Pagkaligtas Pasiring sa Bagong Daga
Kapitulo 8: Mga Maliligtas Hale sa Gabos na Nasyon
1. Anong panuga na itinao ki Abraham an nagpapaheling na an pag-oyon nin Dios posible para sa “gabos na pamilya” nin katawohan?
Si Jehova may mamomoton na interes sa mga tawo hale sa gabos na nasyon asin tribo. Sia naggibo nin probisyon tanganing an gabos na pamilya sa daga magkamit kan saiyang pag-oyon asin bendisyon. Ki Abram (Abraham), na gikan kan aki ni Noe na si Sem, si Jehova nagsabi: “Humale ka sa saimong banwaan asin sa saimong mga kag-anak asin sa harong kan saimong ama pasiring sa dagang itotokdo ko saimo; asin magibo ako nin dakulang nasyon hale saimo asin ika bebendisyonan ko asin padadakulaon ko an saimong ngaran, asin magigin kang paladan. Asin bebendisyonan ko an mga nagbebendisyon saimo, asin sia na nagsusumpa saimo susumpaon ko, asin an gabos na pamilya kan daga magbebendisyon nanggad kan saindang sadiri paagi sa saimo.” (Genesis 12:1-3; Gibo 7:2-4) “An gabos na pamilya kan daga”—kabale kita dian ngonyan, ano man an nasyon na namundagan niato o an tataramon niato.—Salmo 65:2.
2. (a) Kapareho ni Abraham, anong kuwalidad an kaipuhan niato? (b) Arog kan ipinaheheling sa Hebreo 11:8-10, paano si Abraham nagtao nin pruweba sa kuwalidad na ini?
2 An sinabihan ni Jehova kan panugang ini tawong may pagtubod, kun paanong kita kaipuhan na may pagtubod tanganing kita magkaigwa nin kabtang sa bendisyon hale sa Dios na ipinanuga digdi. (Santiago 2:23; Hebreo 11:6) An pagtubod ni Abraham bako sanang daing gibong paniniwala kundi may kaibang paghiro. Iyan nagpangyari saiya na humale sa Mesopotamia pasiring sa harayong daga na dai pa nia naheling. “Huli sa pagtubod sia nag-erok bilang nakikihimanwa sa daga kan panuga siring sa nasa ibang daga,” na dai iinaasosyar an sadiri sa arin man na siudad-kahadean duman. “Huli ta hinahalat nia an siudad [Kahadean nin Dios] na may tunay na mga pundasyon, na an paratogdok asin kaglalang kan siudad na iyan iyo an Dios.”—Hebreo 11:8-10.
3. Anong nagsisiyasat na pagbalo sa pagtubod an inagihan ni Abraham mapadapit ki Isaac?
3 Kan si Abraham umedad nin 100 na taon asin an agom niang si Sara 90, milagrosong binendisyonan sinda ni Jehova nin aking lalaki, si Isaac. May labot sa aking ini, si Abraham nag-agi nin nag-uusisang pagbalo sa pagtubod asin pagkuyog sa Dios. Sinabihan ni Jehova si Abraham na ipag-iba si Isaac, na ngonyan soltero na, sa daga nin Moria asin duman idolot sia bilang tinotong na dolot. May pagtubod sa kakayahan nin Dios na buhayon liwat an saiyang aki, si Abraham nagkuyog. (Hebreo 11:17-19) Si Isaac, na nagpasakop sa saiyang ama, nagagapos na sa ibabaw kan altar asin kapot na ni Abraham an daga na igagadan saiya kan mangunlabot an anghel ni Jehova. An pagbalo igo na tanganing patunayan na si Abraham daing ano man na isasayuma sa Dios. Kaya inestablisar nin Dios an saiyang pakipagtipan ki Abraham, arog kan sinasabi kan Biblia:
4. Sa okasyon na idto, ano pang dugang na mahalagang panuga an ginibo nin Dios mapadapit sa mga tawo hale sa gabos na nasyon?
4 “‘Paagi sa sako man sana ako nagsusumpa,’ an sabi ni Jehova, ‘na huli sa bagay na ginibo mo an bagay na ini asin dai mo isinayuma an saimong aki, an saimong bugtong na aki, ika bebendisyonan ko nanggad asin padadakulon ko nanggad an saimong banhi siring kan mga bitoon sa kalangitan asin siring kan mga baybay sa baybayon; asin an saimong banhi makasasadiri kan tata kan saiyang mga kaiwal. Asin paagi sa saimong banhi an gabos na nasyon sa daga magbebendisyon nanggad kan saindang sadiri huli sa bagay na ika naghinanyog sa sakong tingog.’”—Genesis 22:15-18.
