Pag May Malala Kang Hilang

“Kan maaraman ko na may kanser ako sa baga saka sa bituka, pagmati ko sinentensiyahan ako nin kagadanan. Pero pagpuli ko hali sa doktor, naisip ko, ‘Okey, bako ini an linalauman ko, pero kaipuhan kong maghanap nin paagi tanganing makayanan ko ini.’”—Linda, 71 anyos.

“Igwa ako nin hilang na apektado an mga nerve sa walang parte kan lalawgon ko. Sa grabeng kulog, may beses na nade-depress ako. Dakul na beses kong namati na nagsosolo ako, naisip ko na nganing maghugot.”—Elise, 49 anyos.

Sarong lalaking may hilang na nasa wheelchair kaiba kan saiyang mga mahal sa buhay

KUN ika o an saro mong namumutan ma-diagnose na may hilang na puwedeng ikagadan, siguradong grabeng kulog an dara kaiyan. Bako sana an mismong hilang an kaipuhan atubangon kundi an mga negatibong emosyon man. Nakakadagdag pa sa takot saka pagkahadit an nakakatensiyon na pagpakonsulta sa doktor, kadipisilan sa paghanap nin kinakaipuhan na pagpabulong asin panggastos para diyan, o maraot na mga epekto kan pagbulong. Grabeng kapurisawan sa isip an dara kan malalang hilang.

Ano an puwedeng makatabang? Nahiling kan dakul na an pinakanakatabang sainda na maginhawahan iyo an pagsarig sa Diyos sa pamibi asin an pagbasa nin nakakapakusog na mga tataramon sa Bibliya. Nakakatabang man an pagkamuot asin suporta na puwedeng itao kan pamilya saka mga amigo.

KUN PAANO NAKAYANAN KAN IBA

“Atubangon mo an hilang na may pagtubod sa Diyos,” an sabi kan 58 anyos na si Robert, “huli ta aalalayan ka niya. Mamibi ka ki Jehova. Ipaaram mo sa saiya an namamatian mo. Hagadon an saiyang banal na espiritu. Hagadon saiya na tabangan kang magpakakusog para sa pamilya mo saka magdanay na kalmado mantang tinatagalan mo an hilang mo.

“Dakulang bagay talaga pag yaon an suporta kan saimong pamilya, pag aram mong yaon sinda para saimo. Kada aldaw, may saro o duwang nag-aapod sako para kumustahon ako. Napapakusog ako kan mga amigo ko na yaon sa iba-ibang lugar. Talagang napaparahay ninda an pagmati ko. Natatabangan ako kaiyan na dai sumuko.”

Kun mabisita ka sa amigo mong may hilang, mangnuhon an sinabi ni Linda: “Siguradong gusto kan may hilang na mabuhay nin normal sagkod sa mapupuwede asin tibaad habo niyang pirming pag-ulayan an hilang niya. Kaya an pag-ulayan nindo, su mga arog lang kan dati.”

Sa kusog na itinatao kan Diyos, sa nakakaginhawang mga tataramon hali sa Kasuratan, saka sa suporta kan mamumuton na mga kapamilya asin amigo, talagang masasabi ta na may saysay pa man giraray an mabuhay dawa na may tinatagalan kitang malalang hilang.

Mga Teksto sa Bibliya na Makakatabang

Magsarig sa Diyos.

“Naghapot ako ki Jehova, asin sinimbag niya ako. Ilinigtas niya ako sa gabos na kinakatakutan ko. Nag-apod an hamak na ini, asin nagdangog si Jehova.”—Salmo 34:4, 6.

Si Linda, na nasambitan sa inutan, nagsabi: “Dai ko ipinapamibi na parahayon ako. An pirmi kong ipinapamibi iyo na pakusugon ako asin tabangan na makayanan ko an sakong hilang.”

Kumua nin kusog sa Tataramon nin Diyos.

“Mayo nin residente an magsasabi: ‘May hilang ako.’”—Isaias 33:24.

Isip-isipon an mga pangako nin Diyos sa maabot na panahon tanganing magkaigwa nin paglaom, na mapakusog saimo na magtagal.

Hagadon an suporta kan pamilya asin mga amigo.

“An tunay na amigo nagpapahiling nin pagkamuot sa gabos na panahon asin sarong tugang na namumundag sa mga panahon nin kasakitan.”—Talinhaga 17:17.

“Dai mo isuway an sadiri mo,” an sabi ni Elise na nasambitan sa inutan. “Pabayaan mong tabangan ka kan saimong mga amigo. Tibaad may mga panahon na namamatian mong nagsosolo ka o naiisip mong maski an Diyos dai nagdadangog sa saimo, pero dawa arog kaiyan dai mo isuway an sadiri mo.”