Ihinahapot nin mga Hobenes...

Taano ta Basahon an Biblia?

‘Sarong ordinaryong karpintero, si Jesus nin Nazaret, natanyog an kinaban kan saiyang mensahe!’ an pahayag kan propesor. Dai, dai sia nagtotokdo kan Biblia kundi ikinokomparar iyan sa sarong trabaho nin literaryo na nginaranan Don Quixote. Si Aaron (20 anyos), minsan siring, masuripot na naghinanyog. Para sa propesor na ini maski bakong relihiyoso, apresyado an Biblia bilang literatura—siring sa sinabi nia, sarong libro na ‘an lambang edukadong lalaki asin babae kaipuhan mabasa.’

TALAGA daw na makakapag-edukar an Biblia sa sarong tawo? Asin ano an nakatanyog sa daga dapit sa mensahe kan karpintero? Boot maaraman ni Aaron, kaya sia nagdesisyon na basahon an Biblia.

Si George (12 anyos) nakabasa nin sarong kotasyon sa Biblia: “Girumdoma, ngonyan, an saimong Dakulang Kaglalang sa mga aldaw kan saimong pagkabarobata.” (Parahulit 12:1) Kaya hinapot nia an saiyang sadiri: ‘Paano ko gigirumdomon an Kaglalang kun enot dai ko sia midbid?’ Sia man, nakarisa kan pangangaipo na basahon an Biblia.

Si Kelvin (21 anyos) saro sa mga Saksi ni Jehova asin regular na nakikikabtang sa paghuhulit sa pagharong-harong. Maogma niang iniestorya sa iba an saiyang nanonodan sa Biblia. Minsan siring nanompongan nia, na an nagkapirang tawo na saiyang naaatubang nabasa na an mga kabtang sa Biblia. Asin huli ta si Kelvin nagmamawot na magkaigwa nin intelihenteng pakipag-olay sainda, inaandam nia an saiyang sadiri paagi sa mahigos na pag-aadal sa Biblia. Sa saiyang mga tataramon, “Kaipuhan na basahon mo an saimong Biblia tanganing maaraman kun ano an saindang sinasabi.”

Si Aaron, George, asin Kelvin nagin mga seryosong estudyante sa Biblia. Alagad ano daw kamo? Kaipuhan daw, na basahon nindo an Biblia? Arog sa dakol na mga hoben, tibaad kamo magsabi:

‘Bako Daw Nakakalangkag an Biblia?’

Iyan an pagmate nin iba. Alagad sa katunayan, dai ninda aram kun ano an nawawara sa sainda. An Biblia iyo an kapahayagan nin Dios sa tawo. Iyan nagsasabi sato kun paano kita namugtak digdi asin kun saen kita maduman. Paano iyan magigin nakakalangkag?

Totoo, an ibang kabtang garo mas madale kisa iba. Si David (19 anyos) nakapagsabi: “Sa mga libro kan Biblia nin Mga Bilang asin Deuteronomeo, igwa nin nagkapirang mga pangyayari, alagad sa kadaklan igwa nin mga pagboot asin mga rason para sa mga pagboot. Bako ini makalalangkag, alagad sa Josue, an masunod na libro, igwa nin orog pang mga pangyayari; maheheling nindo mismo an eksena. Poon sa Josue padagos, tunay nang nagigin marikas.” Siring na nagpapadagos si David sa saiyang pagbasa, minsan siring, an saiyang opinyon kan inaapod na maluway na mga kabtang kan Biblia nababago nanggad. Taano? Horophoropa an saindong eksperyensia.

Nagdalan na daw kamo nin sarong pelikula na naheling nindo kan kamo mas aki pa? Kan panahon na idto tibaad dai nindo biyong nasabotan, asin bilang resulta, dikit na mga eksena sana an nakawiwili. Alagad ngonyan na kamo nagdakula na, masasabotan nindo nin orog. Nagigin mas makahulogan an estorya, asin an mga eksena mas nagigin marikas. Sarong bagay an nagkakaagid mantang kamo nagtatalubo sa pakasabot sa pinakamabenta sa bilog na kinaban. (Hebreo 5:14) Sa kada panahon na basahon nindo iyan, an mga pagboot na iyan asin mga rason para sa pagboot nagigin mas makahulogan. Naaapresyar nindo an mga detalye.

Alagad taano ta importanteng gayo an mga detalye? Bueno, konsiderara an sportscaster sa radyo. An saiyang trabaho gibohon na buhay an kawat na borola sa saiyang mga parahinanyog. Asin paano daw nia iyan ginigibo? Nagtatao sia nin mga detalye—kun paano tinamaan an bola, an distansia, an karawat, an iskor, an kuwentada, an mga estorya dapit sa mga parakawat. Nakakalangkag daw iyan? Dai nanggad! Siring man, an Biblia mayaman sa mga detalye—mga ginikanan, mga numero, mga sokol, mga pagboot. Huli sa mga detalyeng ini tunay na nagigin buhay an kasaysayan!

Dangan, an mga pagboot na ini nagpapahayag kan personalidad nin Dios. Sa Exodo 22:21, 22 asin Levitico 19:32, halimbawa, nagboboot an Dios na ibilang na may kabootan an mga balo, an mga daing ama, asin mga gurang na tawo. Iyo, si Jehova nagmamawot na an lambang saro trataron na may paggalang, ano man an sekso o edad. Dai daw iyan saindo nagpapahiro na magmawot na orog na mamidbid sia? Ini an namatean nin sarong hoben na babae na nginaranan Georgie. Dapit sa saiyang pagbasa sa Biblia, sia nagsabi: “Iyan orog na nagpaparani sa saimo ki Jehova.”

Kamo man makakadiskubre na an Tataramon nin Dios “buhay asin mapuwersa.” (Hebreo 4:12) Paano?

