Referensi tu Parpunguan Hangoluan dohot Pangkobasion Na Laho Diparsiajari
4-10 MARET
ARTA NA ARGA NA ADONG DI BIBEL ROM 12-14
“Songon dia do Cara Patuduhon Holong?”
it-1-IN 1174
Holong ni Roha
Holong ni roha (Jun., philadelphia, lapatanna, “holong ni roha tu dongan”) ingkon dipatudu tu sude dongan di huria. (Rom 12:10; Heb 13:1; ida muse 1Ptr 3:8.) Jadi, ingkon togu do holong ni rohanta tu angka dongan di huria. Jala ingkon solhot do hita tu nasida songon tu keluarganta sandiri. Nang pe nunga tapatudu holong ni roha di huria, alai ingkon marsitutu do hita asa tongtong mangulahon i.—1Tes 4:9, 10.
Hata Junani philostorgos, lapatanna “marholong ni roha”. Hata on jotjot dipangke laho patuduhon sasahalak na solhot tu donganna. Hata on mulana sian hata stergo, na jotjot dipangke laho patuduhon holong ni roha di keluarga. Dijujui apostel Paulus do halak Kristen asa patuduhon holong sisongon on. (Rom 12:10) Didok si Paulus muse, godang do halak di tingki parpudi on “ndang marroha holong” (Jun., astorgoi) jala ingkon diuhum mate do halak sisongon i.—2Tim 3:3; Rom 1:31, 32.
w09-IN 15/10 8 ¶3
“Mardame ma Hamu tu Sude Halak”
3 Jaha Rom 12:17. Didok si Paulus, molo adong na mangalo hita, unang ma taalo muse nasida. Ringkot do on tongtong taingot, tarlumobi molo adong na so Saksi di keluarganta. Molo ndang Saksi dope dongan saripemuna jala dibahen na so denggan tu hamu, unang ma bahen muse na so denggan tu ibana. Ndang adong labana molo ‘tabalos na jahat alo ni na jahat’. Holan mambahen sursar do i.
w07-IN 1/7 24-25 ¶12-13
“Unang ma Baloshon na Jahat Alo ni na Jahat tu Manang Ise pe”
12 Adong do muse poda ni si Paulus taringot caranta maradophon dongan sahaporseaon dohot halak na asing. Didok ibana, “Unang ma baloshon na jahat alo ni na jahat tu manang ise pe.” Pas do hata on. Alana andorang so mandokkon on, didok si Paulus do, “Hasogohon hamu ma na jahat.” Jadi molo adong na mandok sogo rohana mangida na jahat, alai dibahen na jahat laho mambalos halak na asing, aha do na taboto taringot ibana? Berarti ndang adong di ibana holong na “sian nasa roha”. I do umbahen didok si Paulus, “Marsitutu ma hamu mambahen na denggan tu sude jolma.” (Rom 12:9, 17) Boha do caranta mangulahon i?
13 Tingki manongos suratna tu angka dongan di Korint, dipaboa si Paulus do taringot sitaonon na dihilala angka apostel. Didok ibana, “Nunga gabe sitontonon hami di portibi on, sitontonon ni angka suru-suruan, dohot jolma. . . . Tingki dileai hami, mamasu-masu do hami. Tingki dibahen na hansit tu hami, sabar do hami manaon i. Tingki diparoa-roa goarnami, lambok do hualusi hami.” (1 Korint 4:9-13) Suang songon i ma hita saonari. Godang do halak na mamparrohahon hita. Nang pe ndang denggan pambahenan ni nasida tu hita, alai molo tongtong taulahon na denggan, diparrohahon nasida do i. Jala olo do ra gabe lomo roha ni nasida mambege barita na uli na tapasahat.—1 Petrus 2:12.
w12-IN 15/11 29 ¶13
Rade ma Hamu Manalpuhon Hasalaan ni na Asing
13 Olo do sipata adong halak na mambahen na so denggan tu hita. Alai didok Apostel Paulus, “Molo male musum, lehon ma ibana mangan, molo mauas, lehon ma ibana minum. Molo dibahen ho songon i, gabe salpu ma murukna. Unang ma olo ho ditaluhon hajahaton, alai tongtong ma taluhon hajahaton i marhite na denggan.” (Rom 12:20, 21) Jadi nang pe adong na mambahen na so denggan tu hita, tongtong ma burju hita. Molo taulahon songon i, halak na jahat manang na parmuruk pe boi do gabe burju tu hita. Manang aha pe na masa, tongtong ma lambok caranta mangalusi halak sisongon i. Jadi molo tapatudu holong, haburjuon, dohot asi ni roha tu halak sisongon i, olo do ra gabe lomo rohana marsiajar Bibel. Boi ma diida ibana pambahenanta na denggan jala dipingkiri ibana ma boasa tabahen songon i.—1 Ptr. 2:12; 3:16.
