Aha do Arti ni Nomor na Adong di Bibel? Adong do Numerologi Disurat di Bibel?
Na didok Bibel
Di Bibel, sipata dipakke do angka manang nomor gabe lambang. Asa taboto nomor i dipakke sebagai lambang do manang na dang, ikkon jolo taida do konteksna. Akka on ma contoh ni nomor na dipakke di Bibel sebagai lambang:
1 Marsada. Contohna, hea do Jesus martangiang tu Debata asa marsada akka siseanna. Didok ibana, “Hutangiakkon do asa gabe sada nasida sude, songon Ho Amang na marsada dohot au jala au marsada dohot Ho.”—Johannes 17:21; Mateus 19:6.
2 Molo adong masalah hukum, ikkon adong do hatorangan sian dua saksi lao mamastihon na tutu do perkara i manang na dang. (5 Musa 17:6) Suang songon i ma, molo adong sada parnidaan manang hata na diulangi sappe dua hali, on patuduhon na tutu do i jala sittong. Contohna, tikki dipaboa si Josep arti ni nipi ni si Firaun Raja ni Mesir didok ibana do, “Umbahen dua hali pe raja i marnipi, lapatanna nungnga ditottuhon Debata na sittong be na lao masa i, jala satokkin nai nama masa i bahenon ni Debata na sittong i.” (1 Musa 41:32) Di surirang na diida si Daniel, adong diida ibana ‘dua tanduk’ na manggombarhon pamarettaon na marsada, i ma Imperium Media Persia.—Daniel 8:20, 21; Pangungkapon 13:11.
3 Molo adong hatorangan sian tolu saksi taringot sada perkara, boi ma dibuktihon tutu manang na dang perkara i. Jala molo adong sada hata na diulangi sappe tolu hali, berarti tutu do i jala boi dihaporseai.—Hesekiel 21:27; Ulaon ni Apostel 10:9-16; Pangungkapon 4:8; 8:13.
4 Angka manang nomor on, boi do manggombarhon naung tercapai sada tujuan. Contohna, adong do didok di Bibel hata “opat suhi ni tano on” na manggombarhon saluhut tano on.—Pangungkapon 7:1; 21:16; Jesaya 11:12.
6 Ala angka pitu sering manggombarhon na lengkap, jadi angka onom manggombarhon na so lengkap jala dang sempurna. Alana angka on hurang sada sian angka pitu, jala adong do kaitan ni angka onom on tu akka musu ni Debata.—1 Kronika 20:6; Daniel 3:1; Pangungkapon 13:18.
7 Angka on dipakke do lao manggombarhon na lengkap. Contohna, disuru Debata do halak Israel asa makkaliangi Kota Jeriko saleleng pitu ari. Jala di ari na papituhon, ikkon marbaris do nasida makkaliangi kota i pitu hali. (Josua 6:15) Adong do muse contoh na asing di Bibel na mamakke angka pitu lao manggombarhon kelengkapan. (3 Musa 4:6; 25:8; 26:18; Psalmen 119:164; Pangungkapon 1:20; 13:1; 17:10) Hea do didok Jesus tu si Petrus dang holan “pitu hali” ibana mengampuni akka donganna, alai ikkon “sappe 77 hali”. Jadi pengulangan angka pitu dison patuduhon, ikkon torus do taampuni akka donganta.—Mateus 18:21, 22.
10 Angka on boi do manggombarhon kelengkapan ni sada perkara.—2 Musa 34:28; Lukas 19:13; Pangungkapon 2:10.
12 Angka on boi do manggombarhon na sempurna do aturan na dibahen Debata. Contohna, tikki mandapot parnidaan Apostel Johannes taringot sada kota na di surgo, diida ibana do molo ‘fondasi ni tembok ni kota i dibahen sian 12 batu. Tarsurat do sada sian goar ni 12 apostel di ganup batu i’. (Pangungkapon 21:14; 1 Musa 49:28) Jala kelipatan ni angka 12 pe sarupa do artina.—Pangungkapon 4:4; 7:4-8.
40 Di Bibel, hea do dipakke piga-piga hali angka 40 lao paboahon leleng ni sada hukuman.—1 Musa 7:4; Hesekiel 29:11, 12.
Numerologi dohot gematria
Dang sarupa angka manang nomor na dipaboa di Bibel tu numerologi. Alana molo di numerologi, angka, kombinasi angka, dohot jumlah angka adong do kaitanna tu ilmu sihir. Contohna, dipakke Kabalis Jahudi do teknik numerologi manang gematria lao manottuhon angka na adong di ganup huruf na adong di Akka Bukku Heber. Tujuanna, asa boi ditafsirhon nasida aha do arti ni akka huruf i. Numerologi adong do hubunganna tu ilmu sihir jala sogo do roha ni Debata mangida i.—5 Musa 18:10-12.