Referensi tu Parpunguan Hangoluan dohot Pangkobasion Na Laho Diparsiajari
4-10 FEBRUARI
ARTA NA ARGA NA ADONG DI BIBEL ROM 1-3
“Sai Latik ma Panggora ni Rohamuna”
lvs-IN 18-19 ¶6
Panggora ni Roha na Ias di Adopan ni Debata
6 Halak na so mananda Jahowa pe, boi do mamboto dia na sintong dohot na sala. Didok do di Bibel, “Pingkiran ni nasida ma na manontuhon na sintong manang na sala nasida.” (Rom 2:14, 15) Umpamana, godang do halak mamboto molo mambunu, manangko, sala do i. Boasa i diboto nasida? Alana, nunga dilehon Jahowa hian panggora ni roha tu nasida, asa diboto dia na denggan dohot na so denggan. Jadi nang pe ndang diantusi nasida aha panggora ni roha i, alai sasintongna diihuthon nasida do i. Jala diihuthon nasida do prinsip ni Debata naung adong di roha ni nasida, asa boi dibahen nasida keputusan na denggan.
lvs-IN 19-20 ¶8-9
Panggora ni Roha na Ias di Adopan ni Debata
8 Adong na marpingkir, sarupa do panggora ni roha dohot pangkilalaan. Dirimpu nasida, aha na tahilala denggan, i ma na ingkon ulahonon. Hape, ndang sempurna pangkilalaanta, boi do i mambahen hita gabe lilu. Didok do di Bibel, “Tung na angkal situtu do roha ni jolma, jala na ganggu, tung ise ma na tuk mandodoisa?” (Jeremia 17:9) Ra tarimpu nunga denggan na taulahon, hape sasintongna sala do i. Umpamana songon si Paulus, tingki ndang gabe halak Kristen dope. Dibahen ibana do susa angka halak na manomba Debata. Ninna rohana denggan do na niulahonna i, ala mangihuthon panggora ni rohana do i. Alai ujungna didok ibana ma, “Jahowa do na manguhumi ahu.” (1 Korint 4:4; Ulaon ni Apostel 23:1; 2 Timoteus 1:3) Tingki diboto si Paulus ndang lomo roha ni Jahowa tu na niulahonna i, dihilala ibana ingkon muba do ibana. Jadi, tingki naeng taulahon sada ulaon, porlu do tasungkun dirinta, ‘Las do roha ni Jahowa molo huulahon on?’
9 Molo holong rohanta tu sasahalak, tontu ndang olo hita mambahen ibana kecewa. Suang songon i ma, molo tahaholongi Jahowa ndang olo hita mambahen hansit rohana. Mabiar do hita molo mambahen Jahowa gabe kecewa. Umpamana songon si Nehemia. Nang pe gubernur ibana, alai ndang olo ibana mambahen dirina gabe mamora. Boasa? ‘Alana biar do ibana mida Debata.’ (Nehemia 5:15) Ndang olo si Nehemia mambahen hansit roha ni Jahowa. Songon si Nehemia, hita pe ndang olo mangulahon na sala, ala mabiar do hita mambahen Jahowa kecewa. Boi do taboto songon dia carana mambahen las roha ni Jahowa molo tajaha Bibel.—Ida Catatan No. 6.
Mangalului Arta na Adong di Bibel
w08-IN 15/6 30 ¶5
Angka na Denggan sian Buku Rom
3:4. Molo adong halak na pandapotna maralo tu Hata ni Debata, ingkon tongtong ma hita porsea tu barita na adong di Bibel jala taulahon ma lomo ni roha ni Debata. Molo taulahon i, hita patuduhon “sai na sintong do Debata”. Jala molo ringgas hita marbarita dohot mambahen sisean, hita mangurupi halak asa mamboto Debata do na sintong.
w08-IN 15/6 29 ¶6
Angka na Denggan sian Buku Rom
3:24, 25—Songon dia tobusan ni Jesus boi “manesa dosa ni angka jolma di tingki naung salpu”? Surirang taringot Messias na parjolo, disurat di 1 Musa 3:15. Digohi ma i di taon 33 M, tingki Jesus mate di hau partinaonan. (Gal. 3:13, 16) Ndang adong na boi manundati sangkap ni Jahowa. Jadi tingki dipaboa Debata surirang taringot Messias i, hira na nunga marlangku be laba ni tobusan i di adopanna. Jadi nang pe ndang dilehon Jesus dope tobusan i, alai nunga boi disesa Jahowa dosa ni angka pinompar ni si Adam na porsea tu janji i. Dung i, angka halak na mate andorang so ro Jesus tu tano on pe, boi mandapot pangkirimon laho dipahehe.—Ul. 24:15.
