Pagkaligtas Pasiring sa Bagong Daga
Kapitulo 9: Siisay an Naggigiya sa Dalan Pasiring sa Kaligtasan?
1. (a) Sa ano kita kaipuhan na magpasakop tanganing maligtas sa “dakulang kahorasaan”? (b) Paano ini iinilustrar kan paggamit nin Dios ki Moises?
SOLAMENTE kun aakoon niato an pangengenot ni Jesu-Cristo asin magtatao nin nakakokombensir na ebidensia na kita tunay na naghihinanyog sa saiya asin naglalakaw sa saiyang mga gira na kita maliligtas sa maraot na kinaban na ini asin matatadang buhay sa nagdadangadang na “dakulang kahorasaan.” (Gibo 4:12) Ini ipinag-iilustrar na gayo kan mga pangyayari sa palibot kan pagkaligtas kan mga Israelitas sa laman hale sa Egipto kan 1513 B.C.E. Sa milagrosong paagi dinara ni Jehova an Israel sa kaligtasan paagi sa Dagat na Pula asin linaglag an naglalapag na hukbo nin Egipto. Sa gabos na ini, ginamit nin Dios si Moises sa paggiya sa saiyang banwaan.—Josue 24:5-7; Exodo 3:10.
2. (a) Sairisay an “dakulang kadaklan na manlaenlaen” na naghale sa Egipto kaiba kan Israel? (b) Ano an sierto na nakadagka sa dakol sa sainda? (c) Sa anong bagay sinda nabalo dai nahaloy?
2 Kan an mga Israelitas magmartsa paluwas sa Egipto na may paglaom na lumaog sa Dagang Panuga, may ibang nag-iba sa sainda. Arog kan sa huri isinurat ni Moises: “Tuminukad man na kaiba ninda an sarong dakulang kadaklan na manlaenlaen.” (Exodo 12:38) Sairisay an mga ini? Sinda mga Egipcio o iba pang tagaibang daga na nakidamay sa Israel. Naheling ninda an makangingirhat na mga damat na itinao ni Jehova sa mapan-aping nasyon nin Egipto tanganing ipaheling na sia sana an tunay na Dios asin na an mga dios nin Egipto falso asin dai kayang iligtas an mga nagsasamba sainda. Sierto man na an nadangog ninda sa mga Israelitas manongod sa paglaom na mabuhay sa “daga na nagbubulos nin gatas asin tangguli” marahay sa pagdangog ninda. (Exodo 3:7, 8; 12:12) Alagad lubos daw nindang minidbid si Moises bilang an saro na tinindog nin Dios na magin namomoon asin paraligtas sa Saiyang banwaan? Dai nahaloy sinda nabalo.—Gibo 7:34, 35.
3. (a) Taano ta mahalaga na kumuyog sa mga paggiya ni Moises? (b) Ano an kahulogan kan ‘bautismo dian ki Moises’? (c) Taano iyan ta mahalaga sa espirituwal na mga Israelitas?
3 Kan an Israel, kaiba an “dakulang kadaklan na manlaenlaen,” harani na sa pangpang kan Dagat na Pula, linapag sinda kan hade nin Egipto asin kan saiyang mga hukbo militar tanganing guyodon sinda pabalik sa kaoripnan. Tanganing maligtas, kaipuhan na sinda mag-iriba asin kumuyog sa paggiya ni Moises, ta ginagamit ni Jehova si Moises sa paggiya sa sainda. Paagi sa milagrosong panganoron pinogolan ni Jehova an kaiwal mantang pinagbanga nia an tubig kan dagat asin pinamara an daga sa irarom kan dagat. Kabaliktaran nanggad sa nangyari sa mga Egipcio kan huri, an bilog na Israel asin an “dakulang kadaklan na manlaenlaen” nakaligtas kaiba ni Moises sa pagbalyo sa namarang irarom kan dagat. (Exodo 14:9, 19-31) Kan sinda nagmamartsa pabalyo, na may lanob na tubig sa saindang too asin sa saindang wala asin nasa itaas an panganoron kan presensia nin Dios, may sarong bagay na makahulogan na nangyari. Inaapod iyan kan Biblia na bautismo—bakong literal na bautismo sa tubig, kundi simboliko dian ki Moises bilang an propeta ni Jehova, an saro na isinugo nin Dios na magin saindang Paraligtas. (1 Corinto 10:1, 2) Siring man, an gabos na espirituwal na Israelitas na maliligtas sa kalaglagan kan maraot na kinaban na ini kaipuhan na umagi sa kaagid na bautismo dian ki Cristo bilang paraligtas asin magtao nin nakakokombensir na patotoo na sinda nagkukuyog na gayo sa saiyang pangengenot. An modernong “kadaklan na manlaenlaen” kaipuhan na umiba sa sainda.
