ma ibana, “Aha do na diparsiajari hamu taringot parange ni Jahowa sian ayat on?” “Songon dia do ayat on boi mangurupi hamu?” “Boha do pakkilalaanmu tikki manjaha ayat on?” Jadi na uppetting, dang sadia godang naung diboto ibana, alai sadia balga holongna tu parsiajaran i jala boha do carana mangulahon i. Porlu do serep ni roha, asa lam malo hita mangajari. w20.10 15 ¶5-6

Pos ma rohatta pasti sae do ulaon marbarita on pas di tikkina. Parrohahon ma aha na masa di tikki ni si Noak. Nungnga ditottuhon Jahowa hian na lao masa ma Aek na Sumar hira-hira 120 taon andorang so ro i. Martaon-taon dukkon i, disuru Jahowa ma si Noak mambahen sada parau. Toktong do si Noak kerja keras, saleleng hira-hira 40 sahat tu 50 taon andorang so ro Aek na Sumar i. Jala dipasahat si Noak do barita panguhuman nang pe dang adong na manangihon. Toktong do diulahon ibana i sahat tu na disuru Jahowa nasida masuk tu bagasan parau i. Dung i “ditutup Jahowa ma pintu i”, pas di tikkina. (1 Mus. 6:3; 7:1, 2, 16, Bibel siganup ari) Satokkin nai dipasae Debata nama ulaon marbarita na uli. Dung i, hancurhononna ma portibi na dirajai Sibolis. Jala bahenonna ma portibi on gabe inganan ni akka halak na mangoloi Debata. Sahat tu na ro tikkina, toktong ma hita semangat marbarita, maniru si Noak dohot akka na asing na setia. w20.09 13 ¶18-19

Molo dang takkas ise na gabe kepala di keluarga ni Jahowa, boi do gabe sursar jala dang marlas ni roha. Misalna, gabe dang jelas diboto ise na marhak mambahen keputusan jala ise na mandalatton i. Molo songon i do tujuan ni pengaturan na dibahen Debata, boasa godang bawa na kasar tu istrina? Godang nuaeng bawa na so mangihutton aturan ni Jahowa ala dipengaruhi tradisi dohot latar belakang ni keluargana. Manang olo do ra dibahen ibana songon i asa songon na jago diida halak. Misalna adong do bawa na kasar tu istrina asa dihabiari ibana jala asa didok ibana bawa na jago na boi mangatur istrina. Olo do ra didok rohana dang boi paksaonna istrina i makkaholongi ibana. Alai boi bahenonna istrina i mabiar tu ibana. Jadi songon i ma dibahen asa boi dirajai istrina i. Sala do cara marpikkir sisongon i. Alana, i patuduhon dang arga borua di ibana, jala dang sesuai i tu lomo ni roha ni Jahowa.—Eps. 5:25, 28. w21.02 3 ¶6-7

Dialusi Jahowa do tangiangta, jala dilehon do tu hita “hadameon na so boi diattusi jolma”. (Plp. 4:6, 7) Boi do bahenon ni Jahowa dame pakkilalaatta marhite tondi parbadiana. (Gal. 5:22) Tikki martangiang hamu, takkas ma paboa sude na di rohamuna tu Jahowa. Paboa ma masalahna, jala paboa ma songon dia perasaanmuna. Molo dihilala hamu boi pasaehon sada masalah, pangido ma bisuk tu Jahowa lao mangalului cara pasaehon i. Jala pangido ma gogo asa boi mangulahon i. Alai molo dihilala hamu dang boi pasaehon sada masalah, pangido ma gogo sian Jahowa asa unang sai marsak hamu mamikkiri i. Molo takkas dipaboa hamu pangidoanmuna tu Jahowa, gabe boi ma takkas diida hamu songon dia Jahowa mangalusi tangiangmuna. Molo dang dialusi Jahowa dope tangiangmuna, torus ma tangiakkon hamu i.—Luk. 11:8-10. w21.01 3 ¶6-7

Di huria godang do akka donganta na so marhasohotan. Boha do caratta mangida nasida? Tatiru ma songon dia cara ni Jesus mangida nasida. Tikki di tano on dang marhasohotan Jesus. Fokus do ibana mangulahon tugasna. Alai didok ibana adong do memang piga-piga halak Kristen na mamillit dang marhasohotan. (Mat. 19:11, 12) Diargai Jesus do akka na so marhasohotan. Manang dang hea didok rohana dang sonang ngolu ni akka na so marhasohotan i. Songon Jesus, Apostel Paulus pe dang marhasohotan saleleng mangulahon tugasna. Alai dang gabe didok si Paulus sala do molo marhasohotan sahalak Kristen. Diboto si Paulus ganup halak ikkon mambahen keputusanna sandiri do taringot on. w20.08 28 ¶7-8

