Dang Olo Nasida Marsomba tu Patung

Sada tikki, marnipi ma Raja Nebukadnesar taringot patung. Dung i dibahen ibana ma patung sian mas na massai balga. Dibahen ma i di Dataran Dura jala dijou ma sude pejabat asa marpungu di jolo ni patung i, dohot ma i si Sadrak, si Mesak, dohot si Abednego. Didok raja i ma, ‘Molo dibege hamu soara ni tarompet, harpa, dohot suling, ikkon marsomba ma hamu tu patung i! Manang ise na so marsomba, ikkon disappatton tu api na marsigorgor.’ Olo do halak Israel na tolu i marsomba tu patung i? Manang holan Jahowa do na disomba nasida?

Dung i disuru raja i ma asa dibahen musik. Marsomba ma sude halak tu patung i. Alai si Sadrak, si Mesak, dohot si Abednego dang olo marsomba. Adong ma na mandok tu raja i, ‘Dang olo halak Israel na tolu i marsomba tu patung i.’ Dijou si Nebukadnesar ma nasida jala didok ma, ‘Hulehon muse kesempatan tu hamu lao marsomba tu patung i. Molo dang olo hamu, husappatton ma hamu tu api. Dang adong debata na boi menyelamatton hamu.’ Didok nasida ma, ‘Dang olo hami marsomba tusi. Boi do hami diselamatton Debatanami. Alai nang pe dang diselamatton hami, toktong do hami dang olo marsomba.’

Muruk situtu ma si Nebukadnesar. Didok ibana ma tu akka pelayanna, ‘Bahen hamu ma api i pitu hali loppit ummohop sian na somal!’ Jala didok ma tu akka prajuritna, ‘Ikkat ma akka bawa on, jala sappatton tusi!’ Alani mohop ni api i, gabe mate do akka prajurit na manappatton nasida. Tikki diida si Nebukadnesar tu bagasan, adong ma opat bawa na mardalan di bagasan api i. Mabiar situtu ma ibana jala disukkun ma tu akka pejabatna, ‘Dang na tolu halak nakkin na tasappatton? Alai adong opat halak na huida, jala songon malaikat do sada sian nasida!’

Dipajonok si Nebukadnesar ma tu inganan ni api i, jala dijou ma, ‘Kaluar ma hamu akka naposo ni Debata Natumimbul!’ Heran ma sude halak na mangida nasida kaluar sian api i. Dang matutung daging, obuk, dohot pakkean ni nasida. Bahkan dang bau timus nasida.

Didok si Nebukadnesar ma, ‘Dipuji ma Debata ni si Sadrak, si Mesak, dohot si Abednego. Disuru do malaikatna lao menyelamatton nasida. Dang adong debata na songon Debata ni nasida.’

Olo do ho songon tolu halak Israel i, na toktong setia tu Jahowa manang aha pe na masa?