Ano an Pinakamahalaga sa Saindong Buhay?
SIA midbid bilang an pinakamayaman na tawo sa kinaban. Binilyon na dolyar an saiyang personal na kayamanan. Hinangaan sia nin dakol bilang nakaabot na sa alitoktok nin pag-asenso. Alagad ta duwang taon bago sia nagadan, si J. Paul Getty nagsabi: “An kuwarta dai man perming konektado sa kaogmahan. Tibaad sa kamondoan.”
Sa paghanap sa ibinibilang nin dakol na mahalaga sa buhay, an bantog na hade nin krudo tunay na nagin mapanggana sa pambihirang sokol. Alagad sa isinabi nia garo daw sia tawo na nakanompong nin kaogmahan paagi sa pinagmaigotan niang gayo na makamtan? O garo daw sia saro na sa katapustapusi nakarealisar na an pinagmaigotan niang gayo bako man palan na talagang mahalaga?
Kamawotan Asin Katunayan
Ano an ibinibilang nindong pinakamahalaga sa saindong buhay? Tibaad sabihon nin nagkapira na an katalingkasan iyo an pinakamamahal ninda. An iba man tibaad magsabi na an pag-asenso iyo an pinakamahalaga sa saindang buhay. An iba pa pinaoorog sa gabos an personal na pagkakontento.
Minsan ngani habo nindang admitiron iyan, an pamumuhay asin mga hiro-hiro nin dakol nagpaparisa na an kuwarta asin pag-aling-aling iyo an talagang pinakamahalaga sa saindang buhay. Determinadong gayo sinda na yumaman o desididong gayo na ‘magpasiramsiram sa buhay,’ kaya dai ninda iniintindi dawa mapabayaan an saindang pamilya, an saindang salud, asin an saindang espirituwal na kapakanan sa paggibo kaiyan. Asin interesanteng gayo, an Biblia naghula na sa “huring mga aldaw” an mga tawo magigin “mamomoton sa sainda man sana, mamomoton sa pirak” asin “mamomoton sa kasingawan ki sa magin mamomoton sa Dios.”—2 Timoteo 3:1, 2, 4.
Sarong Bagay na Mas Mahalaga
Si Jesu-Cristo, an kagpundar sa Kristianismo, nagtao nin nakapagpapaisip na hapot. “May napapakinabang daw an tawo kun ganahon nia an bilog na kinaban alagad mawaran man kan saiyang buhay?” an hapot nia. (Marcos 8:36, Today’s English Version) Isip-isipa iyan. Ano an magigibo nin saro kun mayo sia nin buhay? Mayo!—Eclesiastes 9:5, 10.
Tibaad kamo hoben pa kaya sa paghona nindo kadakol pa kamo nin panahon na gibohon an gabos na gusto nindong gibohon. Alagad totoo daw iyan? An mga guerra, krimen, helang, asin aksidente guminadan sa dai mabilang na makokosog na lalaki asin babae—nin bigla asin dai linalaoman. Ano an nangyari sa gabos nindang plano asin pasohan?
Tibaad kamo may pamilya o may edad na. Kaya tibaad an saboot nindo kaipuhan na idusay nindo an gabos nindong panahon asin kosog sa pagtogdok nin seguradong ngapit para sa saindo asin sa saindong mga namomotan bago kamo magkapanahon na isipon an ibang bagay. Alagad ano an ibibilang nindong segurado? Arog kan aram nindo, an implasyon, pagluya nin negosyo, asin kadaihan nin trabaho nakaubos sa natipon nin dakol sa bilog nindang buhay, na ginigibo sindang pobre asin daing harong. Apuwera kaiyan, mantang daing kasegurohan an mga kamugtakan sa bilog na kinaban, ano an garantiya na an mga bagay na pinagpagalan nindo dai mawawara huli sa dai linalaoman na pagkaliwat nin mga pangyayari?
Kaya sierto na nasasabotan nindo an halaga nin pagsiyasat sa saindong personal na mga pasohan. Kaya, ano man nanggad an ibinibilang nindong pinakamahalaga sa saindong buhay?