Ihinahapot nin mga Hobenes . . .

Gurano Kahalaga kan Itsura?

‘Habo ko an sakong hawak,’ an agrangay kan 16 anyos na si Maria. ‘Sa paghona ko bakong gayong marahay an sakong itsura’

ANO nagsasabi kamo na dai nindo nagugustohan an saindong itsura? Bueno, pipira sana sa sato—kun igwa man—an biyong kontento sa satong pisikal na itsura. Bakong arog ni Narcissus, na namoot sa saiyang ladawan sa tubig, an iba sa sato haros nakakamate nin labi-labing kamondoan kun naheheling niato an satong sadiri sa salming.

Ini nangorognang totoo kun kamo nagdadakula, tibaad masosopgon na barobata. ‘Habo ko an sakong hawak,’ an agrangay kan 16 anyos na si Maria. ‘Sa paghona ko bakong gayong marahay an sakong itsura.’ An trese anyos na si Bob may kaparehong reklamo: ‘Habo ko an sakong buhok, an pagtindog kaiyan digdi sa likod.’

Siyempre, natural sana an pagmawot na magin magayon. Asin an paggibo nin rasonableng mga paghihingoa na asikasohon an saindong personal na itsura madonong. Minsan siring, an saindo daw na pag-intindi sa saindong itsura nagpopoon nang makadominar sa saindong kaisipan? Hinahaboan na daw nindo an saindong sadiri huli sa saindong itsura? Kun iyo, hapota an saindong sadiri, Gurano katama kan sakong mga reklamo? Posible daw na ako nasisiod sana sa daing pondong pagmawot nin mas berdeng doot?

Mas Berdeng Doot

Iyo, para sa dakol, an buhay garo daing kasagkodan na linya nin mga kudal na may mas berdeng doot sa ibong. Nakaheling na kamo nin mga arog kaiyan. An natural na slender na daragita na naghohona na sia maniwang asin nagkakakan sagkod na sia maghelang. An daragita na bilog an hawak na naghohona na sia mataba asin haros magadan na huli sa dai pagkakan. O an mga kapareho ni Annie, na mas marikas an pagtalubo ki sa saiyang mga kaklase. Ikinaogma daw nia an saiyang pagtalubo? Nagigirumdoman nia: “Mas halangkaw ako ki sa gabos. Idto ikinasopog ko. Igwa ako nin saditon na amiga asin nauuri ako kaidto saiya.”

Kaya, abunda an mga pampagayon, mga kasangkapan, asin aparato sa pagpagayon. An mga plastic surgeon nagdadakol asin nagyayaman. Asin sa pagsapeligro kan salud asin kaogmahan, an mga hobenes naghahadit manongod sa dai na puwedeng maliwat. May paagi daw na makahale sa daing katapusan na pagkadiskontentong ini? Igwa! Alagad ta an liyabe iyo an pagkaigwa kan tamang punto-de-vista manongod sa saindong itsura. Paano kamo magkakaigwa kaiyan? Ponan niato paagi sa paghihingoa na masabotan kun taano ta tibaad arog kaiyan an saindong saboot.

Mapuwersang mga Impluwensia

Kadakol kan mga puwersa na nakaiimpluwensia sa satong punto-de-vista asin saboot manongod sa satong itsura. An saro sa impluwensiang iyan hale sa laog. Inaapod iyan kan Biblia na “mga horot na uso sa pagkabarobata.” (2 Timoteo 2:22) An mga horot na ini nahahayag sa dakol na paagi, asin an saro dian iyo an sobrang paghadit manongod sa satong itsura.

Alagad ta makawiwili, ipinaheheling kan sarong propesor nin sikayatriya na si Richard M. Sarles na an mga horot na iyan parate na pinalalaad: “An pagkabarobata panahon nin pagkaliwat na dian nangyayari an darakulang pagreorganisar kan lawas. . . . Tanganing maatubang an pagkalawi nin bago asin nagliliwat na lawas, an dakol na hobenes nagsasarig sa seguridad kan saindang mga kaedad.” Sa ibang pagtaram, kun dai naririsa kan satong mga kaamigo kun gurano kadakula kan satong dongo, iyan dai niato iintindihon. Alagad ta kun iyan marisa kan satong mga kaedad, maririsa man niato.