11-17 FEBRUARI
ARTA NA ARGA NA ADONG DI BIBEL ROM 4-6
“Debata Patuduhon Holongna tu Hita”
w11-IN 15/6 12 ¶5
Debata Patuduhon Holongna tu Hita
5 Dipatorang si Paulus ma, “Masuk do dosa i tu portibi on marhite sada jolma. Jala dosa i parohon hamatean. Ujungna rarat ma hamatean i tu sude jolma, ala nunga mardosa sude jolma.” (Rom 5:12) Boi do taantusi taringot i, ala dipaboa Debata do songon dia parmulaan ni jolma na parjolo. Ditompa Jahowa ma baoa dohot borua, i ma si Adam dohot si Hawa. Sempurna do Debata, songon i nang ompunta na parjolo i. Dilehon Debata ma parenta tu nasida, na sasintongna ndang maol diulahon. Molo dialo nasida parenta i, gabe mate ma nasida. (1 Mus. 2:17) Alai, diihuthon nasida do giot-giot ni roha ni nasida, dialo nasida ma parenta ni Debata. I patuduhon nasida ndang olo manjangkon Debata gabe Sibahen Uhum jala Parhuaso di nasida.—5 Mus. 32:4, 5.
w11-IN 15/6 12 ¶6
Debata Patuduhon Holongna tu Hita
6 Dung mardosa do si Adam, baru pe adong gellengna. Jadi, angka gellengna i pe mardosa do. Alai, molo si Adam mardosa ala mangalo parenta ni Debata do. Hape molo di angka gellengna, ndang adong dope parenta manang uhum dilehon Debata tu nasida. Jadi ndang sarupa dosa ni nasida tu dosa ni si Adam. (1 Mus. 2:17) Alai ingkon ditean nasida ma dosa sian si Adam. Jadi dosa dohot hamatean ma na mangarajai jolma. Dung di tingki ni si Musa, dilehon Debata ma uhum tu halak Israel. Uhum i patuduhon halak na mardosa do nasida. (Jaha Rom 5:13, 14.) Pangkorhon ni dosa i boi ma dipatudos songon sahit sian natua-tua na gabe turun tu angka ianakhonna. Memang ndang sude gellengna gabe hona sahit sian natua-tuana i. Alai asing do molo dosa. Sude do hita gabe mardosa jala mate ala ni si Adam. Boi do muba situasi on?
w11-IN 15/6 12-13 ¶9-10
Debata Patuduhon Holongna tu Hita
9 Aha do lapatan ni “didok mangulahon na sintong” di hata Junani? Sahalak penerjemah Bibel mandok, “Hata on dipangke laho mangulas taringot hukum. Hata on ndang na patuduhon parange ni sasahalak na muba, alai cara ni Debata mangida ibana do na muba . . . Dison Debata dipatudos songon Hakim na paluahon sasahalak sian hukuman. Hape ala mangulahon na so denggan do umbahen na diuhumi sasahalak i. Alai diputushon Debata ma molo ibana ndang marsala.”
10 Songon dia do “Siuhumi liat portibi on” boi paluahon angka halak na so tigor? (1 Mus. 18:25) Disuru Debata ma anakna na sasada i ro tu tano on. Diulahon Jesus do lomo ni roha ni Bapakna nang pe diela-ela, direhei, manang dipungkuli. Tongtong do ibana marsihohot sahat tu na mate ibana di hau partinaonan. (Heb. 2:10) Dilehon Jesus do ngoluna na sempurna gabe tobusan, asa malua pinompar ni si Adam sian dosa dohot hamatean.—Mat. 20:28; Rom 5:6-8.
