?Like nga be flɛ i sa tɛ’n e te bu i like ekun?

Ɔ NIN a cɛman sɔ liɛ, kɛ asɔnun’m be su kpɛnngbɛn’m bé kán Ɲanmiɛn Ndɛ’n be kpan se be ndɛ tiefuɛ’m be kɛ be nian be wun “sa tɛ nso nga Ɲanmiɛn yaci cɛman’n” be lika. Sa tɛ sɔ mun yɛle bla nin bian kunndɛlɛ sukusuku’n, aliɛ dan dilɛ’n, awɛn yolɛ’n, fuɛn yolɛ’n, ya falɛ’n, aɲinblɔɛ’n yɛ tutre dilɛ’n. Kpɛ sunman’n, Ɲanmiɛn ndɛ kanfuɛ’m be kan sa nga be sa tɛ’n ti’n, ɔ kwla tɔ sran’m be su’n i ndɛ. Kpɛkun be wla be su nun kɛ be kaci be sa. Fluwa klɛfuɛ kun seli kɛ: “Siɛn’n, be nga be kan Ɲanmiɛn ndɛ’n, be kanman ndɛ nga be ko kan m’ɔ ko yo be ndɛ tiefuɛ’m be kɛnsrɛn’n. Sanngɛ ndɛ ng’ɔ yo be ndɛ tiefuɛ’m be su nun fɛ’n yɛ be kan ɔn.”

Zronali klɛfuɛ wie’m be sieli i sɔ liɛ’n i nzɔliɛ wie. Ndɛ nga be kannin’n yɛ:

▪ “Sa nga laa’n, be bu be sa tɛ’n, ɔ nin sa tɛ mɔ be yaci i yolɛ’n, ɔ nin sa tɛ’n i ti kpatalɛ’n, be boman su be diman jɔlɛ kun. Ndɛ nga w’a tru siɛn’n, yɛle sran’m be lualualɛ nin wafa nga sran kun kwla klo i bɔbɔ i wun’n.”—Star Beacon, Ashtabula, Ohio.

▪ “Srɛ kunman sran mun sa tɛ yolɛ’n i wun kun.”—Newsweek.

▪ “Siɛn’n, e buman like nga Ɲanmiɛn kunndɛ kɛ e yo’n i akunndan kun. Sanngɛ like ng’ɔ ti e cinnjin’n yɛle like nga Ɲanmiɛn kwla yo man e’n.”—Chicago Sun-Times.

Andɛ mɛn’n nun’n, sran’m be kwlaa b’a sangansangan nun.Yɛ sɛ sran kun yó i like’n, sran uflɛ fɛmɛn i nuan wlaman nun. Sɛ sran kun yo sɔ’n, ɔ ti kɛ nn i ɲin yimɛn i wiengu sa. Sɛ sran kun yo like naan a bu i fɔ’n nn a fɔn tɛ kpa. Ɔ maan akunndan nga sran’m be bu’n yɛ: ‘Like ng’ɔ ti kpa man wɔ’n yo. Sanngɛ nán mian sran uflɛ kɛ ɔ nian ɔ liɛ’n su yo. Andɛ’n ninnge nga sran’m be lafi su’n be ti fanunfanun. Yɛ ninnge sɔ’m be su yɛ be nian be di be mɛn ɔn. Nán sran kunngba yɛ ɔ si like ng’ɔ ti kpa’n niɔn. Ninnge nga sran uflɛ yo’n, ɔ ti kpa wie.’

I sɔ akunndan bulɛ wafa’n ti’n, sran’m be aeliɛ’n w’a kaci. “Sa tɛ’n” w’a kaci aɔwi ndɛ. Sran wie’m be jaman be wun sanngɛ be tran lika kunngba. Wie’m be kunndɛ bian annzɛ bla be wiengu bo yɛ yasua’m be nin be wiengu yasua’m be la. Kpɛkun bla’m be nin be wiengu bla’m be la. Be bumɛn i sɔ ninnge’m be sa tɛ kun.

Ɔ ti weiin kɛ ninnge nga sran’m be bu i kɛ ɔ ti “sa kpa” annzɛ ɔ ti “sa tɛ’n” w’a kaci. ?Sanngɛ ngue ti yɛ sran’m be aeliɛ’n w’a kaci sɔ ɔ? ?Sran’m be bu sa tɛ’n i sɛ siɛn’n? ?Yɛ akunndan nga amun bu i sɔ’n su’n, ɔ ti cinnjin?