‘Maan sran kwlaa be wun kɛ amun ti wɛtɛɛfuɛ’
‘Kpɛn be wla kɛ [...] maan be yaci sa cɛ, maan sran kwlaa be wun kɛ be ti wɛtɛɛfuɛ.’—TIT 3:1, 2.
1. ?Ngue ti yɛ wɛtɛɛ yolɛ’n timan pɔpɔ e sa nun ɔn?
AKOTO Pɔlu seli kɛ: “Kɛ n nian like nga Krist yo’n su n yo’n, amun kusu an nian nga n yo’n su, an yo.” (1 Korɛntfuɛ Mun 11:1). Andɛ Klistfuɛ’m be kwlaa be mian be ɲin be fa afɔtuɛ sɔ’n su. Sanngɛ nanwlɛ, Klist i ajalɛ’n i su nantilɛ’n timan pɔpɔ. Afin, e si nin e nin klikli’n be nzuɛn tɛ’n o e nun (Rɔmfuɛ Mun 3:23; 7:21-25). Sanngɛ, sɛ e mian e ɲin’n, e ngba e kwla yo wɛtɛɛfuɛ. Sanngɛ kusu i sɔ yolɛ’n nun’n, e kwlá lafiman e bɔbɔ e wunmiɛn’n i ngunmin su. ?Kɛ m’ɔ ti sɔ’n niɔn, ngue yɛ ɔ kwla uka e ɔ?
2. ?É yó sɛ naan y’a kwla yo “wɛtɛfuɛ” sran kwlaa be lika?
2 Wɛtɛɛ yolɛ nga ɔ fin Ɲanmiɛn’n, ɔ o sa nga i wawɛ’n maan sran yo’n, be nun. Yɛle kɛ, kɛ é ló e wun é mán Ɲanmiɛn mɔ i wawɛ’n síe e’n, nn é yí sa sɔ’m be nglo kpa. Ɔ maan, saan i sɔ yolɛ’n kunngba cɛ, yɛ e kwla yo naan y’a yo “wɛtɛfuɛ” sran kwlaa be lika ɔ (Tit 3:2). Wafa nga e kwla nian like nga Zezi yoli’n su naan sran kwlaa nga e nin be e nanti titi’n be ‘wla w’a gua ase’n,’ yɛ é wá wún i ɔ.—Matie 11:29; Galasifuɛ Mun 5:22, 23.
Wɛtɛɛ yolɛ awlobo’n nun
3. ?Awlobo’m be nun’n, sa mennin mun yɛ be fin angunndan nga mɛn nun sran’m be bu’n niɔn?
3 Lika nga nun mɔ wɛtɛɛ yolɛ’n ti cinnjin kpa’n, yɛle awlobo’n nun. Mɛn wunmuan nunfuɛ’m be anuannzɛ nga ɔ nian sran’m be aunkpinndiɛ su’n (Organisation Mondiale de la Santé), i waan sa kekleekle nga be fa yo bla mun awlo’m be nun m’ɔ kwla kun be’n, sɛ bɔɔ be kan asidan nga sran’m be yo’n ɔ nin jɛkuajo m’ɔ kun sran’n be kwlaa bo nun’n, be juman sa sɔ’m be lika fi. E fa sunnzun ase kun. Klɔ nga be flɛ i Lɔndri’n m’ɔ ti Angle’m be klɔ’m be bo bia’n i su lɔ’n, sɛ sran ya (100) wu’n, be nun ablaɔn nin nnun (25%) be fin awlobofuɛ’m be wiengu sa kekleekle yolɛ’n. Polisi’m be nin sran nga be klo “sran nin ndɛnngan’n,” be yia nun tititi. I tɛ kpa bɔbɔ’n, yɛle kɛ bla nin yasua wie’m be yacili “klunwi’n” lɛ ɔ sacili be afiɛn. Ɔ fataman kɛ ayeliɛ kɛ ngalɛ sa mun mɔ be ti “akunndan nga [mɛn nun] sran’m be bu’n,” ɔ tran Klistfuɛ’m be awlobo’m be nun.—Efɛzfuɛ Mun 4:31; 1 Korɛntfuɛ Mun 2:12.