Mangalului Arta na Adong di Bibel
w08-IN 15/6 29-30 ¶7
Angka na Denggan sian Buku Rom
6:3-5—Aha do lapatan ni tardidi di bagasan Kristus Jesus dohot tardidi di bagasan hamamatena? Lapatan ni tardidi di bagasan Kristus, i ma tingki Jahowa mamillit angka siihuthon Jesus gabe na miniahan marhite tondi parbadia. Dipasada ma nasida dohot Jesus jala gabe anggota ni huria ma nasida. Huria i ma pamatang ni Jesus, jala Jesus ma na gabe Ulu. (1 Kor. 12:12, 13, 27; Kol. 1:18) Tardidi do muse angka na miniahan i di bagasan hamamate ni Kristus. Lapatanna, dibahen nasida do pengorbanan. Rade do nasida manadingkon pangkirimon laho mangolu salelengna di tano on. Jadi songon hamatean ni Jesus, sada pengorbanan do hamatean ni nasida i. Nang pe hamatean ni nasida i ndang boi manobus dosa ni jolma. Pandidion on masa tingki nasida mate jala dipahehe asa mangolu di surgo.
w14-IN 1/6 11 ¶1
Adong do Pangkirimon tu Angka Ompungnami?
Tingki dipahehe halak na so tigor, hombar tu pangalaho ni nasida najolo do nasida diuhumi? Daong. Didok do di Rom 6:7, “Molo nunga mate sasahalak, nunga malua be ibana sian dosana.” Lapatanna, nunga disesa be dosa ni sasahalak tingki mate ibana. Jadi, nasida diuhumi hombar tu aha na diulahon nasida dung dipahehe, ndang na hombar tu parngoluon ni nasida andorang so mate, i ma tingki ndang diboto dope hasintongan. Jadi aha do laba ni on tu nasida?
18-24 FEBRUARI
ARTA NA ARGA NA ADONG DI BIBEL ROM 7-8
“Dipaima Hamu do Pangkirimon I?”
w12-IN 15/7 11 ¶17
Jahowa ma na Paluahon Hamu
17 Hea do diulas si Paulus taringot haluaon na laho dilehon Jahowa tu angka naposona di tano on. Didok si Paulus, “Tarpaima do sude tompaan tingki dipapatar angka anak ni Debata.” Jala didok muse, “Asa unang gabe hatoban ni dosa dohot hamatean sude tompaan i. Jala dapot ni nasida ma hasangapon na mansai balga songon na dilehon tu angka anak ni Debata.” (Rom 8:19-21) “Tompaan” lapatanna angka halak na marpangkirimon mangolu salelengna di tano on. Dihilala nasida ma pangkirimon i tingki “dipapatar” anak ni Debata na miniahan. On dimulai tingki dung dipahehe “angka anak ni Debata” i gabe songon suru-suruan. Dung i, rap ma nasida dohot Kristus laho mangaripashon hajahaton sian tano on jala mangalinggomi “punguan bolon” asa masuk tu tano na imbaru.—Pgk. 7:9, 14.
w12-IN 15/3 23 ¶11
Marlas ni Roha Alani Pangkirimonta
11 “Diparade Debata do pangkirimon”, tingki marjanji Ibana laho paluahon angka jolma sian “ulok na parjolo i”, i ma Sibolis. Pasautonna ma i marhite ‘pinompar’ na dijanjihon i. (Pgk. 12:9; 1 Mus. 3:15) Jesus ma na gabe bagian na umringkot sian ‘pinompar’ na dijanjihon i. (Gal. 3:16) Ala nunga mate Jesus jala dipahehe, gabe mandapot pangkirimon ma angka jolma. Gabe boi ma nasida dipalua sian dosa dohot hamatean. Alai pangkirimon i saut dungkon dipapatar “angka anak ni Debata”. Angka na miniahan ma na gabe bagian na asing sian ‘pinompar’ i. Dipasangap jala dipapatar ma nasida tingki rap dohot Jesus laho mangaripashon pamarentaon ni Sibolis. (Pgk. 2:26, 27) Ujungna, gabe boi ma malua angka biru-biru na asing sian hasusaan bolon.—Pgk. 7:9, 10, 14.