Ganjang do umur ni Apostel Johannes. Jadi godang do pengalaman dohot tantangan na diadopi ibana na manguji haporseaonna tu Jahowa. Alai nang pe songon i marsitutu do ibana mambahen na dumenggan lao mangoloi paretta ni Jesus, termasuk ma i makkaholongi akka dongan sahaporseaon. Hasilna gabe pos ma rohana na toktong do ibana dihaholongi Jahowa dohot Jesus. Asing ni i pos do muse rohana na urupan ni Jahowa do ibana nang pe gok sitaonon. (Joh. 14:15-17; 15:10) Takkas ma dang boi Sibolis dohot akka na di portibi on, pasohon si Johannes patuduhon holongna tu akka dongan sahaporseaon. Hita pe saonari mangolu di portibi na dirajai Sibolis do. Dang adong holong ni roha di Sibolis. (1 Joh. 3:1, 10) Lomo do rohana asa unang tahaholongi be akka dongan sahaporseaon. Alai dang boi saut lomo ni rohana i molo dang talean kesempatan tu ibana. Toktong ma tapatudu holong tu akka dongan sahaporseaon marhite pakkataionta dohot pambahenatta. Molo taulahon i marlas ni roha ma hita di ngolutta ala nungnga gabe bagian ni keluarga ni Jahowa.—1 Joh. 4:7. w21.01 13 ¶18-19

Susa do ngolutta saonari, ala dirajai Sibolis dope portibi on. Sipata alani susana, dang taboto be boha bahenotta. (2 Tim. 3:1) Alai nang pe songon i, unang pola marsak manang mabiar hita. Takkas do diboto Jahowa sude sitaononta i. Marjanji do Ibana, tioponna do gomos tanganta mamakke tangan kananna. (Jes. 41:10, 13) Dilehon Jahowa do tu hita Bibel asa sabar jala margogo manaon sude hasusaatta. Disediahon do akka video, drama audio, dohot artikel berseri “Tiru ma Haporseaon ni Nasida”. Andorang so manonton video i, mambege drama audio, dohot manjaha akka artikel i, jolo martangiang ma hita tu Jahowa. Tapangido ma asa dipatudu parsiajaran na pas tu situasitta. Tabayakkon ma hita di situasi ni naposo ni Debata i. Tarimangi ma aha na diulahon nasida jala songon dia Jahowa mangurupi nasida. Dung i, tapikkiri ma aha parsiajaranna tu hita jala taulahon ma i. Mandok mauliate ma hita tu Jahowa ala nungnga diurupi hita. Jala tikki taida adong donganta na porlu dipatogu, rade ma hita mangurupi nasida. w21.03 19 ¶22-23

Molo nungnga marhasohotan hamu jala lomo rohamuna marianakkon, sukkun ma dirimuna, ‘Songon si Josep dohot si Maria, serep do rohanami? Holong do rohanami tu Jahowa dohot tu Bibel? Olo do Jahowa mamillit hami gabe natua-tua na lao mangurus sada poso-poso?’ (Ps. 127:4) Molo nungnga adong ianakkonmuna, sukkun ma dirimuna, ‘Huajari do ianakkonku asa olo kerja keras?’ (Pjm. 3:12, 13) ‘Hubahen do sian nasa gogokku lao manjaga ianakkonku sian akka bahaya na adong?’ (Poda 22:3) Memang dang boi dijaga hamu ianakkonmuna sian sude tantangan. Alai torus ma ajari ianakkonmuna asa sai mangasahon Bibel tikki mangadopi masalah di ngoluna. (Poda 2:1-6) Misalna molo adong keluargamuna na so manomba Jahowa be, urupi ma ianakkonmuna mangida alasan ni Bibel boasa ikkon torus setia ibana tu Jahowa. (Ps. 31:23) Manang tikki mate sasahalak na dihaholongi ibana, patudu ma akka ayat sian Bibel na boi mangapuli jala mambahen dame rohana.—2 Kor. 1:3, 4; 2 Tim. 3:16. w20.10 27 ¶7