Surat Hali sa Namamahalang Grupo
Mahal na Kapwa Namomoot ki Jehova:
“Maaaraman nindo an katotoohan, asin an katotoohan mapatalingkas sa saindo,” an sabi ni Jesus. (Juan 8:32) Nakakaparigon nanggad sa boot an mga tataramon na iyan! Iyo, posibleng maaraman an katotoohan, dawa sa delikadong “huring mga aldaw” na ini na lakop an kaputikan. (2 Timoteo 3:1) Nagigirumdoman mo daw kan enot mong maaraman an katotoohan na ipinapaliwanag sa Tataramon nin Dios? Nakakapukaw nanggad sa boot na eksperyensia iyan!
Minsan siring, kun paanong mahalaga an pagkaigwa nin tamang kaaraman dapit sa katotoohan asin an regular na pakikikabtang sa pagsabi kaiyan sa iba, dapat man na gumawe kita kaoyon kan katotoohan. Tanganing magibo iyan, kaipuhan na magdanay kita sa pagkamoot nin Dios. Ano an kalabot digdi? Sinisimbag an hapot na ini kan mga tataramon ni Jesus kan banggi bago sia magadan. Sinabihan nia an saiyang maimbod na mga apostol: “Kun otobon nindo an sakong mga togon, magdadanay kamo sa sakong pagkamoot, kun paanong ako nag-otob sa mga togon kan Ama asin nagdanay sa saiyang pagkamoot.”—Juan 15:10.
Mangnohon na si Jesus nagdanay sa pagkamoot nin Dios paagi sa pag-otob sa mga togon kan saiyang Ama. Totoo man iyan sa sato ngonyan. Tanganing magdanay sa pagkamoot nin Dios, kaipuhan na iaplikar niato sa pangaroaldaw na buhay an katotoohan. Kan banggi man sanang iyan, si Jesus nagsabi: “Kun aram nindo an mga bagay na ini, maogma kamo kun gibohon nindo iyan.”—Juan 13:17.
Odok niamong linalaoman na an librong ini makakatabang sa saimo na padagos na iaplikar sa saimong buhay an katotoohan asin sa siring magdanay ka “sa pagkamoot nin Dios . . . na nasa isip an buhay na daing katapusan.”—Judas 21.
Namamahalang Grupo kan Mga Saksi ni Jehova