4. Gurano kadakula kan autoridad na itinao ni Jehova ki Cristo?
4 Tinawan ni Jehova nin dakulang autoridad an saiyang Aki, si Jesu-Cristo. Paagi sa saiya pinapangyari nin Dios na kita ‘makaligtas sa presenteng maraot na palakaw nin mga bagay,’ tanganing dai kita mapadamay sa makamomondong kaaabtan kaiyan. (Galacia 1:3-5; 1 Tesalonica 1:9, 10) Paagi ki Moises, si Jehova nagtao sa Israel nin mga pagboot na nakaapektar sa paglaom sa buhay kan banwaan kaidto mismo. Kun sinda minakuyog sa mga pagboot na idto sinda nakikinabang na gayo. Alagad an ibang pagboot may penalidad man na kagadanan para sa pakisuway. Kan huri, si Jesus nagin propeta na mas dakula ki Moises. An saiyang itinokdo “mga tataramon nin buhay na daing katapusan,” asin an tuyong dai pagkuyog sa mga tataramon na ini nagbubunga nin kagadanan na dian mayo na nin kaligtasan. Kaya, napakahalaga na isapuso niato an saiyang sinasabi!—Juan 6:66-69; 3:36; Gibo 3:19-23.
5. Ano an minagibo sa pagpasakop ki Jesus na magin nakadadagka?
5 Para sa nagkapira, garo baga dai ninda gusto an ideya na magpasakop sa sarong namomoon. Kadakol na nindang naheling na pag-abuso sa autoridad. Alagad an mismong mga tataramon ni Jesus nagpaparisa nin espiritu na nakapakokosog sa boot. Sia mainit na nag-aagda sato: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin magin sakong mga disipulo, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mateo 11:28-30) Nakaoogma nanggad na paglaom! An mga nagdadangog sa mainit na pag-agdang iyan, na lubos na nagsasarig sa saiya, dai madidisganar. (Roma 10:11) Makananamit sinda nin katiwasayan na kapareho kan mga karnero sa aripompon nin sarong mamomoton na pastor.
An Tunay na Marahay na Pastor
6. (a) Paano na an nasyon nin Israel garo mga karnero sa sarong toril? (b) Ano an ipinanuga ni Jehova manongod sa pastor para sa “mga karnerong” ini, asin paano iyan naotob?
6 An nasyon nin Israel garo aripompon nin mga karnero na rogaring ni Jehova. Itinao nia an tipan nin Pagboot, na nagserbing garo nagpoprotehir na lanob nin sarong toril, na irinarayo sinda sa pamumuhay nin maraot na mga nasyon na Hentil. Dinara man kaiyan an mga makinuyog sa Mesiyas. (Efeso 2:14-16; Galacia 3:24) Manonongod sa Mesiyanikong Pastor-Hade, si Jehova naghula: “Patitindogon ko sa [sakong mga karnero] an sarong pastor, asin pakakakanon nia sinda, minsan an sakong oripon na si David.” (Ezequiel 34:23, 31) Dai boot sabihon kaini na si David, na kaidto gadan na, personal giraray na maghahade sa banwaan nin Dios. Imbes, gikan sa makahadeng linya ni David si Jehova mapatindog nin pastor-hade na paagi sa saiya an Dios magtatao nin katiwasayan. (Jeremias 23:5, 6) Sa laen-laen na panahon may mga tawong putik na naghingako na Mesiyanikong paraligtas, alagad kan taon 29 C.E., ginamit ni Jehova si Juan Bautista na iintrodusir si Jesu-Cristo sa “mga karnero” nin Israel bilang an saro na tunay na isinugo nin Dios, an Mesiyas na igwa kan masasarigan na kredensial. Ini an langitnon na Aki nin Dios, na an prinsipyo nin buhay ibinalyo sa matris nin sarong birhen na Judia tangani siang mamundag sa makahadeng linya ni David. An ngaran na David nangangahulogan “namomotan,” kaya, tamang-tama, pakalihis kan bautismo sa tubig ni Jesus, ipinahayag nin makosog ni Jehova hale sa langit: “Ika an sakong Aki, an namomotan; inoyonan ta ka.”—Marcos 1:11.