Mangalului Arta na Adong di Bibel
lvs-IN 76-77 ¶5-6
Cara Mamillit Hiburan
5 Angka na taulahon boi do mambahen hita gabe solhot tu Jahowa manang gabe dao sian Ibana. Didok si Paulus do songon on, “Pelehon hamu ma dirimuna gabe pelean na mangolu, na badia, jala na palashon roha ni Debata.” (Rom 12:1) Jesus mandok, “Ingkon haholonganmu do Jahowa Debatam sian nasa roham, sian nasa ngolum, sian nasa pingkiranmu, dohot sian nasa gogom.” (Markus 12:30) Lomo do rohanta asa tongtong mambahen las roha ni Jahowa. Di tingki ni halak Israel najolo, molo sasahalak laho mangalehon sada binatang gabe pelean tu Jahowa, ingkon sehat do binatang i. Molo cacat do binatang i, ndang olo Debata manjalo i. (3 Musa 22:18-20) Suang songon i ma, olo do ndang dijalo Jahowa angka ulaonta laho manomba Ibana. Boasa boi songon i?
6 Didok Jahowa do tu hita, “Ingkon badia do hamu, ai badia do ahu.” (1 Petrus 1:14-16; 2 Petrus 3:11) Molo badia hita, tontu jaloon ni Jahowa do angka ulaonta laho manomba Ibana. (5 Musa 15:21) Alai boi do gabe ndang badia hita molo taulahon angka ulaon na dihasogohon roha ni Jahowa. Umpamana, molo taulahon parmainanon, hajahaton, manang ulaon na adong hubunganna tu angka begu. (Rom 6:12-14; 8:13) Jala molo lomo rohanta mangida hiburan sisongon i, gabe sogo ma roha ni Jahowa mangida hita. Gabe ndang badia be hita, jala ndang dijalo Jahowa be ulaonta laho manomba Ibana. Gabe sega ma parale-aleonta tu Jahowa.
w08-IN 15/6 31 ¶4
Angka na Denggan sian Buku Rom
13:1—Aha do lapatanna Debata “mambahen pamarenta adong di ingananna be”? Lapatanna, diloas Debata do nasida mamarenta. Jala nunga disurirangkon Debata taringot aha na laho masa tu pamarentaon ni nasida. Dipaboa do surirang i di Bibel.
11-17 MARET
ARTA NA ARGA NA ADONG DI BIBEL ROM 15-16
“Pangido ma tu Jahowa Apul-Apul dohot Hasabaron”
“Tangis ma Hamu Rap Dohot Angka na Tangis”
11 Godang do ayat na boi mangapuli hita. Sada sian i, i ma taringot Jesus na marhabot ni roha di tingki mate si Lasarus. Ndang pola longang rohanta disi alana “nasa na tarsurat hian, bahen poda di hita do, umbahen na tarsurat; asa marpangkirimon hita binahen ni habengeton dohot pangapulon na di bagasan Surat i”. (Rom 15:4) Molo marhabot ni roha hamu, boi do tarapul rohamuna manjaha ayat na mangihut:
▪ “Donok do Jahowa di angka na bojok marroha, jala ditumpahi do angka na pogos tondi.”—Ps. 34:19, 20.
▪ “Di hinadeak ni holso ni rohangku di bagasan, sai dipasabam angka pangapoim do tondingku.”—Ps. 94:19.
▪ “Tuhanta Jesus Kristus dohot Debata Amanta, na mangkaholongi hita jala mangalehon apulapul, na mian tongtong, dohot pangkirimon na denggan sian asi ni roha i: Ibana ma mangapuli jala pahothon rohamuna di bagasan.”—2 Tes. 2:16, 17.
