Boi do Urupanmu Dongan na di Huria?

ANDORANG so manaek tu surgo, didok Jesus tu angka siseanna, ”Gabe sitindangingku ma hamu . . . sahat ro di ujung ni tano on.” (Ul. 1:8) Songon dia do nasida boi pasahathon barita na uli di liat portibi on?

Si Martin Goodman, sahalak profesor di Universitas Oxford, mandok ”Ulaon marbarita ma na paimbarhon halak Kristen sian agama na asing, songon agama Jahudi di tingki imperium ni Roma.” Laho do Jesus marbarita na uli sian sada inganan tu inganan na asing. Ditiru halak Kristen na sintong do Jesus mamaritahon ”harajaon ni Debata” di sude inganan. Dilului nasida do halak na olo mamboto hasintongan. (Luk. 4:43) I do alana, di abad na parjolo adong na digoari ”apostel” lapatanna, halak na disuru laho mangulahon sada ulaon. (Mrk. 3:14) Didok Jesus tu angka siseanna, ”Laho ma hamu, podai hamu ma saluhut bangso.”—Mat. 28:18-20.

Nang pe ndang di tano on be saonari sisean ni Jesus na 12 i, alai torop naposo ni Jahowa maniru nasida marbarita. Tingki dihaporluhon godang parbarita, nasida mandok, ”Dison do ahu, suru ma ahu!” (Jes. 6:8) Adong na pinda tu negara na asing, songon na lulus sian Singkola Gilead. Na asing, pinda tu sada inganan di negara nasida. Torop na marsiajar bahasa na baru asa boi mangurupi huria manang kelompok. Nang pe ndang sai mura, alai rade do angka donganta on mangalehon tingkina laho patuduhon holong ni nasida tu Jahowa dohot tu dongan. Alani i, denggan ma diatur nasida tingki, gogo dohot parhepengon ni nasida laho marbarita di inganan na mangkaporluhon. (Luk. 14:28-30) Arga situtu do sude na diulahon ni angka donganta on.

Ala marimbar do na masa di parngoluonta, ndang sude hita boi pinda manang marsiajar bahasa na baru. Alai, boi do hita gabe missionari di hurianta sandiri.

GABE MISSIONARI DI HURIANTA SANDIRI

Di abad na parjolo, marlas ni roha do halak Kristen marbarita di inganan ni nasida be. Didok si Paulus tu si Timoteus, ”Ulahon ma ulaon ni parbarita na uli, jala ulahon ma sude ulaonmu songon naposo ni Debata.” (2 Tim. 4:5, Bibel siganup ari) Hata on, didok tu halak Kristen di abad na parjolo, alai ringkot dope taulahon on saonari. Sude halak Kristen, ingkon mamaritahon barita na uli taringot Harajaon jala mambahen sisean. Boi do hita songon missionari nang pe di hurianta sandiri.

Umpamana, tingki ro missionari tu sada negara, ingkon pahombaronna do dirinasida tu hasomalan di negara i. Nang pe ndang boi hita pinda tu inganan na mangkaporluhon godang penyiar, boi do tapangke marragam cara laho marbarita? Umpamana, taon 1940 angka donganta taronjar rohana marbarita di inganan na ribur sahali saminggu. Hea do hamu marbarita di inganan na ribur? Hea do hamu marbarita mamangke rak beroda? Alani i, rade do hamu marbarita mamangke marragam cara?

Molo olo do hita mangulahon i, tadapot ma las ni roha tingki marbarita. Donganta na pinda tu inganan na mangkaporluhon parbarita manang na marsiajar bahasa na baru, nasida boi gabe sitiruon jala mangalehon pangurupion di huria. Umpamana, nasida boi manguluhon ulaon marbarita. Angka missionari pe, jotjot do manguluhon ulaon marbarita di huria huhut mangajarajari angka donganta baoa di huria i mangulahon sisongon i. Molo hamu nunga tardidi, olo do hamu ”diajarajari” jala rade do hamu gabe parhobas manang gabe sintua laho mangurupi donganta di huria?—1 Tim. 3:1.

PATOGUHON ANGKA DONGAN

Godang do cara na boi tabahen mangurupi huria. Sude hita, na poso manang na matua boi do mangalehon ”pangurupion na balga” tu dongan sahaporseaon.—Kol. 4:11, Bibel siganup ari.

Molo naeng taurupi donganta, porlu tatanda nasida. Bibel manjujui hita asa marsaor dohot dongan sahaporseaonta di parpunguan. (Heb. 10:24) Ndang na ingkon taboto sude manang tasungkuni taringot nasida. Alai, porlu tapingkirhon aha na ringkot di nasida, songon pangurupion, pangapulion manang patoguhon rohanasida marhite Bibel. Alai, adong do situasi na ingkon holan parhobas manang sintua na boi mangalehon pangurupion tu nasida. (Gal. 6:1) Nang pe songon i, boi do hita mangurupi donganta na matua manang songon keluarga tu na marsitaonon.

Dihilala si Salvatore do pangurupion sian dongan di huria. Ala susa di parhepengon, dijual ma usahana, jabuna dohot angka barangbarangna. Marsak ma ibana mangingot keluargana. Dilehon sada keluarga di huria ma hepeng tu ibana jala diurupi mangalului karejo. Jotjot nasida mangkatahatai jala patoguhon roha ni si Salvatore. Alani i, solhot ma paralealeon ni nasida. Saonari, las do roha ni nasida mangingot tingki rap nasida mangkilala hasusaan.

Halak Kristen na sintong ndang maila paboahon haporseaonna tu na asing. Ingkon tatiru do Jesus jala mangurupi halak mamboto bagabaga ni Debata. Nang pe adong na boi pinda, na debanai ndang, alai sude hita boi do mambahen na dumenggan di hurianta sandiri. (Gal. 6:10) Tingki taurupi donganta, tahilala do las ni roha jala hita mangulahon ulaon na denggan.—Kol. 1:10; Ul. 20:35.