4. ?Sɛ awlobo kun nunfuɛ’m be ti wɛtɛɛfuɛ’n, i nun tranlɛ’n yó sɛ?
4 Kɛ ɔ ko yo naan y’a buman angunndan nga mɛn nun sran’m be bu’n, ɔ fata kɛ Ɲanmiɛn wawɛ’n sie e. Biblu’n waan: ‘Lika kwlaa nga e Min’n [Zoova] i wawɛ’n wo lɛ’n, be di alaje.’ (2 Korɛntfuɛ Mun 3:17). Kannzɛ bɔɔ fɔ o yasua nga ɔ nin i yi be klo Ɲanmiɛn nin sran’n be nun’n, sanngɛ be tra be awlɛn, be yo sran ye, yɛ be yo sa i nuan su, kpɔkun be afiɛn’n sɛ kpa (Efɛzfuɛ Mun 5:33). Kɛ awlobo kun i nunfuɛ’m be ti wɛtɛɛfuɛ’n, awlo sɔ’n i nun tranlɛ yo fɛ. Ɔ timan kɛ awlo kpanngban mɔ awlɛn fufu nin ndɛnnganndɛnngan o be nun’n sa. Sran kun i ndɛ liɛ nga ɔ kan’n, ɔ ti cinnjin. Sanngɛ wafa nga ɔ kan ndɛ’n, yɛ ɔ yi angunndan nga ɔ o i ijɔlɛ’n i sin’n i nglo ɔ. Kɛ be bu be wiengu angunndan’n mɔ be kan ndɛ kle i amanniɛn su’n, ngasi baman nun. I sɔ ti’n, famiɛn Salomɔn kɛnnin i ngwlɛlɛ su seli kɛ: “Sɛ sran fa ya kan ndɛ tɛ kle wɔ naan a tɛ i su amanniɛn su’n, i ya’n ɔ jɔ. Jɔlɛ tɛ’n ɔ klɔklɔ ya.”—Nyanndra Mun 15:1.
5. ?Wafa sɛ yɛ wɛtɛɛ yolɛ’n kwla uka awlobo nga i nunfuɛ’m be bo timan kun Ɲanmiɛn sulɛ nun’n niɔn?
5 Awlobo nga i nunfuɛ’m be bo timan kun Ɲanmiɛn sulɛ nun’n, i nun wɛtɛɛ yolɛ’n ti cinnjin kpa. Afin sɛ e ti wɛtɛɛfuɛ naan e yo sran’m be ye’n, e kwla uka sran nga be faman Ɲanmiɛn ndɛ’n su’n, naan b’a su Zoova. Piɛli seli bla nga be ti Klistfuɛ’n be kɛ: “Mmo mun, amun kusu an bu amun wun’m be sran, nán an fa amun nyin wlawla be. I liɛ’n sɛ be nun wie’m be fa-man Nyanmiɛn ndɛ’n su’n, kɛ be wun amun nzuɛn kpa’n nin sran bɔ an bu be’n, an su kan-man ndɛ fi naan b’a yaci. Kɛ amún síesíe amun wun’n, nán maan ɔ yo be wunnɛn su like kɛ be ti yolɛ, nin sika wlalɛ, ɔ nin tralɛ klanman wlalɛ sa. Sanngɛ maan be wun amun klanman’n amun nzuɛn’n, nin amun anwlɛn wɛtɛɛ’n, ɔ nin diin bɔ an ti’n nun. Klanman sɔ’n wie-man, ɔ ti kpa Nyanmiɛn nyrun.”—1 Piɛr 3:1-4.
6. ?Wafa sɛ yɛ wɛtɛɛ yolɛ kwla yo maan siɛ nin niɛn mun ɔ nin be mma’m be afiɛn’n mantan kpa ɔ?