w12-IN 15/3 23 ¶12
Marlas ni Roha Alani Pangkirimonta
12 Mansai las do roha ni angka jolma di tingki Pamarentaon Saribu Taon ni Kristus haduan! Di tingki i, dipapatar ma muse “angka anak ni Debata” na sangap i, i ma tingki gabe malim nasida rap dohot Kristus. Dipasaut nasida ma laba ni tobusan ni Jesus i tu sude jolma. Sude rakyat ni Pamarentaon i, dipalua ma sian dosa dohot hamatean. Angka halak na tigor ndang be “gabe hatoban ni dosa dohot hamatean”. Alai di ujung ni Pamarentaon Saribu taon i, diuji ma muse nasida. Jadi molo tongtong nasida marsihohot sahat tu tingki diuji nasida, gabe disurat ma goar ni nasida di “buku hangoluan”. Dapot ni nasida ma “hasangapon na mansai balga songon na dilehon tu angka anak ni Debata”. (Pgk. 20:7, 8, 11, 12) Sada pangkirimon na luar biasa do i!
Mangalului Arta na Adong di Bibel
w17.06-IN 3
Diingot Hamu do?
Aha do imbar ni marpingkir “hombar tu lomo ni roha ni daging”, dohot marpingkir “hombar tu panogu-noguon ni tondi parbadia”? (Rom 8:6)
Halak na marpingkir hombar tu lomo ni roha ni daging holan mamingkirhon dohot mangkatahon taringot arta. Alai halak na marpingkir hombar tu panogu-noguon tondi parbadia mangkaringkothon Debata dohot pingkiran ni Debata. Molo diulahon halak Kristen i, gabe diurupi tondi parbadia ma ibana. Parohon hamatean do molo daging. Alai molo tondi parbadia parohon hangoluan dohot hadameon do.—w16.12, hlm. 11-14.
w09-IN 15/11 7 ¶20
Tangiangmuna Patuduhon Songon dia Dirimuna
20 Sipata, ndang taboto aha sidohononta tingki martangiang. Disurat si Paulus do, “Olo do sipata ndang taboto aha na laho tatangiangkon tingki martangiang. Molo ndang taboto sidohononta, di tingki i ma tondi parbadia mangurupi hita paboahon na di bagasan rohanta. Jala botoon ni Debata do aha na dipangido ni tondi parbadia i, ai Ibana do na mamboto roha ni sude jolma.” (Rom 8:26, 27) Dibahen Jahowa do asa godang tangiang disurat di Bibel. Diboto Ibana do, hira-hira dos songon i ma na naeng tatangiangkon, jala olo do Ibana mangalusi. Diboto Jahowa do songon dia hita, jala diantusi Ibana do boasa angka tangiang i disurat di Bibel. Jadi hira tondi parbadia ma na pasahathon pangidoanta i tu Ibana, jala dialusi Ibana ma i. Alai molo lam denggan taparsiajari Hata ni Debata, gabe lam mura ma hita pasahathon aha na laho tatangiangkon.
25 FEBRUARI-3 MARET
ARTA NA ARGA NA ADONG DI BIBEL ROM 9-11
“Tudosan taringot Hau Jetun”
w11-IN 15/5 23 ¶13
‘Tung Godang Situtu do Bisuk ni Debata!’
13 Dipatudos Apostel Paulus ma angka halak na gabe pinompar ni si Abraham i songon dangka ni hau jetun. (Rom 11:21) Hau jetun i manggombarhon sangkap ni Debata na digohi hombar tu janji ni Debata tu si Abraham. Uratna na badia manggombarhon Jahowa na mangalehon ngolu tu angka na miniahan. (Jes. 10:20; Rom 11:16) Batangna manggombarhon Jesus, na gabe bagian na umringkot sian pinompar ni si Abraham. Angka dangkana manggombarhon “sude” bagian na asing sian pinompar ni si Abraham.
w11-IN 15/5 24 ¶15
‘Tung Godang Situtu do Bisuk ni Debata!’