An Biblia Buhay!

“An pagbasa kan Biblia iba sa pagbasa nin sarong diaryo o sarong magasin,” an sinabi ni Marvin (19 anyos). “Kaipuhan ikonsentrar mo an saimong isip sa saimong binabasa. Dai puwedeng kun ano an saimong isipon mantang binubuklit mo an mga dahon kaini. An pagbasa kan Biblia nangangaipo nin plinanong paghihingoa. Iniimahinar ko an kamugtakan asin ipinamumugtak ko an sakong sadiri duman mantang binabasa ko an dapit sa pagkabanga kan Pulang Dagat o an pagbukas kan langit asin si Jehova nagtataram.”

Magigibo nindo ini! Kun basahon nindo an kasaysayan ni Daniel sa lungib nin leon, ipamugtak nindong yaon kamo! Imahinaron na solo kamo asin daing ano man na pandepensa sa lungib nin gutom na mga leon! (Daniel 6:16-23) O Kumusta daw an kasaysayan ni Reyna Ester? An saiyang mga kahimanwa namimiligro na magin biktima nin pankagabsan na panggadan. Sarong depisil na kamugtakan! Tanganing ikaligtas sinda kaipuhan siyang gumamit nin serye nin mga maniobra na magsasapeligro kan saiyang buhay asin atubangon an kaiwal. Naiimahinar daw nindo an kamugtakan?—Ester 3:6 5:4; 2:10; 8:3-6.

Igwa pa nin iba na puwede nindong gibohon tanganing an Biblia magin orog na makawiwili asin nakapagpapa-alisto sa isip. Mantang binabasa nindo, risahon kun paano an manlaenlaen na kabtang kan Biblia nagkakakurokonektar. Halimbawa, ano daw an komon sa kasaysayan ni Daniel asin Ester? Pareho nagpapatotoo kan pagigin tunay kan Salmo 34:7: “An anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.”

Saro pang tema na nagkokonektar sa manlaenlaen na parte kan Biblia iyo an Kahadean nin Dios. An Daniel 2:44 nagsasabi: “An Dios nin kalangitan mapatindog nin sarong kahadean.” Alagad ano an gigibohon kaining Kahadean? Poon sa kapinonan sagkod sa katapusan, an Biblia nagpapaheling na si Jehova gagamiton ining kahadean—saiyang gobyerno—tanganing magtao nin nagdadanay na katoninongan. “Pinapaontok nia an mga ralaban sagkod sa kaporoporohi kan daga,” sabi kan Salmo 46:9. Asin paagi kan Kahadean, “papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”—Kapahayagan 21:4.

Gabos magkasorogpon. An gobyerno nin Dios tatapuson an helang, pagsakit, asin maski kagadanan. An inhustisya magigin bagay na nakalihis na. An lambang saro ibibilang na may kabootan asin paggalang. Daing duwaduwa na si Jesus nagsabi sa saiyang pamibi, “Dumatong logod an kahadean mo”! (Mateo 6:10) An mensahe nin kahadean nagtanyog sa kinaban poon kaidto asin sagkod ngonyan tinatanyog pa! Bako daw kun siring na mahalaga para saindo na imbistigaron ining nagtatao nin buhay na mensahe? Puwede, paagi sa pagbasa nindo kan Biblia!

‘Alagad Paano Ko Iyan Mababasa?’

Kun nag-eeskuwela kamo, puwedeng mamatean nindo na kamo sibot-sibot sa saindong mga asignasyon. Alagad talaga daw na magabat na gibohon nindo an saindong mga asignasyon asin basahon an Biblia? Bako para ki Richard (17 anyos): “Kun hapon kun igwa ako nin mga asignasyon, inaasikaso ko iyan asin tinatapos ko. Sa samong harong dai nin TV sa ordinaryong aldaw.” Kun siring man gibohon nindo, masosorpresa kamo na maheling kun gurano kadakol an panahon na natatada para sa pagbasa nin Biblia. Taano, kun magbasa kamo nin 15 minutos kada aldaw, puwede nindong matapos na basahon an bilog na Biblia nin haros sarong taon!

Makakatabang Iyan Saindo Ngonyan Mismo!

Tunay na nagdadakula kamo sa panahon na “masakit pakibagayan” nanggad. (2 Timoteo 3:1) Minsan siring, an Biblia minatabang sa mga hobenes na ini na magin mapanggana:

“Kun beses napoproblema ako kun paano na sana ining kinaban. Binubuklat ko an mga kasuratan siring baga kan Kapahayagan 21:4, asin tinatawan ako kaiyan nin bagay na malalaoman.”—Prentice.

“An pagbasa kan Biblia tunay na mapapakinabangan, lalo na kun igwa ako nin problema. Parate, igwa nin saro sa Biblia na igwa kan kaparehong problema, asin iyan minatabang sako na atubangon iyan.”—Myrtie.

“Naheheling kong nagtatalubo ako sa pagbasa kan Biblia.”—Theresa.

Kamo man, maheheling nindong an saindong sadiri magtalubo. Aprobetsaran an satispaksiyon nin pagpoon nin sarong bagay na mahalaga, asikasohon iyan, asin tapuson iyan. Saro pang orog na kapakipakinabang iyo an mamidbid nin orog an Dakulang Kaglalang. (Parahulit 12:1) Maabot an panahon, bobooton nindo na gamiton an Biblia na tumabang sa iba. Totoo an pagbasa kan Biblia saro sa pinakamahalagang proyekto na dapat gibohon!

[Blurb sa pahina 11]

“An pagbasa kan Biblia mapapakinabangan nanggad, orog na kun igwa ako nin problema”

[Ritrato sa pahina 10]

Imahinaron an mga pangyayari mantang binabasa