6 Kɛ siɛ nin niɛn nin ba’m be kloman Zoova’n, ndɛnngan kwlá trán be afiɛn. Sanngɛ, ɔ fata kɛ Klistfuɛ’m be awlobofuɛ’m be kwlaa be yo wɛtɛɛfuɛ. Pɔlu seli siɛ’m be kɛ: “Nja mun, amun kusu, nán an yo sa b’ɔ kun amun mma’m be ya, sanngɛ an ta be kpa e Min’n liɛ’n su, yɛ an tu be fɔ, an kle be ngwlɛlɛ.” (Efɛzfuɛ Mun 6:4). Kɛ awlobo kun i nunfuɛ’m be ti wɛtɛɛfuɛ’n, siɛ nin niɛn nin be mma’m be afiɛn’n mantan kpa. Be flɛ gbaflɛn kun kɛ Dean (an kɛnngɛn i kɛ Dini). Ɔ ti i si nin i nin be wa yasua nnun’n be nun kun. Kɛ ɔ́ kán i si i ndɛ’n, ɔ seli kɛ: “M baba yoli sran wɛtɛɛfuɛ. I nun mɔ n ti gbaflɛn bɔbɔ’n, e nin i y’a kpɛman ndɛ cɛn kun sa le. Kannzɛ bɔɔ ɔ fa ya’n, sanngɛ ɔ trɛ i awlɛn. Cɛn wie’n, kɛ n yo sa tɛ’n, ɔ se n kɛ n wlu sua ba’n nun lɔ naan nán maan n fite, annzɛ kusu ɔ tannin min like nga n klo i kpa’n i dilɛ annzɛ i yolɛ. Sanngɛ e nin i y’a kaciman e nuan le. Nán siɛ sa ngbɛn yɛ ɔ ti ɔ. Sanngɛ ɔ yoli e janvuɛ, ɔ maan y’a kunndɛman kɛ é gúɛ i ɲin ase sa le.” Nanwlɛ, wɛtɛɛ yolɛ’n uka siɛ nin niɛn mun maan be nin be mma’m be afiɛn’n sɛ kpa.
Wɛtɛɛ yolɛ jasin fɛ’n bolɛ’n nun
7, 8. ?Ngue ti yɛ wɛtɛɛ yolɛ’n ti cinnjin kpa jasin fɛ’n bolɛ’n nun ɔn?
7 Lika nga nun mɔ wɛtɛɛ yolɛ’n ti cinnjin kpa ekun’n, yɛle jasin fɛ’n bolɛ’n nun. Kɛ é bó Ɲanmiɛn Sielɛ Blɛ’n i jasin fɛ’n, sran nga e fite be su’n be nzuɛn ti fanunfanun. Wie’m be sie be su kpa e nuan bo. Wie’m be kusu, sa wie’m be ti’n, be sɔman e nun kpa. Sɛ e waan é dí lalofuɛ junman nga Ɲanmiɛn fa mannin e’n i lele é fá jú asiɛ’n i awieliɛ’n, i lɛ nun yɛ ɔ fata kɛ wɛtɛɛ yolɛ’n ɔ uka e ɔ.—Sa Nga Be Yoli’n 1:8; 2 Timote 4:5.
8 Akoto Piɛli seli kɛ: “Sanngɛ an bu Krist sran, yɛ an bu i amun Min. An bu sa ti yɛ amun wla o Krist su’n i akunndan sie naan sɛ be usa amun i su sa’n amu’an kwla tɛ su. Sanngɛ an tɛ be su amanniɛn su, maan be wun kɛ an sro Nyanmiɛn.” (1 Piɛr 3:15, 16). Kɛ mɔ Klist i ajalɛ’n su yɛ e nian e nanti ti’n, kɛ é bó jasin fɛ’n é klé sran nga be like yolɛ yo ya’n, e mian e ɲin e yo wɛtɛɛfuɛ ɔ maan be wun kɛ e ɲin yi be. Kpɔkun e junman’n bá nvlɛ kpa.
9, 10. ?Sa kun m’ɔ kle kɛ wɛtɛɛ yolɛ jasin fɛ’n bolɛ nun’n ti kpa’n, yɛle mennin?