5. (a) Ano an ipinanganino kan pagprobar ni Abraham na idolot si Isaac? (b) Bilang kaotoban kan Genesis 12:3, paano an mga tawo “nagsusumpa” sa Mas Dakulang Abraham, asin may anong resulta? (c) Paano niato sia ‘mabebendisyonan’?
5 Kun mamamansayan niato na an Mas Dakulang Abraham iyo si Jehova asin na si Isaac nanganino ki Jesu-Cristo, masasabotan niato kun paanong an mga pangyayaring ini mahalaga sa sato sa personal. An totoo, an iginagawe niato ki Jehova Dios an nagdedeterminar sa satong ngapit. An paglaom na buhay na daing sagkod posible para sa sato ta aktuwal na itinao nin Dios an saiyang bugtong na Aki bilang atang para sa satong mga kasalan, siring kan ipinag-ilustrar kan pagprobar ni Abraham na idolot si Isaac. (Juan 3:16) An siisay man na padagos na ‘nagsusumpa’ ki Jehova, na linilibak sia o binabasangbasang an saiyang mamomoton na mga katuyohan, napaiirarom sa sumpa na mangangahulogan kan saindang daing sagkod na kalaglagan. (Ikomparar an 1 Samuel 3:12-14; 2:12.) Alagad kun kita tawong may pagpahalaga, kita ‘magbebendisyon’ sa Mas Dakulang Abraham. Paano? Paagi sa pag-admitir na ki Jehova gikan an gabos na marahay na bagay, kaiba na an dai na kutana maninigong balaog na buhay paagi sa saiyang Aki. Siring man, isasaysay niato sa iba an karahayan ni Jehova asin an makangangalas na mga kuwalidad kan saiyang pagkahade. (Santiago 1:17; Salmo 145:7-13) Sa paaging ini ilinilinya niato an satong sadiri na mag-ako nin mga bendisyon hale sa saiya sagkod lamang.
An Ipinanugang “Banhi” ni Abraham
6. (a) Siisay an pangenot na “banhi” ni Abraham? (b) Paano niato maaako an bendisyon na minaabot paagi sa saiya?
6 Bilang kabtang kan saiyang areglo sa pagbendisyon sa katawohan si Jehova nagtagama nin matanos na langitnon na gobyerno. Si Jesu-Cristo namundag bilang gikan ni Abraham, bilang an saiyang pinakamahalagang aki, o “banhi,” asin sia an tinawan ni Jehova nin pagkahade. (Galacia 3:16; Mateo 1:1) Kaya, arog kan ipinaririsa kan isinumpa nin Dios ki Abraham, paagi ki Jesu-Cristo na an mga tawo hale sa gabos na nasyon kan daga bebendisyonan. Ginigibo daw nindo an kinakaipuhan tanganing makamtan nindo an bendisyon na iyan? Halimbawa, ipinaheheling daw kan saindong pamumuhay na nasasabotan nindo kun gurano kahalaga sa saindo kan pag-atang kan buhay ni Jesus? Kamo daw tunay na nagpapasakop sa saiyang autoridad bilang Hade?—Juan 3:36; Gibo 4:12.
7. (a) Siisay pa an kaiba sa “banhi ni Abraham”? (b) Paano niato naaaraman na bakong gabos na maimbod na naglilingkod sa Dios maduman sa langit?
7 Si apostol Juan tinawan nin makahulang patanaw sa langitnon na mga pangyayari na dian naheling nia an iba na kaiba ni Jesu-Cristo sa langitnon na Bukid nin Sion. Sinda kabtang man kan “banhi ni Abraham.” Arog kan sinasabi sa Kapahayagan 14:1-5, sinda “binakal hale sa katawohan” asin may kabilangan na 144,000. (Galacia 3:26-29) Siisay an kabilang dian? Liniliwanag kan Biblia na dai noarin man nagin katuyohan nin Dios na darahon sa langit an gabos na matanos na tawo. (Mateo 11:11; Gibo 2:34; Salmo 37:29) An dakulang pribilehiyo na makaibanan ni Cristo sa Kahadean nin langit limitado sa “sadangoton na aripompon” na magigin mga hade asin saserdote kaiba nia sa laog nin sangribong taon.—Lucas 12:32; Kapahayagan 5:9, 10; 20:6.