15 Aha do na dibahen Jahowa asa saut sangkapna i? Dipaboa si Paulus, dicangkok ma dangka ni hau jetun tombak tu hau jetun i. I ma na manggantihon angka dangkana naung diponggol i. (Jaha Rom 11:17, 18.) Jadi, dangka ni hau jetun tombak i manggombarhon angka halak Kristen na miniahan sian angka bangso, umpamana songon na di huria Rom. Hira na dicangkok ma nasida tu hau jetun i. Gabe bagian sian pinompar ni si Abraham ma nasida. Najolo, dos do nasida songon dangka ni jetun tombak. Ndang dohot hian nasida gabe bagian sian perjanjian on. Alai dipungka Jahowa ma dalan tu nasida asa gabe Israel ni Debata.—Rom. 2:28, 29.
w11-IN 15/5 25 ¶19
‘Tung Godang Situtu do Bisuk ni Debata!’
19 Jadi, di tingkinta saonari on digohi nama sangkap ni Jahowa taringot “Israel ni Debata”. (Gal. 6:16) Songon na didok si Paulus, “sude halak Israel boi malua”. (Rom 11:26) Jala nunga ditontuhon Jahowa tingkina asa “sude halak Israel”, i ma sude angka halak na miniahan, gabe raja jala gabe malim di surgo. Ndang adong manang ise pe na boi manundati sangkap ni Jahowa i!
Mangalului Arta na Adong di Bibel
w13-IN 15/6 25 ¶5
Oloi ma Sipasingot sian Jahowa
5 Songon dia molo sasahalak ndang olo ditopa Debata? Aha ma na diulahon Debata? Pingkirhon ma molo adong tano liat na maol ditopa. Somalna, dibahen sitopa hudon i ma tano liat i gabe bentuk na asing, manang olo do gabe dibolongkon! Molo ndang boi be dipangke hudon i, sala ni sitopa i do i. Alai ndang songon i molo Debata, Sitopa hita. (5 Mus. 32:4) Molo adong jolma na so olo ditopa Jahowa, sala ni jolma i do i. Ndang dipaksa Jahowa sasahalak asa ditopa Ibana. Molo olo do nasida ditopa, gabe denggan ma. Umpamana songon halak Kristen na miniahan. Mulana nasida holan ‘angka jolma naung ditontuhon mandapot asi ni roha ni Debata’, alai ditopa ma nasida gabe “barang na dipangke tu na sangap”. Alai molo ndang olo sasahalak ditopa Debata, ujungna nasida gabe “ditontuhon laho diripashon, na dipatudos songon hudon tano na laho diropukhon”.—Rom 9:19-23.
it-1-IN 496 ¶3
Mangiburu
Hiras ni Roha na Sala. Adong do halak na marhiras ni roha mangulahon sada ulaon na dihilala nasida sintong. Hape sala do hiras ni roha ni nasida i, jala mambahen sogo roha ni Debata. Songon i ma na masa tu halak Jahudi di abad na parjolo. Marsitutu do nasida mangulahon Patik ni si Musa, asa gabe halak na tigor. Alai didok si Paulus ma, sala do hiras ni roha ni nasida i, jala sala do parbinotoan ni nasida. Alani i, ndang las roha ni Debata mangida nasida. Ingkon diboto nasida do na sala na diulahon nasida i. Dung i, ingkon diakkui nasida do molo Jesus i anak ni Debata, asa boi nasida tigor di adopan ni Debata jala ndang hona uhum. (Rom 10:1-10) Umpamana si Paulus najolo, tingki margoar si Saul dope. Hiras do rohana tingki maragama Jahudi dope. ‘Dibahen ibana do na hansit tu huria ni Debata jala dilelei ibana do i.’ Jala ‘ndang adong sian patik i na so diulahon ibana’. (Gal 1:13, 14; Plp 3:6) Jadi sala do hiras ni rohana i. Tutu sian ias ni rohana do ibana mangulahon i. Alani i, dipatudu Jahowa ma haburjuon tu ibana asa boi diboto si Saul panombaon na sintong.—1Tim 1:12, 13.