An saro pang nakadadarang impluwensia iyo an tusong sistema na inaapod ahensia nin komunikasyon paagi sa mga babasahon asin dadalanon. Poon sa pagkaaki, an TV, mga libro, asin pelikula nagtotokdo sato na an “marahay” na mga tawo magayon asin na an “maraot” na mga tawo makanos, tema na paorootrong ipinahahayag sa mga babasahon asin dadalanon. Pinagagrabe kaini an tendensia nin bakong sangkap na mga tawo na ‘magheling sa mga bagay sono sa panluwas na halaga kaiyan,’ na paggrupo-grupohon an mga tawo sono sa saindang itsura.—2 Corinto 10:7.

Kaya patutubodon kamo kan mga babasahon asin dadalanon na kun kamo bakong magayon an hiro, nakaaakit, mestisahon, daing mantsa an kutis na babae, o sarong maskuladong lalaki, marahay pa na kamo sumuhot na sa sarong labot—o kisuerra lingawan na an ideya na kamo magigin popular, asensado, o maogma. Siyempre, sa ibabaw kan saindong isip seguro aram nindo kun ano an totoo sa taktikang ini kan mga babasahon asin dadalanon: iyan kalokohan sana. Minsan siring, an kadaklan sa mga epekto kan mga babasahon asin dadalanon sa irarom nin isip. Pairarom man o hayagan, an kagayonan iniidolo o sinasamba sa gabos na lugar! An magayon na itsura nakakapabakal kan gabos poon sa olor sagkod sa mga de koryenteng lagadi. Bilang resulta, an dakol nagbabakal bako sanang sa mga produkto kundi pati sa bikong ideya na an itsura iyo na an gabos.

Paglaban sa Salang Ideya nin ‘Magagayon na Tawo’

Kaya daing duwa-duwa, an salang ideya manongod sa ‘magagayon na tawo’ nakakaapektar sa dakol. An buhay nagigin daing katapusan na siklo nin mga usong kakanon, sobra sa kolor na mga kosmetiko, asin magastos na mga pagpabolong. Alagad ta an Biblia nagsasabi: “Dai kamo magpamolde sa kinaban na nasa palibot nindo.” (Roma 12:2, Phillips) Isipa: Siisay an nagpapalakop kan ideya na kaipuhan nindo an sarong klase nin itsura tangani kamong magin popular, asensado, o maogma? Bako daw na an mga paramanupaktura asin paraanunsio na naggaganansia sa siring na pandadaya? Taano ta totogotan an saindong kaisipan na mamolde kan mga iyan? Asin kun an mga pagtatsar manongod sa saindong itsura naghahale sa mga amigo, siisay man an nagkakaipo nin siring na mga “amigo”?

An Biblia nagsasadol pa na kamo “mag-isip tanganing magkaigwa nin marahay na kaisipan.” (Roma 12:3) Iyan puwedeng mangahulogan nin pagkaigwa nin mapagdudang pagmansay sa propaganda—baga man hale sa mga amigo o sa mga babasahon o dadalanon—na nagpapalakop nin dai pagkakontento sa sadiri. Bako daw totoo na pipira sana man an talagang an itsura panmodelo? “An kagayonan sabo sana,” sabi kan Biblia. (Talinhaga 31:30, Byington) Kaya minsan an mga tawo na binabayadan huli sa saindang itsura nasa alitoktok kan saindang kabantugan sa halipot sanang panahon—bago sinda ribayan nin bagong lalauogon. Saro pa, nagigibo an mga milagro para sa lalauogon asin hawak paagi sa makeup, ilaw, asin mahika kan kamera. An iba nabigla kan maheling ninda nin personal an saindang paboritong artista na mayo kan komplikado nindang mga paagi nin pagpagayon!