9 Jasin fɛ’n bofuɛ kun ko boboli bian kun mɔ be flɛ i Keith (an kɛnngɛn i kɛ Kifu) i anuan. Kɛ bian sɔ’n i yi’n kó tíke anuan’n, nn i kusu o awlo’n i klun lɔ. Kɛ bla’n tikeli anuan’n m’ɔ wunnin kɛ be aofuɛ’n ti Zoova i Lalofuɛ’n, ɔ fali ya kpa. Kpɔkun ɔ tɔnnin Zoova i Lalofuɛ’m be suɛn kɛ be ti sran kunfuɛ naan be kun ba kanngan mun. I sɔ nun’n, aniaan’n guɛli i wla ase. Kpɔkun ɔ seli bla’n i amanniɛn su kɛ: “Mmo, sɛ ɔ ndɛ’n ti nanwlɛ sakpa’n, ń srɛ́ wɔ kɛ a yaci e wun sa’n cɛ e. ?Sanngɛ, a kwla man min atin naan n yiyi like nga Zoova i Lalofuɛ’m be fa be wla gua su’n, i nun n kle wɔ?” Kɛ Keith tili be yalɛ kokolɛ’n, ɔ wunngeli be wun lɔ naan w’a kan aniaan’n i bo.
10 Wafa nga bian sɔ’n ɔ nin i yi be sɔli be aofuɛ’n nun’n, ɔ wa yoli be nsisɔ. Afin aniaan i wɛtɛɛ yolɛ’n wluwluli be wun. Le mɔcuɛ nga ɔ bɛli i sin’n, aniaan sɛli i sin Keith nin i yi be awlo lɔ ekun. I sɔ’n boli Keith nin i yi be nuan, ɔ maan be mannin aniaan’n i atin naan w’a fa Biblu’n w’a yiyi like nga ɔ fɛ i wla gua su’n i nun w’a kle be. I sin’n, ndɛ nga Keith nin i yi’n be wa kannin’n yɛ: “Kɛ ɔ fin cɛn sɔ nun’n, afuɛ nɲɔn nga ɔ bɛli i sin nun’n, e wa sieli e su Zoova i Lalofuɛ wie’m be nuan bo.” Keith nin i yi be wa kplinnin Biblu’n nun like suanlɛ’n su, kpɔkun be wa fali be wun mannin Zoova, naan b’a yo be batɛmu. Amun nian kɛ ɔ yoli Zoova i Lalofuɛ klikli nga ɔ fiteli Keith nin i yi be su’n, i fɛ ɔ! Kɛ ɔ́ wún be wun ekun’n, nn Keith nin i yi b’a kaci i niaan Klistfuɛ siɛn’n. Nanwlɛ, wɛtɛɛ yolɛ’n bali nvlɛ.
11. ?Wafa sɛ yɛ wɛtɛɛ yolɛ’n kwla yo maan sran wie’m be sɔ nanwlɛ ndɛ’n nun ɔn?
11 Be flɛ bian kun kɛ Harold (an kɛnngɛn i kɛ Hɛrɔli). Ɔ dili sonja junman laa. Kɛ mɔ like kwlaa nga ɔ wunnin be i junman dilɛ nun’n be wlɛli i klunngbɔ ti’n, i waan Ɲanmiɛn nunman lɛ. Sanngɛ like nga ɔ wa wlɛli i klunngbɔ kpa ekun’n, yɛle kɛ nzan nunmunfuɛ kun fali loto sili i, ɔ maan ɔ yoli bubuwafuɛ. I sɔ ti’n, kɛ Zoova i Lalofuɛ’m be toli i awlo lɔ’n, ɔ fuannin be. Sanngɛ cɛn kun’n, Bill (an kɛnngɛn i kɛ Billi), ɔ siesieli i wun wɔli sran kun mɔ i konvi sɔ Ɲanmiɛn ndɛ’n i wun wunlɛ. Sran sɔ’n i awlo’n mantan Harold i awlo liɛ’n. Bill w’a sunnzunman kɛ ɔ́ kó bóbó Harold i anuan’n. Kɛ Harold fɛli i kpɔnman’n mɔ blɛblɛblɛ ɔ tikeli anuan’n cɛ’n, Bill seli i kɛ ɔ yaci naan sran uflɛ yɛ ɔ bɛli i wun wunlɛ ɔ. Kpɔkun ɔ boli jasin fɛ’n kleli i. ?Yɛ ngue yɛ Harold yoli ɔ? Like nga Bill siman nun’n, yɛle kɛ televiziɔn nun’n Harold wunnin kɛ lika wie nun’n, Zoova i Lalofuɛ’m be bo yoli kun be kplannin be Ɲanmiɛn Sielɛ Blɛ Sua mun ndɛndɛ kpa. Wafa nga Zoova i Lalofuɛ fanunfanun be nuan sɛ be wun mɔ be di junman’n kɛ ngalɛ sa’n mɔ Harold wunnin i’n, ɔ kacili i angunndan nga ɔ bu i Zoova i Lalofuɛ’m be su laa’n. Kpɔkun Bill i wɛtɛɛ yolɛ’n, ɔ nin wafa nga ɔ buli Harold i sran ti’n, Harold kplinnin su kɛ Zoova i Lalofuɛ’m be wa niɛn i lika siɛn’n. Ɔ wa suannin Biblu’n nun like ɔli i ɲrun, kpɔkun be wa yoli i batɛmu, ɔ maan ɔ yoli Zoova i sufuɛ.
Wɛtɛɛ yolɛ asɔnun’n nun
12. ?Mɛn’n nun ayeliɛ mennin be ɲrun yɛ ɔ fata kɛ Klistfuɛ’m be jran kekle ɔ?
12 Lika’n i nsan su nga wɛtɛɛ yolɛ’n ti cinnjin kpa nun’n yɛle asɔnun’n nun. Mɛn nga nun’n, be nga klɔ sran nzuɛn’n yɛ be klo i’n, ndɛnganndɛngan nin ndɛ ngbɛnngbɛn’m be su’n akplowa silɛ’n yɛ ɔ ti be ajuin ɔn. Ɔ ju cɛn wie’n, mɛn’n nun ayeliɛ sɔ’m be wlu Klistfuɛ’m be asɔnun’n nun blɛblɛblɛ. Ɔ maan aniaan’m be tɔ ndɛnngan nin ndɛ’m be su utre dilɛ’n nun. Nanwlɛ, ɔ yoman asɔnun kpɛnngbɛn’m be fɛ kɛ be di i sɔ ndɛ’m be su jɔlɛ. Sanngɛ kɛ mɔ be klo Zoova nin be niaan mun ti’n, be nga be kpɛ ndɛ sɔ’m be ba’n, be mian be ɲin be uka be ndɛndɛ naan be kaci be ayeliɛ’n.—Galasifuɛ Mun 5:25, 26.
13, 14. ?Kɛ be ‘tu be nga be kpalo sran nuan’n be fɔ amanniɛn su’n,’ i bo’n gua sɛ?
13 Afuɛ ya kpɔlɛ klikli nun’n, asɔnun’n nun sran wie’m be fali ndɛnngan wlali Pɔlu nin Timote be sin. I sɔ’n ti’n, Pɔlu seli Timote kɛ, nán maan ɔ fɛ i wun mantan aniaan nga be ti kɛ awlo nun sɛ mɔ be fa “yo like kwlaa nga be klo’n” sa. Kpɔkun ɔ seli i ekun kɛ: “E Min’n i sran’n nin utre’n fataman. Sanngɛ ɔ yo sran’m be kwlaa be kpa, ɔ si like kle, sa nga be yo i’n sɔn i nun, yɛ ɔ tu be nga be kpalo i nuan’n be fɔ amanniɛn su.” Kɛ sran’m be klɔklɔ e mɔ e tra e awlɛn’n, be nga be bu e wun angunndan tɛ’n, be kwla kaci be angunndan sɔ’n. Ɔ maan kɛ nga Pɔlu fa kannin’n sa’n, “wienun-ɔn cɛn wie lele Nyanmiɛn maan bé káci be nzuɛn’n naan bé sí sa ng’ɔ ti nanwlɛ’n.” (2 Timote 2:20, 21, 24, 25). Maan e sie i nzɔliɛ kɛ, Pɔlu kleli kɛ sran kpa yolɛ’n, ɔ nin sa nga be yo e m’ɔ sɔn e nun’n, ɔ nin wɛtɛɛ yolɛ’n, be afiɛn’n mantan.
