Sarong Angat sa mga Magurang
An kinaban mas hababa an moral kisa kaidto. Abunda an mga anunsiong may koneksion sa sekso. An mga magasin na nagpapaheling nin mga babae na kaswal sanang mga kawatan itinitinda sa groseri. An sarong kantang rock inooyonan an panlulugos nin kamidbid. Iyo nanggad, siring sa pinatutunayan kan naheheling asin nadadangog aroaldaw, ini inmoral na kinaban!
AN PROPESOR sa pag-adal sa pamilya na si Greer Litton Fox nagkomento na “mga 40” akto nin pagdodorog o ipinasesentidong pagdodorog “na puwedeng maheling nin saro sa telebisyon poon ala 1:30 sagkod alas 11 n.h. aroaldaw, mayo pang 5 porsiento an sa mag-agom.” Mantang isinasadol kan medya an sekso, bako man na makangangalas na mabasa an “halangkawon na bilang asin nakapanluluyang mga resulta nin pagbabados nin mga tin-edyer.”
Tunay nanggad, para sa mga magurang na an pinakamarahay an mawot para sa saindang mga aki, sarong angat an pagpadakula sa sainda sa inmoral na kinaban na ini. Pero, dai boot sabihon kaini na nakidodorog an gabos na hobenes. Ipinaheheling nin mga surbey na kabanga sa 15-sagkod-19-anyos na mga kaakian na babae sa Amerika an may eksperyensia na sa sekso, sa siring pinatutunayan na an kabanga mayo! Dugang pa, pati an dakol na napalabot sa sekso nagmamawot na kutana dai sinda nakiiba. An saro nagsurat sa kolumnista sa peryodiko na si Ann Landers:
“An sekso kaiba ni Joe (an enot kong kursunada) nakadidisganar, kaya prinobaran ko giraray kaiba ni Mike, dangan ni Neal, dangan ni George. Dai ko aram kun ano an hinahanap ko. Ano man idto, dai ko idto nakua. Nakakua ako nin kadakol na rungaw na ideya sa mga magasin, drama asin pelikula. Bakong arog kaiyan an tunay na buhay.
“Kun makakaolay ko an mga daragita na nagbabasa kan saindong artikulo, sasabihon ko sainda na an sekso kun tin-edyer pa dai nakareresolber sa mga problema, iyan nagtatao pa nin dagdag na problema. Iyan dai nagpapamate sa sarong daragita na sia namomotan, iyan nagpapamate saiya na sia daing kuwenta. Ipaaaram ko sainda na iyan dai ginigibo an sarong daragita na ‘may orog na pagkababae,’ puwede iyan na makaina sa saiyang pagkababae.
“Kun makakaolay ko an mga magurang, dadagkahon ko sinda na idoon an paggalang sa sadiri asin halangkaw na mga pamantayan.”
An totoo, an mga hobenes na dayupot sa saindang mga magurang asin trangkilo sa saindang pamilya saka marahay an pagmate sa saindang sadiri mas harayong mabiktima nin inmoralidad kisa mga bako. Asin igwa nin organisasyon nin labing kuwatro milyones katawo sa bilog na daga na an mga hobenes tinatabangan na mangapot sa pamantayan na mas halangkaw kisa sinusunod nin kadaklan ngonyan.
Huli sa mga katunayan na ini, paano nindo matatabangan an saindong mga aki na ingatan an saindang sadiri sa nag-oorog na inmoralidad sa kinaban ngonyan? Paano nindo sinda matatabangan na magkaigwa nin mas maogma, mas marahay, asin mas moral na buhay? Iyan an pag-oolayan niato sa masunod na duwang artikulo.