Loas ma Habengeton i Lam Margogo Sampe So Boi Talu
5 Pangido hagogoon tu Jahowa. Jahowa, i ma “Debata nampuna habengeton dohot pangapulon”. (Rom 15:5) Holan Ibana do na mananda hita jala mangantusi pangkilalaanta. Alani i, tangkas do diboto Ibana aha na tahaporluhon asa boi marhabengeton. Bibel mandok, “Ibana mambahen lomo ni roha ni angka na mangkabiari Ibana, jala dibege do angguknasida i, jala dipalua do nasida.” (Ps. 145:19) Alai, songon dia do Debata boi mangalusi tangiangta asa marhabengeton?
w14-IN 15/6 14 ¶11
“Ingkon Haholonganmu do Jahowa Debatam”
11 Dilehon Jahowa do pangkirimon na mambahen dame jala las roha. (Rom 15:13) Pangkirimon na sian Debata mangurupi hita tongtong marsihohot tingki diuji haporseaonta. Dilehon Debata do pangkirimon tu angka na miniahan asa mangolu salelengna di surgo. (Pgk. 2:10) Dilehon do muse pangkirimon tu na asing asa mangolu salelengna di Paradeiso. (Luk. 23:43) Jadi, aha do na tahilala dung mamboto taringot pangkirimon on? Tontu las do rohanta jala dame tahilala. Asing ni i, gabe lam holong do rohanta tu Debata na mangalehon “sude silehon-lehon na denggan jala na sun denggan”.—Jak. 1:17.
Mangalului Arta na Adong di Bibel
w89-IN 1/12 24 ¶3
“Mamboto Holong ni Rohamuna na Sasintongna”
Ingkon olo do nian angka dongan na so halak Jahudi mangurupi nasida. Alana sian Jerusalem do barita na uli na dibege angka halak na so Jahudi. Jadi, songon na marutang do nasida tu halak Kristen di Jerusalem. I do umbahen didok si Paulus, “Ai nunga dilehon angka na badia tu nasida angka na boi patoguhon parale-aleon ni nasida tu Debata. Alani i, ingkon lehonon ni nasida do na porlu tu angka na badia i.”—Rom 15:27.
it-2-IN 936 ¶3
Nunga Diboto Hian; Nunga Ditontuhon Hian
Messias do Pinompar na dijanjihon i jala didok do ibana Kristus. Marhite ibana, dapotan pasu-pasu ma sude halak na marsihohot. (Gal 3:8, 14) Mulana, dipaboa do taringot Pinompar i dungkon mangalo si Adam dohot si Hawa di Eden, alai andorang so tubu dope si Abel. (1 Mus 3:15) Masa ma i hira-hira 4.000 taon andorang so dipaboa dope “rahasia na badia” taringot ise do pinompar i. Jadi, diloas do “rahasia na badia” i “leleng buni”.—Rom 16:25-27; Eps 1:8-10; 3:4-11.
18-24 MARET
ARTA NA ARGA NA ADONG DI BIBEL 1 KORINT 1-3
“Mangihuthon Lomo ni Roha ni Portibi On do Hamu, manang Mangihuthon Tondi Parbadia?”
Songon dia do Sasintongna Halak na Jonok tu Debata?
4 Diihuthon halak na mangkaholongi portibi on do angka pangalaho na roa saonari. Jala holan mangkaringkothon dirina sandiri do nasida. Si Paulus paboahon molo pangalaho ni nasida dos songon “tondi na mangula nuaeng di tongatonga ni angka jolma na so mangoloi Debata.” (Eps. 2:2, Bibel Siganup ari) Mura do nasida tarela-ela laho mangihuthon pangalaho ni angka halak na diida nasida. Angka na denggan dihilala nasida, i do na diulahon. Jala ndang parduli nasida tu uhum ni Debata. Holan hepeng, pangkat, dohot dirina sandiri do na rumingkot.
5 Didok di Bibel, angka “parulaon ni daging” do na jotjot diulahon halak sisongon i. (Gal. 5:19-21) Di surat ni si Paulus na parjolo tu halak Kristen di Korint, dipaboa do angka na diulahon halak na mangkaholongi portibi on. Nasida ndang olo mardame, paimbar-imbarhon halak, manjujui na asing asa mangalo, manguhumi, ndang unduk tu na manguluhon, jala mongkus. Halak na songon i mura do tarela-ela laho mangulahon na sala. (Poda 7:21, 22) Si Judas mandok molo halak na mangkaholongi portibi on, boi gabe ndang mandapot panogu-noguon sian Jahowa.—Jud. 18, 19.
Songon dia do Sasintongna Halak na Jonok tu Debata?
