Tiru ma Parange ni Panurirang

ADONG do parange ni panurirang di hamu? Buku Pemahaman Alkitab mandok, panurirang i ma halak na gabe parhitean ni Debata paboahon sangkapNa. Ndang holan pasahathon surirang, alai dohot do ajaran, parenta dohot panguhuman sian Jahowa. Nang pe hita ndang pasahathon surirang, alai hita pasahathon barita sian Debata na adong di Bibel.—Mat. 24:14.

Sada hak na sumurung do di hita paboahon tu halak taringot Debata Jahowa dohot taringot sangkapNa tu jolma! Rap do hita mangulahon ulaon on dohot surusuruan na ”habang martongatonga langit”. (Pgk. 14:6) Alai, olo do gabe ndang hiras be rohanta mangulahon ulaon na sumurung on. Boasa? Olo do ala loja, marmetmet ni roha, manang mandele. Songon on do tongtong pangkilalaan ni panurirang najolo, alai marsihohot do nasida. Diurupi Jahowa do nasida mangulahon i. Taparsiajari ma taringot dua panurirang jala songon dia hita boi maniru nasida.

MARSITUTU SIAN NASA GOGO NI NASIDA

Olo do hita loja alani ulaonta, mambahen hita ndang marhiras ni roha marbarita na uli. Tutu, porlu do hita maradi sian ulaonta, songon na binahen ni Jesus dohot angka siseanna. (Mrk. 6:31) Alai, pingkirhon ma ulaon ni si Hesekiel na pasahathon surirang tu halak Israel na tartaban di Babel. Sada tingki, didok Debata tu si Hesekiel mambuat batu bata jala mambahen gombar ni kota Jerusalem di batu i. Dung i, disuru ma si Hesekiel modom mamiding dompak gombar ni Jerusalem i songon halak na mengepung kota i. Dung i, mamiding dompak hambirang saleleng 390 ari jala dompak siamun saleleng 40 ari. Didok Jahowa tu si Hesekiel, ”Talionku ma ho asa unang boi ho humusor sian hambirang tu siamun manang sian siamun tu hambirang, sampe marujung pengepungan i.” (Hes. 4:1-8, Bibel siganup ari) Tontu, sungkunsungkun do roha ni halak Israel mangida i. Sataon lobi ma si Hesekiel mangulahon i. Songon dia do si Hesekiel tolap mangulahon i?

Diboto si Hesekiel do boasa ibana disuru gabe panurirang. Tingki disuru ibana, didok Debata tu ibana, ”Ditangihon manang so ditangihon nasida pe ho, asal ma diboto nasida naung adong panurirang di tongatonganasida.” (Hes. 2:5, Bibel siganup ari) Tongtong do on diingot si Hesekiel. Alani i, rade ma ibana mangulahon songon na didok Jahowa i tu ibana. Tutu ma ibana panurirang na sintong. Di pudian ni ari, dibege ibana dohot halak Israel ma ”naung sega kota i”. Diboto halak Israel ma na adong panurirang di tongatonganasida.—Hes. 33:21, 33.

Saonari, hita paingothon angka jolma taringot panguhuman tu Sibolis dohot sude na nirajaanna. Nang pe loja hita, ingkon tapasahat do barita on, manjumpangi muse jala mambahen parsiajaran Bibel di jabu. Molo dung ro ari panguhuman i, ias ma rohanta ala nunga tapaboa sangkap ni Debata.

MARSIHOHOT DO NASIDA NANG PE MAOL DIHILALA

Marhite pangurupion ni Jahowa, boi do hita marsihohot. Alai, sipata olo do hita marmetmet ni roha ala ndang ditangihon jolma barita na tapasahat. Alani i, taingot ma tiruan sian si Jeremia. Diinsahi, dileai do ibana tingki pasahathon barita sian Debata tu halak Israel. Ala marmetmet ni roha, didok si Jeremia ma, ”Ndang be taringotanku ibana, jala ndang be ahu marjamita marhitehite goarna.” Songon pangkilalaanta do pangkilalaan ni si Jeremia. Nang pe songon i, tongtong do dipasahat ibana barita sian Debata. Boasa? Didok ibana muse, ”Gabe songon api na marsigorgor di bagasan rohangku huhilala, tarhurung di bagasan holiholingku, siol mandate ahu mangotapotapi, hape ndang tarbahen.”—Jer. 20:7-9.

