Adong do Dipaboa di Bibel na Lao Terjadi Gempa na Massai Gogo?

Setiap taon, terjadi do marpulu ribu hali gempa. Nang pe godangan sian gempa i dang pola gogo, alai molo terjadi massai gogo gempa i boi do godang na hancur, godang halak na susa, jala godang halak na mate. Sipata, gempa bumi on boi do mambahen ro tsunami jala gabe hancur ma wilayah na adong di pinggir laut. Alani tsunami on godang do halak na mate na tinggal disi. Attong, adong do dipaboa di Bibel na lao terjadi gempa na massai gogo?

Dibahas ma di artikel on

Adong do dipaboa di Bibel na lao terjadi gempa bumi?

Bibel na tarbukka. Di pudina adong gambar ni planet bumi dohot gelombang ni getaran gempa na direkam seismograf.

Nungnga dipaboa Jesus di Bibel molo gempa bumi on sada peristiwa na lao terjadi di ari na naeng ro. Disurat do hatana on di tolu bukku na adong di Bibel songon na di toru on:

“Marporang ma bangso tu bangso jala harajaon tu harajaon. Masa ma haraparon dohot gempa di godang inganan.”—Mateus 24:7.

“Ai marporang ma bangso tu bangso jala harajaon tu harajaon. Masa ma gempa dohot haraparon di godang inganan. Alai sudena i, holan mula ni hasusaan i dope.”—Markus 13:8.

“Masa ma gempa na massai gogo jala masa ma haraparon dohot sahit di godang inganan.”—Lukas 21:11.

Jadi, nungnga dipaboa Jesus na lao masa ‘gempa na massai gogo di godang inganan’ jala di tikki na sarupa terjadi do porang, akka halak susa mangalului sipanganon, jala masa sahit. Sude peristiwa on gabe tanda na patuduhon molo jolma nungnga mangolu di “panutup ni jaman” manang “di ari parpudi”. (Mateus 24:3; 2 Timoteus 3:1) Molo taihutton perhitungan waktu na dipaboa di Bibel, taboto ma molo “ari parpudi” nungnga dimulai sian taon 1914 jala dang berakhir dope i.

Tutu do gempa bumi na terjadi saonari on menggenapi ayat na di Bibel?

Titik-titik na adong di peta dunia na patuduhon didia gempa na jotjot terjadi.

Tutu. Molo taida surirang na dipaboa Jesus i termasuk ma taringot gempa bumi, cocok do hatana i tu peristiwa na masa di jamanta on. Mulai sian taon 1914, nungnga terjadi lobi sian 1.950 hali gempa bumi na massai gogo. Molo digabung jumlah ni halak na mate alani gempa i, adong do lobi sian dua juta halak.a Misalna, taparrohahon ma piga-piga peristiwa on.

2004—Samudera Hindia. Masa do gempa bumi na gogona 9,1 skala Richter mambahen terjadi tsunami tu 12 negara jala mate do hira-hira 225.000 halak.

2008—Cina. Masa do gempa bumi na gogona 7,9 skala Richter, hancur do akka kota dohot desa, jala diperkirahon adong do 90.000 na mate, hira-hira 375.000 na lukka, jala marjuta halak na so adong be jabuna.

2010—Haiti. Masa do gempa na gogona 7,0 skala Richter jala terjadi do piga-piga hali gempa susulan na gogo. Mate do lobi sian 300.000 jala lobi sian sajuta na so adong be tempat tinggalna.

2011—Jepang. Masa ma gempa bumi na gogona 9,0 skala Richter jala terjadi do tsunami. Hira-hira 18.500 halak ma na mate jala marratus ribu halak na mengungsi. Sega do Pembangkit Listrik Tenaga Nuklir Fukushima na mambahen terjadi kecelakaan nuklir na massai balga. Sappulu taon dukkon i, adong dope hira-hira 40.000 halak na so boi mulak tu jabu ni nasida, ala timbo dope pengaruh ni radiasi di labbung ni daerah pembangkit tenaga listrik i.

Aha do na boi taboto dung taida nungnga dipaboa hian di Bibel na lao masa gempa bumi?

Suami istri na marsitiopan tangan huhut mangida masa depan na massai denggan.

Dung taboto naung disurat hian di Bibel na lao masa gempa bumi, gabe taboto ma aha na lao masa satokkin nai. Jesus mandok, “Molo diida hamu masa sudena i, botoonmuna ma nungnga jonok Harajaon ni Debata.”—Lukas 21:31.

Dipatorang do di Bibel molo Harajaon ni Debata nyata do adong jala nungnga jongjong pamarettaon i di surgo, Rajana i ma Jesus Kristus. Diajarhon Jesus do asa ditangiakkon akka siihutton ibana Harajaon on.—Mateus 6:10.

Molo dung mamaretta Harajaon ni Debata tu tano on, dang terjadi be bencana alam termasuk ma i gempa bumi. (Jesaya 32:18) Alai dang holan i, padengganon ni Debata ma sude na sega alani gempa bumi, termasuk ma i sude lungun ni rohatta alani bencana i. (Jesaya 65:17; Pangungkapon 21:3, 4) Lao mamboto hatorangan na asing, jaha ma artikel “Aha do na Lao Diulahon Harajaon ni Debata?”

a Statistik on dibuat sian Global Significant Earthquake Database na dikelola Pusat Data Geofisika Nasional Amerika Serikat.

Kesalahpahaman ni akka halak tu ayat ni Bibel taringot gempa bumi

Pandapot na sala: Dang pola porlu hita berjaga-jaga di tikkitta on, ai torus do terjadi gempa bumi sian najolo, hal na biasa do i.

Na sasittongna: Dang holan gempa bumi peristiwa naung disurat hian di Bibel, alai godang do peristiwa na disurat na lao masa secara bersamaan lao gabe tanda na mangolu hita di ari parpudi. Lao mamboto hatorangan na asing, jaha ma artikel “Aha do Tanda ni ‘Ari Parpudi’ manang ‘Ujung ni Ari’ i?”

Pandapot na sala: Hukuman sian Debata do gempa bumi na terjadi saonari on.

Na sasittongna: Dang hukuman sian Debata gempa bumi on, alana molo terjadi gempa rap mate do halak na burju dohot halak na jahat. Jala godang sian nasida mate ala adong di inganan na sala jala dang diboto nasida na lao terjadi gempa bumi. (Parjamita 9:11) Asa lam pos rohatta molo bencana alam i dang hukuman sian Debata, jaha ma artikel “Boha do Didok di Bibel taringot Bencana Alam?”

Pandapot na sala: Disurat do di bukku Pangungkapon na lao terjadi gempa bumi lao menghancurhon portibi on.

Na sasittongna: Adong do disurat di bukku Pangungkapon taringot gempa bumi, i ma di: Pangungkapon 6:12; 8:5; 11:13, 19; 16:18. Alai di bagasan parnidaan do dipaboa akka na di ayat on tu si Johannes. Alani i gempa bumi na disi dang na lao benar-benar terjadi, holan simbol do i. (Pangungkapon 1:1) Lao mamboto hatorangan na asing, jaha ma artikel “Aha do Arti ni Bukku Pangungkapon?”