6 Alai molo halak na jonok tu Debata rumingkot do di ibana parale-aleon tu Debata. Diihuthon ibana do panogu-noguon ni tondi parbadia. Jala marsitutu do ibana asa maniru Jahowa. (Eps. 5:1) Sai diparsiajari ibana do songon dia pamingkirion ni Jahowa jala diihuthon ibana do i. Solhot do ibana tu Debata. Diargai ibana do uhum ni Debata, jala diulahon do i di parngoluonna. (Ps. 119:33; 143:10) Ndang olo ibana mangulahon “parulaon ni daging” alai sai diulahon ibana do “parbue ni Tondi”. (Gal. 5:22, 23) Sahalak na mangkaringkothon ulaon panombaon tu Debata, i ma halak na jonok tu Debata.
Songon dia do Sasintongna Halak na Jonok tu Debata?
15 Songon dia hita maniru Kristus? 1 Korint 2:16 mandok, porlu do hita marroha songon “roha ni Kristus.” Jala Pilippi 2:5 paingothon hita asa “songon parrohaon ni Kristus Jesus ma parrohaonmuna!” Alani i, porlu do hita maniru pingkiran, pangkilalaan, dohot ulaon ni Kristus. Molo Jesus, rumingkot do parale-aleonna tu Debata sian na asing. Jadi molo tatiru Jesus, sasintongna na maniru Jahowa do hita. Jadi ringkot do maniru pingkiran ni Jesus.
Mangalului Arta na Adong di Bibel
it-1-IN 934 ¶4
Bisuk
Ndang dijalo angka halak na di portibi on barita na dipasahat Jesus. Haotoon do i dihilala nasida. Gariada, nang pe sasintongna angka pamarentana malo manguhumi, alai ‘dibunu nasida do Tuan na sangap i’. (1Kor 1:18; 2:7, 8) Alai saonari, dibahen Debata do habisuhon ni portibi on gabe haotoon. Aha do lapatanna? Dipangke Debata do halak ‘na oto, na gale, dohot na so mararga’ laho pasauthon sangkapna. Gabe maila ma angka halak na di portibi on. (1Kor 1:19-28) Didok si Paulus do tu angka halak Kristen di Korint, na laho salpu do “habisuhon ni portibi on manang habisuhon ni angka na marhuaso di portibi on”. Jala ndang habisuhon ni portibi on na dibaritahon si Paulus. (1Kor 2:6, 13) Dipasingot si Paulus do muse halak Kristen na di Kolosse asa unang mangihuthon “ajaran [filosofias, lapatanna mangkaholongi habisuhon] ni jolma dohot angka hata na so marguna, i ma na sian adat ni jolma”.—Kol 2:8; ida muse ayat 20-23.
w08-IN 15/7 27 ¶6
Angka na Denggan sian Buku Korint
2:3-5. Di kota Korint do pusat ajaran ni halak Junani. Ra, sai dipingkiri si Paulus do boha carana mangurupi angka halak asa porsea tu hasintongan. Alai nang pe songon i, tongtong do ibana marbarita. Tatiru ma si Paulus. Tongtong ma tapasahat barita na uli taringot Harajaon ni Debata. Songon si Paulus, pos ma rohanta sai diurupi Jahowa do hita mangulahon i.
25-31 MARET
ARTA NA ARGA NA ADONG DI BIBEL 1 KORINT 4-6
“Otik pe Ragi Boi do Mambahen Kambang Sude Adonan”
it-2-IN 607
Ragi
Dipangke si Paulus do tudosan taringot “ragi” tingki manuru huria Korint asa pakaluarhon baoa na mangulahon parmainanon tu istri ni bapakna. Si Paulus mandok, “Ai na so diboto hamu do, otik pe ragi boi do mambahen kambang sude adonan? Bolongkon hamu ma ragi na leleng i, asa gabe adonan na imbaru hamu. Sasintongna ndang marragi be hamu, ala nunga dipelehon biru-biru Paska, i ma Kristus.” Dipatorang si Paulus do taringot lapatan ni “ragi” i. Didok ibana, “Alani i, tongtong ma tarayahon perayaan i mamangke roti na so marragi, na manggombarhon haburjuon dohot hasintongan. Unang ma tapangke ragi naung leleng, na manggombarhon dosa dohot hajahaton.” (1Kor 5:6-8) Di angka ayat on, dipatorang si Paulus do lapatan ni tudosan taringot Perayaan Roti na So Marragi. Dirayahon halak Jahudi do on dungkon Paska. Si Paulus paboahon, otik pe ragi boi do mambahen kambang sude adonan. I ma na masa tingki i di huria Korint. Boi do gabe sogo roha ni Jahowa mangida huria i molo ndang pintor dipakaluar baoa na mangulahon parmainanon i. Jadi ingkon hatop do nasida pakaluarhon “ragi” i sian huria. Sarupa ma on tu na diulahon halak Israel najolo. Ndang boi adong ragi di jabu ni nasida saleleng perayaan roti na so marragi.
it-2-IN 797
Sibolis
Aha do lapatan ni ‘pasahaton baoa i tu Sibolis asa bolong pangkorhon ni dosana i sian huria’?