Saro pang bagay na dapat isip-isipon: Bako daw na an kadaklan sa saindong mga amigo ordinaryo man sana an itsura? An iba sa sainda tibaad ibilang pa nganing makanos sono sa nagkapirang pamantayan. Asin kumusta man an saindong mga magurang? An siisay man daw sa sainda puwedeng ikabugtak sa tutob nin sarong magasin sa moda? Seguro dai. Alagad naliliwat daw kaiyan an saindong pagmate manongod sa sainda? An totoo, oras na maapresyar na nindo sinda huli sa saindang pagkatawo asin bakong huli sa saindang itsura, seguro bihira na nindong isipon an saindang itsura.

Ultimo, bako daw totoo na bilang nagtatalubong hoben, an saindong itsura talagang nagliliwat? An mga tin-edyer nagtatalubo sa laen-laen na rikas. Kaya kun kamo hababaon o halangkawon, o bakong magayon an saindong kutis, magpasensia. Tibaad an panahon an makaresolber sa nagkapira sa mga inaapod na diperensiang ini.

Kaya an pagheling sa mga bagay na iyan na may marahay na kaisipan puwedeng ikalibre kamo sa pagkadisganar sa paghihingoa na arogon an bakong natural na mga retrato sa pelikula asin makintab na mga magasin o sa dai kinakaipuhan na mga pagkokomparar kan saindong sadiri sa ibang mga hobenes. Igwa kamo nin mga kuwalidad na mas mahalaga nanggad ki sa ano man na pisikal na kakulangan—iniimahinar man iyan o tunay. Minsan siring, igwa pa nin saro na mas mahalagang bagay na kaipuhan nindong konsideraron.

An Kaisipan nin Dios sa Bagay

Narisa daw nindo kun gurano kakadikit kan sinasabi kan Biblia manongod sa itsura nin mga tawo? Taano ta dai sinasabi sato kun ano an itsura ni Abraham, Maria, o minsan ni Jesus? Malinaw, dai iyan ibinilang nin Dios na mahalaga.

An totoo, hinaboan nin Dios na magin hade an sarong barobata na an ngaran Eliab, na minalataw na magayon na lalaki! Si Jehova Dios nagpaliwanag ki propeta Samuel: “Dai ka magheling sa saiyang lalauogon asin sa langkaw kan tindog nia. . . . Huli ta an Dios dai nagheheling siring kan pagheling nin tawo, huling an tawo nagheheling sa luwas sana; alagad si Jehova, naheheling nia kun ano an puso.” (1 Samuel 16:6, 7) Imbes pinili nin Dios an sarong aki na an ngaran David.

Kaya tama sana, an Biblia nagsasadol sato na itorohok an satong atension, bakong sa panluwas na samno, kundi sa “natatagong persona kan puso.” (1 Pedro 3:3, 4) Siyempre, dai ini nangangahulogan na pababayaan na niato an satong panluwas na itsura. Sinasadol kita kan Biblia na papagdanayon an halangkaw na pamantayan sa gubing asin pagbubulos. (Ikomparar an 1 Timoteo 2:9.) Pero, kun beses an satong panluwas na itsura tibaad ikamondo niato nin kadikit. Alagad nakararanga nanggad na maaraman na para sa Dios, an Saro na talagang mahalaga, an satong itsura bakong iyo an mahalaga! “Naheheling nia kun ano an puso.” Kaya bako daw na magigin madonong na umontok sa paghadit nin sobra manongod sa saindong itsura asin imbes maghingoa na pagayonon an saindong puso sa atubangan nia?

[Ritrato sa pahina 23]

An hinahaboan nindo manongod sa saindong sadiri tibaad kinauurihan man nin iba

[Ritrato sa pahina 24]

Igwa kamo nin mga kuwalidad na mas mahalaga nanggad ki sa ano man na pisikal na kakulangan