14 Ndɛ nga Pɔlu kannin’n, i bɔbɔ yoli i nuan su sa’n. Kɛ ɔ nin Korɛnti lɔ asɔnun’n i nun ‘sran kpakpa mɔ be bu be wun kɛ Ɲanmiɛn yɛ ɔ sunmannin be’n,’ bé kán ndɛ’n, ɔ seli be amanniɛn su kɛ: “M bɔbɔ m Pɔl m ma srɛ amun like kun. Be se kɛ kɛ n wo amun nyrun lɔ’n, n ti wɛtɛɛ kpe nun, sanngɛ be waan kɛ n nun-man lɔ’n, ndɛ nga n kan kle amun’n, n kɛn i yasua su. Krist b’ɔ ti wɛtɛɛ b’ɔ ti sran kpa’n i dunman nun.” (2 Korɛntfuɛ Mun 10:1; 11:5). E wun i kɛ, Pɔlu yoli like nga Klist yoli’n wie. Maan e sie i nzɔliɛ kɛ, ɔ seli i niaan’m be kɛ Klist “b’ɔ ti wɛtɛɛ” i dunman nun yɛ ɔ srɛ be ɔ. Pɔlu w’a yomɛn i wun dandan, yɛ w’a mianmianman sran. Ɔ maan, asɔnunfuɛ nga be awlɛn ti flɔlɔ’n be sɔli Pɔlu i afɔtuɛ’n nun kpa. Pɔlu i wɛtɛɛ yolɛ’n yoli maan ndɛnngan’n kannin ase kpɔkun fɔun trannin asɔnun’n nun. ?Nán i sɔ yɛ ɔ fata kɛ e kwlaa e mian e ɲin e yo ɔ? Sanngɛ i kwlaa yoli o, asɔnun kpɛnngbɛn mun yɛ ɔ nin i fata kɛ be dun mmua be nian Klist nin Pɔlu be ninnge yolɛ’n su naan be yo wie ɔ.
15. ?Kɛ bé mán sran afɔtuɛ’n, ngue ti yɛ ɔ ti cinnjin kpa kɛ be mɛn i amanniɛn su ɔ?
15 E wiengu fɔ tulɛ’n leman awieliɛ. Ɔ maan nán kɛ, kɛ ndɛnngan ko tɔ asɔnun nun’n, i blɛ sɔ’n nun ngunmin yɛ ɔ fata kɛ e tu e niaan’m be fɔ ɔ. Ka naan ndɛnngan w’a tɔ’n, ɔ fata kɛ klolɛ su be kle aniaan’m be atin nga ɔ fata kɛ be fa su’n. Pɔlu seli kɛ: ‘Aniaan mun, sɛ an wun kɛ amun niaan kun su yo sa wie m’ɔ timan kpa’n, amun mɔ Ɲanmiɛn wawɛ’n sie amun’n, an kle i atin nga ɔ ti kpa’n.’ ?Sanngɛ, wafa sɛ yɛ be kle sran’n i atin’n niɔn? Pɔlu waan: “Amanniɛn su. Sanngɛ an nian amun bɔbɔ amun wun naan amu’an yo-man sa kunngba sɔ’n wie.” (Galasifuɛ Mun 6:1). E kwlaa nga e ti Klistfuɛ’n, i asɔnun kpɛnngbɛn mun o, kɛ mɔ fɔ’n o e nun ti’n, “amanniɛn su” ijɔlɛ’n timan pɔpɔ e sa nun. Sanngɛ kusu’n, afɔtuɛ nga be mɛn i amanniɛn su’n yɛ ɔ kwla yo maan sran nga ɔ su yo sa m’ɔ timan kpa’n, ɔ wun i wlɛ kɛ ɔ fata kɛ ɔ kaci i sa ɔ.