8. Kasuarin nagpoon an pagpili sa “sadangoton na aripompon,” asin gurano iyan kalawig na nagpapadagos?
8 Paano pinili an “sadangoton na aripompon” na iyan? An maboot na imbitasyon na makikabtang sa langitnon na Kahadean enot itinao sa mga Israelitas sa laman. Alagad huli sa kakulangan ninda nin pagtubod, dai ninda ikinatao an bilog na 144,000. Kaya inimbitaran an mga Samaritano, asin, kan huri, an mga tawo nin gabos na nasyon. (Gibo 1:8) An primero sa kairibang paramana ni Cristo linahidan kan banal na espiritu kan Pentecostes nin 33 C.E. An pagpili sa grupong ini nagpapadagos sagkod na an 144,000 matatakan nin Dios bilang aprobado na. Dangan itinatao an atension sa pagtipon sa mga tawo na mag-eerok sa daga bilang may pagpahalagang mga sakop kan langitnon na gobyerno.
9. (a) Anong mga ekspresyon sa Biblia an aplikado sa langitnon na grupong ini? (b) Siisay an ipinanganino kan mga Israelitas sa laman?
9 An mga paramana sa langitnon na Kahadean kaiba ni Cristo inaapod sa Kasuratan na “mga pinili,” “mga banal,” mga tawong “linahidan . . . [nin] Dios.” (2 Timoteo 2:10; 1 Corinto 6:1, 2; 2 Corinto 1:21) Sinda inaapod man sa kagabsan bilang “nobya” ni Cristo. (Kapahayagan 21:2, 9; Efeso 5:22-32) Sa ibang punto-de-vista, sinda inapod na “mga tugang” ni Cristo, “kairibang paramana ni Cristo” asin “mga aki” nin Dios. (Hebreo 2:10, 11; Roma 8:15-17; Efeso 1:5) Ano man an nasyonalidad ninda, sinda, sa espirituwal na pagtaram, “an Israel nin Dios.” (Galacia 6:16; Roma 2:28, 29; 9:6-8) Kan tapuson ni Jehova an saiyang tipan nin Pagboot sa Israel sa laman, ilinaog nia an espirituwal na Israel sa bagong pakipagtipan sa saiya. Alagad an saiyang mga ginibo sa Israel sa laman kan sinda sakop kan Pagboot nagin arogan kan mga bagay na maabot. (Hebreo 10:1) Kun siring, siisay an ipinanganino kan nasyon nin Israel sa laman, na pinili nin Dios bilang saiyang “espesyal na rogaring”? An mga katunayan nagtotokdo sa espirituwal na Israel, an mga pinili nin Dios na maghade kaiba ni Cristo sa langit. (Ikomparar an Exodo 19:5, 6 sa 1 Pedro 1:3, 4 asin 2:9.) Kaiba ni Cristo sinda an minakompuwesto sa ahensia na paagi kaiyan an mga bendisyon ipaaabot sa gabos na ibang makinuyog sa mga tawo. An pakasabot kaini liyabe sa pagsabot sa Biblia.
An mga Binendisyonan Paagi sa “Banhi”
10. Siisay an ilinaladawan kan bakong Israelitang mga parasamba ki Jehova?
10 Kan panahon na an Dios may espesyal na relasyon sa nasyon nin Israel, sia naggibo man nin mamomoton na mga probisyon para sa mga tawong bakong kabilang sa nasyon na iyan alagad an puso nagpahiro sainda na makikabtang sa tunay na pagsamba kaiba kan mga Israelitas. Nasasabihan sinda sa Biblia. Sinda daw igwa man nin modernong mga katimbang? Iyo nanggad. Sa dakol na paagi sinda naglaladawan sa mga bakong espirituwal na Israelitas alagad nagpapahalagang gayo sa makangangalas na paglaom na buhay na daing sagkod bilang daganon na mga sakop kan Kahadean nin Dios. An mga ini an sinabi nin Dios ki Abraham, na sinasabi na an mga tawo hale sa “gabos na nasyon sa daga” magbebendisyon sa saindang sadiri paagi sa saiyang “banhi.”—Genesis 22:18; Deuteronomio 32:43.