7. (a) Bilang an “marahay na pastor,” paano ipinaheling ni Jesus an rarom kan saiyang mamomoton na pagmakolog sa “mga karnero”? (b) Paano iyan napapalaen sa iginawe nin mas naenot, falsong mga mesiyas?
7 Kulang nin apat na bulan bago sia nagadan, si Jesus nagsabi: “Ako iyo an marahay na pastor; an marahay na pastor minatao kan saiyang kalag para sa mga karnero.” (Juan 10:11) Ipinaheling nia an kalaenan kan saiyang katongdan sa falsong mga mesiyas na naenot, na an sabi: “An dai minalaog sa toril nin mga karnero paagi sa tata kundi minasakat sa ibang lugar, an sarong iyan parahabon asin tulisan. Alagad an minalaog sa tata iyo an pastor kan mga karnero. An sarong ini binubukasan kan bantay sa tata, asin an mga karnero naghihinanyog sa saiyang tingog, asin inaapod nia an saiyang mga karnero sa ngaran asin ginigiyahan sinda paluwas. Kun napaluwas na nia an gabos niang rogaring, sia minaenot sa sainda, asin an mga karnero nagsusunod sa saiya, huli ta midbid ninda an saiyang tingog. Sa estranghero dai nanggad sinda masunod kundi madulag sa saiya, huli ta dai ninda midbid an tingog nin mga estranghero.”—Juan 10:1-5, 8.
8. (a) Sa anong bagong “toril” giniyahan ni Jesus an mga Judio na nagsunod sa saiya? (b) Pira an ilinaog nia sa toril na ini?
8 An mga nasa Judiong toril na nagkuyog sa paggiya kan tipan nin Pagboot inako si Jesus bilang an Mesiyas kan sia ipamidbid ni Juan Bautista bilang an “bantay sa tata.” Sinda an napatunayan na “mga karnero” ni Jesus, asin giniyahan nia sinda pasiring sa bagong piguratibong toril, na rogaring ni Jehova. An toril na ini nagrerepresentar sa pinapaboran na relasyon ki Jehova basado sa bagong tipan, na ginibo sa espirituwal na Israel asin ginibong balido kan sadiring dugo ni Jesus. Paagi sa tipan na ini nagin posible para sa sainda na magkamit nin langitnon na buhay kaiba ni Cristo bilang an “banhi” ni Abraham na paagi sa sainda maabot an mga bendisyon sa mga tawo hale sa gabos na nasyon. (Hebreo 8:6; 9:24; 10:19-22; Genesis 22:18) Si Jesu-Cristo, na binuhay liwat nin Dios hale sa mga gadan asin ibinalik sa langitnon na buhay, iyo an “tata” kan toril na ini nin bagong tipan. Kaoyon sa katuyohan kan saiyang Ama, ilinaog nia sa toril na ini an limitado sanang kabilangan—144,000 sana—primero hale sa mga Judio, dangan hale sa mga Samaritano asin Hentil. Bilang an Marahay na Pastor, midbid ni Jesus an ngaran kan kada saro sa saiyang mga karnero asin tinatawan sinda nin mamomoton na personal na pangataman asin atension.—Juan 10:7, 9; Kapahayagan 14:1-3.
9. Sairisay an “ibang karnero” na sinasabi ni Jesus, asin noarin sinda tinipon?
9 Minsan siring, dai linilimitaran ni Jesus an saiyang pagpapastor sa “sadangoton na aripompon” na ini na magkakamit kan langitnon na Kahadean. (Lucas 12:32) Sia nagsabi man: “Igwa pa ako nin ibang karnero, na bakong sa toril na ini; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.” (Juan 10:16) Sairisay an mga ini? Sinda mga tawo na mayo sa bagong tipan; sinda bakong espirituwal na mga Israelitas. Sinda mga tawo na tinipon sa laog kan probisyon ni Jehova para sa buhay na daing sagkod sa daga basado sa saindang pagtubod sa sakripisyal na halaga kan dugo ni Jesus. An dakol sa sainda dayupot nang nakiaasosyar sa mga miembro kan espirituwal na Israel ngonyan mantang an mga ini nasa daga pa, asin kaiba ninda, si Cristo an linalaoman ninda bilang Marahay na Pastor. An mga kabilang sa “ibang karnero” na buhay pa sa daga asin nagpapamidbid na siring minakompuwesto sa “dakulang kadaklan” na nasa Kapahayagan 7:9, 10, 14, na may paglaom na makaligtas sa nagdadangadang na dakulang kahorasaan.