16, 17. ?Ngue yɛ ɔ kwla uka afɔtuɛ manfuɛ’n naan sran w’a fɛ i afɔtuɛ’n su ɔ?
16 I klikli nun’n, Glɛki aniɛn’n nun ndɛ mma nga be kacili i kɛ “kle i atin ng’ɔ ti kpa’n,” i bo’n fin like kɛ be sa mɔ w’a bu’n annzɛ w’a fɔnndɔn mɔ be su cuɛn nun annzɛ be su tinngɛ i be sie i sɛsɛ’n sa. I sɔ’n yo ya kpa. Sanngɛ, sɛ ayre yofuɛ’n ɔ ijɔ amanniɛn su, ɔ gua sran’n i awlɛn su nzue’n, kɛ ɔ́ cúɛn sran’n i sa nun’n, kannzɛ bɔbɔ i sɔ’n yo sran’n i ya kpa sɛ’n, sanngɛ ɔ kwla trɛ i awlɛn kplin ayre yolɛ’n su. I kunngba’n niɔn, Ɲanmiɛn ninnge’m be nun’n, kɛ bé klé sran kun i atin nga ɔ ti kpa’n, ɔ kwla yo sran sɔ’n i ya. Sanngɛ sɛ be mɛn i afɔtuɛ’n i amanniɛn su’n, i sɔ’n kwla yo maan i su falɛ’n yó pɔpɔ. Kpɔkun, ɔ yo maan sran nɲɔn be afiɛn saciman. Kpɔkun, ɔ tike sran nga ɔ su yo sa m’ɔ timan kpa’n i ɲrun atin, naan i sɔfuɛ’n w’a kwla fa su. Kannzɛ bɔɔ i klikli nun afɔtuɛ kpa nga ɔ taka Biblu’n su’n i su falɛ’n kwla yo kekle’n, sanngɛ sɛ sran nga ɔ man afɔtuɛ’n ɔ mɛn i amanniɛn su’n, be su kpalomɛn i afɔtuɛ’n. Saan i nun sɔlɛ cɛ yɛ bé sɔ́ ɔ.—Nyanndra Mun 25:15.
17 E wiengu fɔ tulɛ’n timan pɔpɔ, afin sran nga e tu i fɔ’n kwla bu i kɛ e su kɛn i ndɛ tɛ. Kɛ fluwa kun kɛn i sɔ yolɛ’n i ndɛ’n, ɔ seli kɛ: “Kɛ é tú sran fɔ’n, i blɛ sɔ’n nun yɛ ɔ ti cinnjin kpa kɛ e ijɔ amanniɛn su ɔ. Afin i blɛ sɔ nun’n, e like yolɛ kwla yo ya. Yɛle kɛ e kwla jran ndɛ nga e kan’n su fii e kacimɛn i.” Sanngɛ Klistfuɛ nga ɔ ti wɛtɛɛfuɛ m’ɔ kɛn i wun ase’n, kɛ ɔ mɛn i wiengu afɔtuɛ’n, ɔ su tɔman aya sɔ’n nun.
Wɛtɛɛ yolɛ “sran kwlaa” be lika
18, 19. (a) ?Ngue ti yɛ ɔ kwla yo kekle man Klistfuɛ mun kɛ be yo wɛtɛɛfuɛ mɛn siefuɛ’m be lika ɔ? (b) ?Ngue yɛ ɔ kwla uka Klistfuɛ mun naan b’a yo wɛtɛɛfuɛ mɛn siefuɛ’m be lika ɔ? ?Yɛ ngue like yɛ i sɔ yolɛ’n kwla tike i wun atin ɔn?
