Mas Mahalaga Kisa mga Rogaring
KAN Disyembre28, 1985 si Jess asin Linda Shull kinasal sa Petaluma, California, asin dai nahaloy naghale sa pag-honeymoon sa Nevada. Sa pagpuli ninda sa saindang harong sa Wyoming, plano nindang mag-istar sa sarong bagong harong na duwang eskalon.
“Ako gabos an nagtogdok kaiyan,” an paliwanag ni Jess. “Aram ko na madali na akong kasalon, asin naghingoa ako na gibohon an harong siring sa talagang gusto mi.” Dai mahaloy bago maghale sa pag-honeymoon, idinakit ninda an dakol na kasangkapan ni Linda sa bago nindang harong sa sadit na banwaan nin Lost Wells Butte sa parteng amihanan-solnopan nin Riverton, Wyoming.
Kan nasa Nevada sinda, kan Biyernes, Enero 3, 1986, an bago nindang harong nagkasolo. “Mayo nin nakapagbareta samo,” sabi ni Linda. “Pero naoogma ako na dai ninda kami nabaretaan. Naraot kutana an samong honeymoon.”
An makosog na doros sa lugar na idto malinaw na nakakontribuwir sa pagpoon kan kalayo. An harong, na labing tolong taon na itinogdok ni Jess, biyong nasolo. Asin an pinakamaraot, idto dai nakaseguro.
Sa sarong estorya sa enot na pahina kaiyan kan Enero 14, an The Riverton Ranger nagbareta kan nangyari pagkahale kan boluntaryong mga bombero: “An bagong grupo nin mga tawo, na haros arog kadakol kan mga bombero, nagduman sa Lost Wells Butte. . . . Maation an harong, na may duwang piyeng lapok asin abo sa tahaw kan sala. Mayo na an kuwartong torogan, ta nasolo. Masakit maaraman kun saen mapoon.
“Pero ta nagpoon sinda, asin sa laog sana nin pirang oras, nalinig na ninda an kadaklan sa ati.
“Si Jess asin Linda mapuli na sa laog nin duwang aldaw. Dai pa ninda aram an nangyari sa bago nindang harong. . . .
“Pag-abot nin Martes, Ene. 7, apat pa sanang aldaw poon kan an harong biyong malaglag, naatopan na iyan kan grupo nin 50 boluntaryong mga Saksi ni Jehova. Mga pirang oras bago kaini idto mabata, madiklom na kuweba. . . .
“An mga katood kan mag-agom na Shull nagbugtak nin atop, bagong mga tubo, bagong mga alambre nin koryente. Nagbugtak sinda nin insulasyon, lanob, yeso. . . .
“Sinda nagtrabaho nin dakol na oras . . . kan Enero, sa Wyoming. An temperatura harani sa Lost Wells Butte bihirang lumangkaw nin 15 degrees. . . .
“An mga Saksi ni Jehova na sineguro na an duwang hobenes dai magpuli hale sa saindang honeymoon asin manompongan na nasolo an saindang harong kadaklan suruhaysuhay na ngonyan. Sinda dai nagpamidbid, an klase nin mga tawo na nagtatabang sa katood para sana sa pagtabang, bakong para sa pagkapublikar sa diaryo.
“Pero boot ni Jess asin Linda Shull na maaraman nin mga tawo kun anong klase an mga katood ninda. ‘Kun ika magpuli, asin sabihan ka na nawara an gabos . . . , ‘ sabi ni Linda, na nagpondo nin kadikit. ‘Bueno, iyan nagpapahiro saimo na magpasalamat nanggad na maaraman an gabos na yaon pa saimo.’
“Kadakol kan napierdi sa mag-agom na Shull. Haros nawara an harong ninda, asin an dakol sa mga kasangkapan ninda nasolo. Alagad may aram sinda ngonyan na ibang bagay, na mas mahalaga ki sa bilyaran o kuwarto sa pag-develop nin retrato, mga bagay na dai mababakal nin kuwarta.
“Mga bagay na, minsan sa kasolo, dai nanggad masosolo.”
[Picture Credit Line sa pahina 20]
Riverton, Wyoming, Fire Department