10. Tanganing makabilang sa “ibang karnero,” ano an kaipuhan?
10 Tanganing makatama sa pagkaladawan kan Biblia sa mga “ibang karnero” na iingatan asin ililigtas kan Marahay na Pastor, an saro kaipuhan na ‘maghinanyog’ sa Saiyang tingog asin magtao nin patotoo na sia tunay na kabtang kan “sarong aripompon” na dian kaiba an tunay na mga paramana kan langitnon na Kahadean. Ginigibo daw nindo iyan? Gurano kamo kaingat na naghihinanyog sa saiyang tingog?
11. Ano an magigin ebidensia na kita talagang ‘naghihinanyog’ sa isinabi ni Jesus sa Juan 15:12?
11 Siertong aram nindo na si Jesus nagsabi: “Ini an sakong togon, na kamo magkaminorootmootan siring kan pagkamoot ko sa saindo.” (Juan 15:12) Paano nakaaapektar sa saindong buhay an togon na iyan? An pagkamoot daw na ipinaheheling nindo kapareho kan ipinaheling ni Jesus bilang halimbawa? Iyan daw talagang mapagsakripisyo? An saindo daw na mga gawe asin saboot nagtatao nin ebidensia sa siring na pagkamoot para sa gabos sa Kristianong kongregasyon asin sa mga miembro kan saindong pamilya?
12. (a) Kun kita talagang ‘tinokdoan paagi ki Jesus,’ guranong pagkaliwat an ibubunga kaiyan sa sato? (b) Kun siring, ano an maninigong gibohon niato sa mga bagay na nanonodan niato hale sa Biblia?
12 Si apostol Pablo nagsabi na kun talagang ‘nadadangog’ niato si Jesus asin kita “tinokdoan paagi sa saiya,” maliliwat an bilog niatong pagkatawo. Hahaleon niato an pagkatawo na oyon sa satong dating pamumuhay asin isosolog niato an “bagong pagkatawo,” na nagpapaheling kan marahay na mga kuwalidad ni Jehova. (Efeso 4:17-24; Colosas 3:8-14) Mantang pinag-aadalan nindo an Biblia, odok daw nindong inisip-isip an mga lugar na dian kamo personal na nagkakaipong magliwat tanganing makapaogma sa Dios? Maimbod daw nindong ginigibo an mga pagliliwat na iyan? Tinatandaan daw nindo an mahalagang gibohon na ipinagboot ni Jesus para sa satong aldaw—an paghuhulit kan maogmang bareta kan napatindog nang Kahadean nin Dios—asin naghahanap daw kamo nin paagi na makikabtang dian? An pag-apresyar daw sa dai na kutana maninigong kabootan nin Dios sa saindo nakapupukaw saindo nin odok sa pusong pagmawot na gibohon iyan?—Mateo 24:14.
13. (a) Kun dai kita mag-iingat, paano kita puwedeng ilagalag kan satong puso? (b) Kun siring, sagkod saen kita kaipuhan na sumunod sa mga gira ni Cristo?
13 Kaipuhan kitang mag-ingat na dai kita ilagalag kan satong puso. Minilyon an naghihingakong nagtutubod ki Jesu-Cristo, asin seguro masasabi ninda an nagkapira sa mga itinokdo nia, pero iinaaplikar sana ninda an kombenyente sa sainda. An iba tibaad lumikay na gumibo nin gawe na ibinibilang nindang maraoton. An paglaom na mabuhay sa Paraisong daga sakop kan Kahadean nin Dios tibaad marahay sa saindang pagdangog, asin tibaad naoogma sindang makiasosyar ngonyan sa mga odok na naghihingoang iaplikar an Kristianong mga prinsipyo sa saindang buhay. Alagad kun boot niatong makabilang sa mga makaliligtas pasiring sa “bagong daga,” kaipuhan na kita atentong maghinanyog sa gabos na sinasabi ni Jesus. Mahalagang masabotan na dai niato magigiyahan an sadiri niatong lakad. Kaipuhan kitang maghinanyog sa Aki nin Dios, an saro na isinugo ni Jehova na magin Paraligtas kan Saiyang banwaan, asin maingat na lumakaw sa saiyang mga lakad.—Jeremias 10:23; Mateo 7:21-27; 1 Pedro 2:21.