Bantuan Kemanusiaan Taon 2023—⁠“Takkas do Diida Hami Bukti ni Holong ni Jahowa”

Bibel mandok “marporang ma bangso tu bangso” jala godang ma terjadi bencana alam saleleng “panutup ni jaman on”. (Mateus 24:3, 7) Nungnga taida songon dia ayat on digenapi saleleng taon dinas 2023.a Terjadi do akka porang dohot bencana alam di hampir 100 negeri, alai toktong do Saksi Jahowa patuduhon holong. Songon dia carana?

Saleleng taon dinas 2023, adong lobi sian 200 bencana alam dohot bencana na asing na berdampak tu akka donganta. Lao mangurupi nasida, dipakke badan hukum Saksi Jahowa do lobi sian sappulu juta dolar AS lao mangalehon sumbangan kemanusiaan. Asing ni i, godang do akka donganta na mamakke hepeng ni nasida sandiri lao mangurupi akka dongan di wilayah ni nasida na hona bencana. Taida ma songon dia sumbangan na dilehon hamu dipakke lao mangurupi akka dongan di Nigeria dohot di Cile.

“Tutu do Marsihaholongan Akka Naposo ni Jahowa”

Piga-piga wilayah di Nigeria jotjot do mengalami banjir musiman. Alai banjir na terjadi di Oktober 2022 ma na paling parah na hea terjadi saleleng sappulu taon parpudi on. Lobi sian 676.000 hektar ma ladang na hancur jala adong lobi sian dua juta halak na mangungsi. Pittor ditugasson cabang Nigeria ma Panitia Penanggulangan Bencana lao mangalehon bantuan kemanusiaan jala patoguhon akka dongan.

Dampakna tu Akka Donganta

• 7.505 penyiar ikkon mangungsi

• 860 jabu sega manang hancur

• 90 Bale Harajaon jala sada Bale Kebaktian na hona banjir

Tudia do Dipakke Akka Sumbangan i

Lobi sian 250.000 dolar AS ma na dipakke tu bantuan kemanusiaan. Dipakke do i lao:

• Paradehon sipanganon songon boras, kacang-kacangan, dohot mi

• Paradehon perlengkapan tu jabu songon tempat tidur dohot kelambu

• Padenggatton manang paturehon akka jabu naung hancur

Songon dia do cara ni akka donganta asa denggan mamakke sumbangan i? Sada carana, ikkon dipastihon nasida do boi dope manang na dang sada bangunan dipadenggan. Molo ikkon dibangun do muse bangunan i, porlu do dibahen nasida rancangan na sederhana jala na umum dipakke di daerah i.

Mandok mauliate do akka donganta tu bantuan na dapot ni nasida. Sahalak donganta borua mandok, “Banjir on mambahen susa ngolunami, alana gabe dang adong be ladang dohot jabunami. Alai gabe tenang do dihilala hami dung ro akka dongan di sadari i lao mangurupi hami jala paradehon tempat tinggal tu hami. Las hian do muse rohanami ala pittor dikirim kantor cabang do akka sipanganon tu hami. Luar biasa do ala boi takkas diida hami saut hata na di Johannes 13:34, 35. . . . Tutu do marsihaholongan akka naposo ni Jahowa. Mandok mauliate situtu do au dohot keluargakku tu sude bantuanmuna i. Benar-benar dihaporluhon hami do i.”

Tikki dilehon organisasitta bantuan kemanusiaan, godang do akka halak di daerah i na mamparrohahon i. Sahalak tokoh masyarakat di Sabagreia, Negara Bagian Bayelsa mandok, “Godang do organisasi manang gareja di liat portibi on, alai holan Saksi Jahowa do na olo mangulahon songon on. . . . Organisasimuna on ma sada organisasi terbaik di portibi on.

“Takkas do Diida Hami Bukti ni Holong ni Jahowa”

Saleleng bulan Februari 2023, adong lobi sian 400 kebakaran na terjadi di Cile. Akibatna adong ma lobi sian 430.000 lahan na hancur. Hancur do muse akka bangunan dohot akka fasilitas na asing. Adong hira-hira 8.000 halak na ikkon dievakuasi. Alai dang leleng dung terjadi kebakaran i, pittor diatur kantor cabang do asa dilehon akka bantuan kemanusiaan.

Dampakna tu Akka Donganta

• 222 penyiar ikkon dievakuasi

• 20 jabu hancur

Tudia do Dipakke Akka Sumbangan i

Lobi sian 200.000 dolar AS ma hepeng na dipakke tu bantuan kemanusiaan. Dipakke do i lao:

• Paradehon sipanganon dohot aek

• Paradehon bahan bakar, akka alat kebersihan, dohot obat-obatan

• Paturehon akka jabu naung sega

Adong sada keluarga na tarsonggot tikki mangida hancur sude arta ni nasida, termasuk ma jabu dohot usaha ni nasida. Alani i, gabe dang adong be passarian ni nasida. Saleleng piga-piga ari, tikki diida nasida lokasi ni jabuna na sebelumna gabe marsak hian ma nasida. Alai dung dibangun muse jabu ni nasida, gabe tarapul ma roha ni nasida. Gabe tenang do muse dihilala nasida ala dipatuduhon akka relawan i do holong tu nasida. Alani i, gabe tergerak ma roha ni nasida lao dohot mambangun jabu ni dongan na asing.

Godang do akka donganta na gabe terharu alani bantuan na dilehon organisasi ni Jahowa. Sahalak donganta bawa mandok, “Luar biasa do pengaturan na dibahen organisasi ni Jahowa marhite Panitia Penanggulangan Bencana. Sadari dukkon terjadi bencana i, nungnga pittor ro nasida lao mangalehon bantuan. Tikki tajaha kisah ni akka donganta na mandapot bantuan di negara na asing, gabe dipatogu do rohatta. Alai tikki hita sandiri na mengalami i, pasti beda do tahilala. Gabe lam taargai ma organisasi ni Jahowa. Boi do diida hami songon dia akka donganta i maniru sifat ni Jahowa. Dilehon nasida do tu hami akka bantuan, dipastihon do asa tetap hami sehat, asa tetap jonok tu Jahowa, jala tetap marpikkiran positif. Takkas do diida hami bukti ni holong ni Jahowa.”

Dung lam jonok ari i, pasti lam sering do terjadi bencana alam. (Lukas 21:10, 11) Alai pos ma rohatta, pasti pakkeon ni Jesus do huria Kristen lao mangurupi hita “sahat tu panutup ni jaman on”. (Mateus 28:20) Dipatuduhon hamu do na didukung hamu Harajaon ni Debata dohot Rajatta Jesus Kristus. Buktina, dilehon hamu do sumbangan marhite donate.jw.org manang marhite cara na asing. Olo do muse hamu mamakke tikki dohot tenagamuna lao mendukung organisasi. Mauliate ma tu haburjuonmuna i.