Mambeda-bedahon Halak—Songon i do Hamu?
Molo olo hita mambeda-bedahon halak, boi do gabe songon sahit i di hita. Bahaya do molo songon i pikkiranta. Boi do dang tasadari nungnga songon i hita.
Olo do halak mambeda-bedahon halak na asing dang holan ala na asing negarana, sukuna, manang bahasana. Alai, boi do tong ala asing agamana, jenis kelaminna, manang parhepengonna. Adong do muse halak na marpikkiran negatif alani mangida umurna, pendidikanna, hahuranganna, manang mangida fisikna. Nang pe didok nasida dang olo nasida songon i, alai sasittongna olo dope nasida mambeda-bedahon.
Olo do hamu mambeda-bedahon halak? Biasana mura do taboto molo halak nungnga mambeda-bedahon halak na asing. Alai molo hita sandiri maol do taboto naung songon i hita. Jadi, sasittongna hita sude olo dope mambeda-bedahon halak. Molo negatif pikkiranta tu sada kelompok jala molo juppang hita dohot halak i, didok profesor sosiologi David Williams, “Boi do gabe asing pambahenatta tu halak i jala dang tasadari i.”
Contohna, si Jovica tinggal di Eropa Tenggara. Adong do sada kelompok na otik pendudukna di negara i. Didok si Jovica, “Huhilala dang adong halak na burju sian kelompok i. Dang na mambeda-bedahon halak au, memang i do kenyataanna.”
Dibahen pamaretta do hukum asa unang tabeda-bedahon halak. Alai nang pe songon i sai adong dope na olo mambeda-bedahon halak na asing. Boasa songon i? Alana hukum holan boi mangatur tindakan ni halak do, dang boi mangatur roha dohot pikkiran ni halak. Hape sian roha dohot pikkiran ni halak do na mambahen halak olo mambeda-bedahon. Boha do carana asa unang mambeda-bedahon halak be hita?
Di halaman selanjutna, adong lima cara na mangurupi halak asa unang mambeda-bedahon halak na asing.