Libro kan Biblia Numero 53—2 Tesalonica
Kagsurat: Pablo
Kun Saen Isinurat: Corinto
Natapos an Pagsurat: Mga 51 C.E.
AN IKADUWANG surat ni apostol Pablo sa mga taga Tesalonica kasunod tolos kan enot niang surat. Aram niato na iyan ginibo dai nahaloy pagkatapos kan enot na surat, asin iyan hale sa iyo man sanang siudad nin Corinto, huli ta an iyo man sanang mga tugang, si Silvano saka Timoteo, kaiba giraray ni Pablo sa pagkumusta sa kongregasyon sa Tesalonica. Sinda gabos nagbibiaheng mga lingkod kan enot na Kristianong kongregasyon, asin mayong rekord na sindang tolo nag-iribanan giraray pagkatapos kan pag-iribaiba nindang ini sa Corinto. (2 Tes. 1:1; Gibo 18:5, 18) An tema asin paagi kan pagpaliwanag nagpaparisa na si Pablo nakamate nin apuradong pangangaipo na itanos tolos-tolos an kongregasyon mapadapit sa sarong sala na nagibo kaiyan.
2 An pagigin totoo kan surat pinatotoohan man siring sa pagigin totoo kan Enot na Tesalonica. Kinotar man iyan ni Ireneo (ikaduwang siglo C.E.) saka kan iba pang enot na mga parasurat, kaiba na si Justinong Martir (kan ikaduwang siglo man), na minalataw na nasambitan an 2 Tesalonica 2:3 kan magsurat sia manongod sa “tawo nin katampalasanan [kasalan].” Iyan maheheling sa iyo man sanang enot na mga katalogo siring kan Enot na Tesalonica. Minsan ngani iyan mayo na ngonyan sa Chester Beatty Papyrus No. 2 (P46), iyan posibleng marhay na yaon sa enot na duwa kan pitong pahina na mayo na pagkatapos kan Enot na Tesalonica.
3 Ano an katuyohan kan surat na ini? Basado sa hatol na itinao ni Pablo sa mga taga Tesalonica, manonodan niato na an nagkapira sa kongregasyon nakiargumento na an presensia kan Kagurangnan harani na, na an mga nagbabanabanang ini aktibong ihinuhulit an teoriya nindang ini, asin na riniribok nindang gayo an kongregasyon. Minalataw na an nagkapira ginamit pa ngani ini bilang sarahotan sa dai pagtrabaho tanganing sustentohan an saindang sadiri. (2 Tes. 3:11) Sa enot niang surat, nasambitan ni Pablo an presensia kan Kagurangnan, asin mayong duwa-duwa na kan madangog kan mga nagbabanabanang ini na binasa an surat, tolos nindang biniribid an mga tataramon ni Pablo asin tinawan ninda iyan nin ibang mga kahulogan. Posible man na an sarong surat na salang hinona na hale ki Pablo ininterpretar na nagsasabi na “an aldaw ni Jehova uya na.”—2:1, 2.
4 Minalataw na si Pablo nakaresibi nin bareta manongod sa kamugtakan na ini, posibleng hale sa nagdara kan enot niang surat sa kongregasyon, asin kun siring gusto niang marhay na itanos an kaisipan kan saiyang mga tugang na padangat nanggad nia. Kaya kan taon 51 C.E., si Pablo, kaiba an duwa niang kaibaiba, nagpadara nin surat hale sa Corinto para sa kongregasyon sa Tesalonica. Apuera sa pagtanos sa salang punto de vista dapit sa presensia ni Cristo, si Pablo nagtao nin mainit na pagparigon sa boot na manindogan nin marigon sa katotoohan.
KUN TAANO TA KAPAKIPAKINABANG
10 An halipot na ipinasabong na surat na ini sa mga taga Tesalonica nagtatao nin paliwanag dapit sa kadakol na Kristianong katotoohan, na gabos kapakipakinabang na pag-olayan. Isip-isipa an minasunod na pundamental na mga katokdoan asin prinsipyo na ipinapaliwanag kaini: Si Jehova iyo an Dios nin kaligtasan, asin sia nagpapabanal paagi sa espiritu asin pagtubod sa katotoohan (2:13); an Kristiano kaipuhan na magtagal nin pagsakit tanganing ikabilang sia na angay sa Kahadean nin Dios (1:4, 5); an mga Kristiano titiponon sa Kagurangnan na Jesu-Cristo durante kan saiyang presensia (2:1); matanos na hohokoman ni Jehova an mga minasuway sa maogmang bareta (1:5-8); an mga inapod papamurawayon kasaro ni Cristo Jesus, sono sa dai na kutana maninigong kabootan nin Dios (1:12); sinda inaapod paagi sa paghuhulit kan maogmang bareta (2:14); an pagtubod mahalagang marhay na kahagadan (1:3, 4, 10, 11; 2:13; 3:2); tama na magtrabaho tanganing masustentohan an sadiri sa ministeryo; kun an saro dai nagtatrabaho, tibaad sia magin hugakon asin magpoon na makiaram sa mga bagay na dai nia maninigong pakiaraman (3:8-12); an pagkamoot sa Dios konektado sa pakatagal (3:5). Saro nanggad na kayamanan nin nakakaparigon na impormasyon an makukua sa halipot na ipinasabong na surat na ini!
11 Sa surat na ini nagpaheling si Pablo nin hararom na pagmakolog sa espirituwal na ikakarahay kan saiyang mga tugang sa Tesalonica asin sa pagkasararo patin prosperidad kan kongregasyon. Itinanos nia sinda dapit sa kun noarin madatong an aldaw ni Jehova, na ipinapaheling na “an tawo nin katampalasanan” kaipuhan ngunang lumataw, tangani na tumukaw sa “templo kan An Dios, na nagpapaheling sa publiko na sia sarong dios.” Minsan siring, an mga ‘ibinilang na angay sa kahadean nin Dios’ puedeng magkaigwa nin lubos na garantiya na an Kagurangnan na Jesus ihahayag sa itinalaan na panahon hale sa langit, na mamamalos paagi sa naglalaad na kalayo “sa panahon na sia dumatong tanganing pamurawayon may koneksion sa saiyang mga banal asin tanganing paghelingon na may pagngalas sa aldaw na iyan may koneksion sa gabos na nagtubod.”—2:3, 4; 1:5, 10.