11. (a) Ano an pagkasambit sa grupong ini kan idedikar an templo ni Salomon? (b) Paano an “mga tagaibang daga” ‘nagdodorolok ki Jehova’ sa satong aldaw, arog kan ihinula sa Isaias 56:6, 7?
11 Poon kaidto katuyohan na nin Dios na an bilog na katawohan magkasararo sa tunay na pagsamba. Tamang-tama, kan idedikar an templo na itinogdok ni Salomon sa Jerusalem, an hade namibi na dangogon logod ni Jehova an pamibi nin mga tagaibang daga na naghihingoang magdolot nin inaakong pagsamba kaiba nin Israel. (2 Cronica 6:32, 33) Asin, sa Isaias 56:6, 7, an Dios nanuga: “An mga tagaibang daga na nagdorolok ki Jehova tanganing maglingkod sa saiya asin kamotan an ngaran ni Jehova, tanganing magin mga lingkod nia, . . . dadarahon ko man sinda sa sakong banal na bukid asin paoogmahon ko sinda sa laog kan sakong harong nin pamibi. . . . Huli ta an sadiri kong harong aapodon na harong nin pamibi para sa gabos na banwaan.” Ipinaheheling an espiritu na sinasabi digdi, an “mga tagaibang daga” sa modernong aldaw nagtitiripon na ngonyan hale sa gabos na nasyon, bako sanang bilang kaswal na mga paramasid, kundi bilang mga tawo na “nagdorolok ki Jehova.” Ginigibo ninda ini paagi sa pagdusay kan saindang buhay sa saiya, na isinisimbolo ini paagi sa pagpabautismo sa tubig dangan paglilingkod sa paagi na nagpapaheling kan saindang pagkamoot sa “ngaran ni Jehova” asin sa gabos na ipinagrerepresentar kaiyan.—Mateo 28:19, 20.
12. Paano ipinaririsa kan Pagboot ni Moises kun baga an mga naglalaom na magin daganon na mga sakop kan Kahadean nin Dios kaipuhan na makaotob sa haralangkaw na pamantayan na aplikado sa espirituwal na Israel?
12 An hinahagad na kaimbodan sa sainda bakong mas kadikit kisa sa linahidan nin espiritung mga Kristiano. Sa irarom kan Pagboot ni Moises, hinagad ni Jehova sa “nakikihimanwa” na nag-ako sa tunay na pagsamba na mag-otob sa kaparehong pagboot na nakasasakop sa Israel. (Bilang 15:15, 16) An relasyon sa pag-oltanan ninda bako sanang pagpabaya sa lambang saro kundi may tunay na pagkamoot. (Levitico 19:34) Siring man, an mga ipinanganino kan mga nakikihimanwa naghihingoa na lubos na ioyon an saindang buhay sa mga kahagadan ni Jehova asin paglingkodan sia na may mamomoton na pakikisaro sa mga natatada sa espirituwal na Israel.—Isaias 61:5.
13. Anong mga detalye sa Isaias 2:1-4 an maninigo niatong isapuso kun boot niatong makaligtas pasiring sa “bagong daga”?
13 Paagi sa saiyang propetang si Isaias, ilinaladawan ni Jehova an galagang grupo nin mga tawo hale sa “gabos na nasyon” na ngonyan nagraralaog sa unibersal na harong nin pagsamba ki Jehova. Sia naghula: “Dakol na banwaan an maduruman asin masarabi: ‘Madia kamo, banwaan, asin magtukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.’” Bilang resulta, saindang ‘dinaragopdop an saindang mga minasbad na magin tarom nin arado’ asin, minsan sa tahaw kan nagkakariribok na kinaban na ini, sinda ‘dai na nag-aadal sa pakilaban.’ (Isaias 2:1-4) Naheheling daw nindo na kamo kabilang sa maogmang grupong iyan? Igwa daw kamo nin kamawotan na kapareho ninda na manodan an mga kahagadan ni Jehova, iaplikar ini sa saindong buhay asin dai na magsarig sa mga armas sa pakikilaban? An Dios nanuga na an sarong dakulang kadaklan na naggigibo kaini ‘maluwas sa dakulang kahorasaan’ bilang mga naligtas pasiring sa saiyang matoninong na “bagong daga.”—Kapahayagan 7:9, 10, 14; Salmo 46:8, 9.