Nang pe marmetmet ni roha ala ndang ditangihon barita na tapasahat, alai boi do togu rohanta molo tarimangi barita i songon si Jeremia. Boi do i ”songon api na marsigorgor” di bagasan holiholi. Asa tongtong marsigorgor, ingkon tajaha do Bibel ganup ari.

DIPATOGU DO ROHANASIDA TINGKI MARMETMET NI ROHA

Tingki disuru mangulahon sada ulaon, adong donganta na gabe mabiar. Songon i do na hea dihilala panurirang Hosea. Didok Jahowa tu ibana, ”Laho ma ho, buat ma sada boruboru sibabijalang dohot angka tubu ni sibabijalang!” (Hos. 1:2) Pingkirhon ma songon dia pangkilalaanmuna molo naeng mangoli hamu, alai didok Debata siolionmuna i sahalak boruboru na so hasea. Alai dioloi si Hosea do i. Dibuat ma si Gomer gabe tungganeboruna jala ditubuhon ma sada anak. Dung i, tubu ma muse boru dohot anak ni si Gomer sian parmainanon na diulahon. Nunga dipaboa Jahowa hian tu si Hosea na laho lojongan ni tungganeboruna angka baoa na hinaholonganna. Dung godang dilului angka baoa, mulak ma muse ibana tu si Hosea. Molo hamu si Hosea, jaloonmu do tungganeborumuna i mulak muse? Disuru Jahowa do si Hosea mambahen songon i! Jala, arga do digarar si Hosea asa boi mulak muse tungganeboruna.—Hos. 2:9; 3:1-5.

Sungkunsungkun do ra roha ni si Hosea, aha do lapatanna bahenonna songon i. Alai, ala olo si Hosea mangulahon i, taboto ma songon dia hansit ni roha ni Debata tingki bangso Israel ndang marsihohot tu Ibana. Nang pe songon i, deba halak Israel mulak do muse tu Debata.

Ndang disuru Debata hita saonari mangoli tu sasahalak na mangulahon parmainanon. Alai, adong do na taparsiajari sian si Hosea? Adong. Ingkon tapasahat do barita na uli di hatoropan dohot sian jabu tu jabu nang pe maol tahilala. (Ul. 20:20) Olo do maol tahilala marbarita na uli. Godang do mandok tu Sitindangi Ni Jahowa lomo rohanasida marsiajar Bibel, alai ndang lomo rohana marbarita na uli. Di pudian ni ari, adong do na gabe olo dohot marbarita. Aha do parsiajaranna sian on?

Adong dope parsiajaran na asing sian si Hosea. Boi do ibana marsidalian asa unang mangulahon ulaon na maol i. Jala, ise ma na mamboto ulaon ni si Hosea i molo ndang ibana na manurat? Olo do sipata adong dalan paboahon taringot Jahowa, alai ndang adong na mamboto molo ndang tapaboa i. On ma na masa tu si Anna, parsingkola SMA di Amerika Serikat. Disuru guru nasida mambahen karya tulis jala ingkon dipatorang di kelas asa diantusi na asing. On ma dalan na denggan paboahon hasintongan. Boi do sip si Anna, alai dihilala ibana Jahowa do na patuduhon dalan on. Martangiang ma ibana tu Jahowa jala dipillit ma karya tulis na marjudul ”Evolusi: Tutu do i manang na ndang.”

Godang do sungkunsungkun ni donganna na porsea tu evolusi, ala dipatorang si Anna di kelas taringot i. Alai, boi do denggan dilehon si Anna alusna. Lomo roha ni guruna tu hatorangan ni si Anna i. Dilehon ma tu ibana hadiah. Jala dipatorang si Anna ma muse taringot panompaon tu donganna na porsea tu evolusi i. Ala rade si Anna pasahathon hasintongan, didok si Anna ma, ”Saonari ndang mabiar be ahu paboahon hasintongan.”

Tutu, ndang panurirang hita, alai boi do hita denggan pasahathon barita sian Debata molo tatiru parange ni si Hesikiel, si Jeremia dohot si Hosea. Di parsiajaran Bibelta manang di panombaon na sasaripe, taparsiajari ma taringot angka panurirang jala tarimangi ma songon dia boi hita maniru nasida.