Penciptaan Manang Evolusi?​—Bagian 3: Boasa Porsea Hita tu Penciptaan?

Songon i do na dihilala hamu? Molo i do, ra dang pos dope rohamuna tu penciptaan. Jala pasti dang lomo roham didok halak na oto. Aha do na boi mangurupi hamu?

• Na mambahen hamu ragu

• Na dia do na lao dihaporseai ho

• Akka sijahaon na boi mangurupi hamu lao mangalului buktina

• Na didok akka donganmu

Na mambahen hamu ragu

1. Molo porsea hamu tu penciptaan, gabe dianggap ma hamu halak na so porsea tu sains.

“Didok gurukku, halak na porsea tu penciptaan i halak na malas do. Alana dang olo nasida mangalului sian dia dalanna umbahen na adong bumi on.”​—Si Maria.

Na porlu diboto hamu: Halak na mandok songon i, dang diboto na sasittongna. Akka ilmuwan na terkenal songon si Galileo dohot si Isaac Newton pe porsea do adong na manoppa saluhutna. Jala haporseaon ni nasida i dang maralo tu sains manang ilmu pengetahuan na dihalomohon nasida. Saonari pe, adong do piga-piga ilmuwan na mangakkui dang maralo penciptaan tu sains.

Coba ma on: Ketik ma (pakke tanda kutip) “menjelaskan imannya” di kotak pencarian PERPUSTAKAAN ONLINE Menara Pengawal. Disi, boi ma dijaha hamu pengalaman ni akka halak na karejo di bidang kedokteran dohot sains, na porsea tu penciptaan. Parrohahon ma aha na mangurupi nasida gabe porsea tu Pencipta.

Intina: Molo porsea hamu tu penciptaan, dang berarti dang porsea hamu tu sains. Gariada lam godang na diparsiajari hamu taringot alam, gabe lam porsea ma hamu tu penciptaan.​—Rom 1:​20.

2. Molo porsea hamu tu kisah taringot penciptaan na disurat di Bibel, gabe dianggap ma hamu halak na fanatik.

“Godang halak mandok, dang masuk akkal porsea tu penciptaan. Holan dongeng do akka kisah na disurat di bukku sada Musa i.”​—Si Jasmine.

Na porlu diboto hamu: Sala do pandapot ni godangan halak tu kisah taringot penciptaan na disurat di Bibel. Misalna, piga-piga halak na porsea tu kreasionisme mandok, marribu taon dope umur ni tano on. Manang didok nasida, di bagasan 24 jam do ditoppa Debata sude na mangolu di tano on. Alai dang sadalan hatorangan na disurat di Bibel tu dua pandangan on.

• 1 Musa 1:1 mandok, “Di mula ni mulana ditoppa Debata ma langit dohot tano.” Dang maralo hatorangan on tu akka bukti di bidang ilmu pengetahuan na patuduhon nungnga milliaran taon umur ni tano on.

• Hata “ari” na disurat di sada Musa, dang ikkon 24 jam lelengna, boi do tong lobi sian i. Misalna hata “ari” na disurat di 1 Musa 2:4, patuduhon onom ari Debata paradehon tano on.

Intina: Sadalan do akka kisah taringot penciptaan na disurat di Bibel tu sains.

Na dia do na lao dihaporseai ho

Molo porsea hamu tu penciptaan, dang berarti “asal porsea” hamu disi. Gariada, porsea pe hamu tu penciptaan ala adong do bukti na masuk akkal. Pikkirhon ma on:

Pasti porsea do hamu adong na mambahen kamera, pesawat, manang jabu. Jadi, masuk akkal do molo porsea hamu adong na manoppa mata ni jolma, akka pidong na habang di langit, manang planet bumi on?

Pikkirhon ma on: Akka ilmuwan jotjot do maniru akka na didapot nasida di alam lao mambahen asa lam denggan penemuan ni nasida. Jala lomo roha ni nasida asa diakkui halak penemuanna i. Hape undenggan do akka toppaan ni Debata sian sude penemuan ni nasida. Menurutmu, masuk akkal do molo taakkui penemuan ni akka ilmuwan i alai dang taakkui Debata do na manoppa saluhutna?

Akka sijahaon na boi mangurupi hamu lao mangalului buktina

Boi do gabe lam pos rohamuna tu penciptaan molo dilului hamu akka bukti na adong di alam.

Coba ma on: Ketik ma (pakke tanda kutip) “apakah ini dirancang” di kotak pencarian PERPUSTAKAAN ONLINE Menara Pengawal. Pillit ma piga-piga topik na menarik di hamu sian artikel “Apakah ini Dirancang?” di majalah Sadarlah!. Di ganup artikel, lului ma aha do na menarik sian akka hatorangan na dibahas disi. Jala songon dia i paposson rohamuna na tutu adong Pencipta.

Bagas ma parsiajari: Pakke ma akka brosur on lao mangalului akka bukti taringot penciptaan.

• Benarkah Kehidupan Diciptakan?

  • Pas do posisi ni bumi di tata surya jala nungnga dirancang asa boi mahkluk hidup tinggal disi.​—Ida halaman 4-​10.

  • Akka contoh rancangan na adong di alam.​—Ida halaman 11-​17.

  • Sadalan do kisah taringot penciptaan na disurat di bukku sada Musa tu sains.​—Ida halaman 24-​28.

• Asal Mula Kehidupan​—Lima Pertanyaan yang Patut Direnungkan

  • Dang mungkin toppu adong hangoluan sian benda mati.​—Ida halaman 4-7.

  • Massai rumit do struktur ni makhluk hidup. Alani i, dang mungkin toppu i berkembang.​—Ida halaman 8-​12.

  • Umbalga do kapasitas ni DNA lao menampung informasi sian sude teknologi modern.​—Ida halaman 13-​21.

  • Dang sian sada sel na sarupa mula ni sude makhluk hidup. Sian penemuan ni fosil gabe taboto ma, na tiba-tiba do adong piga-piga kelompok ni binatang alani penciptaan jala dang na berkembang secara bertahap i sian sada sel.​—Ida halaman 22-​29.

“Tikki huida marragam binatang di tano on dohot alam semesta na teratur, gabe pos ma rohakku na tutu adong Debata.”​—Si Thomas.