18 Lika kun nga nun m’ɔ kwla yo kekle kpa man e kɛ e yo wɛtɛɛfuɛ’n, yɛle mɛn siefuɛ’m be lika. E si kɛ, mɛn siefuɛ wie’m be like yolɛ yo ya, yɛ be timan be wun ase kanfuɛ (Akunndanfuɛ’n 4:1; 8:9). Sanngɛ, klolɛ mɔ e klo Zoova’n, ɔ uka e maan e si kɛ Zoova yɛ ɔ sie kpɛnngbɛn mun ɔn. Sanngɛ, aɲinyiɛ nga e fa man be’n ɔ le awɛ (Rɔmfuɛ Mun 13:1, 4; 1 Timote 2:1, 2). Sɛ sran dandan mɔ be ti’n ti, wie liɛ’n be kunndɛ kɛ bé tánndan e jasin fɛ’n bolɛ’n i ɲrun’n, aklunjuɛ su e kunndɛ ajalɛ nga e ko fa naan y’a kwla manman Ɲanmiɛn naan y’a lɛ i ase’n.—Ebre Mun 13:15.
19 Ɔ leman sa kun mɔ i nun’n, y’a jaso mɛn siefuɛ’m be wun sa le ɔ. Sa kwlaa nga be ju’n be nun’n, e mian e ɲin e yo wɛtɛɛfuɛ. Sanngɛ e kpɛman Ɲanmiɛn i mmla’n i wun. I sɔ’n yoli maan e niaan’m be kwla bo jasin fɛ’n asiɛ’n su mɛnmɛn nin nvlenvle ya nɲɔn ablasan nin nnan (234) nun. Pɔlu i afɔtuɛ nga ɔ mannin’n, i su yɛ e fa ɔ. I waan: “Be bu be nga be sie be’n nin be nga be jran be ja nun’n be sran, maan be nyin yi be, sa kpa kwlaa nga be se be kɛ be yo’n, maan be yo. Nán maan be kan sran wun ndɛ, nán maan be klo utre, maan be yaci sa cɛ, maan sran’n kwlaa be wun kɛ be ti wɛtɛfuɛ.”—Tit 3:1, 2.
20. ?Mmlusuɛ mennin yɛ be nga be yo wɛtɛɛfuɛ’n bé ɲɛ́n i ɔ?
20 Sran kwlaa nga be ti wɛtɛɛfuɛ’n, be ɲan suyralɛ kpanngban kpa. Zezi seli kɛ: “Be nga be ti wɛtɛɛfuɛ’n, be liɛ su ti ye, afin mɛn’n ɔ́ wá yó be liɛ.” (Matie 5:5). Klistfuɛ nga be kpali be sieli be ngunmin’n be liɛ’n, be wɛtɛɛ yolɛ’n i su aklunjuɛ nga be di’n ɔ nin like nga ɔ ti be cenjele nun kpa’n, yɛle kɛ bé síe sran nga bé ká asiɛ’n su wa’n. Yɛ “sran kpanngban kpa” mɔ be yɛle ‘bua’m be wie mun’ mɔ be yo wɛtɛɛfuɛ titi’n, be lafi su kɛ bé trán asiɛ’n m’ɔ́ wá káci Mɛn Klanman’n i su (Sa Nglo Yilɛ 7:9; Zan 10:16; Jue Mun 37:11). ?Nán like dan kpa yɛ ɔ sie e ɲrun lɛ ɔ? I sɔ’n kwlaa ti’n, nán maan e ɲin kpa afɔtuɛ nga Pɔlu mannin Efɛzi lɔ Klistfuɛ mun’n, i su le. I waan: “I sɔ’n ti’n, m bɔ e Min’n ti yɛ n ti bisuafuɛ’n, n srɛ i kpa kɛ an bu flɛlɛ nga Nyanmiɛn flɛli amun’n i akunndan naan an yo sa ng’ɔ ti i nuan su’n. Nán an tu amun wun mlɔnmlɔn, an yo wɛtɛɛfuɛ.” (E bɔbɔ yɛ e sie i nzɔliɛ ɔ.)—Efɛzfuɛ Mun 4:1, 2.
I nun flanlɛ
• ?Mmlusuɛ mennin yɛ be ɲɛn i wɛtɛɛ yolɛ’n
• Awlobo’n nun ɔn?
• Jasin fɛ’n bolɛ’n nun ɔn?
• Asɔnun’n nun ɔn?
• ?Ngue yɛ Ɲanmiɛn seli kɛ ɔ́ fá mán be nga be ti wɛtɛɛfuɛ mun ɔn?