Dipaboa si Paulus do tu huria Korint aha na ingkon diulahon nasida tu sahalak baoa na mangulahon seks dohot istri ni bapakna. Didok ibana ma, “Ingkon pasahatonmuna do baoa i tu Sibolis asa bolong pangkorhon ni dosana i sian huria.” (1Kor 5:5) Jadi ingkon dipakaluar do baoa i sian huria, jala ndang boi be nasida mardongan tu baoa i. (1Kor 5:13) Dipasahat nasida baoa i tu Sibolis, lapatanna dipakaluar ma baoa i sian huria jala mulak muse ibana mangihuthon Sibolis. Dos songon ‘otik ragi’ di “sude adonan”, baoa i boi manegai huria. Jadi molo pintor dipakaluar baoa i sian huria, tongtong ma denggan parale-aleon ni huria i tu Jahowa. (1Kor 5:6, 7) Songon i ma na dibahen si Paulus tu si Himeneus dohot si Aleksander. Ala ndang dijaga nasida haporseaon dohot panggora ni rohanasida, gabe ndang marhaporseaon be nasida tu Jahowa.—1Tim 1:20.
lvs-IN 241, catatan
Pemecatan
Molo adong sasahalak na mangulahon dosa, ndang marhamubaon, jala ndang olo mangihuthon aturan ni Jahowa, ingkon dipakaluar do ibana sian huria. Dung dipakaluar ibana sian huria, ndang boi be hita mardongan manang mangkatai tu ibana. (1 Korint 5:11; 2 Johannes 9-11) Boasa dibahen songon i? Asa tongtong badia goar ni Jahowa, jala tongtong denggan parale-aleon ni huria tu Jahowa. (1 Korint 5:6) Jala on mangurupi halak na mardosa i asa marhamubaon jala mulak tu Jahowa.—Lukas 15:17.
▸ Pasal 3, paragraf 19
Mangalului Arta na Adong di Bibel
w09-IN 15/5 24 ¶16
Angka Suru-suruan “Marhobas tu Debata”
16 Tingki masa sitaonon tu hita, gabe “sitontonon ni angka suru-suruan” do i. (1 Kor. 4:9) Boasa? Alana, mansai las do roha ni angka suru-suruan molo tongtong hita marsihohot nang pe godang sitaonon. Jala las do roha ni nasida mangida na marhamubaon. (Luk. 15:10) Asing ni i, diparrohahon angka suru-suruan do parange ni angka donganta borua. Didok di Bibel, “Alani angka suru-suruan, ingkon pangkeon ni borua do tutup ni simanjujungna tanda na unduk ibana tu tunggane dolina.” (1 Kor. 11:3, 10) Mansai las do roha ni angka suru-suruan molo unduk angka donganta borua dohot hita sude tu aturan na dibahen organisasi ni Jahowa. Gabe songon sipaingot do i tu nasida asa tongtong unduk tu Jahowa.
it-1-IN 976
Patik
Patik tu Angka Suru-suruan. Umgogo do suru-suruan sian jolma. Alai nang pe songon i, ingkon unduk do nasida tu patik ni Debata dohot parentana. (Heb 1:7, 14; Ps 104:4) Boi ma taboto taringot on tingki dibahen Jahowa aturan tu Sibolis, suru-suruan na jahat. (Job 1:12; 2:6) Si Mikhael pe unduk do tu Jahowa, nang pe ibana pamimpin ni suru-suruan. Alana tingki marsoal ibana dohot Sibolis, didok ma, “Jahowa ma na maminsang ho.” (Jud 9; ida muse Sak 3:2.) Jala disuru Jahowa do sude suru-suruan unduk tu Jesus Kristus. (Heb 1:6; 1Ptr 3:22; Mat 13:41; 25:31; Plp 2:9-11) Buktina adong do suru-suruan na disuru Jesus manjumpangi si Johannes. (Pgk 1:1) Alai didok apostel Paulus di 1 Korint 6:3, dohot do angka na miniahan manguhumi angka suru-suruan. Alana di ari na naeng ro, dohot do angka na miniahan i manguhumi angka suru-suruan na jahat.